2 Samuel 8

Ika 2018 Bible

← Chapter 7 Jump to: Chapter 9 →

1O mẹgụ, Defidi nọ mẹri ndị Filistia, bu wẹ che okpuru ẹ; ọ narịn ndị Filistia alị Mẹtẹgi-Ama hụn te rị wẹ ẹka.

2Defidi e mẹrizighọ ndị Mụabụ. O mẹrigụ wẹ, ọ nọ sị wẹ dinẹ alị, gi mgbata eriri masọnmẹ wẹ ebẹhụ wẹ dinẹ: ọ ma mgbata ẹbụọ, o gbu ndị rịn'a, dọnmẹ ndị hụn mẹ ẹ mgbata ẹtọ ndụn. Ya ndị Mụabụ nọ ban okpuru Defidi, a tụhan'a ụtụ-isi.

3Defidi e mẹrizighọ Hadadeza nwa Rehobu, eze Zoba, ogẹn Hadadeza gi jẹn d'a kịmazị alị ndị rịsọnmẹ mkpẹnrẹn Iyi-Yufretisi o te rị a kị.

4Defidi nọ nọ imẹ agha hụ narịn Hadadeza ụgbọ-ẹshin agha ọgụn-iri kwasị nnụ-uku ohu-lẹ-mkpikpi (1,700), lẹ ndị-agha e nyinni wẹ, ọ narịnzị a madụ nnụ-uku ọgụn (20,000) hụn gi ụkụ e jẹn agha. Ọ nọ tụbepụchanrịn ẹshin ile a dọkpụn ụgbọ-ẹshin ndị hụ akwanran mkpụkụ ibe azụụn, latọ ọgụn-isẹn sụọ.

5Ogẹn ndị Aram alị Damaskọsụ gi bịa d'e yeni Hadadeza eze Zoba ẹka, Defidi nọ gbu madụ nnụ-uku ẹbụọ kwasị ọgụn (22,000) imẹ wẹ.

6Ọ nọ bu ndị-agha tọ imẹ alị-eze ndị Aram alị Damaskọsụ nị w'e leban wẹ ẹnya, ndị Aram nọ ban okpuru Defidi, a tụhan'a ụtụ-isi. Osolobuẹ mẹsọnmẹ Defidi mẹri ebe ọwụlẹ o jẹn.

7Defidi kpọnrin akpaịn goru ndị-isi alị Hadadeza wẹ, kpọnhẹn wẹ Jerusalẹm.

8Eze wụ Defidi kpọnrinzikwọ bronzu bugbu enwẹn ẹ ọda imẹ Bẹta lẹ Bẹrotaị, alị ndị rị ẹka Hadadeza.

9Mgbe Towu hụn wụ eze Hamatị gi nụ nị Defidi e mẹrigụọ ndị-agha Hadadeza ile,

10ọ nọ zi nwa a okẹnnyẹ wụ Joram d'e kele Eze wụ Defidi, liyen'ẹ ẹka o gi mẹri agha ọ lụsọn Hadadeza hụn ya lẹ Towu rị a lụ agha ketekete. Joram kpọnhẹn ihiẹn siliva lẹ goru lẹ bronzu.

11Eze wụ Defidi nọ we ihiẹn ndị ahụn kwachanrịnnị Osolobuẹ — k'o dọn mẹ siliva lẹ goru ndị ọ ghasọnmẹ alị ichẹn-ichẹn o mẹri kpọnhẹn —

12kẹ Ẹdọm kẹ Mụabụ kẹ ndị Amọnụ kẹ ndị Filistia kẹ ndị Amalẹki. O gizighọ ihiẹn ndị ọ narịn eze Zoba wụ Hadadeza nwa Rehobu kwachanrịnnị Osolobuẹ.

13Ẹfan Defidi kpọgbarị ogẹn o gi mẹrigụ ndị Ẹdọm nnụ-uku mmẹsatọ (18,000) imẹ Ọdanmgbugbu-Nnu lụaha.

14Defidi nọ butọsọnmẹ ndị-agha imẹ Ẹdọm ile, ndị Ẹdọm ile nọ rị okpuru Defidi. Osolobuẹ mẹ Defidi mẹri ebe ọwụlẹ o jẹn.

15Defidi hụ a kị ndị Izrẹlụ ile, e mẹni ndị nke ẹ ihiẹn rị mma lẹ ihiẹn furuni.

16Jụabụ nwa Zeruaya wụ onyẹ-isi agha; Jehoshẹfatị nwa Ahiludu wụ onyẹ e dọnmẹ ẹkụkwọ;

17Zadọkụ nwa Ahitubu lẹ Ahimẹlẹkị nwa Abiata wụ ndị nchụn-ẹjan; Sẹraya wụ akanwe;

18Bẹnaya nwa Jehoyada kị ndị Kẹrẹtị lẹ ndị Pẹlẹtị — ndị Defidi gi e che ẹhụ; ụmụ Defidi ikẹnnyẹ rịzị ndị e yen'ẹ ẹka a kị.

← Chapter 7 Jump to: Chapter 9 →