Leviticus 22

Ika 2018 Bible

← Chapter 21 Jump to: Chapter 23 →

1Osolobuẹ sị Mozizi,

2“Gwa Ẹrọnụ lẹ ụmụ a wẹ gbayekwọ oyiye ndị hụ rị nsọ ndị Izrẹlụ e wẹhẹni m, amamgbe w'e budan ẹfan nsọ m. Mmẹ wụ Osolobuẹ.

3Sị wẹ: Agbọ ile lalanị, nwa ụnụ ọwụlẹ hụn buche ẹka oyiye nsọ ndị hụ ndị Izrẹlụ e wẹhẹni Osolobuẹ bụ hụnyẹ arịnị ọchan, arịkọzị ndị k'a rị a bịa ihun m. Mmẹ wụ Osolobuẹ.

4“Onwọnni nwa Ẹrọnụ ọwụlẹ bu eje-emu akpụkpọ-ẹhụ mọbụ hụn ihiẹn rị e hupụha ẹhụ hụn k'e ri oyiye nsọ ndị ahụn ndị Izrẹlụ e wẹhẹ d'e ru mgbe ọ rịzị ụchan. O k'a rụzịkwọ omẹni ẹhụ a hụarị ihiẹn ọwụlẹ ozun mẹrụ mọbụ onyẹ rị a nyụn ohe,

5mọbụ n'o mẹtụ ihiẹn ọwụlẹ a rịnị ẹka, mẹrụ enwẹn ẹ, mọbụ n'o nwọn onyẹ rụnị ẹhụ a hụatụ — ihiẹn ọwụlẹ ọ wụ hụn mẹrụn'a.

6Onyẹ ọwụlẹ ẹhụ a mẹtụ ihiẹn ndị nọ ẹrịra a rụgụọ d'e ru ogẹn ẹnyasị. O rikọ oyiye ọwụlẹ rị nsọ d'e ru ni o gigụ mirin wụ ẹhụ.

7Anwụn rọgụ, ọ rịzị ọchan, o mẹgụ ọnwan, o nwọn ikẹn ri oyiye rị nsọ, makẹni ihiẹn-oriri ẹ rọ.

8O rikọ ihiẹn ọwụlẹ wẹ hụn ozun ẹ mọbụ ihiẹn eje-anụ gbu, makẹni o k'e gi ẹ mẹrụ enwẹn ẹ. Mmẹ wụ Osolobuẹ.

9“Ndị nchụn-ẹjan wẹ mẹ ihiẹn ile kẹ m dọn ku ẹ amamgbe w'e mẹ ihiẹn ikpe e gi ma wẹ, a nwụnhụn wẹ makẹni wẹ lelịa oku m. Mmẹ wụ Osolobuẹ hụn e mẹ wẹ a rị nsọ.

10“Onwọnni onyẹ wụlẹni onyẹ ikpụlọ onyẹ nchụn-ẹjan hụn k'e ri oyiye rị nsọ; kẹ ọbịa kẹ onyẹ-ọrụn a erikọ a.

11Kanị omẹni onyẹ nchụn-ẹjan nwọn igbọn o gi egho ṅọn mọbụ hụn wẹ mụ iwe ẹ, o k'a s'ẹka ri ihiẹn-oriri onyẹ nchụn-ẹjan hụ.

12Nwa onyẹ nchụn-ẹjan lụrụ okẹnnyẹ wụlẹni onyẹ nchụn-ẹjan, o rikọ hụn ọwụlẹ imẹ ihiẹn-oriri ndịnị rị nsọ wẹ gi a kwadọn ọrụn Osolobuẹ.

13Kanị, omẹni di nwa onyẹ nchụn-ẹjan a nwụnhụn mọbụ kpechan a, bụ okpoho hụ amụnị nwa, ọ lụakinhẹn d'e biri iwe nẹdi ẹ nọkẹ ogẹn o gi rị nwagbọọ, o nwọn ikẹn du nẹdi ẹ ri ihiẹn-oriri ẹ. Onyẹ ọwụlẹ rịlẹni ndị m ku erikọ a.

14“Onyẹ ri anụ oyiye-nsọ bụ ọ marịn nị ya rọ, o k'a kụrịrị onyẹ nchụn-ẹjan ụgwọ oyiye hụ, wezi ụzọ ohu imẹ ụzọ isẹn ọnụ-egho ẹ chen'ẹ.

15Ndị nchụn-ẹjan wẹ emẹrụkwọlẹ oyiye-nsọ hụn ndị Izrẹlụ e ye Osolobuẹ

16yeni ịnị wẹ ri ẹ, gi ẹ buhẹni wẹ ikpe ọmụma hụn w'e gi kụma ụgwọ a. Mmẹ wụ Osolobuẹ hụn e mẹ ndị Izrẹlụ a rị nsọ.”

