1 Corinthians 14

Ika 2018 Bible

← Chapter 13 Jump to: Chapter 15 →

1A chụ nị nwan ihiẹn-ọsụsụọ. A chọkẹnmẹ ni oyiye Mmọn-nsọ — tụmadụ ịgwapụ ịhịan uche Osolobuẹ.

2Makẹni onyẹ rị a sụ asụsụ ọzọ rị a gwa Osolobuẹ, ẹlẹ ịhịan, makẹni onwọnni onyẹ rị a ghọtan'a. Ọ rị e ku oku imẹ-mmọn ịhịan marịnlẹni.

3Kanị, hụn rị a gwapụ wẹ uche Osolobuẹ rị a gwa ịhịan, e mẹ okukwe wẹ e sue, a gba wẹ umẹ, a kasị wẹ obi.

4Hụn rị a sụ asụsụ ọzọ rị a gba enwẹn ẹ umẹ. Kanị, hụn rị a gwapụ wẹ uche Osolobuẹ rị a gba ịhịan ile rị ụka umẹ.

5M chọ nị ụnụ ile nwọn oyiye ịsụ-asụsụ ichẹn-ichẹn. Kanị hụn m ka a chọ wụ nị ụnụ a gwapụ ịhịan uche Osolobuẹ. Onyẹ rị e ku uche Osolobuẹ ka onyẹ rị a sụ asụsụ ọzọ, mmanị ịhịan naye oku kẹni ndị ụka gi ẹ sue.

6Umunẹ m, lee n'ẹ nwan: m bịa ebe ụnụ rị, nị a sụma m asụsụ ọzọ, nanị o dọn bannị ụnụ erere? Mmanị m gwapụ ụnụ ihiẹn Osolobuẹ ghọsị m mọbụ ihiẹn ụnụ marịnlẹni mọbụ zi ụnụ ozi Osolobuẹ zi mọbụ kuzi ụnụ ihiẹn?

7Ẹrịra k'ọ rịzịdẹ ihiẹn-egu ghalẹni e kwọn, nọkẹ ẹkpịrị lẹ ụbọ: omẹni eyeni wẹ olu we ẹnya, nanị ịhịan a dọn ghọta ihiẹn wẹ rị a kpọ?

8Opi-agha ye olu welẹni ẹnya, onyẹ k'e kọnrin agha?

9Ẹrịrazịkwọ, ụnụ gi asụsụ ịhịan marịnlẹni ku oku, nanị w'a dọn ghọta? O k'a nọ kẹ sị ufere kẹ ụnụ rị a gwa.

10W'a ra rụ ụka a, olu ichẹn-ichẹn rị elu ụwa abarahịghọ bụ onwọnni hụn nwọnlẹni ihiẹn wẹ gi ẹ e ku.

11O mẹ nwan nị aghọtanị m olu rị e kuni, ọ k'a rị m kẹ otumunyẹ, mmẹ nwẹn a nọ kẹ otumunyẹ ebe olu hụ rị.

12Ẹrịrazịkwọ, ebe ụnụ rị e mẹ oku oyiye Mmọn-nsọ, lịlịma nị nwan a wụ ọkaa imẹ oyiye ndị hụn e mẹ ụka e sue.

13Ya wụ, onyẹ hụn a sụ asụsụ ọzọ, ya rịọma Chuku, kẹni ọ saẹka a naye oku.

14Makẹni, m gi asụsụ m marịnlẹni mẹ ekpere, mmọn m hụ e mẹ ekpere, kanị onwọnni hụn uche m rị a rụn.

15Kị m'e mẹ nwan? M k'e gi mmọn m kpe ekpere, e gizi m uche m kpe ekpere m k'a ghọta; m k'e gi mmọn m bụ ẹbụ, e gizi m uche m bụ hụn m k'a ghọta.

16Omẹni ẹlẹ ẹrịra, i gi mmọn ị ja Osolobuẹ mma, nanị ogbori a dọn nwan sị “Isẹẹ!” bụ ọ marịn ihiẹn ị rị e ku?

17Ikẹnkwọ y'a jaghọ Osolobuẹ mma k'o furu bụ onwọnni onyẹ o yeni ẹka.

18A kpanmịn m Osolobuẹ nị mmẹ ka ụnụ ile oyiye asụsụ ichẹn-ichẹn e nwọn;

19kanị, imẹ ụka, ọ ka m mma nị m ku mkpụrụ-oku isẹn m ghọta, gi kuzi ndị ọzọ, karị igi asụsụ ọzọ ku mkpụrụ-oku nnụ-uku iri.

20Umunẹ m, erolẹ ni iroro kẹ ụmụẹka! O mẹ nke imẹ-njọ, a wụ nị ụmụẹka, kanị, o mẹ nke iroro, e ro ni iroro kẹ ndị ka-ẹhụ.

21Ẹkụkwọ-nsọ sị, “Ndị asụsụ ọzọ, lẹ ọnụ itumunyẹ kẹ m k'e gi gwa ndịnị oku; kanị ẹlẹ wẹ k'e gọnkwọ m tan ntịn. Ya kẹ Osolobuẹ ku.”

