1 Corinthians 8

Ika 2018 Bible

← Chapter 7 Jump to: Chapter 9 →

1Nị ẹnyi ku nwan oku ihiẹn-oriri wẹ gi rụa mmọn. Ẹnyi a marịnghọ nị, “Ẹnyi ile marịn ihiẹn.” Okẹn ịmarịn-ihiẹn e mẹ ịhịan a fụshihụ elu, kanị ihiẹn-ọsụsụọ e mẹ ịhịan e sueshi elu nke-esi.

2Onyẹ hụn rị e ro nị ọ marịnghọ eke marịn ihiẹn o furu n'ọ marịn;

3kanị onyẹ hụn ihiẹn Osolobuẹ a sụọ kẹ Osolobuẹ marịn.

4O mẹ nwan nke iri ihiẹn-oriri wẹ gi rụa mmọn, ẹnyi a marịnghọ nị imẹ ụwa ile, onwọnni ihiẹn mmọn wẹ kpụ akpụ wụ, ẹnyi a marịnzịghọ nị Chuku ohu sụọ rị — ọzọ arịa.

5Ikẹnkwọ o nwọnghọ ihiẹn ndị w'e fe nọkẹ sị wẹ wụ Chuku, kẹ ndị rị elu-igwee kẹ ndị rị elu ụwa. Ezioku-ezioku, mmọn w'e fe barahị abarahị; ndị w'a kpọ “nna” barahịzịkwọ a barahị.

6Kanị, nke ẹnyi wụ nị Chuku ohu sụọ rị; ịya wụ Nẹdi ẹnyi; ihiẹn ile gha ẹka a a bịa; ịya kẹ ẹnyi rị a rịnị. Nna ohu rịzị, ya wụ Jesu Kristi; Osolobuẹ ke ihiẹn ile ghahan'a; ẹnyi rị a rị ghahan'a.

7Kanị, ẹlẹ ịhịan ile marịn ihiẹnni ile. Makẹni, o nwọnghọ ndị ịrụa-mmọn mụmarịngụ mbụ, wẹ riọlẹ ihiẹn-oriri wẹ gi rụa mmọn, obi e gbumẹ wẹ mgbu — makẹni obi wẹ ezeni.

8Bụ ihiẹn-oriri ara mẹ ẹnyi nọkunmẹ Osolobuẹ: ẹlẹ ẹnyi ka njọ omẹni ẹnyi erini, ẹlẹ ẹnyi ka mma omẹni ẹnyi e ri.

9Kpachanpụ nị nwan ẹnya amamgbe ụnụ e mẹghafe oku inwọnrin-enwẹn ụnụ okẹn, o họnrin ihiẹn umunẹ ụnụ zelẹni a kpọgburu.

10Makẹni, omẹni onyẹ nke Kraịstịnị obi ẹ zelẹni a hụn ịyụ hụn marịn ihiẹn ebe ị rị ụlọ-mmọn e ri ihiẹn-oriri, ọ kpọkinkọ obi ri ihiẹn-oriri wẹ gi rụa mmọn?

11Ya wụ, onyẹni zelẹni, onyẹ itu-Kraịstị ibe i, hụn Kraịstị gi ufiri ẹ nwụn, e gi nwan ufiri “amamihiẹn i ni” la iwi.

12Ụnụ gha e mẹ umunẹ ụnụ njọ ẹnịna, a han wẹ e mẹ ihiẹn obi wẹ zelẹni gi a rụ, Kraịstị kẹ ụnụ rị e mẹ njọ.

13O mẹ nwan nị ihiẹn m'e ri k'e mẹ nwẹnẹ m danye imẹ njọ, onwọnzini ogẹn m'e gi ri anụ ahụn m'e ri, amamgbe m'e mẹ nwẹnẹ m dan.

← Chapter 7 Jump to: Chapter 9 →