2 Samuel 22

Ika 2018 Bible

← Chapter 21 Jump to: Chapter 23 →

1Ogẹn Osolobuẹ gi zụọpụhachanrịngụ Defidi ẹka ndị-iṅẹnrẹn ẹ ile lẹ ẹka Sọlụ, Defidi nọ gi oku ndịnị bụnị Osolobuẹ ẹbụ.

2Ọ sị, “Osolobuẹ wụ Okẹn-ọmụma e che m nche, ebe m'a gbaban lẹ onyẹ hụn a zụọpụhanị m;

3Chuku wụ Okẹn-ọmụma m, hụn m'a gbaban; akpaịn m lẹ mpịn hụn a zụọpụhanị m. Ịya wụ ebe m nọ e nwọn nchedọn, ebe m'a gbaban lẹ onyẹ a zụọpụhanị m — ịyụ zụọpụha m ẹka ndị egbu-lẹ-egbu.

4A kpọku m Osolobuẹ, hụn furu w'a ja mma, a wanahịn m ndị-iṅẹnrẹn m.

5Ọnwụn fihunmẹ m nọkẹ ẹbi-mirin; ntikpọ e rukpumẹ m lekẹ mirin-iyi;

6alị-mmọn a kụhunmẹ m nọkẹ ẹgbụn, ọnwụn a kpọ m ihun.

7A nọ m imẹ ụya kpọku Osolobuẹ; a kpọcheni m Chuku m. Ọ gha Ụlọ-NSỌ a nụ olu m, ẹkwan m e ru ẹ ntịn.

8Alị e zinzin, mẹhunmẹ; igwere e mẹhunmẹ ru ebe ọ gha, e mẹhunmẹ ọda-ọda makẹni ize rị e ze ẹ.

9Ẹnwụnrụn hụ a gha a imi a lọpụha; ọkụn e ri ihiẹn hụ a gha a ọnụ a pụha, ikeke ọkụn hụ a gha ebe ọ rị a pụha.

10O kewa igwere hidan; igwere gitọnị k'ọ tụkwasị ụkụ.

11O nyinrin mmọn-ozi nọkẹ ẹshin, fehẹ; o gi ufere họnrin nku.

12Ọ gi ẹkpa-ishi kpumẹ enwẹn ẹ — ishi igwere gitọnị.

13Ukpẹ hụ e ti ebe Osolobuẹ rị amụma hụ a gha a e bepụha.

14Osolobuẹ a gha igwere gi olu akpabọ ku oku, olu Onyẹ ahụn Kachanrịnnị a hansọnmẹ.

15Ọ gi ụta a gba ọbara bu ọda, ndị-iṅẹnrẹn a gbayịya; o gi amụma rị e beni, mẹri wẹ.

16Akpakalị ohimin nọ pụha ifọn; iyetọ ụwa a pụha ifọn; makẹni Osolobuẹ bigbọ ohimin hụn o gi tahị; makẹni o kun uzun ẹ kpu ẹ, ọ kọrọ

17Osolobuẹ nọ gha elu tịnpụ ẹka, kwọndọn m; ọ gha ogbu mirin dọpụha m.

18Ọ zụọpụha m ẹka eṅẹnrẹn hụn kin akwanran, ẹka ndị iwe, hụn te ka m ẹka.

19M rị imẹ nsọngbu kẹ wẹ maye m, kanị Osolobuẹ nọ yeni m ẹka.

20O wepụha m, bu m che ebe ẹhụ nọ fu m; ọ gbapụha m makẹni ihiẹn m sụọ a.

21Osolobuẹ e gigụọ ezi-omumẹ m sọn m o gigụọ ufiri nị ẹka m rị ọchan kụ m ụgwọ-ọrụn.

22Makẹni m hụ e sọn ụzọ Osolobuẹ; emẹni m eje-ihiẹn ghahanị ịgbakịtọ Chuku m azụụn.

23Iwu ẹ ile kẹ ẹnya m rị, apanị m iwu ndị o ye.

24Enwọn m nkọrịanị ẹnya a, e dọnmẹgụọ m enwẹn m amamgbe m'e mẹ njọ.

25Osolobuẹ a kụgụọ m ụgwọ makẹ ezi-omumẹ m, makẹni ẹka m rị ọchan ẹnya a.

26Onyẹ we enwẹn ẹ kwan'ị, y'e we enwẹn i kwan'a; onyẹ mẹchanrịnn'ị hụn ọ marịn, y'e mẹchanrịnn'a hụn ị marịn;

27Onyẹ gi ezioku sọn i, y'e gi ezioku sọn ẹ; kanị onyẹ gi ghẹrẹ-ghẹrẹ-ghẹrẹ sọn i, y'e gi akọ sọn ẹ.

