Mark 10

Ilonggo (Ang Biblia (1982))

← Chapter 9 Jump to: Chapter 11 →

1Kag nagtaliwan si Jesus gikan didto kag nagkadto sa duug sang Judea kag sa unhan sang Jordan, kag nagtipon liwat ang mga kadam-an sa iya; kag, sono sa iya kinabatasan, ginpanudloan niya sila liwat.

2Kag nagpalapit sa iya ang mga Fariseo kag nagpamangkot sa pagtilaw sa iya, “Tugut bala sa bana ang pagbulag sa iya asawa?”

3Nagsabat sia sa ila, “Ano bala ang ginsogo ni Moises sa inyo?”

4Nagsabat sila, “Si Moises nagtugut sa pagsulat sing kalig-onan sa pagbulagay, kag sa pagsikway sa iya.”

5Apang si Jesus nagsiling sa ila, “Bangud sa katig-a sang inyo tagiposoon nagsulat sia sa inyo sining sogo.

6Apang kutub sa ginsuguran sang pagtuga, ‘Lalaki kag babayi ginhimo sang Dios sila.’

7‘Bangud sini bayaan sang lalaki ang iya amay kag iloy kag maghiusa sa iya asawa,

8kag ang duha mangin-isa ka unud.’ Gani indi na sila duha kondi isa ka unud.

9Busa ang gintingub sang Dios, dili pagbulagon sang tawo.”

10Kag sa balay ang mga gintoton-an nagpamangkot liwat sa iya nahanungud sining bagay.

11Kag nagsabat sia sa ila, “Ang bisan sin-o nga magbulag sa iya asawa kag magpangasawa sing iban, nagapanglahi batok sa iya;

12kag kon sia gid magbulag sa iya bana kag magpamana sing iban, nagapanglahi sia.”

13Kag nagdala sila sa iya sing kabataan nga magamay, agud nga tandugon niya sila; kag ang mga gintoton-an nagsabdong sa ila.

14Apang sang nakita ni Jesus ini nangakig sia, kag nagsiling sa ila, “Tuguti ninyo ang kabataan sa pagkari sa akon, kag dili sila pagdumilian; kay ang ginharian sang Dios ila sang mga kasubong nila.

15Sa pagkamatuud, nagasiling ako sa inyo, ang bisan sin-o nga indi magbaton sang ginharian sang Dios subong sang bata nga diotay indi sia makasulud sini. ”

16Kag ginkugos niya sila kag ginpakamaayo sila, nga nagapandung sang iya mga kamut sa ila.

17Kag sang paggowa niya sa dalan, may isa nga nagdalagan kag nagluhud sa iya, kag nagpamangkot sa iya, “Manunudlo nga maayo, ano bala ang akon himoon agud mapanubli ko ang kabuhi nga walay katapusan?”

18Kag si Jesus nagsiling sa iya, “Ngaa bala nga ginatawag mo ako nga maayo? Wala gid sing maayo kondi ang Dios lamang.

19Nahibaloan mo ang mga sogo: ‘Dili ka magpatay, Dili ka magpanglahi, Dili ka magpangawat, Dili ka magsaksi sing dimatuud, Dili ka maglimolimo, Tahora ang imo amay kag iloy. ’”

20Kag nagsiling sia sa iya, “Manunudlo, tanan ini nabantayan ko kutub sa akon pagkapamatan-on.”

21Kag si Jesus nga nagatolok sa iya naghigugma sa iya, kag nagsiling sa iya, “Isa ka butang ang nakulang sa imo; lakat ka, ibaligya ang pagkabutang mo, kag ihatag sa mga imol, kag may bahandi ka sa langit; kag kari, magsonod sa akon.”

22Apang naholog ang iya nawung sa sining polong, kag nagtaliwan sia nga masinulub-on; kay sia may dakung pagkabutang.

23Kag si Jesus nagtolok sa palibut kag nagsiling sa iya mga gintoton-an, “Daw ano kaiwat sa mga may manggad ang pagsulud sa ginharian sang Dios!”

24Kag ang iya mga gintoton-an naorongan sa iya mga polong. Apang si Jesus nagsiling liwat sa ila, “Mga anak, daw ano kaiwat [sa mga nagasalig sa manggad] ang pagsulud sa ginharian sang Dios!

25Mahapus pa sa camelyo nga maglapus sa boho sang dagum sang sa magsulud ang manggaranon sa ginharian sang Dios.”

26Kag natingala sila sing lakas, kag nagsiling sa iya, “Niyan sin-o bala ang maluwas?”

27Si Jesus nagtolok sa ila kag nagsiling, “Sa mga tawo ini indi mahimo, apang indi sa Dios; kay sa Dios ang tanan nga butang mahimo.”

28Si Pedro nagsugud sa pagsiling sa iya, “Yari karon, ginpamayaan namon ang tanan kag nagsonod kami sa imo.”

