1 Corinthians 6

Ika 2018 Bible

← Chapter 5 Jump to: Chapter 7 →

1O ru ẹ egun a nị onyẹ kwerini wejẹn oku ya lẹ ibe ẹ ẹka ndị kwerilẹni, hụn nkẹ o gi jẹnburu ndị kwerini?

2Ụnụ a marịn nị ndị nke Osolobuẹ, jẹnkọ d'e kin ndị ụwa ikpe? Omẹni ụnụ k'e kin ụwa ikpe, ụnụ asakọ ẹka dọnzi oku mẹhụ ẹkẹrẹ?

3Ụnụ amarịn nị ẹnyi jẹnkọ d'e kin ndị mmọn-ozi ikpe? Ọrịwụzị ikpe ihiẹn ụwanị!

4O mẹdẹ nwan nị ikpe ihiẹn ụwanị seni ụnụ, kị ụnụ e bun'ẹ nwan e jẹnni ndị ọnụ wẹ rulẹni oku ụka dọnzi?

5Nị m ku ẹ kẹni ifẹnrẹn mẹ ụnụ! Ya wụ, onwọnni onyẹ marịn ihiẹn imẹ ụnụ k'a s'ẹka dọnzi oku rị ẹgbata ndị kwerini —

6hụn onyẹ kwerini gi e wejẹn ibe ẹ ẹka ndị kwerilẹni?!

7Eziẹ, nị ikpe rịdẹ imẹ igunrun ụnụ ghọsị nị e mẹrichanrịngụọlẹ wẹ ụnụ! Y'a ra gharị wẹ mẹ i eje-ihiẹn? Y'a ra gba nkịtịn wẹ mẹgbu i?

8Hụn nkẹ ụnụ e gi mẹ ẹrịra ụnụ nwẹn hụ e mẹdẹ ibe ụnụ eje-ihiẹn, e mẹgbudẹ wẹ — bụ umunẹ ụnụ rọ imẹ Kraịstị!

9Ụnụ amarịn nị ndị e mẹ eje-ihiẹn abanyekọ Alị-eze Osolobuẹ? Anịkwọlẹ ni wẹ dufie ụnụ! Ndị ughẹrẹ lẹ ndị e fe ihiẹn ọzọ lẹ ndị a zọ-ụkụ-eye-ọfịa lẹ ndị wẹ lẹ nwunyẹ ịhịan a ranhịn lẹ ikẹnnyẹ wẹ lẹ ikẹnnyẹ ibe wẹ e mẹ mgba lẹ

10ndị ohin lẹ ndị ẹnya-uku lẹ ndị manya lẹ ndị a kpọ iyi lẹ ndị a tụnarịn ịhịan ihiẹn ẹ abanyekọ Alị-eze Osolobuẹ.

11Ihiẹn ndịnị kẹ ụfọdụ imẹ ụnụ te wụ, kanị Osolobuẹ ẹnyi gi Mmọn-nsọ a chanchan ụnụ; o dọn ụnụ nsọ, gi ẹfan Jizọs Kraịstị Di-nwọnni-ẹnyi nabanhan ụnụ.

12“Onwọnni ihiẹn wụ njọ ẹnya m.” Ya kẹ w'e ku, kanị, ẹlẹ ihiẹn ile e ye ẹka. Ẹghẹẹ, “Onwọnni ihiẹn wụ njọ ẹnya m,” kanị emẹkọ m igbọn ihiẹn ọwụlẹ.

13“Ihiẹn-oriri wụ nke ẹfọ; ẹfọ wụ nke ihiẹn-oriri.” Kanị, Osolobuẹ k'e tikpọ wẹ ẹbụọ. Ẹhụ ẹlẹ nke ughẹrẹ, nke Di-nwọnni-ẹnyi rọ; Di-nwọnni-ẹnyi wụzị nke ẹhụ.

14Osolobuẹ gi ikẹn ẹ gha ọnwụn weli Onyẹ-nwọnni-ẹnyi; o k'e welizi ẹnyi nwẹn.

15Ụnụ amarịn nị ẹhụ ụnụ wụchanrịn mkpamkpa ẹhụ Kraịstị? Nị m gi nwan mkpamkpa ẹhụ Kraịstị họnrin mkpamkpa ẹhụ ịgbaraja? O mẹkọ!

16Ụnụ amarịn nị onyẹ ya lẹ ịgbaraja gba ranhịn lẹ ịgbaraja e họnringụọ ẹhụ ohu? Makẹni Ẹkụkwọ-nsọ sị, “Wẹ ẹbụọ e họnrin ẹhụ ohu.”

17Kanị, onyẹ hụn we enwẹn ẹ cheni Di-nwọnni-ẹnyi lẹ Di-nwọnni-ẹnyi e họnringụọ ohu imẹ-mmọn.

18Gbakwọnị nị ughẹrẹ ọsọ! Njọ ndị ọzọ ile ịhịan e mẹ ẹlẹ imẹ ẹhụ, kanị, onyẹ hụn ghẹrẹni mẹ ẹhụ a njọ.

19Ụnụ amarịndẹ nwan nị ẹhụ ụnụ wụ Ụlọ-nsọ hụn Mmọn-nsọ rị imẹ ụnụ bi, Mmọn-nsọ Osolobuẹ ye ụnụ, nị ẹlẹ ụnụ nwọn enwẹn ụnụ?

20Wẹ ṅọn ụnụ e ṅọn; e gi ni nwan ẹhụ ụnụ e ye Osolobuẹ ọghọ.

← Chapter 5 Jump to: Chapter 7 →