Mark 7

Ilonggo (Ang Biblia (1982))

← Chapter 6 Jump to: Chapter 8 →

1Karon sang nagtipon sa iya ang mga Fariseo, kag pila sang mga escriba, nga nakaabut gikan sa Jerusalem,

2nakakita sila nga ang iban sang iya mga gintoton-an nagkaon nga nadagtaan, nga wala makapanghinaw sang mga kamut.

3(Kay ang mga Fariseo, kag ang tanan nga Judio, indi magkaon kon indi nila mahinawan sing maayo ang ila mga kamut, sa pagbantay sang pinalatonlaton nga sugid sang mga tigulang;

4kag kon mag-abut sila gikan sa balaligyaan, indi sila magkaon kon indi sila makapaligos; kag may madamu pa nga iban nga butang nga nabaton nila nga bantayan, ang paghugas sang mga tagayan kag sang mga tibud kag sang mga suludlan nga saway [kag sang mga higdaan].)

5Kag ang mga Fariseo kag ang mga escriba nagpamangkot sa iya, “Ngaa bala wala nagagawi ang imo mga gintoton-an sono sa pinalatonlaton nga sugid sang mga tigulang, kondi nagakaon sa nadagtaan nga mga kamut?”

6Kag nagsabat sia sa ila, “Igo gid nga gintagna ni Isaias nahanungud sa inyo nga mga salimpapaw, subong sang nasulat na, ‘Ining katawohan nagatahud sa akon sa ila mga bibig, apang ang tagiposoon nila malayo sa akon;

7walay pulus ang pagsimba nila sa akon, nga nagatudlo subong nga mga pagtolon-an sang mga sogo sang mga tawo.’

8Ginabayaan ninyo ang sogo sang Dios, kag ginabantayan ang mga pinalatonlaton nga sugid sang mga tawo.”

9Kag nagsiling sia sa ila, “Ginasikway ninyo sing bug-os gid ang sogo sang Dios, agud nga mabantayan ninyo ang inyo pinalatonlaton nga sugid!

10Kay si Moises nagsiling, ‘Tahora ang imo amay kag ang imo iloy’; kag, ‘Ang nagahambal sing malaut sa amay ukon sa iloy, patyon sia nga gayud’;

11apang kamo nagasiling, ‘Kon ang tawo magsiling sa iya amay ukon sa iya iloy, Ang ikabulig ko sa inyo Corban’ (nga kon sayoron, nahatag sa Dios)—

12niyan wala na ninyo ginatuguti sia sa paghimo sing bisan ano sa iya amay ukon sa iya iloy,

13nga nagapakawalay pulus sang polong sang Dios tungud sang inyo pinalatonlaton nga sugid nga nahatag ninyo. Kag madamu nga subong nga butang ang ginahimo ninyo.”

14Kag gintawag niya sa iya liwat ang katawohan, kag nagsiling sa ila, “Pamati kamo tanan sa akon, kag hangpa ninyo:

15walay bisan ano sa luwas sang tawo nga nagasulud sa iya nga makadagta sa iya; apang ang mga butang nga nagagowa sa tawo amo ang nagadagta sa tawo.

16[Ang may idulungug sa pagpamati magpamati sia.]”

17Kag sang nakasulud sia sa balay gikan sa katawohan, nagpamangkot sa iya ang iya mga gintoton-an nahanungud sang paanggid.

18Kag nagsabat sia sa ila, “Gani wala man bala kamo sing paghangup? Wala bala kamo makahangup nga bisan ano nga gikan sa gowa nga nagasulud sa tawo indi makadagta sa iya,

19bangud nga wala nagasulud ina sa iya tagiposoon kondi sa iya tiyan, kag ginapagowa?” (Ini ginsiling niya sa pagpatinlo sang tanan nga pagkaon.)

20Kag nagsiling sia, “Ang nagagowa sa tawo ina nagadagta sa tawo.

21Kay gikan sa sulud, gikan sa tagiposoon sang tawo, nagagowa ang malaut nga mga hunahuna, pakighilawas, pangawat, pagpatay, panglahi,

22kaibog, kalautan, kaulag, limbong, kahisa, pasipala, palabilabi, kabuangan.

23Tanan ining malaut nga butang nagagikan sa sulud, kag nagadagta sang tawo.”

24Kag gikan didto nagtindug sia kag nagkadto sa mga ginsakpan sang Tiro kag Sidon. Kag nagsulud sia sa isa ka balay, kag buut niya nga walay tawo nga makahibalo sini; apang indi sia matago.

25Apang sa gilayon isa ka babayi, nga ang iya anak nga babayi nga diotay may espiritu nga dimatinlo, sang nakabati nahanungud kay Jesus, nag-abut kag naghapa sa iya tiilan.

26Karon ang babayi Griega, tumanduk sa Sirofenicia. Kag nagpakilooy sia kay Jesus nga sobolon ang yawa gikan sa iya anak.

27Kag nagsiling sia sa iya, “Busgon sing una ang mga anak, kay indi nagakaigo nga kuhaon ang tinapay sang mga anak kag ipilak sa mga ido.”

28Apang nagsabat sia sa iya, “Hoo, Ginoo; bisan pa ang mga ido sa idalum sang latok nagakaon sang mga usik sang kabataan.”

29Kag nagsiling sia sa iya, “Bangud sining polong lakat ka; ang yawa naggowa na sa imo anak.”

30Kag nagpauli sia sa iya balay, kag nakita niya ang iya anak nga nahamtang sa higdaan, kag ang yawa nakagowa na.

31Niyan nagbalik sia gikan sa ginsakpan sang Tiro, kag nag-abut sia sa Dagat sang Galilea, nga naglatas sa Sidon, kag naglatas sa tunga sang ginsakpan sang Decapolis.

32Kag nagdala sila sa iya sing bungul kag apa; kag nagpakilooy sila kay Jesus nga pandungan niya sia sang iya kamut.

33Kag ginkuha niya sia sing pahain sa kadam-an, kag gingulu ang iya mga tudlo sa iya mga dulunggan, kag nagdupla sia kag gintandug ang iya dila;

34kag sang nagahangad sa langit, nanghakruy sia, kag nagsiling sa iya, “Ephphatha,” kon sayoron, “Magbukas ka.”

35Kag nag-anting ang iya mga idulungug, ang gawid sang iya dila nagtugak, kag nakahambal sia sing maathag.

36Kag nagtugon sia sa ila nga indi sila magpanugid bisan kay sin-ong tawo; apang sa labi nga pagtugon niya sa ila, nagadugang tapat ang pagbantala nila sini.

37Kag natingala sila sing tama gid, nga nagasiling, “Nahimo niya sing maayo ang tanan nga butang; ginahimo niya nga makabati ang bungul kag makahambal ang apa.”

← Chapter 6 Jump to: Chapter 8 →