Judges 5

Ika 2018 Bible

← Chapter 4 Jump to: Chapter 6 →

1Ụhụọhịn ahụn, Debọra lẹ Barakị nwa Abinụam nọ bụ ẹbụnị:

2“Ebe ndị-ndu Izrẹlụ nọ buru ụzọ; ebe ndị họdụnị nọ wepụha obi za oku-agha — ọjịja-mma ya rịnị Osolobuẹ!

3Ụnụ ndị-nze, nụ nị ọnwan! Ụnụ ndị-ọkịkị, gọn ni ntịn! M k'a bụnị Osolobuẹ ẹbụ; ẹghẹẹ, m k'a bụ ẹbụ; m k'a kụnị Osolobuẹ egu, Osolobuẹ, Chuku Izrẹlụ.

4Euu Osolobuẹ, ogẹn i gi gha Sẹẹ buli, ogẹn i gi gha alị Ẹdọm jẹnpụha, alị nọ zinzin, igwere nọ zue mirin; igwere nọ hutu mirin.

5Ugu ichẹn-ichẹn nọ zinzinni Osolobuẹ, Osolobuẹ, Chuku Saịnaị, e zinzinni wẹ Osolobuẹ Chuku Izrẹlụ.

6Ogẹn Shamga, nwa Anatị — ogẹn Jaẹlụ, ndị-afịa aghazịnị ụzọ; ozue kẹ ndị e jẹn alị-ịhịan a gha.

7W'ara bizi ụmụ-alị Izrẹlụ, d'e runi mmẹ wụ Debọra a pụha, pụha kẹ nnẹ imẹ Izrẹlụ.

8Ogẹn ndị Izrẹlụ gi họrị ihiẹn ọzọ femẹ, agha nọ ru ọnụ-mgbọn obodo. Ahụnnị wẹ akpaịn imẹ Izrẹlụ, a hụnnị wẹ obo, kẹ imẹ ndị-agha Izrẹlụ nnụ-uku ọgụnnaị!

9Obi rị a sụọ m ụsụọ makẹ ndị-ndu Izrẹlụ, ndị wepụha obi za oku-agha. Ọjịja-mma ya rịnị Osolobuẹ!

10Ụnụ ndị rị e nyinhunmẹ jaki ọchan ma mma, a gbama ẹkwa rị mma elu anyịnyan-jaki, e gi a nọdị, lẹ ụnụ ndị gi ụkụ e jẹn — gọn ni ntịn

11ihiẹn ndị ẹbụ rị a bụ ebe wẹ nọsọnmẹ a kwọ mirin: wẹ rị ebẹhụ e ku oku ihiẹn-ọma Osolobuẹ mẹ, ihiẹn-ọma ndị-agha Izrẹlụ mẹsọnmẹ. O ru, ndị nke Osolobuẹ nọ zu iko-agha ọnụ-mgbọn obodo ile.

12Tẹnhin, Debọra; tẹnhin! Tẹnhin, n'ị bụye ẹbụ; tẹnhin! Lihi, Barakị! Kpọnrin ndị ị nwụnrụn imẹ agha, ịyụ, nwa Abinụam!

13Ndị họdụnị nọ bịa d'e kunrun ndị isi wẹ; ndị nke Osolobuẹ e kọnrin agha d'e kunrun m.

14Ndị Ifrem hụ imẹ wẹ, alị Ifrem te wụ nke ndị Amalẹki; ndị Bẹnjamini rịzị ndị sọnmẹn'i; ndị Makiri ebọn Manasẹ wẹhẹ ndị ọkị-agha; ndị Zẹbulọnụ e wẹhẹ ndị e bu ọkpọ — ndị e detu ẹfan ndị-agha;

15Ndị-isi ebọn Isaka sọnhẹn Debọra agha hụ; ẹghẹẹ, ebọn Isaka e sọnjẹnghọ Barakị agha hụ, sọn ẹ zụnshi ọdanmgbugbu agha hụ. “Kanị ebọn Rubẹni mẹsọnmẹ ẹlẹẹ-ẹlẹẹ.

16Kị ụnụ nọdịnị e lepụ atụnrụn ụnụ ẹnya, e gọn ntịn ọfịfị ndị e du anụ gi a hị anụ? Ẹghẹẹ, ebọn Rubẹni mẹ ẹlẹẹ ọda.