29Si Jesus nagsiling, “Sa pagkamatuud, nagasiling ako sa inyo, walay tawo nga nagbiya sang balay ukon mga utud nga lalaki ukon mga utud nga babayi ukon iloy ukon amay ukon mga anak ukon mga duta, bangud sa akon kag sa maayong balita,

30kondi magabaton sia sing isa ka gatus ka pilo sa karon nga tion, sang mga balay kag mga utud nga lalaki kag mga utud nga babayi kag mga iloy kag mga anak kag mga duta, upud sang mga paghingabut, kag sa katuigan nga palaabuton kabuhi nga walay katapusan.

31Apang madamung nahauna mga maolihi, kag mga naolihi nga mahauna. ”

32Kag yadto sila sa dalan, nga nagataklad pa Jerusalem, kag si Jesus nagauna sa ila; kag naorongan sila, kag ang mga nagsonod nahadluk. Kag ginpain niya liwat ang napulog duha, kag nagsugud sia sa pagsugid sa ila sang mahanabu sa iya,

33nga nagasiling, “Yari karon, nagataklad kita pa Jerusalem; kag ang Anak sang tawo itugyan sa puno nga mga sacerdote kag mga escriba, kag sila magatagudili sa iya sa kamatayon, kag magatugyan sa iya sa mga Gentil;

34kag uligyaton nila sia, kag duplaan sia, kag bunalon sia, kag patyon sia; kag sa tapus ang tatlo ka adlaw mabanhaw sia.”

35Kag nagpalapit sa iya si Santiago kag si Juan, ang mga anak ni Zebedeo, kag nagsiling sa iya, “Manunudlo, luyag namon nga himoon mo sa amon ang bisan anong amon pangayoon sa imo.”

36Kag nagsiling sia sa ila, “Ano bala ang buut ninyo nga akon himoon sa inyo?”

37Kag nagsiling sila sa iya, “Itugut sa amon nga kami maglingkod sa imo himaya, ang isa sa imo too kag ang isa sa wala.”

38Apang si Jesus nagsiling sa ila, “Wala ninyo mahibaloi ang inyo ginapangayo. Sarang bala kamo makainum sa tagayan nga akon imnan, ukon sa pagpabautiso sa bautismo nga ginbautiso sa akon? ”

39Kag nagsabat sila sa iya, “Sarang kami.” Kag si Jesus nagsiling sa ila, “Ang tagayan nga akon imnan imnan ninyo; kag sa bautismo nga ginbautiso sa akon, bautisohan kamo;

40apang ang paglingkod sa akon too ukon sa akon wala indi akon ang pagtugut, kondi ila ini sang gin-amanan sini.

41Kag sang nabatian ini sang napulo, nagsugud sila sa pagpangakig kay Santiago kag kay Juan.

42Kag gintawag sila ni Jesus sa iya kag nagsiling sa ila, “Nahibaloan ninyo nga ang mga ginakabig nga pangolo sang mga Gentil nagapakaginoo sa ila, kag ang ila kadalagkuan nagagamit sing pagbulut-an sa ila.

43Apang indi amo ini sa inyo; kondi ang bisan sin-o sa inyo buut mangindaku mangin-alagad ninyo,

44kag ang bisan sin-o sa inyo buut mangin-nahauna mangin-ulipon sang tanan.

45Kay ang Anak sang tawo man wala magkari nga pag-alagdon kondi sa pag-alagad, kag sa paghatag sang iya kabuhi nga gawad sang madamu.”

46Kag nag-abut sila sa Jerico; kag sang paggowa niya sa Jerico upud sang iya mga gintoton-an kag sang dakung kadam-an, ang anak ni Timeo, si Bartimeo, bulag nga manugpakilimos, nagalingkod sa higad sang dalan.

47Kag sang pagkabati niya nga ini si Jesus nga Nazaretnon, nagsugud sia sa pagsinggit kag sa pagsiling, “Jesus, Anak ni David, kalooyi ako!”

48Kag madamu ang nagsabdong sa iya, nga maghipus sia; apang nagdugang pa gid ang iya pagsinggit, “Anak ni David, kalooyi ako!”

49Kag si Jesus nagdolog kag nagsiling, “Tawga ninyo sia.” Kag gintawag nila ang bulag nga tawo, nga nagasiling sa iya, “Magkalipay ka; tindug, nagatawag si Jesus sa imo.”

50Kag sia nga nagapilak sang iya kunup nagtumbo kag nagpalapit kay Jesus.

51Kag si Jesus nagsabat sa iya, “Ano bala ang buut mo nga himoon ko sa imo?” Kag ang bulag nga tawo nagsabat sa iya, “Rabbi, nga makabaton ako sang akon itololok.”

52Kag si Jesus nagsiling sa iya, “Lakat ka; ang imo pagtoo nag-ayo sa imo.” Kag sa gilayon nabaton niya ang iya itololok kag nagsonod kay Jesus sa dalanon.

← Chapter 9 Jump to: Chapter 11 →