Leviticus 1

Ika 2018 Bible

Jump to: Chapter 2 →

1Osolobuẹ gha imẹ Ọdụ-ozuzu kpọ Mozizi oku; sị a,

2“Gwa ndị Izrẹlụ oku, sị wẹ: onyẹ ọwụlẹ imẹ ụnụ hụn welanị Osolobuẹ oyiye ya wẹhẹ efin mọbụ ewu mọbụ atụnrụn.

3“Omẹni ẹjan w'a dụn ọkụn rọ, nị efin k'o wela d'e gi chụn ẹjan ahụn, o sikọ d'a wụrịrị okẹn efin ẹhụ a zu oke, o wẹhẹ ẹ ọnụ-mgbọn Ọdụ-nsọ kẹni Osolobuẹ kweri narịn a.

4O k'e bu ẹka kwasị anụ hụ isi, oyiye ahụn wẹ jẹnkọ d'a dụn ọkụn, a narịn w'a ya gi gbarị isi ẹ.

5Ọ nọ ihun Osolobuẹ gbu agbanaị-efin ahụn; ụmụ Ẹrọnụ ndị ikẹnnyẹ, ndị nchụn-ẹjan, e wẹhẹ ẹdeke anụ hụ d'e feye ukpo nchụn-ẹjan hụ rị ọnụmụzọ Ọdụ-nsọ ụsụọ a ile.

6O k'a han anụ hụ o gi ye oyiye w'a dụn ọkụn akpụkpọ, ja a kịrị-kịrị.

7Ụmụ-ikẹnnyẹ Ẹrọnụ onyẹ nchụn-ẹjan k'a fiye ọkụn ye elu ukpo nchụn-ẹjan ahụn, nu nkụn ye ọkụn hụ.

8Ụmụ-ikẹnnyẹ Ẹrọnụ hụ wụ ndị nchụn-ẹjan a bịa d'e dọnsọnmẹ anụ hụ, kẹ isi ẹ kẹ ụtọrọ a ye elu nkụn ndị hụ rị elu ukpo nchụn-ẹjan e rẹn.

9Hụn wẹhẹ anụ e gi mirin chanchan ụkụ anụ hụ lẹ ihiẹn rị imẹ ẹfọ a, onyẹ nchụn-ẹjan a nọ ukpo nchụn-ẹjan dụnkwama anụ ahụn ile ọkụn. Ẹjan wẹ dụn ọkụn rọ, oyiye wẹ gi ọkụn ye, hụn ishin ẹ a sụọ Osolobuẹ ụsụọ.

10“Omẹni ewu mọbụ atụnrụn k'o k'e gi ye oyiye hụ wẹ jẹnkọ d'a dụn ọkụn, o k'a wụrịrị mkpịn ẹhụ a zu oke.

11O k'a nọ ẹbamịn-ugu ukpo nchụn-ẹjan gbu ẹ ihun Osolobuẹ; ụmụ Ẹrọnụ ikẹnnyẹ ndị nchụn-ẹjan e fesọnmẹ ẹdeke ẹ kpu ukpo nchụn-ẹjan hụ ụsụọ ile.

12Onyẹ wẹhẹn'ẹ k'a ja a ẹkẹrẹ-ẹkẹrẹ onyẹ nchụn-ẹjan e dọnsọnmẹ wẹ, kẹ isi ẹ kẹ ụtọrọ a, ye elu nkụn rị elu ukpo nchụn-ẹjan e rẹn.

13Hụn wẹhẹn'ẹ e gi mirin chanchan ihiẹn ile rị imẹ ẹfọ anụ hụ lẹ ụkụ a, onyẹ nchụn-ẹjan e wẹhẹ wẹ ile d'a dụn ọkụn elu ukpo nchụn-ẹjan hụ. Oyiye wẹ dụn ọkụn rọ, oyiye wẹ gi ọkụn ye, hụn ishin ẹ a sụọ Osolobuẹ.

14“Omẹni nnụnụ k'o k'e gi ye Osolobuẹ oyiye w'a dụn ọkụn, o sikọ d'a wụrịrị nduri mọbụ nwa oluikuku.

15Onyẹ nchụn-ẹjan e wẹhẹ ẹ ebe ukpo hụ rị, fịkwọnpụ a isi, nọ ukpo ahụn dụn isi ẹ ọkụn; ọ nị ẹdeke ẹ gbaye ụsụọ ukpo nchụn-ẹjan ahụn.

16O wepụ akụ-ẹkpịrị a lẹ ihiẹn ndị rị imẹ ẹ, tụye ụsụọ ukpo hụ, ẹbamịn ọwụwa ẹnyanwụn, ebẹhụ wẹ kpọntọ ntụn ụtọrọ anụ.

17Ọ dọdọn ẹ ẹka-nku, dọwa a, kanị ọ dọwapụchanrịnkọ a, onyẹ nchụn-ẹjan a nọ elu nkụn hụ rị ukpo nchụn-ẹjan dụn a ọkụn. Ẹjan wẹ dụn ọkụn rọ, oyiye wẹ gi ọkụn ye, hụn ishin ẹ a sụọ Osolobuẹ.

Jump to: Chapter 2 →