bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Leviticus 16
Leviticus 16
Ika 2018 Bible
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 17 →
1
Osolobuẹ gwa Mozizi oku ogẹn ahụn ụmụ Ẹrọnụ ẹbụọ wụ Nadabụ lẹ Abihu gi nwụnhụn yeni ọnọkunmẹ hụ wẹ nọkunmẹ Osolobuẹ.
2
Osolobuẹ sị Mozizi, “Gwa Ẹrọnụ nwẹnẹ i ya atụkwọlẹ ẹhụ banhan Ebe Kachanrịn nsọ hụn rị azụụn Ẹkwa-mgbọnkin, ihun okun ẹkpẹti-nsọ, okun hụ wẹ nọ a gbarị isi: y'e mẹkwọl'a amamgbe ọ nwụnhụn, makẹni m rị imẹ orukpu hụ hụn a pụha elu okun hụ wẹ nọ a gbarị isi.
3
“Ẹnịna kẹ Ẹrọnụ k'a gha a banhan Ebẹhụ Kachanrịn-nsọ: o k'e weri agbanaị okẹn-efin o k'e gi chụn ẹjan-njọ lẹ ebulu o k'e gi chụn ẹjan w'a dụn ọkụn.
4
O k'e yiri ẹwuru ọrụn nchụn-ẹjan hụ rị nsọ hụn tueru alị wẹ gi ẹkwa linẹni mẹmẹ lẹ apa-linẹni; o gi nfifie linẹni hụ fiedọn ukun, kpuru okpu linẹni hụ isi. Ẹkwa ndị hụ rị nsọ; ya wụ, o k'e girịrị mirin wụgụ ẹhụ o kebe yiri wẹ.
5
“O sikọ d'a narịn ndị Izrẹlụ mkpịn ẹbụọ o k'e gi chụn ẹjan-njọ lẹ ebulu ohu o k'e gi chụn ẹjan w'a dụn ọkụn.
6
Ẹrọnụ k'e gi okẹn-efin hụ chụn ẹjan-njọ a, gi gbarị isi ya lẹ enwẹn ẹ lẹ ikpụnọ a;
7
ọ bịa d'e wẹhẹ ewu ẹbụọ hụ, we wẹ che ihun Osolobuẹ, ọnụmụzọ Ọdụ-ozuzu.
8
Imẹ ewu ẹbụọ hụ, o k'e gi utẹn-Osolobuẹ hanrịn hụn k'a wụ nke Osolobuẹ lẹ hụn k'e bu njọ-alị.
9
Ẹrọnụ k'e wẹhẹ ewu hụn o gi utẹn-Osolobuẹ hanpụhanị Osolobuẹ, gi ẹ chụn ẹjan-njọ.
10
Kanị o k'e weri hụn ahụn o gi utẹn-Osolobuẹ hanpụha n'o bu njọ-alị butọ ihun Osolobuẹ. O sikọ d'a chụ a shi imẹ atụ n'ọ wụrụ hụn bu njọ-alị, gi ẹ gbarị isi ndị alị.
11
“Ẹrọnụ k'e wẹhẹ nwan okẹn-efin hụ o sikọ d'e gi chụn ẹjan-njọ ahụn wụ nke ẹ, gi ẹ gbarị isi ya lẹ enwẹn ẹ lẹ ikpụlọ a.
12
O k'a gha elu ukpo-nsẹnsị rị ihun Osolobuẹ weri mkpu nsẹnsi ikeke ọkụn jun, o weri nsẹnsi e shin ọhụnma wẹ gweriẹn hụn jun ọb'ẹka ẹbụọ, o we wẹ ile ghafe Ẹkwa-mgbọnkin, shi imẹ Ebẹhụ Kachanrịn-nsọ.
13
O kpọn nsẹnsi hụ ye imẹ ọkụn hụ rị ihun Osolobuẹ; ẹnwụnrụn nsẹnsi hụ a lọkpumẹ okun hụ wẹ nọ a gbarị isi, okun Ẹkpẹti Ashịa-ẹri, makẹ ọ gha a nwụn.
14
O k'e weberi ẹdeke okẹn-efin hụ, gi mkpịnsịn-ẹka fe ẹ ye ihun okun hụ wẹ nọ a gbarị isi, ya wụ nkọ ọwụwa ẹnyanwụn; gizi mkpịnsịn-ẹka fe ẹ mgbe ẹsa ye elu okun hụ.
15
“O k'e gbu nwan ewu hụ o gi a chụn ẹjan-njọ ndị Izrẹlụ; o weri ẹdeke ẹ ghafe Ẹkwa-mgbọnkin hụ, shi imẹ Ebe Kachanrịn nsọ, mẹ ẹ k'ọ mẹ ẹdeke okẹn-efin hụ: o fe e ye elu okun hụ wẹ nọ a gbarị isi, o feyezi ẹ ihun ẹ.
16
Ẹnịna k'o k'a dọn gbarị Ebẹhụ Kachanrịn-nsọ yeni ihiẹn ile ndị Izrẹlụ gi rụ lẹ nnupụ-isi wẹ, ihiẹn ọwụlẹ hụn wụ njọ wẹ. O k'e mẹzini Ọdụ-ozuzu ihiẹn ohu ahụn, makẹni ọ rị imẹ igunrun wẹ lẹ ihiẹn ndị ahụn wẹ gi a rụ.
