Mark 6 — Ilonggo (Ang Biblia (1982))

1Naggowa sia gikan didto kag nag-abut sia sa iya kaugalingon nga duta; kag nagsonod sa iya ang iya mga gintoton-an.

2Kag sa adlaw nga inugpahuway nagsugud sia sa pagpanudlo sa sinagoga; kag ang madamu nga nagpamati sa iya natingala, nga nagasiling, “Diin bala ining tawo magkuha sini tanan? Ano bala ang kaalam nga ginhatag sa iya? Daw ano nga mga buhat nga gamhanan ang nahimo sang iya mga kamut!

3Indi bala ini ang panday, ang anak ni Maria kag utud ni Santiago kag ni Jose kag ni Judas kag ni Simon, kag wala bala diri kaupud naton ang iya mga utud nga babayi?” Kag nasaklaw sila sa iya.

4Kag si Jesus nagsiling sa ila, “Ang manalagna may kadungganan, luwas sa iya kaugalingon nga duta, kag sa tunga sang iya kaugalingon nga himata, kag sa iya kaugalingon nga panimalay.”

5Kag indi sia makahimo didto sing buhat nga gamhanan, luwas nga napandung niya ang iya mga kamut sa pila ka masakiton kag nag-ayo sa ila.

6Kag natingala sia bangud sang ila pagkadimatinoohon. Kag naglibut sia sa mga minoro nga nagapanudlo.

7Kag gintawag niya sa iya ang napulog duha, kag nagsugud sa pagpadala sa ila sing tagduhaduha, kag ginhatagan niya sila sing pagbulut-an batok sa mga espiritung dimatinlo.

8Nagtugon sia sa ila nga indi sila magdala sing bisan ano sa ila panlakatan luwas sang sungkud lamang; walay tinapay, walay puyo, walay cuarta sa ila mga wagkus;

9kondi magsuksuk sing sandalias kag indi magsul-ub sing duha ka bayo.

10Kag nagsiling sia sa ila, “Bisan diin nagasulud kamo sa isa ka balay, dayon kamo didto tubtub nga maghalin kamo sadtong duug.

11Kag bisan anong duug nga indi magbaton sa inyo kag indi sila magpamati sa inyo, sa inyo paggowa didto, itaktak ninyo ang yab-ok nga yara sa inyo mga tiil nga pagpamatuud batok sa ila.”

12Gani naggowa sila kag nagwali nga maghinulsul ang mga tawo.

13Kag ginsobol nila ang madamung yawa, kag ginhaplas sing lana ang madamung masakiton kag gin-ayo sila.

14Si Hari Herodes nakabati sini; kay nabantugan ang ngalan ni Jesus. Ang iban nagsiling, “Si Juan nga Manugbautiso nabanhaw sa mga minatay; gani ining mga gahum nagapanghikot sa iya.”

15Apang ang iban nagsiling, “Si Elias ini.” Kag ang iban nagsiling, “Manalagna ini, kaangay sang isa sang dumaan nga mga manalagna. ”

16Apang si Herodes, sang pagkabati niya sini, nagsiling, “Si Juan, nga akon ginpugutan, nabanhaw sia.”

17Kay si Herodes gid nagpadala kag nagpadakup kay Juan, kag ginpagapus sia sa bilanggoan bangud kay Herodias, ang asawa ni Felipe nga iya utud; kay ginpangasawa niya sia.

18Kay si Juan nagsiling kay Herodes, “Indi tugut sa imo ang paghuput sang asawa sang imo utud.”

19Kag si Herodias nagdumut sa iya, kag naghumut sa pagpatay sa iya. Apang indi sia makasarang,

20kay si Herodes hinadlukan kay Juan, nga nakahibalo nga sia matarung kag balaan nga tawo, kag ginpabantayan sia niya. Sang ginpamatian niya sia, naglibog sia sing tama; kag bisan pa ginpamatian niya sia sing malipayon.

21Apang nag-abut ang kahigayonan nga si Herodes sa adlaw sang iya pagkatawo naghiwat sing sinalosalo sa kadalagkuan niya kag sa mga tribuno kag sa pangulo nga mga tawo sa Galilea.

22Kay sang nagsulud kag nagsaut ang anak nga babayi ni Herodias, nagpahamuut sia kay Herodes kag sa mga inagda niya; kag nagsiling ang hari sa dalaga, “Pangayo ka sa akon sang bisan ano nga imo naluyagan, kag ihatag ko ini.”

23Kag nagsumpa sia sa iya, “Bisan ano ang imo pangayoon sa akon, ihatag ko sa imo, tubtub sa katunga sang akon ginharian.”

24Kag naggowa sia, kag nagpamangkot sa iya iloy, “Ano bala ang akon pangayoon?” Kag nagsabat sia, “Ang olo ni Juan nga Manugbautiso.”

25Kag sa gilayon nagsulud sia sing dalidali sa hari, kag nangayo, nga nagasiling, “Luyag ko nga imo ihatag sa akon sa gilayon sa bandiha ang olo ni Juan Bautista.”

26Kag ang hari nagkasubu sing lakas; apang bangud sang iya mga sumpa kag sang iya mga inagda indi sia makabalibad sa iya.

