Leviticus 5

Ika 2018 Bible

← Chapter 4 Jump to: Chapter 6 →

1“Onyẹ mẹ njọ yeni n'ọ jụ n'ọ shịakọ ẹri ihiẹn o gi ẹnya a hụn mọbụ ihiẹn o gi ntịn a nụ, bụ ọ nụghọ kẹ wẹ gi ẹfan Osolobuẹ sị ịhịan ile ku ihiẹn wẹ nụ lẹ ihiẹn wẹ hụn, o k'e gi isi ẹ buru ẹ;

2ẹhụ ịhịan hụarị ihiẹn ọwụlẹ rụnị, kẹ ozun anụ-ọfịa rụnị kẹ ihiẹn-uriri rụnị mọbụ ihiẹn a rịnị rụnị, ọ sụọn'a n'ọ marịn, hụnyẹ a rụọlẹ, o sikọ d'e gi isi ẹ buru ihiẹn o mẹ;

3ẹhụ ị hụarị ihiẹn gha ẹhụ ịhịan pụha hụn iwu sị n'o mẹrụ ịhịan bụ y'a marịn, hụn i gi marịn, i k'e gizikwọ isi i buru ẹ;

4Ịhịan kun Osolobuẹ sị o k'e mẹ ihiẹn, kẹ mma rọ kẹ njọ rọ, bụ o ron'ẹ, hụn o gihụ marịn n'o kwegụọ nkwa furulẹni, ikpe a magụọ a.

5“Hụn ọwụlẹ ikpe gi ma ịhịan imẹ ihiẹn ndịnị wẹ, o ru, o sikọ d'e girịrị ọnụ a ku njọ hụn o mẹ,

6o wẹhẹni Osolobuẹ ẹjan onyẹ ikpe ma yeni njọ hụn o mẹ: onyẹnnyẹ atụnrụn mọbụ onyẹnnyẹ ewu k'o sikọ d'e wẹhẹ gi chụn ẹjan-njọ, onyẹ nchụn-ẹjan e gi ẹ gbarị isi hụnyẹ.

7“Omẹni mbụọ a epuni atụnrụn, o wẹhẹni Osolobuẹ nduru ẹbụọ mọbụ ụmụ oluikuku ẹbụọ makẹ njọ a: ohu wụ nke ẹjan njọ, ohu wụ nke ẹjan w'a dụn ọkụn.

8Ya we wẹ jẹnni onyẹ nchụn-ẹjan. Onyẹ nchụn-ẹjan sikọ d'e bu ụzọ chụnyegụ hụn wụ ẹjan-njọ ẹnịna: o k'a rụkwọn ẹ olu, kanị ọ dọbepụchanrịnkọ a isi;

9o k'e weberi ẹdeke ẹjan-njọ hụ feye ụsụọ ukpo nchụn-ẹjan, ọ nị hụn họdụnị gbayechanrịn ukun ukpo nchụn-ẹjan. Ẹjan njọ rọ.

10O weri nwan hụn ẹbọ chụn ẹjan w'a dụn ọkụn kẹ w'a chụ a, gi ẹ gbarị isi hụnyẹ makẹ njọ hụ o mẹ, Osolobuẹ a gbagharị hụnyẹ.

11“Omẹni mbụọ a epuni nduru ẹbụọ mọbụ ụmụ oluikuku ẹbụọ, ya wẹhẹ ọka-witi wẹ gweriẹn hụn k'e jun mkpu kọstadị nta ohu d'a chụn ẹjan njọ. Y'e buchekwọl'a ofigbọn-olivu mọbụ nsẹnsi, makẹni ẹjan njọ rọ.

12O k'e wẹhẹni onyẹ nchụn-ẹjan ya, onyẹ nchụn-ẹjan a bụọrị hụn jun ọb'ẹka gi nọkin ẹnya ọka hụ ile o wẹhẹ, dụn a ọkụn elu ukpo nchụn-ẹjan elu oyiye wẹ gi ọkụn ye Osolobuẹ, o họnrin ẹnwụnrụn. Ẹjan njọ rọ.

13Ụzọnị kẹ onyẹ nchụn-ẹjan e gi gbarị isi onyẹ mẹ njọ ọwụlẹ nọ ẹnịna, Osolobuẹ a gbagharị a. Hụn họdụnị imẹ oyiye ahụn k'a wụrụ nke onyẹ nchụn-ẹjan ẹrịra w'e mẹ oyiye-ọka.”

14Osolobuẹ nọ sị Mozizi:

15“Omẹni ọ rụnahịn ịhịan mẹ njọ ghahanị imẹrụ ihiẹn ọwụlẹ rị Osolobuẹ nsọ, o jẹnkọ d'a hannị Osolobuẹ ebulu ẹhụ a zu oke mọbụ ọnụ-egho ẹ wẹ gụn kẹ w'a gụn imẹ Ọdụ-nsọ, d'e gi ẹ chụn ẹjan onyẹ ikpe ma.

16O k'a kụzị ụgwọ omẹrụ hụn o mẹrụ ihiẹn hụn rị nsọ, o wezi ụzọ ohu imẹ ụzọ isẹn chen'ẹ, we wẹ ile ye onyẹ nchụn-ẹjan, o gi ịya lẹ ebulu ahụn chụnnị hụnyẹ ẹjan onyẹ ikpe ma, gi ẹ gbarị isi hụnyẹ, Osolobuẹ a gbagharị a.

17“Ịhịan mẹ njọ yeni n'o mẹ ihiẹn ọwụlẹ Osolobuẹ sị wẹ emẹlẹ, ikpe a magụọ a — ọ sụọn'a n'o ron'ẹ. O jẹnkọ d'e gi isi ẹ buru ẹ.

18O sikọ d'e wẹhẹni onyẹ nchụn-ẹjan ebulu ẹhụ a zu oke mọbụ ọnụ-egho ẹ, onyẹ nchụn-ẹjan e gi ẹ gbarị isi hụnyẹ, Osolobuẹ a gbagharị a.

19Ẹjan onyẹ ikpe ma rọ; ikpe ma a nke-esi ebe Osolobuẹ rị.”

← Chapter 4 Jump to: Chapter 6 →