Leviticus 17

Ika 2018 Bible

← Chapter 16 Jump to: Chapter 18 →

1Osolobuẹ sị Mozizi,

2“Gwa Ẹrọnụ lẹ ụmụ a lẹ ndị Izrẹlụ ile, sị, ‘Ọnwan wụ ihiẹn Osolobuẹ ku:

3Onyẹ Izrẹlụ ọwụlẹ nọ ebe ọwụlẹ imẹ obodo mọbụ ebe ịhịan bilẹni chụn ẹjan efin mọbụ atụnrụn mọbụ ewu,

4hụn nkẹ o gi wẹhẹ ẹ ọnụ-mgbọn Ọdụ-ozuzu k'o furu d'e ye Osolobuẹ ya ihun Ọdụ-nsọ, wẹ sikọ d'e weri ẹ kẹ onyẹ gbu ọchụn; ọchụn k'o gbu, wẹ k'e bepụ a imẹ ndị nke ẹ.

5O sikọ d'e mẹ ndị Izrẹlụ e wẹhẹni Osolobuẹ ẹjan wẹ rị nwan a chụnsọnmẹ ogbe, e wẹhẹni Osolobuẹ ya ọnụ-mgbọn Ọdụ-ozuzu, e ye onyẹ nchụn-ẹjan ebẹhụ, e gi wẹ ẹ a chụnyeni Osolobuẹ ẹjan-ekele.

6Onyẹ nchụn-ẹjan e fe ẹdeke anụ hụ ye elu ukpo nchụn-ẹjan Osolobuẹ ọnụmụzọ Ọdụ-nsọ, dụn ụtọrọ a ọkụn n'ọ wụrụ ẹjan hụn ishin ẹ a sụọ Osolobuẹ ụsụọ.

7Achụnyebehini wẹ eje-mmọn ẹjan wẹ ebe wẹ rị a rụa ewu ndị hụ wẹ rị nwan a rụa. Iwuni k'a rị jẹnrin ejẹn.’

8“Sị wẹ: Onyẹ Izrẹlụ ọwụlẹ mọbụ abịamabịa ọwụlẹ bi imẹ igunrun wẹ, hụn chụn ẹjan w'a dụn ọkụn mọbụ ẹjan ọzọ,

9mmanị o wẹhẹ ẹ ọnụ-mgbọn Ọdụ-ozuzu d'a chụnyeni Osolobuẹ, wẹ k'e bepụ onyẹ hụ imẹ ndị nke ẹ.

10“Onyẹ Izrẹlụ ọwụlẹ mọbụ abịamabịa bi imẹ igunrun wẹ ri ẹdeke ọwụlẹ, m k'e bu ẹnya zinmẹ ẹ, bepụ a imẹ ndị nke ẹ.

11Makẹni ndụn ihiẹn ọwụlẹ rị imẹ ẹdeke ẹ; e yegụọ m ụnụ ya nị ụnụ gi ẹ a chụn ẹjan ụnụ gi a gbarị isi elu-ukpo nchụn-ẹjan. Ẹdeke kẹ wẹ gi a gbarị isi ịhịan.

12Ịya haịn m gi a sị ndị Izrẹlụ, ‘E rikwọlẹ ni ẹdeke mọbụ nị abịamabịa rị imẹ igunrun ụnụ ri ẹdeke.’

13“Onyẹ Izrẹlụ ọwụlẹ mọbụ abịamabịa ọwụlẹ bi igunrun wẹ gbu anụ mọbụ nnụnụ k'a nị ẹdeke ẹ gbapụchanrịn, o gi ẹjan kpumẹ ẹ,

14makẹni ndụn ihiẹn ọwụlẹ rị imẹ ẹdeke ẹ. Ịya haịn m gi a sị ndị Izrẹlụ, ‘E rikwọlẹ ni ẹdeke ihiẹn ọwụlẹ, makẹni ndụn ihiẹn ọwụlẹ rị imẹ ẹdeke ẹ; onyẹ ri ẹ, wẹ k'e gbu ẹ.’

15“Kẹ nwa-di-alị kẹ abịamabịa, onyẹ ri anụ ọwụlẹ nwụnhụn ihiẹn ẹ mọbụ anụ eje-anụ gbu k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị o kebe rị ọchan.

16Kanị omẹni ọ sụnị ẹkwa, ọ wụnị ẹhụ, onyẹ hụ k'e gi isi ẹ buru ẹ.”

← Chapter 16 Jump to: Chapter 18 →