2 Samuel 7

Ika 2018 Bible

← Chapter 6 Jump to: Chapter 8 →

1Ogẹn eze wụ Defidi gi kwabangụ obi-eze ọhụn a, Osolobuẹ e mẹrigụn'a ndị-iṅẹnrẹn ẹ ile fihunmẹn'ẹ, ye ẹ ezumikẹn,

2ọ nọ sị onyẹ-amụma wụ Natanị, “E lee m: m bi nwan obi-eze ma mma wẹ gi osisi-ọma sida tụn, kanị Ẹkpẹti-nsọ Chuku hụ imẹ ọdụ.”

3Natanị nọ sị eze, “Mẹ ihiẹn ọwụlẹ rị ị obi; Osolobuẹ hụ ị azụụn.”

4Uhinhin ahụn, Osolobuẹ nọ gwa Natanị oku, sị,

5“Jẹn d'a gwa odibo m wụ Defidi, sị, ‘Ọnwan wụ ihiẹn Osolobuẹ ku: Ịyụ jẹnkọ nwan d'a tụnnị m ụlọ m k'e bi ra?

6Ebituni m ụlọ — ghakwọrị ogẹn gi wepụha ndị Izrẹlụ imẹ Ijiptu d'e ru tannị. Ojẹnhunmẹ-ojẹnhunmẹ kẹ m'e jẹnhunmẹ, ọdụ-ọdụ k'e m'e bi.

7Ebe ile mmẹ lẹ ndị Izrẹlụ ile jẹnpụ, o nwọntughọ onyẹ-ndu ọwụlẹ m sị du ndị nke m wụ Izrẹlụ hụn m jụtu kẹ kị haịn o gilẹni tụnnị m ụlọ sida, ụlọ ma mma?’

8“Sị nwan odibo m Defidi: Lee ihiẹn Osolobuẹ ihiẹn ile rị okpuru ẹ ku. Ọ sị: M gha ọfịa wẹ nọ a zụn anụ lẹ ebe i rị e du anụ wẹhẹ i d'a kịma ndị nke m wụ Izrẹlụ.

9A nọyegụọnị m'ị ebe ọwụlẹ i jẹn, e mẹrigụọnị m'ị ndị iṅẹnrẹn i ile. M jẹnkọ nwan d'e mẹ ẹfan ị kpọ nọkẹ ẹfan ndị kachanrịn okẹn-ịhịan e mẹ elu-ụwa.

10M k'e ye ndị nke m wụ Izrẹlụ ebe sikọ d'a wụ nke wẹ, kụn wẹ ye nị wẹ nwọnrin ebe obibi ẹka wẹ — e yebehi wẹ wẹ nsọngbu. Eje-ndị abịangbukọzị wẹ kẹ wẹ dọn mẹ isi-ibuzọ

11lẹzi kẹ wẹ dọn rị e mẹ kete m'e tumẹlẹni ndị nke m wụ Izrẹlụ ndị-ndu. M k'e mẹzikwọ ndị-iṅẹnrẹn i ile yebehi i nsọngbu. “Osolobuẹ rị a gwa ị nị Osolobuẹ lẹ enwẹn ẹ k'a tụnn'ị ụlọ.

12Ogẹn i zugụ, ị nwụnhụngụ, laburu ndị nẹdi i wẹ d'e zu ikẹn, m k'e wepụha nwa ị n'o rikin i eze, nwa ị hụn k'a gha ẹhụ ị pụha; m k'e mẹ alị-eze ẹ kẹnrẹn.

13Ịya wụ onyẹ hụn k'a tụn Ụlọ-nsọ Ẹfan m jẹnkọ d'a rị; m k'e mẹ ukpo alị-eze ẹ tọ jẹnrin-ejẹn.

14M k'a wụ nẹdi ẹ, ya nwẹn a wụrụ nwa m. O mẹfie, e gi m ịhịan ye ẹ afụnfụn n'ọ marịn ihiẹn, e gi m ịhịan fịan a mkpịnsịn.

15Kanị, onwẹni ogẹn m'e gi nwọnbehi ihiẹn-ọsụsụọ a kẹ m dọn mẹ Sọlụ hụn m wepụ buche i.

