Mark 12

Ilonggo (Ang Biblia (1982))

← Chapter 11 Jump to: Chapter 13 →

1Kag nagsugud sia sa paghambal sa ila sa mga paanggid. “Ang isa ka tawo naghimo sing ulubasan, kag ginpalibutan ini sing habong, kag ginpakutkutan sing linasan sang uvas, kag ginpatindugan sing balantayan, kag ginpaagsahan ini sa mga mangunguma, kag nagpanlakatan sa malayo nga duta.

2Sang panag-on sang patubas, ginpakadto niya ang isa ka ulipon sa mga mangunguma, agud mabaton niya sa mga mangunguma ang patubas sang ulubasan.

3Kag gindakup nila sia kag ginbunal, kag ginpapauli sia nga walay dala.

4Liwat ginpakadto niya sa ila ang isa na man ka ulipon, kag ginpilasan nila sia sa olo, kag ginpakahuy-an.

5Kag ginpakadto niya ang isa na man, kag ginpatay nila sia; kag iban pa nga madamu, nga ginbunal ang iban kag ginpatay ang iban.

6May isa pa sia, ang anak nga hinigugma; ginpakadto niya sia sa ila sa katapusan, nga nagasiling, ‘Pagatahoron nila ang akon anak.’

7Apang yadtong mga mangunguma nagsilingay, ‘Ini among manunubli; kari kamo, patyon ta sia, kag ang panublion mangin-aton.’

8Kag gindakup nila sia kag ginpatay sia, kag ginpahabog sia sa gowa sang ulubasan.

9Busa ano bala ang himoon sang agalon sang ulubasan? Magakari sia kag magalaglag sang mga mangunguma, kag ihatag ang ulubasan sa iban.

10Wala bala ninyo mabasahi ining kasulatan: ‘Ang bato nga ginsikway sang mga manunukud nangin-olo sang pamag-ang;

11ini nagikan sa Ginoo, kag makatilingala sa aton mga mata’?”

12Kag naghimulat sila sa pagdakup sa iya, apang nahadluk sila sa kadam-an, kay nahantupan nila nga ginpamolong niya ang paanggid batok sa ila; gani ginbayaan nila sia kag naglakat.

13Kag ginpakadto nila sa iya ang pila sang mga Fariseo kag sang mga Herodianhon, agud madakup nila sia sa hambalanon.

14Kag sang nag-abut sila nagsiling sila sa iya, “Manunudlo, nahibaloan namon nga ikaw maminatud-on, kag wala nagapasulabi sa bisan kay sin-o; kay wala ka nagatamud sang pagkahimtang sang mga tawo, kondi matuud gid nga nagatudlo ka sang dalanon sang Dios. Tugut bala ang paghatag sing buhis kay Cesar, ukon indi?

15Magahatag bala kami, ukon indi?” Apang sia, sang nakahibalo sang ila pagkasalimpapaw, nagsiling sa ila, “Ngaa bala ginatilawan ninyo ako? Dalhi ako sing denario, agud nga akon makita ini.”

16Kag gindala nila ini. Kag nagpamangkot sia sa ila, “Kay sin-o bala ining dagway kag sinulat?” Nagsabat sila sa iya, “Kay Cesar.”

17Si Jesus nagsiling sa ila, “Ihatag ninyo kay Cesar ang mga butang nga iya ni Cesar, kag sa Dios ang mga butang nga iya sang Dios.” Kag natingala sila sing daku sa iya.

18Kag nagpalapit sa iya ang mga Saduceo, nga nagasiling nga walay pagkabanhaw; kag nagpamangkot sila sa iya, nga nagasiling,

19“Manunudlo, si Moises nagsulat sa aton nga kon ang utud sang isa ka tawo mapatay kag mabilin ang asawa, apang walay anak nga mabilin, ang iya utud magpangasawa sang asawa niya, kag magbangon sing kaliwat sa iya utud.

20May pito ka mag-ulutud nga lalaki; ang nahauna nagpangasawa, kag sang napatay wala makabilin sing kaliwat;

21kag ang ikaduha nagpangasawa sa iya, kag napatay, nga wala sia makabilin sing kaliwat; kag ang ikatlo subong man;

22kag ang pito wala makabilin sing kaliwat. Sa katapusan sang tanan napatay man ang babayi.

23Sa pagkabanhaw kay sin-o bala mangin-asawa sia? Kay ang pito nakapangasawa sa iya.”

