Mark 8

Ilonggo (Ang Biblia (1982))

← Chapter 7 Jump to: Chapter 9 →

1Sa sadtong mga adlaw, sang nagtipon liwat ang dakung kadam-an, kag wala gid sila sing kaonon, gintawag niya sa iya ang iya mga gintoton-an, kag nagsiling sa ila,

2“Nalooy ako sa kadam-an, kay tatlo na ka adlaw nga nagpadayon sila kaupud nakon, kag wala gid sing kaonon;

3kag kon akon sila papaulion sa ila mga balay nga ginagutum, punawon sila sa dalanon; kag ang iban sa ila naghalin sa malayo.”

4Kag ang iya mga gintoton-an nagsabat sa iya, “Paano bala nga pagkasarang ta sa pagbusug sining mga tawo sing tinapay diri sa desierto?”

5Kag namangkot sia sa ila, “Pila bala ka bilog ang tinapay ninyo?” Nagsabat sila, “Pito.”

6Kag nagsogo sia sa kadam-an nga maglingkod sa duta; kag ginkuha niya ang pito ka tinapay, kag sang nakapasalamat gintipiktipik niya kag ginhatag ini sa iya mga gintoton-an nga ibutang sa atubangan sang katawohan; kag ginbutang nila sa atubangan sang kadam-an.

7Kag may pila sila ka isda nga magamay; kag sang napakamaayo niya ini, nagsogo sia nga ibutang man ini sa atubangan nila.

8Kag nagkaon sila, kag nabusug; kag gintipon nila ang mga tinipik nga nabilin, pito ka alat nga puno.

9Kag mga apat ka libo sila.

10Kag ginpapauli ni Jesus sila; kag sa gilayon nagsakay sia sa sakayan kaupud sang iya mga gintoton-an, kag nag-abut sa ginsakpan sang Dalmanuta.

11Nag-abut ang mga Fariseo kag nagsugud sa pagpakigpuyas sa iya, nga nagapangita sa iya sing tanda gikan sa langit, nga nagatilaw sa iya.

12Kag nanghakruy sia sing turuk gid sa iya espiritu, kag nagsiling, “Ngaa bala nagapangita sing tanda ining kaliwatan? Sa pagkamatuud, nagasiling ako sa inyo, walay tanda nga ihatag sa sining kaliwatan.”

13Kag ginbayaan niya sila, kag sang nagsakay sia liwat sa sakayan nagtaliwan pakadto sa tabok.

14Karon nalimot sila sa pagdala sing tinapay; kag wala sila sing tinapay sa sakayan kondi isa lang.

15Kag nagtugon sia sa ila, nga nagasiling, “Tan-awa ninyo, mag-andam kamo sang tapay sang mga Fariseo kag sang tapay ni Herodes.”

16Kag nagbinaisay sila, nga nagasiling, “Wala kita sing tinapay.”

17Kag si Jesus, sang nagahantup sini, nagsiling sa ila, “Ngaa bala nagabinaisay kamo bangud nga wala kamo sing tinapay? Wala pa bala kamo makahantup ukon makahangup? Nagtig-a bala ang inyo tagiposoon?

18Subong nga may mga mata kamo wala bala kamo makakita, kag subong nga may mga idulungug kamo wala bala kamo makabati? Kag wala bala kamo makadumdum?

19Sang gintipiktipik ko ang lima ka tinapay sa lima ka libo, pila bala ka alat nga puno sang tinipik ang inyo natipon?” Nagsabat sila sa iya, “Napulog duha.”

20“Kag sang pito sa apat ka libo, pila bala ka alat nga puno sang mga tinipik ang inyo natipon?” Kag nagsabat sila sa iya, “Pito.”

21Kag nagsiling sia sa ila, “Wala pa bala kamo makahangup?”

22Kag nag-abut sila sa Betsaida. Kag nagdala ang pila ka mga tawo sa iya sing tawong bulag, kag nagpakilooy sa iya nga tandugon ang bulag.

23Kag ginkaptan niya sa kamut ang tawong bulag, kag gindala sia sa gowa sang minoro; kag sang naduplaan niya ang iya mga mata kag napandungan niya sia sang iya mga kamut, ginpamangkot niya, “May makita ka?”

24Kag nagtangla sia kag nagsiling, “Makita ko ang mga tawo; apang ginatan-aw ko sila subong sang kakahoyan, nga nagalakat.”

25Niyan gintagpuan niya liwat sang iya mga kamut ang mga mata niya; kag nagtolok sia sing tayuyon kag naulian, kag nakakita sang tanan nga butang sing maathag.

26Kag ginpapauli niya sia sa iya puluy-an, nga nagasiling, “Dili ka gid magsulud sa minoro.”

27Kag si Jesus naglakat upud ang iya mga gintoton-an, pakadto sa mga minoro sang Cesarea ni Filipo; kag sa dalanon namangkot sia sa iya mga gintoton-an, “Sin-o bala ako kono sang mga tawo?”

28Kag nagsugid sila sa iya, “Si Juan Bautista; kag ang iban nagasiling, si Elias; apang ang iban isa sang mga manalagna.”

29Kag nagpamangkot sia sa ila, “Apang sin-o bala ako sa inyo?” Si Pedro nagsabat sa iya, “Ikaw amo ang Cristo.”

30Kag nagtugon sia sa ila nga dili sila magsugid bisan kay sin-ong tawo nahanungud sa iya.

31Kag nagsugud sia sa pagpanudlo sa ila nga ang Anak sang tawo dapat mag-antus sing madamu nga butang, kag isikway sang mga tigulang kag sang puno nga mga sacerdote kag sang mga escriba, kag patyon, kag sa tapus ang tatlo ka adlaw mabanhaw.

32Kag naghambal sia sini sing maathag. Kag ginpain sia ni Pedro, kag nagsugud sa pagsabdong sa iya.

33Apang sang nagliso sia kag nakakita sang iya mga gintoton-an, nagsabdong kay Pedro, kag nagsiling, “Palayo ka sa akon, Satanas! Kay wala ka nagapanghunahuna sang mga butang sang Dios, kondi sang mga butang sang mga tawo.”

34Kag gintawag niya sa iya ang kadam-an upud sang iya mga gintoton-an, kag nagsiling sa ila, “Kon sin-o nga tawo buut magsonod sa akon, magdumili sia sang iya kaugalingon kag magpas-an sang iya cruz kag magsonod sa akon.

35Kay ang bisan sin-o nga buut magluwas sang iya kabuhi madulaan sini; kag ang bisan sin-o nga magadula sang iya kabuhi tungud sa akon kag sa maayong balita maluwas niya ini.

36Kay ano bala ang mapulus sang tawo, nga maka-angkon sang bug-os nga kalibutan kag madula ang iya kalag?

37Kay ano bala ang ihatag sang tawo sa baylo sang iya kalag?

38Kay ang bisan sin-o nga magkahuya sa akon kag sang akon mga polong sa sining kaliwatan nga makilahion kag makasasala, ang Anak sang tawo magakahuya man sa iya, kon magkari sia sa himaya sang iya Amay upud sang balaan nga mga manugtunda.”

← Chapter 7 Jump to: Chapter 9 →