17Ndị Gilẹdị a pụhanị, a tọ wẹ nfetu Iyi-Jọdanị wẹ rị. Ndị Danị nwan? Kị wẹ tọzịnị ẹhụ ụgbọ-mirin wẹ? Ndị Asha nkẹ a tọ alị wẹ mkpẹnrẹn Ohimin, tọ ebẹhụ ụgbọ-mirin e ziẹntọ.

18“Kanị ndị Zẹbulọnụ bu ndụn wẹ che ọb'ẹka; Ndị Naf'tali mẹzikwọ ẹrịra ọgbọ-agha hụ elu ugu.

19“Ndị-nze a bịaghọ, a lụghọ wẹ ọgụn ahụn; ndị-nze Kenaanị a lụghọ ẹnyi ọgụn imẹ Taanakị, mkpẹnrẹn mirin-nta obodo Mẹgido; kanị agha hụ eyeni wẹ siliva buru, o yeni wẹ ihiẹn ọwụlẹ kwarị.

20Kokisẹ a ghaghọdẹ elu-igwere lụ ọgụn; a nọghọ wẹ ote wẹ rị igwere lụsọn Sisẹra agha.

21Iyi Kishọnụ e huruzighọ ndị o huru, Iyi Kishọnụ, iyi ẹdẹi ahụn! Umẹ-ndụn m, nje nwan; atụlẹ egun!

22O ru, ẹshin-agha nọ gbahama, ụkụ wẹ hụ a zụn okẹn-ụzụn, ẹshin ka-ẹhụ Sizera kịha agha hụ a wụha.

23Mmọn ozi Osolobuẹ sị, ‘Bụ nị Mẹrọzụ ọnụ! Bụ nị ndị Mẹrọzụ eje-ọnụ, nị abịanị wẹ d'e yeni Osolobuẹ ẹka, yeni Osolobuẹ ẹka lụsọn ndị odogun-agha.’

24Jaẹlụ ka ikpoho ile ngọzi e nwọn, Jaẹlụ nwunyẹ Hẹba onyẹ Kẹni — imẹ ikpoho ile bi ụlọ w'a kpụkpọrị.

25Mirin kẹ Sisẹra rịọ a, kanị mirin ẹran-efin k'o ye ẹ; afẹrẹ w'e gi ye ụmụ-dẹin ihiẹn-oriri k'o gi wẹhẹn'ẹ mirin ẹran-efin gwọtọnị.

26Ẹka a nọ shi mkpụkpọ ọdụ, ẹka-nni ẹ e shi hama onyẹ-ọrụn; ọ kụ Sisẹra ya, kụkpọpụ a isi, kụkpụkpọ a isi ụsụọ ntịn; ẹghẹẹ, ọ kụpu ẹ ya.

27Ọ wụlụa ye ẹ ụkụ, ọ dan; o fiẹnrin ebẹhụ. Ẹghẹẹ, ọ wụlụa ye ẹ ụkụ, dan; ọ dantọ ebe ọ nọ wụlụa, nwụnhụn.

28Nnẹ Sisẹra nkẹ e bu ẹnya tụma windo, e lee k'ọ lala; ọ nọ ẹhụ windo hụ wẹ chọ mma, e goo, ‘Kị ụgbọ-ẹshin ẹ biehanzịnị ẹnịna d'a lụa? Kị ụgbọ-ẹshin ẹ biezini mbie d'a hanma k'o mẹ mbụ?’

29Ikpoho ndị e fen'ẹ kachanrịn uche e nwọn a za a; ọ tọ a sị enwẹn ẹ,

30‘E mẹrigụọnị wẹ kwarị ihiẹn keri?! Ikẹnkwọ wẹ rị e keri ihiẹn wẹ kwarị — onyẹ-agha ọwụlẹ ịgbagba ohu-ohu mọbụ ẹbụọ-ẹbụọ; nke Sisẹra k'a wụrịrị ẹkwa ọma nụ, ẹkwa ndị wẹ kpayesọnmẹ ihiẹn-mma — ẹkwa ndị wẹ kpayesọnmẹ ihiẹn-mma ọda-ọda hụn m k'a tụ ye olu m! Ẹlẹẹ hụnnị ile kẹ wẹ jẹnkọ d'e kpọnlụa agha?’

31“Euu Osolobuẹ, ndị iṅẹnrẹn i ile wẹ la iwi ẹrịra! Kanị, ndị ihiẹn i a sụọ wẹ nọ kẹ ẹnyanwụn, ebe ọ nọ wachanrịn!” Agha hụ e bigụ, udọn nọ rị alị ahụa ọgụnnaị.

← Chapter 4 Jump to: Chapter 6 →