1 Corinthians 9

Ika 2018 Bible

← Chapter 8 Jump to: Chapter 10 →

1Ẹlẹ mmẹ nwọndẹ nwan enwẹn m ra? Ẹlẹ onyẹ-ozi pụ-ichẹn kẹ m wụ? Ahụnnị m Jesu Di-nwọnni-ẹnyi? Ụnụ ẹlẹdẹ nwan ihiẹn m rụnpụhanị Di-nwọnni-ẹnyi ra?

2Ọsụọn'a nị ẹlẹ m onyẹ-ozi pụ-ichẹn ẹnya ndị ọzọ, m wụ onyẹ-ozi pụ-ichẹn imẹ igunrun ụnụ! Nị ụnụ rị imẹ Onyẹ-nwọnni-ẹnyi a ghọsịgụọ nị m wụ onyẹ-ozi pụ-ichẹn imẹ Onyẹ-nwọnni-ẹnyi.

3Ihiẹnni kẹ m rị a za ndị hụn rị e kin m ikpe.

4Ẹnyi eruni ndị wẹ k'e ye ihiẹn-oriri lẹ ọrịra?

5Ẹnyi eruni ndị wẹ lẹ inyẹnmẹ wẹ kwerini Jesu a wịhunmẹ nọkẹ ndị-ozi pụ-ichẹn ibe ẹnyi lẹ umunẹ Onyẹ-nwọnni-ẹnyi lẹ Kẹfasị wụ Pita?

6Ra mmẹ lẹ Banabasị sụọ rulẹni ndị a latọ ọrụn-ẹka nị wẹ e ye ẹnyi ihiẹn ẹnyi gi e bi?

7Ghọsịdẹle m onyẹ-agha gi ihiẹn ẹ a lụ agha! Ghọsịdẹle m onyẹ a rụn ugbo vaịnị hụn ghalẹni e ri mkpụrụ ọ mị? Ghọsịdẹle m onyẹ-ndu anụ ghalẹni a ra mirin-ẹran anụ hụ?

8M rịdẹ nwan e ku ihiẹnni kẹ ịhịan mmaka ra? Ẹlẹ ẹnịna kẹ Iwu ku ẹ?

9Makẹni, wẹ de ẹ imẹ Iwu Mozizi sị, “Ekẹnmẹlẹ okẹn-efin ọnụ ọ gha a zọchanpụha ọka-witi.” Efin kẹ Osolobuẹ rịdẹ e ro ra?

10Ẹlẹ ufiri ẹnyi k'o gi ku ẹ? Ẹnyi haịn wẹ gi de ẹ nụ. Makẹni, onyẹ rị a kụn ọka lẹ onyẹ rị a kụkpọnị furu nị w'a rụn e lee ẹnya n'o ru wẹ ẹka.

11Omẹni ẹnyi a kụngụọ ihiẹn imẹ-mmọn imẹ igunrun ụnụ, o hikẹ omẹni ẹnyi a ghọnarịn ụnụ ihiẹn wẹ gi e bi?

12Omẹni ụnụ hụ e ye ndị ọzọ rị a rụn ọrụn Osolobuẹ ihiẹn ndịnị runi wẹ, ẹlẹ ẹnyi k'o furu nị ụnụ ka e ye? Kanị ẹnyi adọtuni ụnụ ihiẹn ndịnị runi ẹnyi, kaka! Kama, ẹnyi hụ e dingbuchanrịn ihiẹn ile, makẹ ẹnyi gha e mẹ oziọma Kraịstị uke.

13Ụnụ amarịn nị Ụlọ-nsọ kẹ ndị a rụn ọrụn imẹ Ụlọ-nsọ gha e nwọnhẹn ihiẹn w'e ri? Ụnụ amarịn nị wẹ e keye ndị a rụn ọrụn ebe w'a nọ a chụn ẹjan ihiẹn wẹ gi chụn ẹjan?

14Ẹrịrazịkwọ, Di-nwọnni-ẹnyi e tigụọ iwu nị imẹ oziọma kẹ ndị e zi oziọma a nọ nwọnhẹn ihiẹn wẹ gi e bi.

