1 Corinthians 11

Ika 2018 Bible

← Chapter 10 Jump to: Chapter 12 →

1Esọn ni nzọmụkụ m kẹ m dọn e sọn nzọmụkụ Kraịstị.

2M rị a ja ụnụ mma ụnụ gi a nyanhan m imẹ ihiẹn ile, e kwọnkẹnmẹ omẹnalị ụka kẹ m dọn kuzi ụnụ ya.

3M chọ nwan nị ụnụ ghọta nị Kraịstị wụ onyẹ-isi okẹnnyẹ ọwụlẹ, di wụ onyẹ-isi nwunyẹ ẹ, Osolobuẹ wụ onyẹ-isi Kraịstị.

4Okẹnnyẹ ọwụlẹ kpumẹ isi ẹ e mẹ ekpere mọbụ e zi ozi Osolobuẹ rị e budan onyẹ-isi ẹ.

5Kanị, nwunyẹ ọwụlẹ bu isi-oghe e mẹ ekpere mọbụ e zi ozi Osolobuẹ rị e budan onyẹ-isi ẹ, makẹni ya lẹ ikpụnpụ ntutu wụ ohu.

6Omẹni okpoho ekpumẹkọ isi ẹ, ya kọpụ nwan ntutu ẹ. Omẹni ihiẹn-ifẹnrẹn rọ nị okpoho kọ ntutu ẹ mọbụ kpụnpụ a, ya kpumẹ ẹ nwan.

7Okẹnnyẹ efuruni n'o kpumẹ isi ẹ ebe o mẹ ni o yi Osolobuẹ e yi lẹni ọ nọkin ẹnya Osolobuẹ; kanị okẹnnyẹ kẹ hụn okpoho nọkin ẹnya a.

8Makẹni, aghanị wẹ okpoho wepụha okẹnnyẹ, kama, wẹ gha okẹnnyẹ wepụha okpoho;

9egini wẹ ufiri okpoho ke okẹnnyẹ, kama wẹ gi ufiri okẹnnyẹ ke okpoho.

10Ya haịn o gi mẹ ni okpoho k'e nwọnrịrị ihiẹn rị a isi o gi a ghọsị nị o nwọnghọ onyẹ ọ rị okpuru ẹ — makẹ ufiri ndị mmọn-ozi.

11Kanị, imẹ Di-nwọnni-ẹnyi, okẹnnyẹ rị okpoho mkpa, okpoho rị okẹnnyẹ mkpa.

12Makẹni, kẹ wẹ dọn gha okẹnnyẹ mẹmẹpụha okpoho, ẹrịra kẹ wẹ dọnzi gha okpoho mụpụha okẹnnyẹ. Bụ ihiẹn ile gha ẹka Osolobuẹ bịa.

13Gi ni ẹka ụnụ lele ihiẹnni: ọ hụghọ mma nị okpoho e bu isi-oghe a gwa Osolobuẹ oku?

14Wẹ k'a gwazị ụnụ a gwa nị ntutu okẹnnyẹ rukẹ ọ wụrụn'a ihiẹn-ifẹnrẹn?

15Kanị ntutu okpoho ru, ihiẹn-ọghọ rọ, makẹni wẹ ye ẹ ntutu n'o gi e kpumẹ.

16Onyẹ chọ nwan n'ọ dọ ihiẹnni, ya marịn nị ẹnyi enwọn ụzọ ọzọ ẹnyi gi e mẹ ẹ — kẹ ẹnyi kẹ ndị ụka Osolobuẹ ile.

17Imẹ ihiẹn ndịnị m jẹnkọ d'e ku, ajakọ m ụnụ mma. Makẹni ụnụ zu, eje-ihiẹn k'o buhẹ ẹlẹ ihiẹn rị mma.

18Nke ibuzọ, a nụgụọ m nị ụnụ gha e zu ozuzu ụka, nị nkebe a rịsọnmẹ imẹ ụnụ. O nwọnghọ kẹ m dọn gi ẹ dọn.

19W'a rụ ụka a, nghọta rị ichẹn-ichẹn hụn wẹ gi a marịn ndị rị e mẹ ihiẹn Osolobuẹ chọ k'a rị imẹ igunrun ụnụ.

