Mark 14 — Ilonggo (Ang Biblia (1982))

1Karon sa tapus ang duha ka adlaw amo ang piesta sang Pascua kag sang Tinapay nga walay Tapay. Kag ang puno nga mga sacerdote kag ang mga escriba nagtinguha kon paano nga madakup nila sia sa limbong, kag mapatay sia;

2kay nagsiling sila, “Indi sa tion sang piesta, basi kon may kagubut sa katawohan.”

3Kag sang didto sia sa Betania sa balay ni Simon nga aroon, sang sia nagalingkod sa pagkaon, nagpalapit ang babayi nga nagadala sing tibudtibud nga alabastro sang ihalaplas nga nardo nga walay simbog, nga malahalon gid, kag ginboong niya ang tibudtibud kag ginbobo sa olo ni Jesus.

4Apang may iban sa ila nga nagsingkal, nga nagasiling, “Sa ano bala nga katuyoan nga nahimo ining pag-usik sang ihalaplas?

5Kay ining ihalaplas sarang kuntani mabaligya sing kapin sa tatlo ka gatus ka denario, kag mahatag sa mga imol.” Kag ginsabdong nila ang babayi.

6Apang si Jesus nagsiling, “Pabayai ninyo sia; ngaa bala ginatublag ninyo sia? Nakahimo sia sing buhat nga maayo sa akon.

7Kay ang mga imol kaupud ninyo sa gihapon, kag bisan san-o nga luyag ninyo, makahimo kamo sing maayo sa ila; apang ako indi kaupud ninyo sa gihapon.

8Naghimo sia sang iya masarangan; nag-una sia sa paghaplas sang akon lawas sa paglubung.

9Kag sa pagkamatuud, nagasiling ako sa inyo, bisan diin iwali ining maayong balita sa bug-os nga kalibutan, hambalon man ang ginhimo sining babayi sa handumanan niya.”

10Niyan si Judas Iscariote, isa sang napulog duha, nagkadto sa puno nga mga sacerdote agud nga matugyan niya si Jesus sa ila.

11Kag sila, sang ila nabatian ini, nagkalipay, kag nagpanug-an sa paghatag sa iya sing cuarta. Kag nagpangita sia sing kahigayonan nga matugyan si Jesus sa ila.

12Kag sa nahaunang adlaw sang Tinapay nga walay Tapay, sang paghalad nila sang cordero sang pascua, ang iya mga gintoton-an nagpamangkot sa iya, “Diin bala ang buut mo nga magkadto kami kag mag-aman agud nga magkaon ka sang pascua?”

13Kag nagpadala sia sing duha sang iya mga gintoton-an, kag nagsiling sa ila, “Kadto kamo sa banwa, kag didto may masugata sa inyo nga tawo nga nagadala sing tibud nga may tubig; sondon ninyo sia,

14kag kon diin magsulud sia, magsiling kamo sa agalon sang panimalay, ‘Ang Manunudlo nagasiling, Diin bala ang akon hulut, nga kaonan ko sang pascua kaupud sang akon mga gintoton-an?’

15Kag sia gid magapakita sa inyo sing dakung hulut nga naibabaw nga nasangkapan kag nahanda; didto maghanda kamo sa aton.”

16Kag nagkadto ang iya mga gintoton-an kag nag-abut sila sa banwa, kag nakita nila subong sang nasiling ni Jesus sa ila; kag gin-aman nila ang pascua.

17Kag sa kahaponon nag-abut si Jesus upud ang napulog duha.

18Kag sang naglingkod sila kag nagkaon, si Jesus nagsiling, “Sa pagkamatuud, nagasiling ako sa inyo, isa sa inyo magatugyan sa akon, sia nga nagakaon kaupud nakon.”

19Nagsugud sila sa pagkasubu, kag sa pagsiling sa iya sing tag-isaisa, “Ako ayhan?”

20Nagsabat sia sa ila, “Isa sia sang napulog duha, nga nagatusmug sang tinapay kaupud nakon sa pinggan.

21Kay ang Anak sang tawo magataliwan subong sang nasulat nahanungud sa iya, apang kailo yadtong tawo nga paagi sa iya ginatugyan ang Anak sang tawo! Maayo pa sadtong tawo nga wala sia matawo.”

22Kag sang nagakaon sila, nagkuha sia sing tinapay, kag ginpakamaayo, kag gintipiktipik niya ini, kag ginhatag ini sa ila, kag nagsiling, “Kuha kamo; ini amo ang akon lawas.”

