Leviticus 4

Ika 2018 Bible

← Chapter 3 Jump to: Chapter 5 →

1Osolobuẹ gwa Mozizi oku, sị,

2“Sị ndị Izrẹlụ: Ọ rụnahịn ịhịan mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, lee ihiẹn o jẹnkọ d'e mẹ:

3“Omẹni onyẹ-isi nchụn-ẹjan mẹ njọ, o buhẹgụọnị ịhịan ile ikpe-ọmụma. O k'e wẹhẹrịrịnị Osolobuẹ okoro okẹn-efin ẹhụ a zu oke gi chụn ẹjan makẹ njọ hụ o mẹ.

4O k'e wẹhẹ okẹn-efin ahụn ihun Osolobuẹ ọnụ-mgbọn Ọdụ-ozuzu, bu ẹka kwasị a isi, gbu ẹ ihun Osolobuẹ.

5“Onyẹ-isi nchụn-ẹjan hụ mẹ njọ k'e weberi ẹdeke okẹn-efin ahụn we ẹ shi imẹ Ọdụ-ozuzu.

6Ọ rụ mkpịnsịn-ẹka ye imẹ ẹdeke hụ o gi banhan, o fe ẹ ye ihun Osolobuẹ mgbe ẹsa, ihun Ẹkwa Mgbọnbepụ rị Ọdụ-Nsọ.

7Ọ bịa d'e weberizi ẹdeke hụ, de ẹ deye mpịn rịsọnmẹ nkonko ukpo nsẹnsi e shin ọhụnma hụn rị ihun Osolobuẹ, imẹ Ọdụ-ozuzu; o hu ẹdeke okẹn-efin hụ họdụnị ye ukun ukpo hụ wẹ n'a dụn ẹjan ọkụn hụn rị ọnụmụzọ Ọdụ-ozuzu.

8“O sikọ d'e wepụhachanrịn ụtọrọ okẹn-efin ẹjan-njọ hụ ile: kẹ ụtọrọ ile kpumẹ ihiẹn rị imẹ ẹ lẹ hụn nyanrịnnị wẹ,

9akụnrụn a ẹbụbụọ lẹ ụtọrọ nyanrịnnị wẹ ibẹka ukun ẹ lẹ ihiẹn kpumẹ imegi, hụn o k'e wepụha ya lẹ akụnrụn a

10kẹ wẹ dọn e wepụha ụtọrọ efin ẹjan-ekele. Onyẹ nchụn-ẹjan k'a nọ ukpo wẹ n'a dụn ẹjan ọkụn dụn a ọkụn mẹ ẹ họnrin ẹnwụnrụn.

11Kanị, nke akpụkpọ okẹn-efin ahụn lẹ uru ẹ lẹ isi ẹ lẹ ụkụ a lẹ ihiẹn ndị rị imẹ ẹ lẹ ihiẹn ile w'e ri e ri rị imẹ ẹ,

12anụ okẹn-efin ahụn ile họdụnị, onyẹ nchụn-ẹjan k'a gharịrị ebe ịhịan bi bupụ a, shi ebe rị ọchan kẹ iwu dọn ku hụn w'e kpọnye ntụn d'a dụn a ọkụn.

13“Omẹni ndị Izrẹlụ ile kẹ ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ wẹ — ọsụọn'a nị amarịn wẹ.

14Hụn wẹ gihụ marịn nị wẹ mẹ njọ, wẹ k'e buhẹrịrị agbanaị okẹn-efin wẹ sikọ d'e gi chụn ẹjan-njọ; wẹ k'e buhẹ ẹ ọnụmụzọ Ọdụ-ozuzu.

15Ndị-ichẹn alị k'e bu ẹka kwasị efin hụ isi ihun Osolobuẹ, e gbu wẹ ẹ.

16Onyẹ-isi nchụn-ẹjan e weberi ẹdeke okẹn-efin hụ banye imẹ Ọdụ-ozuzu.

17Ọ rụ mkpịnsịn-ẹka ye imẹ ẹdeke hụ, o fe ẹ ye ihun Osolobuẹ, mgbe ẹsa, ihun Ẹkwa-mgbọnkin.

