1 Corinthians 10

Ika 2018 Bible

← Chapter 9 Jump to: Chapter 11 →

1Umunẹ m, achọnị m nị ụnụ zọ ihiẹn mẹ ndị nẹdi ẹnyi: Wẹ ile kẹ Osolobuẹ gi orukpu hụ du; wẹ ile fetu Ohimin ufie hụ;

2wẹ ile gizi isọn orukpu hụ lẹ ifetu Ohimin hụ wụrụ ndị e sọn Mozizi.

3Wẹ ile e rizighọ ihiẹn-oriri ahụn gha elu-igwee bịa;

4wẹ ile a razịghọ ihiẹn-ọrịra hụ Osolobuẹ zihẹni wẹ, makẹni wẹ ra mirin pụha imẹ ọmụma ahụn nwọnlẹni ebe o gha bịa sọnkọnị wẹ. Ọmụma hụ wụ Kraịstị.

5Kanị agụngụn imẹrinmẹ wẹ asụọnị Osolobuẹ, ọ nọ gbu wẹ, ozun wẹ e jun imẹ atụ.

6Ihiẹn ndịnị mẹ kẹni ẹnyi gi wẹ mụnrụn, amamgbe eje-ihiẹn gha a la ẹnyi ẹnya k'o dọn la wẹ.

7Emẹkwọlẹ ni ndị a rụa mmọn kẹ ụfọdụ imẹ wẹ dọn mẹ: hụn wẹ de imẹ Ẹkụkwọ-nsọ, nị “Ndị hụ nọ nọdị alị, e ri, a ra; e lihi wẹ ọtọ, tẹnmẹ egu.”

8Ẹnyi aghẹrẹkọkwọ nị kẹ ụfọdụ imẹ wẹ dọn mẹ, hụn madụ nnụ-uku ẹtọ-kwasị-ọgụn (23,000) gi nwụnhụn akpọhịn ohu;

9Ẹnyi achọkọkwọ nị ihiẹn rị Di-nwọnni-ẹnyi ọnụ kẹ ụfọdụ imẹ wẹ dọn mẹ, hụn agwọ gi tagbu wẹ;

10edẹnwịnnwịnkwọlẹ ni kẹ ụfọdụ imẹ wẹ dọn mẹ, hụn mmọn-ozi ahụn etikpọnị gi gbupụ wẹ.

11Ihiẹn ndịnị mẹ kẹni ẹnyi mụnrụn. Wẹ detu ihiẹn ndịnị nị wẹ gi wẹ dọ ẹnyi ẹka-ntịn, ẹnyi ndị rị e bi ogẹn ikpanzụụnnị.

12Onyẹ hụn rị nwan e ro n'o wuzokẹ, ya kpachanpụkwọ ẹnya amamgbe ọ dan.

13Onwọnni ọnwụnwan ka ịhịan hụn bịatuni ụnụ. Osolobuẹ furu wẹ e gi dọn ẹnya, ọ nịkọ hụn ka ụnụ ẹka kunrun ụnụ. Kama, n'ọ nọghọdẹ ọnwụnwan ile k'e kunrun ụnụ ghọsị ụnụ kẹ ụnụ a dọn dingbu ẹ.

14Umunẹ m, gbanị nị nwan ịrụa-mmọn ọsọ!

15M rị a gwa ụnụ oku kẹ ndị nwọn uche; lekpọn'a:

16Mkpu ohu ahụn ẹnyi e ye Osolobuẹ ekele a rarịsọnmẹ, ẹlẹ mmẹkọ kẹ ẹnyi ile lẹ ẹdeke Kraịstị gi ẹ e mẹkọ? Brẹdi ahụn ẹnyi e ye Osolobuẹ ekele e keri, ẹlẹ mmẹkọ kẹ ẹnyi ile lẹ ẹhụ Kraịstị gi ẹ e mẹkọ?

17Ebe o mẹ ni brẹdi ohu sụọ rọ, ẹhụ ohu kẹ ẹnyi ile wụ, ọsụọn'a nị ẹnyi bu ọda, makẹni ẹnyi ile gba e ri brẹdi ohu hụ.