22Ya wụ, ndị kwerilẹni kẹ wẹ gi asụsụ ọzọ a ghọsị ẹka Osolobuẹ, ẹlẹ ndị kwerigụnị; kanị, “Osolobuẹ sị” kẹ wẹ gi a gwa ndị kwerini oku, ẹlẹ ndị kwerilẹni.

23O mẹ nwan nị ụka ile zu, nị ịhịan ile a sụma asụsụ ichẹn-ichẹn, onyẹ marịnlẹni ẹnya ihiẹn ndịnị mọbụ onyẹ kwerilẹni banhan, o kukọ nị ẹra rị a pụ ụnụ?!

24Kanị omẹni ịhịan ile hụ e kupụ uche Osolobuẹ, onyẹ hụn kwerilẹni mọbụ onyẹ marịnlẹni ẹnya ihiẹn ndịnị banhan, ihiẹn ọ rị a nụ ọnụ ịhịan ile a mama a ikpe, mẹ ẹ jụma enwẹn ẹ njụ;

25ihiẹn rị a obi a pụha ifọn. Ọ kụnị Osolobuẹ isi alị, ye Osolobuẹ ọghọ, sị, “Ezioku-ezioku, Osolobuẹ rị imẹ igunrun ụnụ!”

26Umunẹ m, kị ẹnyi e mẹ nwan? Ụnụ zu, onyẹ-onyẹ nwọn ihiẹn ọ k'a s'ẹka mẹ: ikẹnkwọ ẹbụ rọ; ikẹnkwọ nkuzi, ikẹnkwọ ihiẹn Osolobuẹ ghọsị ịhịan, ikẹnkwọ ịsụ-asụsụ ọzọ, ikẹnkwọ ịnaye oku: e mẹ ni ihiẹn ile k'o dọn buli okukwe ịhịan elu.

27Omẹni wẹ k'e gi asụsụ ọzọ zi ozi, ya wụrụ madụ ẹbụọ — ọ karị ẹka, madụ ẹtọ. Wẹ ku ẹ onyẹ-ohu onyẹ-ohu. Kanị onyẹ sikọ d'a naye oku k'a rịrịrị a.

28Omẹni onyẹ k'a naye oku arịa, onyẹ te k'a sụnị ya gba nkịtịn imẹ ụka; ya gwama enwẹn ẹ lẹ Osolobuẹ oku imẹ obi.

29Madụ ẹbụọ mọbụ ẹtọ wẹ zi ụka ozi Osolobuẹ zi wẹ: ndị họdụnị wẹ gọn ntịn, e lele ihiẹn wẹ rị e ku.

30Omẹni Osolobuẹ a ghọsị onyẹ nọdị alị ihiẹn, onyẹ rị e ku oku ya kụsị.

31Ụnụ ile k'a sa nwan ẹka e zi ozi Osolobuẹ sị ụnụ zi — onyẹ ohu, onyẹ ohu, ịhịan ile a mụnrụn ihiẹn, ọ gba ịhịan ile umẹ.

32Ọzọzị, mmọn onyẹ amụma e zini Osolobuẹ ozi rị okpuru hụnyẹ — ọ k'a saẹka gba nkịtịn.

33Makẹni Osolobuẹ ẹlẹ Chuku isusu, kanị Chuku udọn lẹ usọnrọn k'ọ wụ. Nọkẹ kẹ ẹnyi dọn e mẹ ẹ imẹ ụka ndị-nsọ ile,

34ikpoho wẹ gba nkịtịn imẹ ụka. M'a ra nị wẹ ku oku. Wẹ bu enwẹn wẹ che okpuru. Iwu e kuzighọ ẹrịra.

35Omẹni wẹ nwọn ajụjụ, wẹ ru ụlọ wẹ jụ di wẹ ya, makẹni ihiẹn ifẹnrẹn k'ọ wụ nị okpoho rị e ku oku imẹ ụka.

36Ra ẹka ụnụ kẹ oku Osolobuẹ ghadẹ bidọn?! Ụnụ sụọ k'o ru ẹka?!

37Onyẹ ọwụlẹ sị n'ọ wụ onyẹ-amụma e zini Osolobuẹ ozi, n'o ze eze imẹ mmọn, ya ku ezioku nị ihiẹnni m rị e deni ụnụ wụ ihiẹn Onyẹ-nwọnni-ẹnyi ku.

38Onyẹ sị ẹlẹ ezioku, ya nwẹn ẹlẹ onyẹ ezioku.

39Umunẹ m, ibu amụma e zini Osolobuẹ ozi ya dụma ụnụ; kanị, egbọndọnkwọlẹ ni oyiye ịsụ-asụsụ ichẹn-ichẹn.

40Kama, e gi ni usọnrọn e mẹ ihiẹn ile, e mẹ ẹ n'ọ la ẹnya.

← Chapter 13 Jump to: Chapter 15 →