Judges 9 — Ika 2018 Bible

1Abimẹlẹkị nwa Jeru-Baalụ jẹn Shẹkẹm d'e kunrun umunẹ nnẹ ẹ ikẹnnyẹ, sị wẹ lẹ ndị ile rị ebọn nnẹ ẹ,

2“Jụ nị ndị Shẹkẹm ile: ‘Elee hụn ka ụnụ mma? Nị ikẹnnyẹ iri kwasị ọgụn-ẹtọ ile Jeru-Baalụ mụ kịma ụnụ ra nị onyẹ ohu kịma ụnụ?’ Nyanhankwọ nị nị mmẹ lẹ ụnụ wụ ẹdeke ohu.”

3Mgbe umunẹ nnẹ ẹ gi gwan'a ndị isi Shẹkẹm ihiẹn ndịnị ile, wẹ nọ kweri ni Abimẹlẹkị kẹ wẹ sikọ d'e sọnmẹ, wẹ sị, makẹni “Nwẹnẹ ẹnyi rọ.”

4Wẹ nọ gha ụlọ-mmọn Baalụ-Bẹriti weye ẹ akpụ siliva iri kwasị ọgụn-ẹtọ. Ọ nọ gi ẹ weri ndị ịkpata chọkọ egho; wẹ nọ sọnmẹ ẹ.

5Ọ nọ shi iwe nẹdi ẹ rị Ọfra, gbuchanrịn umunẹ ẹ ikẹnnyẹ, ụmụ Jeru-Baalụ, iri kwasị ọgụn-ẹtọ, elu ọmụma ohu. Kanị Jọtam, hụn wụ okẹnnyẹ ikpanzụụn Jeru-Baalụ mụ, awanahịnghọ makẹni ọ warị awarị.

6Ya ndị-isi Shẹkẹm ile lẹ ndị Bẹt-Milo nọ zu ẹhụ okẹn-osisi okuu rị ebẹhụ wẹ zumẹ ọmụma wẹ gi a rụa mmọn imẹ Shẹkẹm, nị wẹ hụn ụzọ kin Abimẹlẹkị eze.

7Ogẹn wẹ gi gwa Jọtam ihiẹnni, ọ nọ wuzo elu Ugu Gẹrizim weshi olu elu sị wẹ, “Gọn ni m ntịn, ụnụ ndị Shẹkẹm, kẹni Osolobuẹ gọn ụnụ ntịn:

8Ụhụọhịn ohu, osisi ile nọ chọ nị wẹ nwọnrin eze; ya wẹ nọ sị osisi olivu, ‘Họnrin eze ẹnyi.’

9Osisi olivu nọ sị wẹ, ‘Nị m mụbehi ezigbo ofigbọn-olivu m, hụn wẹ gi e ye mmọn lẹ mmadụ ọghọ, d'a kịmahụ osisi ndị ọzọ?’

10“Ya wẹ nọ sị osisi figi, ‘Bịa d'e họnrin eze ẹnyi.’

11Kanị, osisi figi nọ sị wẹ, ‘Nị m mịbehi mkpụrụ m rịgbu enwẹn ẹ mma, a sụọgbu enwẹn ẹ, d'a kịmahụ osisi ndị ọzọ?’

12“Ya wẹ nọ sị vaịnị, ‘Bịa d'e họnrin eze ẹnyi.’

13Kanị, vaịnị nọ sị wẹ, ‘Nị m mụbehi manya m, hụn e mẹ ẹfọ a sụọ kẹ mmọn kẹ mmadụ ụsụọ d'a kịmahụ osisi ndị ọzọ?’

14“Ya osisi ile nọ nwan sị ogun, ‘Bịa d'e họnrin eze ẹnyi.’

15“Ogun nọ sị wẹ, ‘Omẹni ezioku-ezioku nị ụnụ chọ nị m wụrụ eze ụnụ, bịa nị nwan d'a nọdị igungun m; kanị, omẹni ẹlẹ ẹrịra, ọkụn ya gha mmẹ wụ ogun pụha d'e ripụ osisi sida alị Lẹbanọnụ!’