18Lee ni ụmụ ẹfọ Izrẹlụ: wẹ ile hụn e ri ihiẹn wẹ gi chụn ẹjan e sọngụọnị wẹ mẹ ihiẹn wẹ rị e mẹ ebẹhụ wẹ nọ a chụn ẹjan?

19Kị m rị nwan e ku? M gidẹ ẹ nwan e ku ni ihiẹn-oriri wẹ gi rụa mmọn mọbụ mmọn lẹ enwẹn ẹ nwọn ihiẹn ọ wụ ra?

20Mba. M gi ẹ e ku ni ẹjan ndị a rụa mmọn a chụn, nị eje-mmọn kẹ wẹ rị a chụnyen'ẹ, ẹlẹ Osolobuẹ. Achọnị m nị ụnụ lẹ eje-mmọn mẹkọ.

21Ụnụ asakọ ẹka rị a rarị ihiẹn rị mkpu Di-nwọnni-ẹnyi, a rarịzị nke eje-mmọn; ụnụ asakọ ẹka rị e ri ihiẹn-oriri teburu Di-nwọnni-ẹnyi, e rizi nke eje-mmọn.

22Ẹnyi rịdẹ nwan e mẹ nị ẹnya fụma Osolobuẹ ra?! Ịyụ ka Osolobuẹ e ze?

23Wẹ sị, “Ịhịan nwọn ikẹn mẹ ihiẹn ọ chọ n'o mẹ.” Kanị, ẹlẹ ihiẹn ile e ye ẹka. Wẹ sị, “Ịhịan nwọn ikẹn mẹ ihiẹn ọ chọ n'o mẹ.” Kanị, ẹlẹ ihiẹn ile e mẹ okukwe ịhịan e sue.

24Onyẹ ọwụlẹ ya chọma ọrịrịmma ndị-ọzọ, ẹlẹ nke ẹ.

25Ri ni ihiẹn ọwụlẹ wẹ re ọdụn anụ, ajụsọnmẹlẹ ni ọnụ, makẹ obi gha e gbumẹ ịhịan mgbu;

26ri ni makẹni Ẹkụkwọ-nsọ sị nị, “Ụwa lẹ ihiẹn ile rịn'a wụ nke Di-nwọnni-ẹnyi.”

27Onyẹ ghalẹni e sọn Kraịstị kpọ ị oriri, bụ y'a chọghọ n'i jẹn, i ru ẹ, ri ihiẹn ọwụlẹ wẹ ye i, ajụsọnmẹlẹ ọnụ hụn obi e gi gbumẹ ịhịan mgbu.

28Kanị, omẹni ịhịan a sị ị, “Wẹ gi ihiẹnni rụa mmọn,” ufiri onyẹ hụ gwan'ị lẹ makẹ obi gha e gbumẹ ịhịan mgbu, erilẹ ẹ.

29M sị, “Makẹ obi gha e gbumẹ ịhịan mgbu.” Obi onyẹ ahụn kẹ m rị e ku, ẹlẹ nke i. Ị k'a sị, “Kị wẹ rị e gini obi rị e gbu onyẹ ọzọ mgbu a jụ m ajụjụ m gi mẹ ihiẹn m marịn nị ẹlẹ eje-ihiẹn?

30Omẹni a kpanmịngụọ m Osolobuẹ nị m d'e rimẹ ẹ, kị wẹ rị e gini ihiẹn m ri e kuja oku m, bụ a kpanmịnghọ m Osolobuẹ?”

31Kẹ oriri kẹ ọrịra kẹ ihiẹn ọzọ ọwụlẹ ụnụ e mẹ, e mẹni wẹ ile ụzọ o gi wẹhẹni Osolobuẹ ọghọ,

32ẹlẹ hụn ụnụ e gi e wiwi okukwe ịhịan, kẹ ndị Ju kẹ ndị alị ọzọ kẹ ndị ụka Osolobuẹ.

33Ẹrịra kẹ mmẹ nwẹn e mẹ: m'a lịlịma ụzọ ile nị m'e mẹ n'ọ sụọ ịhịan ile, m'a ra chọ nke m, kanị nke ịhịan ile, kẹni wẹ hụn ụzọ nwọn nzụọpụha.

← Chapter 9 Jump to: Chapter 11 →