2 Samuel 17

Ika 2018 Bible

← Chapter 16 Jump to: Chapter 18 →

1Ahitofẹlụ nọzị sị Absalọm, “Nị m họrị madụ nnụ-uku mmẹbụọ (12,000); e jẹn m d'a chụ Defidi uhinhinni;

2e kunrun m'ẹ ebe ẹhụ rọgụ a, ebe ọ tụlẹni ẹnya a; a karịm'a ẹka, ndị ile ya lẹ wẹ wị a gba a tọ. Eze sụọ kẹ m k'e gbu,

3e wekinhẹnni m'i ndị alịnị ya lẹ wẹ wị. Onyẹ hụ ị chọkọ nwụnhụnọlẹ, ịhịan ile e kinhẹn; onwọnni ihiẹn k'e mẹ ndị ile họdụnị.”

4Iroro hụ ọ tụ nọ sụọ Absalọm lẹ ndị-ichẹn Izrẹlụ ile.

5Kanị, Absalọm nọ sị wẹ, “Kpọhazị nị Hushaị onyẹ Aki, nị ẹnyi nụ ihiẹn o k'e ku.”

6Ogẹn Hushaị gi bịa, Absalọm nọ gwa a iroro Ahitofẹlụ tụ, sị a, “Ọnwan wụ ndụnmọdụn Ahitofẹlụ ye. Nị ẹnyi mẹ ihiẹn o ku? Omẹni ọ danyeni, kị wụ uche i?”

7Hushaị nọ sị Absalọm, “Iroro hụnnị Ahitofẹlụ tụ arị mma.

8Y'a marịnghọ nẹdi i lẹ ndị-agha a — ọka-agha kẹ wẹ wụ; w'a lụ ọgụn kẹ eje-anụ wụ biẹ rị ọfịa wẹ narịn ụmụ a. Wezụkadẹ ọhụn, nẹdi i marịn ẹnya agha ọda-ọda, o sọnkọ itu ẹ nọdị uhinhinni.

9Ikẹnkwọ ọ warịgụọdẹ nwan imẹ okporo mọbụ ụzọ ọzọ. Omẹni ịya buzọ maye ndị-agha ị, onyẹ ọwụlẹ nụn'a k'a sị, ‘E gbuchanrịn wẹ ndị-agha Absalọm ile.’

10Ogẹn ahụn, obi e dẹnhindẹ ndị odogun-agha — ọsụọn'a nị ndị obi ze kẹ ẹwọrọ, makẹni Izrẹlụ ile a marịngụọ nị nẹdi i wụ odogun-agha, nị egun arị ndị ịya lẹ wẹ wị ẹnya.

11“Lee ndụnmọdụn m: Ndị Izrẹlụ ile gbegbegbe wẹ bịa d'e kunrun i, ghakwọrị ndị rị Danị d'e ru ndị rị Biẹshẹba, ẹrịra wẹ buhan ọda kẹ akp'ẹjan rị mkpẹnrẹn ohimin, ịyụ lẹ enwẹn i a kịrị wẹ shi agha.

12Ẹnyi a maye ẹ ọgụn, ebe-lẹ-ebe ẹnyi nọlẹ hụn a; ẹnyi e ziẹnkpumẹ ẹ kẹ ebe igirigi nọ e ziẹnkpu alị. Kẹ ịya kẹ itu ẹ, onwọnni onyẹ ẹnyi k'e gbuhọdụ.

13Ọ gbaban imẹ obodo, ndị Izrẹlụ ile e weri eriri bịa obodo hụ, ẹnyi a dọkpụn obodo hụ, dọ a ye ọdanmgbugbu d'e runi onwọnzini kaka akpụrụ-iyi ohu k'a họdụnị.”

14Absalọm lẹ ndị Izrẹlụ ile nọ sị, “Iroro Hushaị onyẹ Aki tụ ka nke Ahitofẹlụ mma.” Ihiẹnni mẹ makẹni ịya kẹ Osolobuẹ kwademẹ n'o gi ẹ kpọrọpụ ezigbo iroro hụ Ahitofẹlụ tụ, kẹn'ọ hụn ụzọ mẹ Absalọm okẹn-ihiẹn.

15Hushaị nkẹ nọ jẹn d'a gwa ndị nchụn-ẹjan wụ Zadọkụ lẹ Abiata, sị wẹ, “Ahitofẹlụ a dụngụọ Absalọm lẹ ndị-ichẹn Izrẹlụ ọdụn sị wẹ mẹ ọnwan lẹ ọnwan, kanị mmẹ nwẹn nọ sị wẹ ẹnịna lẹ ẹnịna.