16“Jọtam nọ nwan sị wẹ: Omẹni ihiẹnni ụnụ mẹ e zinringhọ; omẹni ọ hụghọ mma — ebe ụnụ nọ kin Abimẹlẹkị eze; omẹni ẹkanị ụnụ gi sọn Jeru-Baalụ lẹ ezi-lẹ-ụlọ a hụ mma, omẹni ihiẹn ụnụ mẹ ẹ e furughọ a —

17ebe o mẹ ni nẹdi m lụnị ụnụ ọgụn, be isi ẹ ye ọb'ẹka n'ọ zụọpụha ụnụ ẹka ndị Midianị

18(kanị, ụnụ e bugụọ nwan nụmanị ikpụlọ nẹdi m tannị, nọ elu ọmụma ohu gbuchanrịn ikẹnnyẹ iri kwasị ọgụn-ẹtọ ọ mụ, weri Abimẹlẹkị, nwa igbọn ẹ mụn'a, kin eze ndị Shẹkẹm makẹni nwẹnẹ ụnụ rọ) —

19omẹkwọnị ihiẹn furuni, rị mma, kẹ ụnụ mẹ Jeru-Baalụ lẹ ikpụlọ a tannị, Abimẹlẹkị ya mẹ ụnụ ghọghọ, ụnụ nwẹn e mẹ ẹ ghọghọ!

20Kanị omẹni ihiẹn ụnụ mẹ arị mma, ọkụn ya gha imẹ Abimẹlẹkị pụha, ripụ ụnụ ndị Shẹkẹm lẹ Bẹt-Milo; ọkụn ya ghazịkwọ imẹ ụnụ ndị Shẹkẹm lẹ Bẹt-Milo pụha, ripụ Abimẹlẹkị.”

21Ya Jọtam nọ gbama ọsọ, gbashi Biẹ d'e biri ebẹhụ, gbapụnị Abimẹlẹkị nwẹnẹ ẹ.

22Ahụa ẹtọ kẹ Abimẹlẹkị kịpụ Izrẹlụ,

23Osolobuẹ nọ zihẹ eje-mmọn d'e bu nkebe che ẹgbata Abimẹlẹkị lẹ ndị-isi Shẹkẹm; ndị Shẹkẹm nọ bu Abimẹlẹkị mbubu-azụụn.

24Osolobuẹ mẹ ihiẹnni makẹ njọ hụ wẹ mẹ ụmụ Jeru-Baalụ iri kwasị ọgụn-ẹtọ, ogbugbu wẹ gbu wẹ. Osolobuẹ mẹ ẹ n'o gi ẹ mẹgwarị nwẹnẹ wẹ wụ Abimẹlẹkị lẹ ndị Shẹkẹm hụn yen'ẹ ẹka gbu umunẹ ẹ.

25Ebe wẹ rị a lụsọn Abimẹlẹkị ọgụn, ndị isi Shẹkẹm nọ zi ikẹnnyẹ d'a warịsọnmẹ elu-ugu, e zunarịn onyẹ ọwụlẹ ghafekọnị ihiẹn ẹ. Ozi ihiẹn rị e mẹni nọ ru ebe Abimẹlẹkị rị.

26Gaalụ nwa Ebẹdi lẹ umunẹ ẹ ikẹnnyẹ kwalụa Shẹkẹm, ya ndị Shẹkẹm nọ bu enwẹn wẹ ye ẹ.

27Ndị Shẹkẹm a ghọgụ vaịnị rị ugbo wẹ ahụa hụ, pịnpụhagụ manya a, wẹ nọ shi ụlọ-mmọn wẹ d'e ri oriri. Ebe wẹ rị e ri, a ra, wẹ nọ kpọma Abimẹlẹkị iyi.