27Kag sa gilayon nagpadala ang hari sing soldado sang bantay niya kag nagsogo nga dalhon ang olo ni Juan. Naglakat sia kag ginpugutan si Juan sa bilanggoan,

28kag gindala ang iya olo sa bandiha, kag ginhatag ini sa dalaga; kag ang dalaga naghatag sini sa iya iloy.

29Sang nabatian ini sang iya mga gintoton-an, nag-abut sila kag nagkuha sang iya bangkay, kag ginlubung ini.

30Nagbalik kay Jesus ang mga pinadala, kag nagsugid sa iya sang tanan nga ila nahimo kag napanudlo.

31Kag nagsiling sia sa ila, “Kari kamo sing pahain sa duug nga baw-ing, kag magpahuway sing diotay.” Kay madamu ang nagapakari kag nagapakadto, kag wala sila sing tion bisan sa pagkaon.

32Kag naghalin sila nga nagasakay sa sakayan pakadto sa duug nga baw-ing.

33Karon ang katawohan nakakita sa ila nga nagapakadto, kag madamu ang nakakilala sa ila, kag nagdalagan sila didto sing tingub gikan sa tanan nga banwa, kag nag-una sa ila.

34Sang nagtakas sia nakita niya ang daku nga kadam-an, kag nalooy sia sa ila, kay subong sila sang mga carnero nga walay manugpahalab; kag nagsugud sia sa pagpanudlo sa ila sing madamu nga butang.

35Kag sang hapon na gid, ang iya mga gintoton-an nagpalapit sa iya kag nagsiling, “Ang duug baw-ing, kag hapon na gid;

36papaulia sila, agud nga magkadto sila sa mga kaumhan kag sa mga minoro sa palibut kag magbakal sing kaonon nila.”

37Apang nagsabat sia sa ila, “Hatagi ninyo sila sing kaonon.” Kag nagsabat sila sa iya, “Magakadto kami bala sa pagbakal sing duha ka gatus ka denario nga tinapay, kag hatagan namon sila sing kaonon?”

38Kag nagsiling sia sa ila, “Pila bala ka bilog ang tinapay ninyo? Kadto kamo kag tan-awa ninyo.” Kag sang nahibaloan nila, nagsabat sila, “Lima, kag duha ka isda.”

39Niyan si Jesus nagsogo sa ila nga maglingkod sila tanan sing hinot-ong sa hilaw nga hilamon.

40Gani naglingkod sila sing pasonod, sa ginatus kag sa kinalim-an.

41Kag ginkuha niya ang lima ka tinapay kag duha ka isda kag sang nagahangad sa langit, ginpakamaayo niya, kag gintipiktipik ang mga tinapay, kag ginhatag niya sa mga gintoton-an nga ibutang sa atubangan sang katawohan; kag ginbahinbahin niya ang duha ka isda sa ila tanan.

42Kag nagkaon sila tanan kag nabusug.

43Kag gintipon nila ang napulog duha ka alat nga puno sang mga tinipik kag sang mga isda.

44Kag ang mga nagkaon sang mga tinapay lima ka libo ka lalaki.

45Sa gilayon ginpilit niya ang iya mga gintoton-an sa pagsakay sa sakayan kag sa pag-una sa iya sa tabok, pa Betsaida, sang ginapapauli pa niya ang kadam-an.

46Kag sang nakataliwan sia sa ila, nagkadto sia sa mga bakolod sa pagpangamuyo.

47Kag sang kahaponanon na, ang sakayan yadto sa tunga sang dagat, kag isa lamang sia sa takas.

48Kag nakita niya sila nga ginbudlay sa paggaud, kay ang hangin sumpung sa ila. Sa may ikap-at nga bahin sang pulaw nagkadto sia sa ila, nga nagalakat sa dagat. Buut sia kuntani magligad sa ila,

49apang sang nakita nila sia nga nagalakat sa dagat naghunahuna sila nga bagat ini, kag nagsinggit;

50kay sila tanan nakakita sa iya, kag nalisang. Apang sa gilayon nagpakighambal sia kag nagsiling sa ila, “Pakalig-on kamo, ako ini; dili kamo mahadluk.”

51Kag nagpalapit sia sa ila kag nagsakay sa sakayan kag nagtonong ang hangin. Kag naorongan sila sing daku,

52kay wala sila makahangup nahanungud sang mga tinapay, kondi nagtig-a ang ila mga tagiposoon.

53Kag sang nakatabok sila, nag-abut sila sa dutang Genezaret, kag nagdungka sa baybayon.

54Kag sang nakatakas sila halin sa sakayan, sa gilayon nakilala sia sang katawohan,

55kag nagdalagan sa palibut sadtong bug-os nga ginsakpan kag nagsugud sa pagdala sa mga higdaan nila sang mga masakiton bisan diin mabatian nila nga yadto sia.

56Kag bisan diin nagsulud sia, sa mga minoro, sa mga banwa, ukon sa mga kaumhan, ginbutang nila ang mga masakiton sa mga balaligyaan, kag nagpakilooy sa iya nga patandugon sila bisan sa sidsid lamang sang iya panapton; kag ang tanan nga nagtandug sa iya nag-ayo.