15Kanị, adọtuni m kaka akpụ ihiẹn ohu imẹ ihiẹn ndịnị ile runi m. Ẹlẹ m rịdẹ nwan e de ihiẹnni nị ụnụ mẹni m wẹ. Ọ kadẹ m mma nị m nwụnhụn anwụnhụn karị nị ịhịan a napụ m ihiẹnni m gi a nyan isi.

16Makẹni, o mẹ nke izi-oziọma lẹ enwẹn ẹ, asa m ẹka gi ẹ nyan isi, ebe o mẹni iwu rọ nị m k'e zirịrị a. Ọ k'a jọdẹni m njọ omẹni ezini m oziọma:

17m wepụha obi m ile mẹ ẹ, nị m nwọnghọ ụgwọ-ọrụn; omẹni egini m obi m ile mẹ ẹ, ogbo m rọkwọ, m k'a rụnrịrị a.

18Kị wụzị nwan ụgwọ-ọrụn m? Ụgwọ-ọrụn m wụ nị m'e zi oziọma ọfẹ, m'a ra dọ wẹ ihiẹn ile runi m m gha e zi oziọma.

19Eziẹ rọ nị mmẹ nwọn enwẹn m. Kanị, e gigụọ m enwẹn m họnrin odibo ịhịan ile kẹni m wẹhẹzini Kraịstị ndị bu ọda.

20M ru ebe ndị Ju rị, e bimẹ m kẹ onyẹ Ju, kẹni m wẹhẹ ndị Ju d'a marịn Kraịstị; m ru ebe ndị rị okpuru Iwu Mozizi rị, e họnrin m onyẹ rị okpuru Iwu — kanị ẹlẹkwọ nị mmẹ lẹ enwẹn m rị okpuru Iwu — m'e mẹ ẹ kẹni m wẹhẹ ndị rị okpuru Iwu d'a marịn Kraịstị.

21M ru ebe ndị rịlẹni okpuru Iwu Mozizi rị, e bimẹ m kẹ onyẹ rịlẹni okpuru Iwu Mozizi, kẹni m hụn ụzọ wẹhẹ ndị rịlẹni okpuru Iwu d'a marịn Kraịstị. Ẹlẹkwọnị iwu Osolobuẹ arị a kị m, kanị m rị okpuru iwu Kraịstị.

22M ru ebe ndị zelẹni rị, e họnrin m onyẹ zelẹni, kẹni m hụn ụzọ wẹhẹ ndị zelẹni d'a marịn Kraịstị. E họnringụọ m ihiẹn ile rị ichẹn-ichẹn ebe ndị ile rị ichẹn-ichẹn rị, kẹni m gi ihiẹn ile rịnị zụọpụhadẹ ụfọdụ.

23M'e mẹ wẹ ile nị m kwadọn oziọma, kẹni m rị ndị k'e ri erere ẹ.

24Ụnụ amarịn nị wẹ e bu ọda a gba ọsọ, kanị onyẹ ohu sụọ e nwọnhẹn ihiẹn wẹ rị a zụọ. A gba nị nwan ọsọ hụn ụnụ e gi nwọnhẹn ihiẹn ahụn ụnụ rị a chụ.

25Onyẹ-ọsọ ọwụlẹ chọ n'o mẹri a napụsọnmẹ enwẹn ẹ ihiẹn ile rị ichẹn-ichẹn. Wẹ e mẹ ihiẹnni ile nị wẹ gi okpu mmaka e wiwini tu wẹ ugọn. Kanị, ẹnyi nwẹn rị a gbanị hụn ghalẹni e wiwi.

26Ya wụ, m'a ra gba ọsọ kẹ onyẹ marịnlẹni ihiẹn ọ chụkọ; m'a ra dụ ịkpa kẹ onyẹ rị a dụ ufere.

27Mba! M'e mẹshi ẹhụ m ikẹn, e mẹ ẹ kẹ igbọn — amamgbe m'e zigụ ndị ọzọ oziọma, mmẹ nwẹn a wụrụ onyẹ wẹ jụ, nị agbanị m ọsọ ọhụnma.

← Chapter 8 Jump to: Chapter 10 →