2 Samuel 4

Ika 2018 Bible

← Chapter 3 Jump to: Chapter 5 →

1Ogẹn Ish'boshẹti nwa Sọlụ gi nụ nị Abna a nwụntọ Hibrọnụ, ndụn a gụ a, obi eruzini Izrẹlụ ile alị.

2Ish'boshẹti nwọn madụ ẹbụọ a kịn'a ndị a maye ndị alị ọzọ a kwahan'a ihiẹn wẹ. Ẹfan ohu wụ Baana, ẹfan hụn ẹbọ wụ Rekabụ. Wẹ ẹbụọ wụ ụmụ Rimọnụ onyẹ Biẹrọtụ ebọn Bẹnjamini. Wẹ a gụn Biẹrọtụ e ye imẹ Bẹnjamini

3makẹni ndị Biẹrọtụ gbashi Gitaim d'e biri; wẹ bihụ ebẹhụ nọkẹ abịamabịa d'e ru tannị.

4(O nwọn nwa Jonatanị nwa Sọlụ ohu ụkụ ẹbụbụọ nwụnhụn. Kẹ nwata hụ rị nwa ahụa isẹn kẹ ozi gha Jezriẹlụ bịa nị Sọlụ nẹdi ẹ kanị lẹ Jonatanị nẹdi ẹ a nwụnhụn. Hụn a pan'a nọhụ parị a n'ọ gbama ọsọ, kanị ebe ọ rị a hụhụ n'ọ gbapụ, ọ nọ dannahịn a, dan ngụrọ. Ẹfan nwatanị wụ Mẹfiboshẹti).

5Omẹgụ, Rekabụ lẹ Baana ụmụ Rimọnụ onyẹ Biẹrọtụ hụ nọ shi iwe Ish'boshẹti; ogẹn anwụn gi e kẹnrẹn kẹ wẹ gi ru ebẹhụ, ogẹn Ish'boshẹti gi rị e zu ikẹn efinnaị.

6Ya wẹ nọ banye imẹ-imẹ ụlọ Ish'boshẹti nọkẹsị wẹ chọha ọka-witi, wẹ nọ zu ẹ agbada ẹfọ, gepụ.

7Imẹ ụlọ ebe Ish'boshẹti dinẹ elu-bẹdi kẹ wẹ banye d'e kunrun ẹ. E zugụ w'a ọpịa-agha ẹfọ, gbugụ a, wẹ nọ bepụ a isi. Ya wẹ nọ buru isi ẹ, gi abalị hụ ile ghashi ụzọ Ọdanmgbugbu Araba, fetu.

8Wẹ nọ buhẹni eze wụ Defidi isi Ish'boshẹti imẹ Hibrọnụ, sị eze, “Lee isi Ish'boshẹti nwa eṅẹnrẹn i wụ Sọlụ hụn te nwan ikẹn ẹ n'o gbu i. Eze nwẹni m, Osolobuẹ e mẹgwarịgụọ Sọlụ lẹ ụmụ a tannị ihiẹn wẹ mẹ i.”

9Kanị Defidi nọ sị Rekabụ lẹ Baana nwẹnẹ ẹ, ụmụ Rimọnụ onyẹ Biẹrọtụ, “Ma Osolobuẹ, hụn zụọpụha m imẹ nsọngbu m ile,

10ogẹn okẹnnyẹ ohu gi bịa d'e kunrun m imẹ Zik'lagị, sị m, ‘Sọlụ a nwụnhụn,’ e ro n'o wẹhẹni m ozi rị mma, e kwọndọn m'ẹ, gbu ẹ. Ịya kẹ m gi kụ a ụgwọ ozi ẹ!

11Ọrịwụzị ụnụ, ndị eje-ịhịan gbu onyẹ nwọnlẹni ihiẹn o mẹ tọ iwe ẹ, ebe ọ rị elu-bẹdi ẹ — achọkọ m nwan ẹdeke ẹ ẹka ụnụ, wepụ ụnụ elu ụwa?!”

12Ya Defidi nọ sị ndị-agha a gbu wẹ, wẹ nọ gbu wẹ. Japụ wẹ ẹka lẹ ụkụ, kọn ẹhụ wẹ ye elu, mkpẹnrẹn mirin Hibrọnụ. Wẹ nọ buru isi Ish'boshẹti li ẹ ye ili Abna imẹ Hibrọnụ ebẹhụ.

← Chapter 3 Jump to: Chapter 5 →