28Ya Gaalụ nwa Ebẹdi nọ sị, “Onyẹ wụdẹ Abimẹlẹkị?! Elee hụn biri ya lẹ ndị Shẹkẹm, hụn o gi kị ẹnyi? Ẹlẹ nwa Jeru-Baalụ rọ?! Ẹlẹ ya tumẹ Zẹbulu ni ebeni?! Nị ẹnyi feni onyẹ Shẹkẹm kẹti-kẹti, onyẹ ẹbozo Hamọ nẹdi ndị Shẹkẹm!! Kị ẹnyi k'e feni Abimẹlẹkị?

29K'o furu mmẹ rị a kị ndịnị! Nkẹ m'e gbupụ Abimẹlẹkị; nkẹ m'a sị a, ‘Kpọpụha ndị-agha ị ile, y'a pụha nị ẹnyi lụ agha!’ ”

30Ogẹn Zẹbulu hụn rị a kị obodo hụ gi nụ ihiẹn ndịnị Gaalụ nwa Ebẹdi rị e ku, olulu nọ bu ẹ ọda-ọda.

31Ọ nọ zi ozi jẹnni Abimẹlẹkị hụn rị Aruma, sị a, “Lekwọ a nị Gaalụ nwa Ebẹdi lẹ umunẹ a bịagụọkwọ Shẹkẹm, wẹ rị a kpasu ndị obodo nị wẹ bunụmanị ị.

32O ru nwan imẹ uhinhin, yụ lẹ ndị agha ị a bịakwọ d'a warị ibẹka ugbo.

33Eki fọn, hụn anwụn gihụ wa, ụnụ a zụnbanhan imẹ obodo. Gaalụ lẹ itu ẹ pụha d'e sọn ụnụ lụ ọgụn, y'e mẹ ẹ ihiẹn i k'a sa ẹka mẹ ẹ.”

34Ya Abimẹlẹkị lẹ ndị-agha a ile nọ gi imẹ uhinhin buli, shi mkpẹnrẹn Shẹkẹm; e kebe wẹ enwẹn wẹ itu ẹnọ, warịsọnmẹ ebẹhụ.

35Gaalụ nwa Ebẹdi gha imẹ obodo ahụn pụha d'e wuzohụ ọnụ-mgbọn obodo hụ ogẹn Abimẹlẹkị lẹ ndị agha a gi gha ebe wẹ warịsọnmẹ pụla.

36Gaalụ a hụn wẹ, ọ nọ sị Zẹbulu, “Lee ẹ, o nwọn ndị ghasọnmẹ elu-ugu hidanla!” Zẹbulu nọ sị a, “Onyinyọn ugu k'ị rị a kpọ ịhịan.”

37Gaalụ nọzị sị a, “Mba; o nwọnkwọ ndị gha ahanmahan alị lala. Itu ohu ghazị ibẹka Osisi Ndị Agba-ẹfa lala.”

38Ebẹhụ kẹ Zẹbulu nọ nwan sị a, “Elebe isi nwẹn ile ị rị a nyan rị nwan? Ịyụ hụn sị, ‘Onyẹ kẹ Abimẹlẹkị wụ hụn ẹnyi a nọdị okpuru ẹ?’ Ẹlẹ ndịnị wụ ndị ị rị e kuja oku wẹ? Jẹn nwan d'a lụsọn wẹ ọgụn.”

39Ya Gaalụ nọ kịpụha ndị Shẹkẹm d'a lụsọn Abimẹlẹkị agha.

40Abimẹlẹkị nọ chụ a; ndị Shẹkẹm bu ọda rụ ẹhụ imẹ agha hụ, a dantọsọnmẹ wẹ ụzọ d'e ru ọnụ-mgbọn obodo hụ.

41Omẹgụ, Abimẹlẹkị nọ lakin Aruma d'a nọdị; Zẹbulu nkẹ nọ chụpụ Gaalụ lẹ umunẹ ẹ imẹ Shẹkẹm.

42Eki e fọn, ndị Shẹkẹm nọ kọnrin agha shi ibẹka ugbo, Abimẹlẹkị nọ nụ a.