24Si Jesus nagsabat sa ila, “Indi bala sa sining kabangdanan nagasayup kamo, nga wala kamo makahibalo sang kasulatan ukon sang gahum sang Dios?

25Kay sa pagkabanhaw nila, wala sila nagapangasawa ukon ginapabanhan, kondi kaangay sa mga manugtunda sa langit.

26Apang nahanungud sa mga patay nga ginabanhaw sila, wala bala ninyo mabasahi sa tolon-an ni Moises, sa bahin nahanungud sang sapinit, kon paano nga nagpamolong ang Dios sa iya, ‘Ako amo ang Dios ni Abraham, kag ang Dios ni Isaac, kag ang Dios ni Jacob’?

27Indi sia Dios sang mga patay, kondi sang mga buhi; nagasayup kamo sing daku.”

28Kag nagpalapit ang isa sang mga escriba kag nakabati sa ila nga nagabinaisay, kag sang nakahibalo nga ginsabat niya sila sing maayo, nagpamangkot sa iya, “Ano bala ang nahaunang sogo sa tanan?”

29Si Jesus nagsabat, “Ang nahauna amo, ‘Pamatii, O Israel: Ang Ginoong Dios naton, ang Ginoo isa;

30kag higugmaa ang Ginoo nga imo Dios sa bug-os mong tagiposoon, kag sa bug-os mong kalag, kag sa bug-os mong hunahuna, kag sa bug-os mong kusug.’

31Ang ikaduha amo ini, ‘Higugmaa ang imo isigkatawo subong sang imo kaugalingon.’ Wala na sing iban nga sogo nga daku pa sa ila sini.”

32Kag ang escriba nagsiling sa iya, “Matuud gid, Manunudlo; nasiling mo sing maayo nga sia isa, kag wala na sing iban luwas sa iya;

33kag ang paghigugma sa iya sa bug-os nga tagiposoon, kag sa bug-os nga ihibalo, kag sa bug-os nga kusug, kag ang paghigugma sa iya isigkatawo subong sang iya kaugalingon, labi pa sa tanan nga dolot nga sinonog sing bug-os gid kag sa mga halad. ”

34Kag sang nakita ni Jesus nga nagsabat sia sing maalamon, nagsiling sia sa iya, “Indi ka malayo sa ginharian sang Dios.” Kag wala na sing tawo sa tapus sadto nga nangahas sa pagpamangkot sa iya.

35Kag si Jesus nagsiling sang nagpanudlo sia sa templo, “Paano bala nga nagasiling ang mga escriba nga ang Cristo anak ni David?

36Si David gid nagsiling paagi sa Espiritu Santo, Ang Ginoo nagsiling sa akon Ginoo, Lingkod ka sa akon too, tubtub nga mahimo ko ang imo mga kaaway nga palatungan sang imo mga tiil.’

37Si David gid nagatawag sa iya nga Ginoo; kag paano bala nga sia anak niya?” Kag ang dakung kadam-an nagpamati sa iya sing malipayon.

38Kag nagsiling sia sa iya pagpanudlo, “Andam kamo sa mga escriba, nga maluyag maglakat nga may mga kunup nga malaba, kag mag-agum sang mga pagabiabi sa mga balaligyaan

39kag sang pinasulabi nga mga lingkoran sa mga sinagoga kag sang pinasulabi nga mga duug sa mga piesta,

40sila nga nagahalunhon sang mga balay sang mga babaying balo kag sa pamalibad nagapangamuyo sing malawig. Ini sila magabaton sing daku pa nga katagudilian.”

41Kag naglingkod sia sa tampad sang bahandian, kag nagtan-aw kon paano nga pagbutang sang kadam-an sing cuarta sa bahandian. Madamung manggaranon nagbutang sing madamung pilak.

42Kag nag-abut ang isa ka imol nga babaying balo, kag nagbutang sia sing duha ka lepta, nga among isa ka diotay.

43Kag gintawag niya sa iya ang iya mga gintoton-an, kag nagsiling sa ila, “Sa pagkamatuud, nagasiling ako sa inyo, ining imol nga babaying balo nagbutang sing labi pa sa tanan nga amut sa bahandian.

44Kay sila tanan nag-amut gikan sa ila kabuganaan; apang sia sa iya kinawad-on nagbutang sang tanan niya, bisan ang tanan nga iya inugpangabuhi.”

← Chapter 11 Jump to: Chapter 13 →