17
“Onwọnni onyẹ sikọ d'a rị imẹ Ọdụ-ozuzu hụ ile gha ogẹn Ẹrọnụ e gi banye Ebẹhụ Kachanrịn-nsọ d'a gbarị isi ịhịan ile d'e ru n'ọ pụha — ọ gbarịgụ isi ya lẹ enwẹn ẹ lẹ nke ikpụnọ a lẹ nke ndị Izrẹlụ ile.
18
“Ọ pụha nwan ezi ebe ukpo nchụn-ẹjan rị ihun Osolobuẹ, gbarịzịkwọ a: O weberi ẹdeke okẹn-efin hụ lẹ ẹdeke ewu hụ, o buchesọnmẹ ẹ mpịn rịsọnmẹ nkonko ukpo nchụn-ẹjan hụ.
19
O k'e gi mkpịnsịn-ẹka deri ẹdeke feyesọnmẹ elu ẹ mgbe ẹsa, gi dọn ẹ nsọ makẹ ihiẹn ile ndị Izrẹlụ gi rụ.
20
“Ẹrọnụ gbarịgụ Ebẹhụ Kachanrịn-nsọ lẹ Ọdụ-ozuzu hụ ile lẹ ukpo nchụn-ẹjan, o wepụha nwan ewu hụ rị ndụn.
21
O bu ẹka a ẹbụbụọ kwasị ewu hụ rị ndụn isi, kuchanrịn eje-obibi lẹ nnupụ-isi ndị Izrẹlụ, njọ ile wẹ mẹ, bugụ wẹ che ewu hụ isi, o we ewu hụ ye onyẹ wẹ tumẹ k'e dupụn'a, o du ẹ shi imẹ atụ.
22
Ewu hụ k'e buru njọ wẹ ile shi ebe ịhịan bilẹni; onyẹ hụ dun'ẹ a hatu ẹ ye imẹ atụ ebẹhụ.
23
“Ẹrọnụ sikọ nwan d'a kinhẹn Ọdụ-ozuzu d'a gbụpụ ẹkwa onyẹ-isi nchụn-ẹjan ndị hụ o yiri n'o d'a banye Ebẹhụ Kachanrịn-nsọ, ọ la wẹ tọ ebahụn.
24
O gi mirin wụ ẹhụ, yiri ẹkwa nke ẹ. Ọ pụha d'a chụn ẹjan w'a dụn ọkụn, nke ẹ lẹ nke ndị alị, gi ẹjan ndị hụ gbarị isi ya lẹ ndị alị;
25
ọ nọzị elu ukpo nchụn-ẹjan hụ dụn ụtọrọ anụ hụ o gi chụn ẹjan-njọ ọkụn.
26
“Onyẹ ahụn dupụ ewu hụ shi imẹ atụ kẹni ọ wụrụ ewu bu njọ-alị k'a sụpụ ẹkwa a, gi mirin wụ ẹhụ, o kebe banhan ebe ịhịan ile bi.
27
Wẹ k'a gha imẹ ebẹhụ ịhịan ile bi bupụ okẹn-efin lẹ ewu hụ wẹ webanhan ẹdeke wẹ imẹ Ebẹhụ Kachanrịn-nsọ gi gbarịsọnmẹ isi; wẹ k'a dụnpụ akpụkpọ wẹ ọkụn, kẹ ya kẹ uru wẹ lẹ ihiẹn ndị ọzọ rịn'a w'e ri.
28
Onyẹ ahụn dụn wẹ ọkụn k'a sụpụ ẹkwa a, gi mirin wụ ẹhụ, o kebe banhan ebe ịhịan ile bi.
29
“Lee ni ihiẹn ụnụ k'a gha e mẹ jẹnrin ejẹn: nke akp'ọhịn iri imẹ ifọn nke ẹsa, ụnụ k'e bu ọnụ; ụnụ arụnkọ ọrụn ọwụlẹ — kẹ nwa-di-alị kẹ abịamabịa rị imẹ igunrun ọnụ,
30
makẹni ụhụọhịn hụ kẹ wẹ k'a chụn ẹjan wẹ gi a gbarị isi ụnụ, gi mẹ ụnụ rị ọchan; e wepụ wẹ njọ ile ụnụ mẹ, ụnụ a rị ụchan ẹnya Osolobuẹ.
31
Ụhụọhịn izu-ikẹn ụnụ k'e gi a latọ ọrụn rọ; ụnụ k'e bu ọnụ; ihiẹn ụnụ k'e mẹsọnmẹ jẹnrin ejẹn rọ.
32
“Onyẹ hụn wụ onyẹ-isi nchụn-ẹjan, hụn wẹ hukpu udẹn-ntumẹ, hụn rikin ọnọdị nẹdi ẹ wụ onyẹ-isi nchụn-ẹjan, ya k'a gha a chụn ẹjannị wẹ gi a gbarị isi ịhịan ile lẹ Ọdụ-nsọ. O k'e yi ẹwuru-nsọ linẹni ndị hụ mẹ ẹ,
33
chụn ẹjan gi gbarị Ebe Kachanrịn nsọ lẹ Ọdụ-ozuzu lẹ ukpo nchụn-ẹjan lẹ ndị nchụn-ẹjan lẹ ndị Izrẹlụ ile.
34
Mẹsọnmẹ ni ihiẹnni jẹnrin ejẹn: mgbe ohu ahụa e gi w'ẹ gbarị isi ndị Izrẹlụ yeni njọ ile wẹ mẹ.” Mozizi nọ mẹ kẹ Osolobuẹ dọn gwa Mozizi.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27