16Zi ni nwan ozi jẹnni Defidi ozigbo; sị n'a, ‘Fetukwọ Iyi Jọdanị ozigbo, aranhịnkwọlẹ ebẹhụ wẹ gha e fetu ẹ imẹ alị ọkpọ-nkụn — amamgbe w'e luepụ kẹ eze kẹ ndị ile ịya lẹ wẹ wị.’ ”

17Jonatanị lẹ Ahimaazị, ụmụ ndị nchụn-ẹjannị rị Mirin-Rogẹlụ ogẹnni. Nwagbọọ ohu wụ odibo wụ onyẹ hụn e wejẹnni wẹ ozi, wẹ nwẹn e jẹn d'a gwa Eze wụ Defidi; ẹrịra kẹ wẹ e mẹ ẹ amamgbe w'a hụn wẹ ebe wẹ rị a banye imẹ obodo.

18Kanị, o nwọnghọ okorọbịa hụnnị wẹ kẹ wẹ jẹnkọ nwan d'a hụn Defidi, ọ nọ jẹn d'a gwa Absalọm. Ya wẹ ẹbụọ nọ pụ ozigbo, shi iwe okẹnnyẹ ohu rị Bahurim. Okẹnnyẹni nwọn ọmị iwe ẹ. Ya wẹ nọ nyinban imẹ ọmị hụ.

19Nwunyẹ ẹ nọ weri ihiẹn kpumẹ ọnụ ọmị, tanma ọka elu ẹ. Onwọnni onyẹ marịn ihiẹn rị ebẹhụ.

20Ogẹn ndị Absalọm zi gi bịa d'e kunrun okpoho hụ iwe ẹ, wẹ nọ jụma a, “Elebe kẹ Ahimaazị lẹ Jonatanị rị?” Okpoho hụ nọ sị wẹ, “E fetugụọ wẹ Iyi udu-mirin.” Ndị hụ a chọgụ wẹ, onwọnni onyẹ wẹ hụn, wẹ nọ lakin Jerusalẹm.

21Ogẹn ndị hụ gi pụgụ, wẹ ẹbụọ nọ gha ọmị pụha, jẹnmẹ d'a gwa Eze wụ Defidi. E ru w'ẹ, wẹ nọ sị a, “Buli n'i fetu Iyi Jọdanị ozigbo; Ahitofẹlụ a tụgụọnị wẹ iroro ihiẹn wẹ sikọ d'e mẹ i.”

22Ya Defidi lẹ ndị ile ya lẹ wẹ wị nọ buli, fetumẹ Iyi-Jọdanị. Eki gini d'e fọn, wẹ ile e fetuchanrịngụọ Iyi-Jọdanị.

23Mgbe Ahitofẹlụ gi hụn a nị egini wẹ ndụnmọdụn a rụn ọrụn, ọ nọ nyinrin jaki ẹ, shi iwe ẹ rị obodo wẹ wụ Gilọnụ. O dọnmẹgụ ikpụlọ a ọhụnma, ọ nọ hogbu enwẹn ẹ. Ẹrịra k'o dọn nwụnhụn, wẹ nọ li ẹ ebe wẹ li nẹdi ẹ.

24Defidi wẹ e fetugụ Iyi Jọdanị, wẹ nọ shi Mahanaim, Absalọm nkẹ nọ weri ndị Izrẹlụ ile fetuzikwọ Iyi-Jọdanị d'a lụsọn wẹ agha.

25Absalọm e tumẹgụọ Amasa onyẹ-isi agha Izrẹlụ gi nọkin ẹnya Jụabụ. Nẹdi Amasa wụ okẹnnyẹ Izrẹlụ ohu w'a kpọ Jeta, hụn lụ Abigẹlụ nwa Nahashi; Abigẹlụ wụ nwẹnẹ-okpoho Zeruaya, nnẹ Jụabụ.

26Ndị Izrẹlụ lẹ Absalọm nọ weri ọnọdị agha imẹ alị Gilẹdị.

27Ogẹn Defidi gi ru Mahanaim, Shọbi nwa Nahashi onyẹ obodo Raba, isi-obodo ndị Amọnụ lẹ Makiri nwa Amiẹlụ onyẹ Lo-Dẹba lẹ Bazilaị onyẹ Gilẹdị hụn wụ onyẹ obodo Rogẹlim alị Gilẹdị

28nọ kpọnhẹnsọnmẹ ni Defidi wẹ ihiẹn w'e gi ranhịn lẹ arịa lẹ ugbẹgbẹ. Wẹ buhẹzikwọ ihiẹn-oriri, kẹ ọka-witi kẹ ọka-bali; ọka wẹ gweriẹn lẹ ọka wẹ ghe; ẹgwa-mmaka lẹ ẹgwa-lẹntilụ;

29mirin-ẹnwụn lẹ bọta; atụnrụn lẹ mirin-ẹran efin kpụkpụrụnị w'e ri. Wẹ ile kẹ wẹ wẹhẹ kẹni Defidi lẹ ndị ya lẹ wẹ wị ri. Makẹni wẹ sị, “Atụ alị-ọkpọnkụnnị ndịnị rị, ẹgụn rị a gụn wẹ, ndụn a gụgụọ wẹ, ẹkpịrị rị a kpọ wẹ nkụn.”

← Chapter 16 Jump to: Chapter 18 →