Leviticus 10

Ika 2018 Bible

← Chapter 9 Jump to: Chapter 11 →

1Ụmụ Ẹrọnụ ikẹnnyẹ ẹbụọ wụ Nadabụ lẹ Abihu werisọnmẹ mkpu wẹ gi a mụ nsẹnsi, bu ọkụn che ẹ, kpọn nsẹnsi che ẹ; ya wẹ nọ mụyeni Osolobuẹ ọkụn ọ gwalẹni wẹ mụye.

2Ya ọkụn nọ gha ebe Osolobuẹ rị pụha d'a dụngbu wẹ, wẹ nọ nwụntọ ihun Osolobuẹ.

3Mozizi nọ sị Ẹrọnụ, “Ọnwan wụ ihiẹn ahụn Osolobuẹ ku ogẹn o gi sị; ‘M k'e gi ndị a nọkunmẹni m ghọsị nị m rị nsọ; m k'a hụn a nị ịhịan ile e ye m ọghọ m.’ ” Ẹrọnụ ekuni oku.

4Mozizi nọ kpọ Mishẹlụ lẹ Ẹl'zafanị, ụmụ Uziẹlụ nwẹnẹ nẹdi Ẹrọnụ, sị wẹ, “Bịa nị ebeni; bupụ nị umunẹ ụnụ ebeni ịhịan ile ziẹntọ lẹ ihun Ọdụ-ozuzu ebeni.”

5Ya wẹ nọ buru wẹ, wẹ lẹ ẹwuru ọrụn nchụn-ẹjan wẹ tueghafe mkpụkụ wẹ yi, gha ebẹhụ ndị Izrẹlụ ziẹntọ bupụ wẹ kẹ Mozizi dọn ku.

6Mozizi nọ sị Ẹrọnụ lẹ ụmụ Ẹrọnụ wụ Ẹliẹza lẹ Itama, “Ahapụkwọlẹ ni isi ụnụ ya-ya-ya nị ụnụ rị a kwan ndị hụ Osolobuẹ gi ọkụn dụngbu mọbụ dọka ẹkwa ụnụ, amamgbe ụnụ a nwụnhụn, ize ndị Izrẹlụ ile a ban Osolobuẹ. Kanị, umunẹ ụnụ, ikpụnọ Izrẹlụ ile, nwọn ikẹn kwan ndị hụ Osolobuẹ gi ọkụn dụngbu.

7Aghakwọlẹ ni ọnụmụzọ Ọdụ-ozuzu pụ, makẹni ụnụ mẹ ẹ, ụnụ a nwụnhụn, makẹni udẹn Osolobuẹ rị ụnụ isi.” Ya wẹ nọ mẹ kẹ Mozizi dọn ku.

8Osolobuẹ nọ sị Ẹrọnụ,

9“Ogẹn ọwụlẹ ịyụ lẹ ụmụ ị jẹnkọ d'a banye imẹ Ọdụ-ozuzu, arakwọlẹ ni manya mọbụ ihiẹn ọwụlẹ wẹ bama abama, amamgbe ụnụ a nwụn. Ọnwan wụ iwu ụnụ k'e dọnmẹferi agbọ ile lalanị.

10Ụnụ k'a gharịrị a ghọsị nị ihiẹn rị ichẹn rị ẹgbata ihiẹn rị nsọ lẹ ihiẹn mmakalaka, ẹgbata ihiẹn rụnị lẹ ihiẹn rị ọchan

11Ụnụ k'a kuzirịrị ndị Izrẹlụ iwu ile Osolobuẹ gha ọnụ Mozizi ye wẹ.”

12Mozizi nọ sị Ẹrọnụ lẹ ụmụ a ikẹnnyẹ họdụnị wụ Ẹliẹza lẹ Itama, “Weri ni hụn họdụnị imẹ ẹjan-ọka hụ wẹ gi ọkụn ye Osolobuẹ d'e ri; makẹni ọ rịkẹnmẹkẹ nsọ, nọ nị ụsụọ ukpo nchụn-ẹjan shi ẹ; ebuchelẹ n'ẹ yisti.

13Nọ nị ebe rị nsọ ri e, makẹni ịya wụ ihiẹn ru yụ lẹ ụmụ ị ikẹnnyẹ imẹ ẹjan wẹ gi ọkụn chụnyeni Osolobuẹ, makẹni ẹrịra kẹ Osolobuẹ gwa m.

14Kanị ịyụ lẹ ezi-lẹ-ụlọ ị nwọn ikẹn ri ẹran ahụn wẹ finfin lẹ ọrụ anụ ahụn wẹ gi a kwadọn ọrụn Osolobuẹ. Nọ nị ebe rị ọchan ri wẹ. Osolobuẹ e wegụọ wẹ ye ịyụ lẹ ụmụ ị ikẹnnyẹ lẹ ikpoho n'ọ wụrụ hụn ru ụnụ ẹka imẹ ẹjan-ekele ndị Izrẹlụ.

15Wẹ k'e weri ọrụ a wẹ gi a kwadọn ọrụn Osolobuẹ imẹ ẹjan wẹ gi ọkụn ye lẹ ẹran a hụ wẹ finfin lẹ ụtọrọ a, finfin ihun Osolobuẹ, n'ọ wụrụ ẹjan wẹ finfin, ọ wụrụ nke yụ lẹ ụmụ ị; hụn e ru ụnụ ẹka rọ jẹnrin ejẹn, kẹ Osolobuẹ dọn ku.”

16Ogẹn Mozizi gi jụ ukwere ewu wẹ gi chụn ẹjan-njọ, hụn a nị a dụnpụgụọ w'a ọkụn, ọ nọ sọn Ẹliẹza lẹ Itama ụmụ ikẹnnyẹ Ẹrọnụ hụ họdụnị, kpemẹ, sị,

17“Kị haịn ụnụ gilẹni ri anụ ẹjan-njọ hụ wẹ sị ụnụ e ri imẹ Ọdụ-ozuzu. Ọ rịkẹnmẹkẹ nsọ; Osolobuẹ ye ụnụ ya n'ọ wụrụ ihiẹn ụnụ gi e wepụnị ndị Izrẹlụ ikpe-ọmụma, a gbarị isi wẹ ebe Osolobuẹ rị.

18Ebe o mẹni ẹjan wẹ webanlẹni ẹdeke ẹ imẹ Ebe Kachanrịn Nsọ rọ, nkẹ ụnụ e ri ewu hụ wẹ sị ụnụ e ri imẹ Ọdụ-ozuzu — kẹ m dọn gwa ụnụ.”

19Ẹrọnụ nọ sị Mozizi, “A chụn wẹ ẹjan-njọ lẹ ẹjan wẹ a dụn ọkụn hụn wẹ chụn tannị, ihiẹn nọ ẹnịna e mẹ m. Nkẹ ọ sụọ Osolobuẹ m ri anụ ẹjan-njọ tannị?”

20Ogẹn Mozizi gi nụ ọnwan, ẹfọ nọ jun ẹ.

← Chapter 9 Jump to: Chapter 11 →