17Osolobuẹ sị Mozizi,

18“Gwa Ẹrọnụ lẹ ụmụ a lẹ ndị Izrẹlụ ile, sị wẹ: Onyẹ welanị Osolobuẹ ẹjan w'a dụn ọkụn, kẹ onyẹ Izrẹlụ rọ kẹ abịamabịa bi imẹ Izrẹlụ rọ, oyiye wẹ gi e mẹzu nkwa mọbụ oyiye ghapụha a obi,

19o sikọ d'a wụrịrị okẹn hụn ẹhụ zu oke; o k'a wụrịrị efin mọbụ atụnrụn mọbụ ewu — kẹni m hụn ụzọ narịn wẹ ya.

20Ewẹhẹkwọlẹ ni anụ ọwụlẹ ẹhụ a zulẹni oke, makẹni anarịnkọ m ụnụ ya.

21Omẹni ẹjan-ekele kẹ ịhịan welanị Osolobuẹ, hụn wẹ gi e mẹzu nkwa wẹ kwe ẹ mọbụ oyiye ghapụha a obi, o sikọ d'a wụrịrị anụ ẹhụ zu oke. Ẹhụ a k'e zurịrị oke, kẹni m narịn a.

22Eyelẹ ni Osolobuẹ anụ ẹnya kpu ishi mọbụ hụn rụ ẹhụ mọbụ hụn ẹhụ a zulẹni oke mọbụ hụn ẹhihi mọbụ hụn ẹkpẹn rị ẹhụ mọbụ hụn ẹtẹ rị a ẹhụ rị e ru ẹbụn mọbụ a mụ mirin. Ebukwọlẹ ni ihiẹn ọwụlẹ nọ ẹrịra che elu ukpo nchụn-ẹjan n'ọ wụ ẹjan wẹ gi ọkụn ye Osolobuẹ.

23“Ụnụ nwọn ikẹn gi efin mọbụ atụnrụn hụn ẹhụ a nwọn k'ọ nọ mọbụ hụn mẹ kakpọị ye oyiye ghapụha ịhịan obi, kanị, anarịnkọ m'a omẹni oyiye wẹ gi e mẹzu nkwa rọ.

24Achụnyekwọlẹ ni ni Osolobuẹ anụ ọwụlẹ wẹ wara mọbụ pịnkpọ mkpụrụ ẹhụ a mọbụ dọwa mkpụrụ ẹhụ a. Emẹlẹ n'a imẹ alị ọnụ;

25anarịnlẹ ni onyẹ alị ọzọ anụ ndị nọ ẹrịra d'e ye Chuku ụnụ ri. A narịnkọ m ụnụ wẹ, makẹni ẹhụ wẹ nwọn k'ọ nọ lẹ makẹni ẹhụ wẹ ezuni oke.”

26Osolobuẹ sị Mozizi,

27“Wẹ mụ efin mọbụ atụnrụn mọbụ ewu, o sikọ d'e sọn nnẹ ẹ nọdị akpọhịn ẹsa. Gha nke akp'ọhịn ẹsatọ jẹnmẹ kẹ w'a nọ gi ẹ chụnyeni Osolobuẹ ẹjan wẹ gi ọkụn ye ẹ, ọ narịn a.

28Egbulẹ ni efin gi nwa lẹ nwa a mọbụ atụnrụn gi nwa lẹ nwa a akp'ọhịn ohu.

29“Ụnụ gha a chụnyeni Osolobuẹ ẹjan-mkpanmịn, e yen'ẹ ụzọ Osolobuẹ e gi narịn ọnụ ya.

30Ụhụọhịn hụ wẹ chụn ẹjan hụ kẹ wẹ k'e ri ẹ; anịkwọlẹ ni hụn ọwụlẹ bọ-ọra. Mmẹ wụ Osolobuẹ.

31“Dọnmẹ ni iwu ndị m ye ụnụ, e gi wẹ e bi. Mmẹ wụ Osolobuẹ.

32Ebudanlẹ ni ẹfan-nsọ m; mmẹ nwẹn, m k'a ghọsịzịkwọ ndị Izrẹlụ nị m rị nsọ. Mmẹ wụ Osolobuẹ hụn e mẹ ụnụ a rị nsọ,

33hụn gha alị Ijiptu wepụha ụnụ d'a wụrụ Chuku ụnụ. Mmẹ wụ Osolobuẹ.”

← Chapter 21 Jump to: Chapter 23 →