Mark 2

Ilonggo (Ang Biblia (1982))

← Chapter 1 Jump to: Chapter 3 →

1Kag sang nagsulud si Jesus liwat sa Capernaum sa tapus ang pila ka adlaw, ginsugid nga yadto sia sa balay.

2Kag madamu ang nagtilipon, sa bagay nga wala na sing duug sa ila, wala bisan pa malapit sa ganhaan; kag ginwali niya ang polong sa ila.

3Kag nag-abut sila, nga nagadala sa iya sang tawo nga paralitiko, nga ginyayongan sang apat.

4Kag sang indi sila makapalapit sa iya bangud sang kadam-an, ginguhaban nila ang atop nayon sa iya; kag sang naguhaban na, gintonton nila ang higdaan nga ginahamyangan sang paralitiko.

5Kag sang nakita ni Jesus ang ila pagtoo, nagsiling sia sa paralitiko, “Anak ko, ginapatawad ang imo mga sala.”

6Apang may pila ka mga escriba nga nagalingkod didto, kag nagapainoino sa ila mga tagiposoon,

7“Ngaa bala nagapamolong ining tawo sing subong? Nagapasipala sia! Sin-o bala ang makapatawad sang mga sala kondi ang Dios lamang?”

8Kag sa gilayon si Jesus, nga nagahantup sa iya espiritu nga nagapainoino sila sing subong sa ila kaugalingon, nagsiling sa ila, “Ngaa bala nagapainoino kamo sang amo sa inyo mga tagiposoon?

9Ano bala ang mahapus pa, ang pagsiling sa paralitiko, ‘Ginapatawad ang imo mga sala,’ ukon ang pagsiling, ‘Tindug ka, dalha ang imo higdaan kag maglakat’?

10Apang agud nga inyo mahibaloan nga ang Anak sang tawo may pagbulut-an sa duta sa pagpatawad sang mga sala”—nagsiling sia sa paralitiko—

11“nagasiling ako sa imo, tindug ka, dalha ang imo higdaan kag magpauli sa imo balay.”

12Kag nagtindug sia, kag sa gilayon nagdala sang higdaan kag naghalin sa atubangan sang tanan; sa bagay nga sila tanan naorongan kag naghimaya sa Dios, nga nagasiling, “Wala pa gid kita makakita sang kaangay sini!”

13Si Jesus naglakat liwat sa ubay sang dagat; kag ang bug-os nga kadam-an nagkadto sa iya, kag gintudloan niya sila.

14Kag sang naglabay sia, nakita niya si Levi nga anak ni Alfeo nga nagalingkod sa buluhisan, kag nagsiling sia sa iya, “Sonod ka sa akon.” Kag nagtindug sia kag nagsonod sa iya.

15Kag sang nagalingkod sia sa pagkaon sa balay ni Levi, madamung manugsukot sang buhis kag makasasala ang naglingkod kaupud ni Jesus kag sang iya mga gintoton-an; kay madamu sila nga nagsonod sa iya.

16Kag ang mga escriba sang mga Fariseo, sang nakita nila nga nagakaon si Jesus kaupud sang mga makasasala kag mga manugsukot sang buhis, nagsiling sa iya mga gintoton-an, “Ngaa bala nga nagakaon [kag nagainum] sia kaupud sang mga manugsukot sang buhis kag sang mga makasasala?”

17Kag sang nabatian ini ni Jesus, nagsiling sia sa ila, “Ang mga maayo walay kinahanglan sang manugbulong, kondi ang mga masakiton; wala ako magkari sa pagtawag sang mga matarung, kondi sang mga makasasala.”

18Karon nagpuasa ang mga gintoton-an ni Juan kag ang mga Fariseo; kag nagpalapit ang katawohan kag nagpamangkot sa iya, “Ngaa bala nagapuasa ang mga gintoton-an ni Juan kag ang mga gintoton-an sang mga Fariseo, apang ang imo mga gintoton-an wala nagapuasa?”

19Kag si Jesus nagsabat sa ila, “Sarang bala makapuasa ang mga inagda sa kasal samtang yara pa ang nobyo kaupud nila? Sa yara pa ang nobyo kaupud nila, indi sila makapuasa.

20Apang magaabut ang mga adlaw, nga kuhaon sa ila ang nobyo, kag niyan magapuasa sila sa sadtong adlaw.

21Walay tawo nga nagatahi sing tukap nga bag-o sa panapton nga daan na; kay kon buhaton niya ini, ang tukap nga bag-o nagabingkas sa daan, kag nagadandan tapat ang gisi.

22Kag walay tawo nga nagasulud sing alak nga bag-o sa mga panit nga daan; kay kon buhaton niya ini, ang bag-ong alak magabusdik sang mga panit, kag ang alak mauyang, kag ang mga panit malaglag; apang ginasulud nila ang alak nga bag-o sa mga panit nga bag-o.”

23Sa adlaw nga inugpahuway nag-agi sia sa mga uma sang uyas; kag ang iya mga gintoton-an sang naglakat sila nagsugud sa pagpangutul sing mga uhay.

24Kag nagsiling ang mga Fariseo sa iya, “Tan-awa, ngaa bala nagahimo sila sang indi tugut sa adlaw nga inugpahuway?”

25Kag nagsiling sia sa ila, “Wala gid bala ninyo mabasahi ang ginhimo ni David, sang sia may kinahanglan kag gingutum, sia kag ang mga kaupud niya:

26kon paano nga nagsulud sia sa balay sang Dios, sang si Abiatar ang pinakamataas nga sacerdote, kag nagkaon sang mga tinapay nga pahayag sa Dios, nga indi tugut nga kaonon kondi sa mga sacerdote, kag naghatag man sini sa mga kaupud niya?”

27Kag nagsiling sia sa ila, “Ang adlaw nga inugpahuway ginhimo tungud sa tawo, kag indi nga ang tawo tungud sa adlaw nga inugpahuway;

28gani ang Anak sang tawo ginoo bisan sang adlaw nga inugpahuway.”

← Chapter 1 Jump to: Chapter 3 →