43Ya kẹ Abimẹlẹkị nọ weri ndị-agha a, ke wẹ itu ẹtọ, warị imẹ ugbo e che wẹ. Ogẹn o gi hụn wẹ kẹ wẹ gha imẹ obodo pụla, ọ nọ pụha d'a maye wẹ.

44Abimẹlẹkị lẹ itu ya lẹ wẹ wị a zụnpụha, wuzo ẹhụ ọnụ-mgbọn obodo hụ; itu ẹbụọ họdụnị nọ zụnburu ndị rị imẹ ugbo lẹ ọfịa, gbu wẹ.

45Abimẹlẹkị nọ gi ụhụọhịn hụ gbegbegbe lụsọn obodo hụ agha d'e ru n'o weri ẹ, gbu ndị rịn'a. O tikpọ obodo ahụn ru alị, fufe ẹ nnu, wiwipụ alị a.

46Ndị isi ile rị ụlọ-uku Shẹkẹm a nụọlẹ ihiẹn rị e mẹni, gbaban ebẹhụ kachanrịn e ze imẹ ụlọ-mmọn Ẹl-Bẹriti.

47Abimẹlẹkị a nụ nị ndị-isi ile zu ọnụ ebẹhụ.

48Ya lẹ itu ẹ nọ shi Ugu-Zalụmọnụ. Abimẹlẹkị nọ weri anyụn, kwarị agala nkụn, dịda wẹ ye uvun ẹ azụụnnị lẹ azụụnnị. Ya ọ nọ sị ndị ya lẹ wẹ wị, “Ozigbo! Mẹ ni ihiẹn ụnụ hụn m mẹ!”

49Ya wẹ ile nọ kparị nkụn, sọnmẹ Abimẹlẹkị. Wẹ nọ kpọn ẹ ye ẹhụ-ẹjan ebẹhụ zegbu enwẹn ndị ahụn gbaban, bu ọkụn che ẹ. Ya kẹ ndị ile rị ụlọ-nche Shẹkẹm nọ nwụnhụn: ihiẹn nọ kẹ ikẹnnyẹ lẹ ikpoho nnụ-uku.

50Abimẹlẹkị nọzị shi Tẹbẹzi, kehunmẹ ẹ, weri ẹ.

51Kanị, ụlọ-nche uku ohu ze ọhụnma-ọhụnma rị imẹ obodo hụ, ikẹnnyẹ lẹ ikpoho ile, ndị obodo hụ ile họdụnị nọ gbaban imẹ ẹ, kpọkin enwẹn wẹ ye, shi ibe elu ẹ.

52Abimẹlẹkị nọ zụnhan ụlọ-nche hụ, kẹn'ọ maye wẹ. Kanị, hụn o gi rumẹ ọnụmụzọ a n'o yi ẹ ọkụn,

53okpoho ohu nọ tụha ẹka-ọlọ y'ẹ isi, ọ nọ tiwa a okpokomisi.

54Ozigbo, ọ nọ kpọ okorọbịa e bun'ẹ ihiẹn-ọgụn, sị a, “Sepụha ọpịa-agha ị n'ị gbu m, amamgbe wẹ e sị, ‘Okpoho gbu ẹ.’ ” Ya odibo ẹ hụ nọ zu ẹ ọpịa-agha, ọ nọ nwụnhụn.

55Ogẹn ndị Izrẹlụ gi hụn nị Abimẹlẹkị a nwụnhụn, onyẹ-onyẹ nọ la iwe ẹ.

56Ẹrịra kẹ Osolobuẹ dọn kụkin Abimẹlẹkị ụgwọ njọ o mẹ nẹdi ẹ: ebe ọ nọ gbu umunẹ ẹ iri kwasị ọgụn-ẹtọ.

57Osolobuẹ gizikwọ ihiẹnni kụ ndị Shẹkẹm ụgwọ eje-ihiẹn ile wẹ mẹ. Ọnụ Jọtam nwa Jeru-Baalụ bụ wẹ nọ ru wẹ ẹhụ.