Leviticus 3

Ika 2018 Bible

← Chapter 2 Jump to: Chapter 4 →

1“Omẹni ịhịan chọ n'o chụn ẹjan-ekele, nị efin k'o wela, ọsụọn'a okẹn, ọsụọn'a onyẹnnyẹ, anụ ẹhụ zu oke k'o k'e wẹhẹni Osolobuẹ.

2O k'e bu ẹka kwasị anụ ahụn o jẹnkọ d'e ye isi, gbu ẹ ọnụmụzọ Ọdụ-nsọ, ụmụ Ẹrọnụ ikẹnnyẹ ndị nchụn-ẹjan e fe ẹdeke ẹ kpu ukpo nchụn-ẹjan hụ ụsụọ ile.

3O k'a gha anụ ẹjan-ekele hụ wepụha ndịnị wẹ k'e gi ọkụn chụnyeni Osolobuẹ — ya wụ, ụtọrọ ile kpumẹ ihiẹn rị imẹ ẹ lẹ hụn nyanrịnnị wẹ,

4akụnrụn a ẹbụbụọ rị ibe ukun ẹ lẹ ụtọrọ nyanrịnnị wẹ lẹ ihiẹn hụ mẹ ụtọrọ-ụtọrọ kpumẹ imegi ẹ — hụn o k'e wepụha ya lẹ akụnrụn a,

5ụmụ Ẹrọnụ ikẹnnyẹ a nọ ukpo nchụn-ẹjan hụ dụn a ọkụn n'o họnrin ẹnwụnrụn, ya lẹ ẹjan w'a dụn ọkụn hụn rị enu nkụn rị ebẹhụ e rẹn, n'ọ wụrụ oyiye wẹ gi ọkụn ye, hụn ishin ẹ a sụọ Osolobuẹ.

6“Omẹni ẹjan-ekele o sikọ d'e ye Osolobuẹ wụ atụnrụn mọbụ ewu, o k'a wụrịrị okẹn mọbụ onyẹnnyẹ ẹhụ a zu oke.

7Omẹni atụnrụn k'o wẹhẹ, o jẹnkọ d'e buhẹ ẹ ihun Osolobuẹ.

8O k'e bu ẹka kwasị a isi, nọ ihun Ọdụ-ozuzu gbu ẹ, ụmụ Ẹrọnụ ikẹnnyẹ ndị nchụn-ẹjan a bịa d'e fe ẹdeke ẹ kpu ukpo nchụn-ẹjan ụsụọ ile.

9O k'a gha anụ ẹjan-ekele hụ wepụha anụ wẹ sikọ d'e gi ọkụn chụnyeni Osolobuẹ, hụn wụ ụtọrọ a ile — kẹ ọdụndụn a ụtọrọ jun d'e ru ebẹhụ ọdụndụn lẹ ogelemazụụn nọ zu kẹ ụtọrọ kpumẹ ihiẹn ile rị imẹ ẹ lẹ hụn nyanrịnnị wẹ;

10akụnrụn a ẹbụbụọ lẹ ụtọrọ nyanrịnnị wẹ ibẹka ukun ẹ lẹ ihiẹn hụ mẹ ụtọrọ-ụtọrọ kpumẹ imegi — hụn o k'e wepụha ya lẹ akụnrụn a.

11Onyẹ nchụn-ẹjan k'a nọ ukpo nchụn-ẹjan dụn wẹ ọkụn nị wẹ họnrin ẹnwụnrụn, wụrụ ihiẹn-oriri, oyiye wẹ gi ọkụn ye Osolobuẹ.

12“Omẹni ewu k'o sikọ d'e ye, o k'e buhẹ ẹ ihun Osolobuẹ.

13O k'e bu ẹka kwasị a isi, ọ nọ ihun Ọdụ-nsọ gbu ẹ; ụmụ Ẹrọnụ ikẹnnyẹ a bịa d'e fe ẹdeke ẹ kpu ukpo nchụn-ẹjan ụsụọ ile.

14Imẹ anụ hụ o ye, hụn o k'e weri gi ọkụn chụnyeni Osolobuẹ wụ ụtọrọ ile kpumẹ ihiẹn rị imẹ ẹ lẹ hụn nyanrịnnị wẹ;

15akụnrụn a ẹbụbụọ lẹ ụtọrọ nyanrịnnị wẹ ibẹka ukun ẹ lẹ ihiẹn hụ mẹ ụtọrọ-ụtọrọ kpumẹ imegi hụn o k'e wepụha ya lẹ akụnrụn a.

16Onyẹ nchụn-ẹjan k'a nọ ukpo nchụn-ẹjan dụn wẹ ọkụn nị wẹ họnrin ẹnwụnrụn, wụrụ ihiẹn-oriri, oyiye wẹ gi ọkụn ye, hụn ishin ẹ a sụọ Osolobuẹ. Ụtọrọ ile wụ nke Osolobuẹ.

17“Dọnmẹsọnmẹ ni iwuni agbọ ile lalanị, ebe ọwụlẹ ụnụ bi. Erikwọlẹ ni ụtọrọ mọbụ ẹdeke kaka.”

← Chapter 2 Jump to: Chapter 4 →