1 Corinthians 12

Ika 2018 Bible

← Chapter 11 Jump to: Chapter 13 →

1Umunẹ m, nị m ku nwan oku oyiye Mmọn-nsọ. M chọ nị ụnụ ghọta a ọhụnma.

2Ụnụ a marịnghọ nị kẹ ụnụ kelẹni kweri, nị e dufieghọ wẹ ụnụ d'e sọnmẹ mmọn ichẹn-ichẹn ghalẹni e ku oku.

3M chọ nwan n'o we ụnụ ẹnya nị onwọnni onyẹ gi ikẹn Mmọn Osolobuẹ e ku hụn a sị, “Jesu arị mma.” Onwọnzikwọnị onyẹ k'a saẹka sị, “Jesu wụ Di-nwọnni-ẹnyi” mmanị Mmọn-nsọ mẹ ẹ ku ẹ.

4Oyiye rị ụdị ichẹn-ichẹn, kanị Mmọn-nsọ ohu e ye wẹ ile.

5Ọrụn wẹ gi e fe ofufe rị ụdị ichẹn-ichẹn, kanị Nna ohu hụ kẹ w'a rụnnị wẹ.

6Ihiẹn wẹ gi ikẹn Osolobuẹ e mẹ rị ichẹn-ichẹn, kanị Osolobuẹ ohu ahụn sụọ rị ọrụn imẹ ndị ile rị e mẹni wẹ.

7Osolobuẹ ye onyẹ-onyẹ oyiye o gi a ghọsị ikẹn Mmọn-nsọ, kẹni o gi ẹ yeni ndị ụka ile ẹka.

8Mmọn-nsọ ye onyẹ ohu oyiye igi amamihiẹn e ku; Mmọn-nsọ ohu hụ yezikwọ onyẹ ọzọ oyiye o gi ku oku ịhịan e gi marịn ihiẹn ọ marịnlẹni.

9Mmọn-nsọ ohu hụ yezikwọ onyẹ ọzọ okukwe; Mmọn-nsọ hụ yezikwọ onyẹ ọzọ oyiye ịzụọ-emu lẹ ọrịa,

10yezikwọ onyẹ ọzọ oyiye ịrụn ọrụn-atụmẹnya, ye onyẹ ọzọ oyiye izi ozi Osolobuẹ, ye onyẹ ọzọ oyiye o gi a marịn ụdị mmọn rị ọrụn, yezikwọ onyẹ ọzọ oyiye ịsụ-asụsụ rị ichẹn-ichẹn, yezikwọ onyẹ ọzọ oyiye ịnaye oku.

11Mmọn-nsọ ohu hụ, ịya e mẹ ihiẹn ndịnị ile; o yesọnmẹ onyẹ-onyẹ oyiye ọ chọ n'o ye ẹ.

12Ẹhụ ohu nwọn mkpamkpa ẹhụ bu ọda, kanị mkpamkpa ndị hụ ile bu ọda wụhụ ẹhụ ohu. Ẹrịra k'ọ rịzị ẹhụ Kraịstị.

13Makẹni, Osolobuẹ gha ẹka Mmọn ohu bu ẹnyi ile che ẹhụ ohu, kẹ ndị Ju kẹ ndị ọzọ, kẹ igbọn kẹ ndị nwọn enwẹn wẹ, mẹ ẹnyi ile rarị Mmọn ohu ahụn.

14Ẹghẹẹ, ẹhụ ẹlẹ mkpamkpa ohu sụọ, kanị mkpamkpa bu ọda rọ.

15Ụkụ sị, “Makẹni ẹlẹ m ẹka, arị m ẹhụ,” o gikọ ọhụn wụbehi mkpamkpa ẹhụ.

16Ntịn sị, “Makẹni ẹlẹ m ẹnya, arị m ẹhụ,” o gikọ ọhụn wụbehi mkpamkpa ẹhụ.

17Omẹni ẹhụ ile te wụ ẹnya-ẹnya, kẹ nkẹ o gi nụ ihiẹn? Omẹni ẹhụ ile te wụ ntịn-ntịn, kẹ nkẹ o gi nụ ishin?

18Kanị k'o dọn nwan rị, Osolobuẹ e gigụọ ẹka a dọnmẹsọnmẹ mkpamkpa ile rị ẹhụ k'o dọn chọ a.

19Omẹni wẹ ile wụ mkpamkpa ohu, elebe nkẹ ẹhụ a rị?

20K'o dọn nwan rị, ẹhụ ohu sụọ rọ kanị mkpamkpa ẹhụ bu ọda.

21Ẹnya as'ẹka sị ẹka, “Onwọnni ihiẹn m gi i e mẹ!” Isi as'ẹka sị ụkụ, “Onwọnni ihiẹn m gi i e mẹ!”

22Kama, mkpamkpa ẹhụ ndị nọkẹ sị wẹ ka alụlụa, uwẹ wụ ndị rịkẹnmẹkẹdẹ mkpa ẹhụ.

23Mkpamkpa ẹhụ ndị ahụn ẹnyi e weri ni enwọn wẹ ọghọ kẹ ẹnyi e yedẹ ọghọ pụ-ichẹn; mkpamkpa ndị hụn furulẹni ẹnya e legha kẹ ẹnyi kadẹ ọhụnma e kpumẹ, amamgbe wẹ a hụn wẹ.

24Kanị mkpamkpa ẹhụ ndị ahụn nwọn ọghọ achọkanị ụdị idọnmẹ-ọhụnmanị. Ẹnịna kẹ Osolobuẹ dọnmẹ ẹhụ: o we ọghọ kanị ye mkpamkpa ndị nọ kẹ sị arị wẹ mma ẹnya,

25makẹ nkebe gha a rị ẹhụ, kama, nị mkpamkpa ọwụlẹ hụn ụzọ e lepụ ibe wẹ ẹnya ahanmahan.

26Omẹni mkpamkpa ohu nwọn nsọngbu, wẹ ile e buru nsọngbu hụ; ọ bọ mkpamkpa ohu, wẹ ile e sọn ẹ ghọghọ.

27Ụnụ ile wụ ẹhụ Kraịstị. Onyẹ-onyẹ imẹ ụnụ wụsọnmẹ mkpamkpa rịn'a.

28Imẹ ndị ụka, Osolobuẹ e tumẹgụọ ndị rị ichẹn-ichẹn: nke ibuzọ wụ ndị-ozi pụ-ichẹn; nke ẹbụọ wụ ndị-amụma lẹ ndị e zi ozi Osolobuẹ; nke ẹtọ wụ ndị-nkuzi; ndị ọzọ wụ ndị a rụn ọrụn-atụmẹnya, ndị a zụọ emu, ndị e yeni ndị ọzọ ẹka, ndị nwọn oyiye ịkị-ọkịkị lẹ ndị a sụ asụsụ rị ichẹn-ichẹn.

29Ịhịan ile wụ ndị-ozi pụ-ichẹn? Ịhịan ile wụ ndị-amụma Osolobuẹ e zi ozi? Ịhịan ile wụ ndị-nkuzi? Ịhịan ile a rụn ọrụn-atụmẹnya?

30Ịhịan ile nwọn oyiye ịzụọ-emu? Ịhịan ile a sụ asụsụ ichẹn-ichẹn? Ịhịan ile a naye oku?

31A chọ nị nwan oyiye ndị kanị. Kanị, nị m ghọsị ụnụ ụzọ ahụn kachanrịnnị.

← Chapter 11 Jump to: Chapter 13 →