23Kag nagkuha sia sang tagayan, kag sang nakapasalamat ginhatag niya sa ila, kag sila tanan nag-inum sini.

24Kag nagsiling sia sa ila, “Ini amo ang akon dugo sang [bag-ong] katipan, nga ginaula tungud sa madamu.

25Sa pagkamatuud, nagasiling ako sa inyo, indi na ako magainum liwat sang bunga sang uvas tubtub sadtong adlaw nga magainum ako sini sing bag-o sa ginharian sang Dios.”

26Kag sang nakaamba sila sing ambahanon, naggowa sila pakadto sa Bukid sang mga Olivo.

27Kag si Jesus nagsiling sa ila, “Tanan kamo masandad; kay nasulat na, ‘Samaron ko ang manugpahalab kag paaplaagon ang mga carnero.’

28Apang sa tapus ako mabanhaw, magauna ako sa inyo sa Galilea. ”

29Si Pedro nagsiling sa iya, “Bisan pa ang tanan masandad, ako indi.”

30Kag si Jesus nagsiling sa iya, “Sa pagkamatuud, nagasiling ako sa imo, sa sining gab-i, sa wala pa makapamalo ang manuk sing makaduha, ipanghiwala mo ako sing makatlo.”

31Apang nagpamolong sia nga may pagpanikasug gid, “Bisan kinahanglan ako mapatay upud sa imo, indi ko ikaw pag-ipanghiwala.” Kag amo man ang ginsiling nila tanan.

32Kag nag-abut sila sa duug nga ginhingalanan Getsemani; kag nagsiling sia sa iya mga gintoton-an, “Lingkod kamo diri, sa nagapangamuyo ako.”

33Kag gin-upud niya si Pedro kag si Santiago kag si Juan, kag nagsugud si Jesus sa pagkakugmat kag pagkalisang sing tama gid.

34Kag nagsiling sia sa ila, “Ang akon kalag masinulub-on sing tama, tubtub sa kamatayon; pabilin kamo diri, kag magpulaw kamo.”

35Kag sang nagakadto sia sa uluunhan, naghapa sia sa duta, kag nagpangamuyo nga, kon mahimo, ang takna mapaligad sa iya.

36Kag nagsiling sia, “Abba, Amay, ang tanan nga butang mahimo sa imo; ipahilayo sa akon ining tagayan; apang indi sono sa buut ko, kondi sa buut mo.”

37Kag nag-abut sia kag nakita sila nga nagakatolog, kag nagsiling sia kay Pedro, “Simon, nagakatolog ka bala? Indi ka bala makapulaw sing isa ka takna?

38Magpulaw kag magpangamuyo kamo, agud nga indi kamo makasulud sa panulay; sa pagkamatuud ang espiritu buut, apang ang unud maluya.”

39Kag naglakat sia liwat kag nagpangamuyo, nga nagasiling sang amo man nga mga polong.

40Kag liwat nag-abut sia kag nakita sila nga nagakatolog, kay mabug-at gid ang ila mga mata; kag indi sila makahibalo kon ano ang isabat sa iya.

41Kag nagbalik sia sa ikatlong tion, kag nagsiling sa ila, “Nagakatolog pa bala kamo kag nagapahuway sa gihapon? Tuman na; nag-abut na ang takna; ang Anak sang tawo ginatugyan sa mga kamut sang mga makasasala.

42Tindug kamo, malakat kita; tan-awa, ang nagatugyan sa akon yari na.”

43Kag sa gilayon, sang nagahambal pa sia, nag-abut si Judas, isa sang napulog duha, kag upud niya ang kadam-an nga may mga espada kag mga lampus, gikan sa puno nga mga sacerdote kag mga escriba kag mga tigulang.

44Karon ang nagtugyan sa iya naghatag sa ila sing isa ka tanda, nga nagasiling, “Kon sin-o ang akon halukan amo ina sia; dakpa sia kag dalha sia sing malig-on.”

45Kag sang nag-abut sia, sa gilayon nagpalapit sia kay Jesus, kag nagsiling, “Rabbi!” Kag naghaluk sia sa iya.

46Kag ginkaptan nila sia kag gindakup.

47Apang may isa sang mga nagtindug nga naggabut sang iya espada, kag ginlabo niya ang ulipon sang pinakamataas nga sacerdote kag gingilangan sia.

