Leviticus 18

Ika 2018 Bible

← Chapter 17 Jump to: Chapter 19 →

1Osolobuẹ sị Mozizi,

2“Gwa ndị Izrẹlụ oku, sị wẹ: Mmẹ wụ Osolobuẹ hụn wụ Chuku ụnụ.

3Emẹkwọlẹ ni kẹ w'e mẹ imẹ alị Ijiptu, hụn ụnụ te bi; emẹzikwọlẹ ni kẹ w'e mẹ imẹ alị Kenaanị hụn m wekọ ọnụ — elerilẹ ni wẹ.

4Iwu ndị m ye ụnụ kẹ ụnụ k'e dọnmẹrịrị, a kpachanpụzịkwọ ẹnya e mẹ ihiẹn ndị m sị ụnụ mẹ. Mmẹ wụ Osolobuẹ.

5E mẹ ni ihiẹn ndị m sị ụnụ mẹ, e dọnmẹ iwu m, makẹni onyẹ hụn dọnmẹni wẹ k'e gi wẹ rị ndụn. Mmẹ wụ Osolobuẹ.

6“Ịhịan emẹkwọlẹ mgba nwẹnẹ ẹ. Mmẹ wụ Osolobuẹ:

7“Emẹkwọlẹ mgba nnẹ i; i mẹ ẹ, y'a gbagụọ nẹdi i ọtọ; nnẹ i k'ọ wụ, emẹlẹ mgba a.

8Emẹlẹ mgba nwunyẹ nẹdi i; i mẹ ẹ, y'a gbagụọ nẹdi i ọtọ.

9Emẹlẹ mgba nwẹnẹ i okpoho: kẹ nwa nẹdi i kẹ nwa nnẹ i; kẹ hụn wẹ mụ yụ lẹ ịya ụlọ ohu kẹ hụn wẹ mụ ụzọ ọzọ.

10Emẹlẹ mgba nwa-nwa ị: kẹ hụn nwa ị okẹnnyẹ mụ kẹ hụn nwa ị okpoho mụ; i mẹ ẹ, y'a gbagụọ enwẹn i ọtọ.

11Emẹlẹ mgba nwa nwunyẹ nẹdi i — hụn ọ mụyeni nẹdi i; nwẹnẹ i k'ọ wụ.

12Emẹlẹ mgba nwẹnẹ nẹdi i, nwẹnẹ nẹdi i kẹti-kẹti k'ọ wụ.

13Emẹlẹ mgba nwẹnẹ nnẹ i, nwẹnẹ nnẹ i kẹti-kẹti k'ọ wụ.

14Emẹkwọlẹ mgba nwunyẹ nwẹnẹ-nẹdi i; i mẹ ẹ, y'a gbagụọ nwẹnẹ-nẹdi i ọtọ; nwẹnẹ nẹdi i kẹ okpoho hụ wụ.

15Emẹlẹ mgba nwunyẹ nwa ị; nwunyẹ nwa ị rọ; emẹlẹ mgba a.

16Emẹlẹ mgba nwunyẹ nwẹnẹ i; i mẹ ẹ, y'a gbagụọ nwẹnẹ i ọtọ.

17Emẹlẹ mgba okpoho lẹ nwa a; alụlẹ nwa-nwa a — kẹ hụn nwa a okẹnnyẹ mụ kẹ hụn nwa a okpoho mụ; wẹ wụ ndị ẹhụ okpoho hụ kẹti-kẹti. Ihiẹn jọgbu enwẹn ẹ rọ.

18“Alụrụkwọlẹ nwẹnẹ nwunyẹ i nị wẹ nọ nwunyẹ-di, y'e mẹ mgba a ebe nwunyẹ i rị ndụn.

19Emẹlẹ mgba okpoho ebe ọ rị a sọ ezi.

20Emẹlẹ mgba nwunyẹ ịhịan; i mẹ ẹ, y'e gigụọ okpoho hụ mẹrụ enwẹn i.

21“Eyekwọlẹ wẹ nwa ị ọwụlẹ gi chụnyeni Molẹkị ẹjan; emẹrụlẹ ẹfan Chuku ụnụ. Mmẹ wụ Osolobuẹ.

22“Okẹnnyẹ esọnkwọlẹ okẹnnyẹ ibe ẹ mẹ mgba nọkẹ okpoho; arụ k'ọ wụ.

23Emẹkwọlẹ mgba anụ gi ẹ mẹrụ enwẹn i. Okpoho ewekwọlẹ enwẹn ẹ ye anụ n'ọ gba a; arụ k'ọ wụ.

24“Egikwọlẹ ni hụn ọwụlẹ imẹ ihiẹn ndịnị ile mẹrụ enwẹn ụnụ, makẹni ẹrịra kẹ ndị alị ndị hụ m jẹnkọ nwan d'a chụpụnị ụnụ dọn mẹrụ enwẹn wẹ;

25kẹ alị lẹ enwẹn ẹ nọzịdẹ rụ, m nọ gi njọ a sọn ẹ, ọ nọ gbọpụ ndị bin'ẹ.

26Ka e mẹ ni ihiẹn ndị m sị ụnụ mẹ, ụnụ e dọnmẹsọnmẹ iwu ndị m ye ụnụ. Kẹ nwa-di-alị kẹ abịamabịa rị imẹ igunrun ụnụ emẹkwọlẹ hụn ọwụlẹ imẹ ihiẹn ndịnị m'a sọ,

27makẹni ihiẹn ndịnị ile kẹ ndị bu ụnụ ụzọ bi alị ụnụ shikọ mẹ, alị hụ nọ rụ.

28Ụnụ mẹrụ alị hụ, o k'a gbọpụzịkwọ ụnụ k'o dọn gbọpụ ndị bu ụnụ ụzọ bi ẹ.

29Onyẹ mẹ hụn ọwụlẹ imẹ ihiẹn ndịnị m'a sọ, wẹ k'e bepụ a imẹ igunrun ndị nke ẹ.

30Mẹ ni ihiẹn ndị m sị ọnụ mẹ; emẹlẹ ni omẹnalị ọwụlẹ imẹ ndịnị m'a sọ, hụn wẹ e mẹ nị ụnụ d'a bịa, egikwọlẹ ni wẹ mẹrụ enwẹn ọnụ. Mmẹ wụ Osolobuẹ hụn wụ Chuku ụnụ.”

← Chapter 17 Jump to: Chapter 19 →