Mark 11

Ilonggo (Ang Biblia (1982))

← Chapter 10 Jump to: Chapter 12 →

1Kag sang naghinamput sila sa Jerusalem, sa Betfage kag sa Betania, sa Bukid sang mga Olivo, nagpadala si Jesus sang duha sang iya mga gintoton-an,

2kag nagsiling sa ila, “Kadto kamo sa minoro nga yara sa atubangan ninyo, kag sa pagsulud gid ninyo sa sini makita ninyo ang polyino nga nahigot, nga wala pa sing tawo nga nakasakay; hubara ini kag dalhon.

3Kon may magsiling sa inyo, ‘Ngaa bala nagahimo kamo sini?’ magsabat kamo, ‘Ang Ginoo may kinahanglan sini kag sa gilayon ipabalik niya ini diri.’”

4Kag nagkadto sila, kag nakita ang polyino nga nahigot sa gowa sang ganhaan sa dalan; kag ginhubad ini nila.

5Kag ang mga nagtindug didto nagsiling sa ila, “Ano bala ang ginahimo ninyo, nga ginahubad ang polyino?”

6Kag nagsabat sila sa ila sono sa ginsiling ni Jesus; kag ginpalakat sila nila.

7Kag gindala nila ang polyino kay Jesus, kag ginhampiloan ini sang ila mga panapton; kag nagsakay si Jesus sa sini.

8Kag madamu ang naghumlad sang ila mga panapton sa dalan, kag ang iban nagyakyak sang mga pagungpung nga gin-utud nila sa mga latagon.

9Kag ang mga nag-una kag ang mga nagsonod nagsinggit, “Hosanna! Pagdayawon ang nagkari sa ngalan sang Ginoo!

10Pagdayawon ang ginharian ni David nga aton amay, nga nagakari! Hosanna sa kataasan!”

11Kag si Jesus nagsulud sa Jerusalem, kag sa templo; kag sang nakatolok sia sa tanan nga butang sa palibut, kay hapon na, naggowa sia pa Betania kaupud ang napulog duha.

12Sa madason nga adlaw, sang nakagowa sila gikan sa Betania, gingutum sia.

13Kag sang nakita niya sa malayo ang kahoy nga higuera nga may mga dahon, nagpalapit sia basi kon may makita sia nga higos didto. Sang nagpalapit sia sa sini, wala sia sing nakita kondi mga dahon, kay indi panag-on sang mga higos.

14Kag nagsiling sia sa sini, “Wala na sing tawo nga magakaon liwat sang bunga mo.” Kag ang iya mga gintoton-an nakabati sini.

15Kag nag-abut sila sa Jerusalem. Kag nagsulud sia sa templo kag nagsugud sia sa pagsobol sang mga nagbaligya kag sang mga nagbakal sa templo, kag ginpamaliskad niya ang mga latok sang mga manugbaylo sang cuarta kag ang mga lingkoran sang mga nagbaligya sing mga salampati;

16kag wala sia magtugut kay bisan sin-o nga magdala sing bisan anong butang nga ilaktud sa templo.

17Kag nagpanudlo sia, kag nagsiling sa ila, “Wala bala masulat, ‘Ang akon balay tawgon nga balay nga palangamuyoan sa tanan nga kapungsuran’? Apang ginhimo ninyo ini nga lungib sang mga buyong. ”

18Kag nabatian ini sang puno nga mga sacerdote kag sang mga escriba kag nagtinguha sila kon paano nga malaglag nila sia; kay nahadluk sila sa iya, kay ang bug-os nga kadam-an natingala sang iya pagtolon-an.

19Kag sang kahaponanon na naggowa sila gikan sa banwa.

20Sang ila pag-agi sa kaagahon, nakita nila ang kahoy nga higuera nalaya kutub sa mga gamut.

21Kag si Pedro nakadumdum kag nagsiling sa iya, “Rabbi, tan-awa! Ang higuera nga imo ginpakamalaut nalaya.”

22Kag si Jesus nagsabat sa ila, “Magtoo kamo sa Dios.

23Sa pagkamatuud, nagasiling ako sa inyo, ang bisan sin-o nga magsiling sa sining bukid, ‘Halin ka kag maglukso sa dagat,’ kag indi magduhaduha sa iya tagiposoon, kondi magtoo nga ang iya ginasiling mahanabu, maangkon niya ini.

24Busa ako nagasiling sa inyo, ang bisan ano nga ginapangayo ninyo sa pangamuyo, magtoo kamo nga ginabaton ninyo, kag maangkon ninyo ini.

25Kag kon kamo nagatindug nga nagapangamuyo, patawara ninyo, kon may butang kamo batok sa bisan kay sin-o; agud nga ang inyo Amay sa langit magapatawad man sa inyo sang inyo mga paglapas. [

26Apang kon indi kamo magpatawad, indi man ang inyo Amay sa langit magpatawad sang inyo mga paglapas.] ”

27Kag nag-abut sila liwat sa Jerusalem. Kag sang nagalakat sia sa sulud sang templo, nagpalapit sa iya ang puno nga mga sacerdote kag ang mga escriba kag ang mga tigulang,

28kag nagpamangkot sila sa iya, “Tungud sa ano bala nga pagbulut-an nagahimo ka sining mga butang, ukon sin-o bala ang naghatag sa imo sining pagbulut-an sa paghimo sa ila?”

29Si Jesus nagsabat sa ila, “Ako magapamangkot sa inyo sing isa ka butang; sabton ninyo ako, kag magasugid ako sa inyo kon sa anong pagbulut-an ginahimo ko ining mga butang.

30Ang bautismo ni Juan gikan bala sa langit ukon sa mga tawo? Sabta ninyo ako.”

31Kag nagbinaisay sila, “Kon magsiling kita, ‘Gikan sa langit,’ magasiling sia, ‘Ngaa man wala kamo magpati sa iya?’

32Apang magasiling bala kita, ‘Gikan sa mga tawo’?”—nahadluk sila sa katawohan, kay ang tanan nagkabig kay Juan nga matuud nga manalagna.

33Gani nagsabat sila kay Jesus, “Wala kami makahibalo.” Kag si Jesus nagsabat sa ila, “Ako indi man magsugid sa inyo kon sa anong pagbulut-an ginahimo ko ining mga butang.”

← Chapter 10 Jump to: Chapter 12 →