18O weberizi ẹdeke hụ deye mpịn ndị rị nkonko ukpo nsẹnsi hụ rị ihun Osolobuẹ imẹ Ọdụ-ozuzu; o hu ẹdeke họdụnị ye ukun ukpo wẹ n'a dụn ẹjan ọkụn hụn rị ọnụmụzọ Ọdụ-ozuzu.

19O k'e wepụhachanrịn ụtọrọ a, nọ elu ukpo nchụn-ẹjan hụ dụn a ọkụn n'o họnrin ẹnwụnrụn,

20o mẹ okẹn efinni k'o dọn mẹ okẹn-efin ẹjan-njọ. Ẹnịna kẹ onyẹ nchụn-ẹjan k'a dọn gbarị isi wẹ, Osolobuẹ a gbagharị wẹ;

21Onyẹ-isi nchụn-ẹjan a gha ebe ịhịan bi bupụ okẹn-efin hụ, dụn a ọkụn kẹ w'a dụn okẹn-efin onyẹ-isi nchụn mẹ njọ. Ọnwan wụ ẹjan-njọ w'a chụnnị alị.

22“Omẹni onyẹ-ndu k'ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ a.

23Hụn o gihụ marịn n'o mẹgụọ njọ, o k'e wẹhẹrịrị mkpịn ẹhụ a zu oke d'e ye.

24O k'e bu ẹka kwasị mkpịn ahụn isi, nọ ihun Osolobuẹ, ebẹhụ wẹ n'e gbu anụ ẹjan w'a dụn ọkụn, gbu ẹ. Ẹjan-njọ rọ.

25Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ, deye mpịn rịsọnmẹ nkonko ukpo hụ wẹ n'a dụn ẹjan ọkụn, hu hụn họdụnị ye ukun ukpo hụ.

26O k'a nọ ukpo hụ dụn ụtọrọ ẹjan ahụn ile ọkụn n'o họnrin ẹnwụnrụn k'o dọn mẹ ụtọrọ ẹjan-ekele. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị onyẹ hụ.

27“Omẹni onyẹ-mmaka k'ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ a.

28Hụn o gihụ marịn n'o mẹgụọ njọ, o k'e wẹhẹrịrị onyẹnnyẹ-ewu ẹhụ a zu oke o jẹnkọ d'e gi chụn ẹjan njọ o mẹ.

29O k'e bu ẹka kwasị anụ ẹjan njọ hụ isi, nọ ebẹhụ wẹ nọ a chụn ẹjan w'a dụn ọkụn gbu ẹ.

30Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ deye mpịn rịsọnmẹ nkonko ukpo hụ wẹ n'a dụn ẹjan ọkụn, hu hụn họdụnị ye ukun ukpo hụ,

31wepụha ụtọrọ a ile, kẹ wẹ dọn e wepụha ụtọrọ anụ wẹ gi ye oyiye ekele; onyẹ nchụn-ẹjan a nọ ukpo hụ wẹ n'a chụn ẹjan dụn a ọkụn n'o họnrin ẹnwụnrụn, ọ wụrụ ishin ọma hụn a sụọ Osolobuẹ ụsụọ. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị a njọ.

32“Omẹni atụnrụn k'o wela d'a chụn ẹjan-njọ a, ya wẹhẹ onyẹnnyẹ ẹhụ a zu oke.

33O k'e bu ẹka kwasị a, nọ ebe wẹ nọ e gbu anụ ẹjan w'a dụn ọkụn gbu ẹ, gi chụn ẹjan-njọ.

34Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ, deyesọnmẹ mpịn rịsọnmẹ nkonko ukpo hụ wẹ nọ a dụn ẹjan ọkụn, hu hụn họdụnị ye ukun ukpo hụ.

35O k'e wepụha ụtọrọ a ile kẹ wẹ dọn e wepụha ụtọrọ anụ wẹ gi ye oyiye ekele, onyẹ nchụn-ẹjan a nọ ukpo hụ wẹ nọ a chụn ẹjan, elu ẹjan ndị hụ wẹ gi ọkụn chụnyeni Osolobuẹ, dụn a ọkụn n'o họnrin ẹnwụnrụn. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị a njọ.

← Chapter 3 Jump to: Chapter 5 →