16Ikpụlọ i lẹ alị-eze i k'a rịsọnmẹ ihun m, ukpo-eze i k'a tọ jẹnrin-ejẹn.”

17Natanị nọ gwachanrịn Defidi okuni ile Osolobuẹ gwa a.

18Eze wụ Defidi nọ banye d'a nọdị alị ihun Osolobuẹ; ọ nọ sị: “Euu Osolobuẹ nwọn ihiẹn ile, onyẹ wụ mmẹ? Kịnị kẹ ezi-lẹ-ụlọ m wụ — hụn i gi we m ru ebeni ile?

19Ọ nọkẹ sị ọhụn ehidẹni i ẹnya, Osolobuẹ nwọn ihiẹn Ile, y'e kugụọzị nwan oku ihiẹn i jẹnkọ d'e mẹni ikpụlọ mmẹ wụ odibo i ihun. Euu Osolobuẹ nwọn ihiẹn ile, ẹkanị k'i gi e sọn ịhịan?

20“Kị Defidi k'a sazị nwan ẹka sị ị? Ịyụ wụ Osolobuẹ nwọn ihiẹn ile a marịnghọ odibo i.

21Y'e mẹgụọ okẹn ihiẹnni kẹni i mẹzu nkwa i kwe lẹn'i mẹ uche i, ị nọ nwan mẹ odibo i marịn a.

22“Euu Osolobuẹ nwọn ihiẹn ile, y'e hikẹkwọ ogbe-o! Onwọnni onyẹ rịkẹ ịyụ; ịyụ sụọ wụ Chuku — kẹ ẹnyi dọn gi ntịn ẹnyi nụ.

23Elee ndị nọ kẹ ndị nke ị wụ Izrẹlụ — alị ohu hụ ị hụn Chuku jẹn d'a gbapụha gi, wẹ họnrin ndị nke ẹ, gi ẹ nwọnrin ẹfan, rụnsọnmẹ okẹn ihiẹn a tụ ẹnya ghahanị ịchụpụsọnmẹ ndị alị ichẹn-ichẹn lẹ mmọn ndị wẹ rị e fe, buche ndị nke i hụn ị gha alị Ijiptu gbapụha?

24Y'e gichanrịngụọ ndị nke i wụ Izrẹlụ họnrin ndị nke i jẹnrin-ejẹn; ịyụ lẹ enwẹn i wụ Osolobuẹ a wụrụgụọ Chuku wẹ.

25“Dodo nwan Osolobuẹ wụ Chuku, mẹzu nkwa ị rị nwan e kwe banyeni mmẹ wụ odibo i lẹ ikpụlọ m; mẹ ẹ gha jẹnrin-ejẹn. Mẹ ẹ hụ k'i dọn ku,

26kẹni ẹfan ị nwọnferi ọghọ — wẹ k'e gi rị a sị, ‘Osolobuẹ ihiẹn ile rị okpuru ẹ wụ Chuku Izrẹlụ nke-esi.’ Ikpụlọ odibo i wụ Defidi k'e gi ẹ rịsọnmẹ ihun i!

27“Euu Osolobuẹ Nwọn Ikẹn Ile, Chuku Izrẹlụ, y'e mẹgụọ odibo i marịn ihiẹnni — ebe ị nọ sị, ‘M k'a tụnn'ị ụlọ.’ Ya kẹ egun gi nị odibo i mẹ ekpere rịọ ị ihiẹnni.

28Euu, Osolobuẹ Nwọn Ihiẹn Ile, ịyụ wụ Chuku! Oku i wụ oku wẹ gi e dọn ẹnya — ị nọ nwan kwe odibo i nkwa ezigbo ihiẹn ndịnị wẹ.

29Dodo, gọzi nwan ikpụlọ odibo i kẹn'ọ rịsọnmẹ ihun i; ịyụ wụ Osolobuẹ nwọn ihiẹn ile e kugụọ a; ya wụ nị ngọzi i jẹnkọ d'e sọnsọnmẹ ikpụlọ odibo i jẹnrin-ejẹn.”

← Chapter 6 Jump to: Chapter 8 →