Mark 1

Ilonggo (Ang Biblia (1982))

Jump to: Chapter 2 →

1Ang ginsuguran sang maayong balita nahanungud kay Jesu-Cristo, ang Anak sang Dios.

2Subong sang nasulat ni Isaias nga manalagna, “Yari karon, ginapadala ko ang akon manugbalita sa una nimo, nga magaaman sang imo dalanon;

3ang tingug sang isa nga nagasinggit sa kamingawan: Ihanda ninyo ang dalanon sang Ginoo, tadlonga ang iya mga banas— ”

4Nagpakita si Juan nga Manugbautiso sa kamingawan, nga nagawali sang bautismo sang paghinulsul nga sa kapatawaran sang mga sala.

5Kag nagduguk sa iya ang bug-os nga duta sang Judea, kag ang tanan nga taga-Jerusalem; kag ginbautisohan niya sila sa suba sang Jordan, nga nagatu-ad sang ila mga sala.

6Karon si Juan napanaptan sing bulbul sang camelyo, kag may wagkus nga panit sa iya hawak, kag nagkaon sing mga apan kag dugus nga talonon.

7Kag nagwali sia, nga nagasiling, “May magasonod sa akon nga gamhanan pa sa akon, nga indi ako takus sa pagduko kag paghubad sang higot sang iya sandalias.

8Ako nagabautiso sa inyo sa tubig; apang sia magabautiso sa inyo sa Espiritu Santo.”

9Sa sadtong mga adlaw si Jesus nag-abut gikan sa Nazaret sang Galilea kag ginbautisohan ni Juan sa Jordan.

10Kag sang nakatakas sia sa tubig, sa gilayon nakita niya nga nagpihak ang mga langit kag ang Espiritu subong sang salampati nga nagakunsad sa ibabaw niya;

11kag naggikan ang isa ka tingug sa langit, “Ikaw hinigugma kong Anak; sa imo nahamuut ako.”

12Sa gilayon gindaldal sia sang Espiritu pa kamingawan.

13Kag didto sia sa kamingawan sing kap-atan ka adlaw, nga ginsulay ni Satanas; kag sia upud sang mga sapat nga talonon; kag ang mga manugtunda nag-alagad sa iya.

14Karon sang nabilanggo na si Juan, nag-abut si Jesus sa Galilea, nga nagawali sang maayong balita sang Dios,

15kag nagasiling, “Ang tion natuman na, kag ang ginharian sang Dios malapit na; hinulsul kamo, kag magtoo sa maayong balita.”

16Kag sang nagaagi sia sa ubay sang Dagat sang Galilea, nakita niya si Simon kag si Andres nga utud ni Simon nga nagaladlad sing pukot sa dagat; kay mga mangingisda sila.

17Kag si Jesus nagsiling sa ila, “Sonod kamo sa akon kag himoon ko kamo nga mga mangingisda sang mga tawo.”

18Kag sa gilayon nagbiya sila sang ila mga pukot kag nagsonod sa iya.

19Kag sang nagapadayon sa uluunhan, nakita niya si Santiago nga anak ni Zebedeo kag si Juan nga iya utud, nga didto man sa ila sakayan nga nagapuna sang mga pukot.

20Kag sa gilayon gintawag niya sila; kag ginbayaan nila ang ila amay nga si Zebedeo sa sakayan kaupud sang mga sologoon nga sinoholan, kag nagsonod sa iya.

21Kag nagsulud sila sa Capernaum; kag sa gilayon sa adlaw nga inugpahuway nagsulud sia sa sinagoga kag nagpanudlo.

22Kag natingala sila sang iya pagtolon-an, kay nagpanudlo sia sa ila subong nga may pagbulut-an, kag indi subong sang mga escriba.

23Kag sa gilayon may tawo sa ila sinagoga nga may espiritu nga dimatinlo;

24kag nagsinggit sia, “Ano bala ang labut mo sa amon, Jesus nga Nazaretnon? Nagkari ka bala sa paglaglag sa amon? Nakahibalo ako kon sin-o ikaw, ang Balaan sang Dios.”

25Apang si Jesus nagsabdong sa iya, nga nagasiling, “Hipus ka, kag gowa sa iya!”

26Kag ang espiritu nga dimatinlo nga nagapakurug sa iya kag nagasinggit sa dakung tingug, naggowa sa iya.

27Kag sila tanan nahiorongan, sa bagay nga nagpamangkotanay sila, “Ano bala ini? Isa ka bag-ong pagtolon-an! Sa may pagbulut-an nagasogo sia bisan sa mga espiritu nga dimatinlo, kag nagatuman sila sa iya.”

28Kag ang kabantugan niya naglapnag sa gilayon sa bug-os nga ginsakpan sang Galilea.

29Kag sa gilayon sang nakagowa sia sa sinagoga, nagsulud sia sa balay ni Simon kag ni Andres, kaupud kay Santiago kag kay Juan.

30Karon ang babayi nga ugangan ni Simon nagahigda nga may hilanat, kag sa gilayon ginsugiran nila si Jesus nahanungud sa iya.

31Kag nagpalapit si Jesus kag ginkaptan ang babayi sa kamut kag ginbangon, kag nagbiya ang hilanat sa iya; kag nag-alagad sia sa ila.

32Sa kahaponanon, sang pagtunud sang adlaw, gindala nila sa iya ang tanan nga masakiton ukon ang may mga yawa.

33Kag ang bug-os nga banwa nagtipon sa ganhaan.

34Kag gin-ayo niya ang madamung masakiton sa sarisaring balatian, kag ginsobol niya ang madamung yawa; kag wala niya pagtuguti ang mga yawa sa paghambal, bangud nga nakakilala sila sa iya.

35Kag sa kaagahon, sang madugay pa magbutlak ang adlaw, nagbangon sia kag naggowa pakadto sa duug nga mamingaw, kag nagpangamuyo didto.

36Kag si Simon kag ang mga kaupud niya nagsonod sa iya,

37kag nakita nila sia kag nagsiling sa iya, “Nagapangita ang tanan sa imo.”

38Kag nagsiling sia sa ila, “Makadto kita sa kasilingan nga mga banwa, agud makawali man ako didto; kay bangud sini nagkari ako.”

39Kag nagkadto sia sa bug-os nga Galilea, nga nagawali sa ila mga sinagoga kag nagasobol sang mga yawa.

40Kag nagpalapit sa iya ang isa ka aroon nga nagapakilooy sa iya, kag nagaluhud nga nagasiling, “Kon buut mo, mapaayo mo ako.”

41Bangud sa kalooy, gin-untay niya ang iya kamut kag gintandug sia, kag nagsiling sa iya, “Buut ako; mag-ayo ka.”

42Kag sa gilayon ang aro naghalin sa iya, kag nag-ayo sia.

43Kag nagtugon sia sing matigdas sa iya, kag sa gilayon ginpalakat sia,

44kag nagsiling sa iya, “Andam nga indi ka magsiling sing ano man bisan kay sin-ong tawo; apang lakat, ipakita ang imo kaugalingon sa sacerdote, kag maghalad tungud sa imo pag-ayo sang ginsogo ni Moises, nga pagpamatuud sa mga tawo.”

45Apang sia naglakat kag nagsugud sa pagsugid sini sing lakas, kag pagpalapnag sang nahimo, sa bagay nga indi na si Jesus makasulud sing dayag sa banwa, kondi sa gowa sia sa mga duug nga baw-ing; kag nag-abut ang katawohan sa iya gikan sa tanan nga kahigaran.

Jump to: Chapter 2 →