Leviticus 12

Ika 2018 Bible

← Chapter 11 Jump to: Chapter 13 →

1Osolobuẹ sị Mozizi,

2“Sị ndị Izrẹlụ: Okpoho tụ imẹ, mụ nwa-okẹnnyẹ, o k'a rụ ọrọgbọ akp'ọhịn ẹsa, k'o dọn a rụ ọ gha a sọ ezi.

3Nke akp'ọhịn ẹsatọ a kwa wẹ nwata-okẹnnyẹ hụ ugun,

4okpoho ahụn a nọdịgụzị akp'ọhịn mmẹtọ kwasị ọgụn wẹ gi e dọn ẹ nsọ makẹ ihiẹn rị a gban'a yeni ọmụmụ nwa. O mẹtụkọ ihiẹn ọwụlẹ rị nsọ ẹka ogẹn ahụn, ọ bankọ ụlọ-ofufe d'e runi ogẹn ahụn wẹ gi rị e dọn ẹ nsọ e zu.

5“Omẹni okpoho k'ọ mụ, o k'a rụ ọrọgbọ izuka ẹbụọ, k'o dọn a rụ ọ gha a sọ ezi, ọ nọdịgụzị akp'ọhịn isin kwasị ọgụn-ẹtọ wẹ gi e dọn ẹ nsọ makẹ ihiẹn gban'a yeni ọmụmụ nwa.

6“Ogẹn wẹ gi e dọn okpoho mụ nwa-okẹnnyẹ mọbụ nwa okpoho nsọ zugụ, o sikọ d'e weri nwa atụnrụn ahụa ohu o k'e gi chụn ẹjan w'a dụn ọkụn lẹ nwa oluikuku mọbụ nduru o k'e gi chụn ẹjan-njọ, we ẹ jẹnni onyẹ nchụn-ẹjan ọnụ-mgbọn Ọdụ-ozuzu.

7Onyẹ nchụn-ẹjan k'e gi wẹ chụnn'a ẹjan ihun Osolobuẹ, gi ẹ gbarị isi ẹ, ọ wụbehi onyẹ rụnị yeni ihiẹn gban'a. “Ịya wụ iwu rịnị okpoho mụ nwa-okẹnnyẹ mọbụ nwa okpoho.

8“Omẹni mbụọ a e puni atụnrụn, o wẹhẹ nduri ẹbụọ mọbụ ụmụ oluikuku ẹbụọ: wẹ gi ohu chụn ẹjan w'a dụn ọkụn, e gi wẹ hụn ẹbọ chụn ẹjan-njọ. Ẹrịra kẹ onyẹ nchụn-ẹjan k'a dọn gbarị isi okpoho hụ, ọ rị ọchan.”

← Chapter 11 Jump to: Chapter 13 →