48Kag si Jesus nagsiling sa ila, “Nagakari bala kamo subong nga batok sa buyong, nga may mga espada kag mga lampus sa pagdakup sa akon?

49Adlawadlaw yara ako kaupud ninyo sa templo nga nagapanudlo, kag wala ninyo ako pagdakpa. Apang matuman ang kasulatan.”

50Kag sila tanan nagbiya sa iya, kag nagpalagyo.

51Kag may pamatan-on nga lalaki nga nagsonod sa iya, nga may panapton lamang nga lino nga nakunup sa lawas niya; kag gindakup nila sia,

52apang ginbayaan niya ang panapton nga lino kag nagpalagyo nga hublas.

53Kag gindala nila si Jesus sa pinakamataas nga sacerdote; kag nagtipon sa iya ang tanan nga puno nga mga sacerdote kag ang mga tigulang kag ang mga escriba.

54Kag si Pedro nagsonod sa iya sa malayo, sa sulud sang luwang sang pinakamataas nga sacerdote; kag naglingkod sia upud sang mga bantay, kag nagapaganggang sa kalayo.

55Karon ang puno nga mga sacerdote kag ang bug-os nga corte nagpangita sing saksi batok kay Jesus sa pagpatay sa iya; apang wala sila makakita.

56Kay madamu ang nagsaksi sing dimatuud batok sa iya, kag ang ila panaksi wala magsinanto.

57Kag may pila nga nagtindug kag nagsaksi sing dimatuud batok sa iya, nga nagasiling,

58“Nabatian namon sia nga nagasiling, ‘Akon gub-on ining templo nga hinimo sang mga kamut, kag sa tatlo ka adlaw patindugon ko ang isa na man, nga indi hinimo sang mga kamut.’ ”

59Walay sapayan ang ila panaksi wala magsinanto.

60Kag ang pinakamataas nga sacerdote nagtindug sa tunga, kag nagpamangkot kay Jesus, “Wala ka bala sing isabat? Ano bala ang ginasaksi nila sini batok sa imo?”

61Apang naghipus sia kag wala magsabat sing bisan ano. Liwat ang pinakamataas nga sacerdote nagpamangkot sa iya, “Ikaw bala ang Cristo, ang Anak sang Dalayawon?”

62Kag si Jesus nagsabat, “Amo ako; kag makita ninyo ang Anak sang tawo nga nagalingkod sa too sang Gahum, kag nagakari upud sang mga panganud sang langit. ”

63Kag ang pinakamataas nga sacerdote nagkusnit sang iya mga panapton, kag nagsiling, “Ano pa bala ang kinahanglan naton sang mga saksi?

64Nakabati kamo sang pasipala niya. Ano bala sa inyo?” Kag tanan sila nagtagudili sa iya nga bagay patyon.

65Kag ang iban nagsugud sa pagdupla sa iya, kag sa pagtabon sang iya nawung, kag sa pagsumbag sa iya, nga nagasiling sa iya, “Itagna!” Kag ang mga bantay nagbaton sa iya nga may mga hampak.

66Kag sang si Pedro didto sa idalum sa luwang, nagpalapit ang isa sang babaying sologoon sang pinakamataas nga sacerdote;

67kag sang nakita niya si Pedro nga nagapaganggang, gintolok niya sia, kag nagsiling, “Ikaw man kaupud sang Nazaretnon, nga si Jesus.”

68Apang sia nagpanghiwala sini, nga nagasiling, “Wala ako makahibalo ukon makahangup sang imo ginasiling.” Kag naggowa sia sa alagyan sa gawang [kag nagpamalo ang manuk].

69Kag nakita sia sang sologoon nga babayi, kag nagsugud liwat sa pagsiling sa mga nagatindug didto, “Ining tawo isa sa ila.”

70Apang sia liwat nagpanghiwala sini. Kag sa wala madugay liwat ang mga nagatindug didto nagsiling kay Pedro, “Matuud gid nga ikaw isa sa ila; kay ikaw Galileanhon.”

71Apang nagsugud sia sa pagpanuluy kag sa pagsumpa, “Wala ako makakilala sining tawo nga inyo ginahambal.”

72Kag sa gilayon ang manuk nagpamalo sa ikaduhang tion. Kag si Pedro nakadumdum nga si Jesus nagsiling sa iya, “Sa wala pa makapamalo ang manuk sing makaduha, ikaw magapanghiwala sa akon sing makatlo.” Kag nahanusbu sia kag naghibi.