20Kanị, ihiẹn ahụn ụnụ e ri, ụnụ zu, ẹlẹkwọ Oriri-nsọ Di-nwọnni-ẹnyi, kaka!

21Makẹni o ru ẹ, onyẹ-onyẹ e rimẹ nke ẹ, echekọ wẹ ndị ọzọ, nke wụnị ụfọdụ e buru ẹgụn bụ ụfọdụ a ragbugụọ enwẹn wẹ, ọ hụ a tụ wẹ!

22Kịnị! Ụnụ enwọn ụlọ ụnụ nọ e ri, a ra? Ra ụnụ rị e legberi ụka Osolobuẹ, e gbe ifẹnrẹn e ye ndị nwọnlẹni ihiẹn ọwụlẹ ihun? Kị m k'a gwa nwan ụnụ? Nị m jama ụnụ mma? Ajakọ m ụnụ!

23Makẹni, ihiẹn m nwọnhẹn ẹka Di-nwọnni-ẹnyi, ya kẹ m kuzi ụnụ: nị ebe wẹ rị e ri ihiẹn-oriri imẹ uhinhin hụ wẹ jẹnkọ d'e re ẹ, nị Di-nwọnni-ẹnyi wụ Jesu weri brẹdi,

24ọ kpanmịngụ Osolobuẹ, ọ nọ bebe ẹ; ọ nọ sị, “Ọnwan wụ ẹhụ m wẹ gi ufiri ụnụ ye; e mẹ ni ihiẹnni e gi ẹ a nyanhan m.”

25Ẹrịra k'o mẹzi kẹ wẹ rigụ ihiẹn-oriri ẹnyasị ahụn: o weri mkpu manya hụ, ọ nọ sị, “Mkpuni wụ nkwerigbama ọhụn hụ wẹ gi ẹdeke m biye ẹka. E mẹ ni ihiẹnni: ogẹn ọwụlẹ ụnụ ra a, e gi n'ẹ a nyanhan m.”

26Ya wụ nị, d'e ru mgbe Di-nwọnni-ẹnyi bịa, ogẹn ọwụlẹ ụnụ gi e ri brẹdini, a rarị ihiẹn rị mkpuni, ụnụ rị e ku ẹ nị Di-nwọnni-ẹnyi a nwụnghọ.

27Onyẹ hụn gi nwan agụngụn rịlẹni mma ri brẹdi Di-nwọnni-ẹnyi mọbụ ra ihiẹn rị mkpu Di-nwọnni-ẹnyi rị e mẹ ẹhụ lẹ ẹdeke Di-nwọnni-ẹnyi njọ.

28Ya wụ nị onyẹ ọwụlẹ k'e lekpọgụ enwẹn ẹ, o kebe ri brẹdi hụ mọbụ rarị ihiẹn rị imẹ mkpu hụ.

29Makẹni, onyẹ ri brẹdi hụ mọbụ rarị ihiẹn rị imẹ mkpu hụ bụ ọ gbayeni ẹhụ Di-nwọnni-ẹnyi rị e riri ikpe-ọmụma, a rarị ikpe-ọmụma, e ye enwẹn ẹ isi.

30Ya rị e buhẹni ndị bu ọda ndụn-ọgụgụ lẹ emu, o nwọnghọdẹ ndị nwụnhụngụnị.

31Omẹni ẹnyi lekpọgụ enwẹn ẹnyi d'e rimẹ, Di-nwọnni-ẹnyi eyekọ ẹnyi afụnfụn.

32Kanị, Di-nwọnni-ẹnyi ye ẹnyi afụnfụn, mkpịnsịn k'o gi ẹ a fịan ẹnyi kẹni ọ rịnị ẹnyi mma, amamgbe ẹnyi e sọn ụwa narịn ikpe-ọmụma.

33Umunẹ m, ụnụ zu nwan nị ụnụ ri Oriri-nsọ, e cheri ni ibe ụnụ.

34Onyẹ ẹgụn gi, ya rigụ ihiẹn-oriri iwe ẹ, amamgbe ụnụ e zu, o buhẹ ikpe-ọmụma. Oku ndị họdụnị, m bịa, a gwa m ụnụ k'o ka rị.

← Chapter 10 Jump to: Chapter 12 →