28Y'a zụọpụha ndị e wetu enwẹn wẹ alị, kanị ị rị e ke ndị mpache nke, n'ị hụn ụzọ wetu wẹ alị.

29Euu Osolobuẹ, ịyụ wụ ukpẹ m; Osolobuẹ e mẹ ẹkpa-ishi m rị imẹ ẹ e họnrin ukpẹ.

30Eyemẹka ị kẹ m gi a s'ẹka a lụsọn igunrun ndị-agha ọgụn; makẹni Chuku nọyeni m, m'a sadẹ ẹka e fe mgbọn.

31O mẹ nke Chuku, ụzọ a zuchanrịn oke; oku ọnụ Osolobuẹ enwọn ntụpọ. Akpaịn kẹ Osolobuẹ wụnị ndị ile gbagbọnin'ẹ.

32Onyẹ wụ Chuku wezụka Osolobuẹ? Onyẹ wụ Ọmụma wẹ gi e che ẹhụ karị Osolobuẹ ẹnyi?

33Osolobuẹ wụ onyẹ e ye m ikẹn, mẹ ụzọ m zu oke.

34O mẹ ụkụ m e be nkanran, rịkẹ nke ele, m gi a saẹka e wuzo ebe jẹn elu.

35O zin m agha; m'a sadẹ ẹka a gba ụta igwe-bronzu.

36Y'e yegụọ m akpaịn i gi e mẹri; makẹni y'e tukun e yeni m ẹka kẹ m gi mẹ okẹn-ịhịan.

37Y'a kwashịanị m ụzọ m, makẹ ụkụ m gha e kpopụ.

38A chụ m ndị iṅẹnrẹn m ọsọ, gweriẹn wẹ, egbehutọnị m e we m tikpọgụ wẹ.

39E gweriẹnchanrịn m wẹ, asanị wẹ ẹka lihi; okpuru ụkụ m kẹ wẹ danye.

40Y'e ye m ikẹn gi lụ agha; y'e mẹ ndị lụsọnni m gbuni m osekpu.

41Y'e mẹ ndị-iṅẹnrẹn m e gbehutọ, gbama ọsọ, e tikpọ m ndị e we iwe m.

42A kpọ wẹ d'e yeni wẹ ẹka, kanị onwọnni onyẹ bịa d'a zụọpụha wẹ — a kpọku wẹ Osolobuẹ, ọ zanị.

43E gweriẹn m wẹ kẹ uzunzun rị alị; a sụ m wẹ, a zọ m wẹ ụkụ kẹ w'a zọ ịkpọtọ rị ogbe.

44Y'a zụọpụhagụọ m ẹka ndị nke m hụn bunụmanị m; y'e mẹgụọ m onyẹ hụn a kị ndị alị ichẹn-ichẹn. Ndị m marịnlẹni rị nwan okpuru m,

45egun m hụ nwan a tụgbu ndị alị ọzọ; wẹ nụhụ banyeni m, e mẹ wẹ ihiẹn m ku,

46ndụn a gụ wẹ ile, e gi wẹ egun pụhasọnmẹ ebe wẹ te nọ e che ẹhụ.

47Osolobuẹ rị ndụn! Ịja-mma ya rịnị Ọmụma m gi e che ẹhụ! Ọghọ ya rịnị Chuku, Ọmụma, Onyẹ-nzụọpụha m!

48Ịya wụ Chuku hụn e mẹgwarịnịnị m, hụn e bu alị ichẹn-ichẹn e che okpuru m;

49onyẹ hụn gbapụha m ẹka ndị-iṅẹnrẹn m. Ịyụ mẹ m karị ndị iwe m e we, gha ẹka ndị egbu-lẹ-egbu gbapụha m.

50Ufiri ẹ, m k'a ja yụ wụ Osolobuẹ mma — imẹ igunrun ndị alị ichẹn-ichẹn. M k'e gi ẹbụ ja ẹfan ị mma.

51O yesọnmẹ eze ọ họrị okẹn mmẹri; o nwọnsọnmẹ ihiẹn-ọsụsụọ onyẹ hụn o tumẹ hụn wụ Defidi, kẹ ya kẹ ụmụ a ile jẹnrin ejẹn.”

← Chapter 21 Jump to: Chapter 23 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible Ika Bible Study Bible →