Leviticus 24

Ika 2018 Bible

← Chapter 23 Jump to: Chapter 25 →

1Osolobuẹ sị Mozizi,

2“Sị ndị Izrẹlụ wẹhẹ ofugbọn-olivu wẹ sụ asụ nwọnlẹni ihiẹn ọzọ rịn'a, ni wẹ gi ẹ a mụ ukpẹ hụ rị Ọdụ-nsọ, nị ukpẹ hụn ụzọ e nwun ogẹn ile

3ihun Ẹkwa hụ wẹ gi tankin Ẹkpẹti Ashịa-ẹri hụn rị imẹ Ọdụ-ozuzu. Ẹrọnụ sikọ d'e mẹmẹ wẹ nị wẹ hụn ụzọ e nwun gha ẹnyasị d'e ru ụtụntụn. Wẹ k'e mẹferi ihiẹnni agbọ ile lalanị.

4Obu-ukpẹ hụ wẹ gi ezigbo goru wẹ buchelẹni ihiẹn ọzọ mẹmẹ hụn rị ihun Osolobuẹ kẹ wẹ sikọ d'a gha e dọnsọnmẹ wẹ, a mụye ọkụn jẹnrin ejẹn.

5“Weri ọka wẹ gweriẹn, gi mẹmẹ ogbe brẹdi mmẹbụọ; gi ọka wẹ gweriẹn hụn k'e jun mkpu kọstadị ẹnọ lẹ nkirishi mẹmẹsọnmẹ ogbe ohu-ohu.

6Dọnmẹ wẹ ogele ẹbụọ: isin ogele ohu, isin ogele ohu, ye elu teburu hụ wẹ gi ezigbo goru wẹ buchelẹni ihiẹn ọzọ mẹmẹ rị ihun Osolobuẹ.

7Bu nsẹnsi wẹ buchelẹni ihiẹn ọzọ che ogele brẹdi ẹbụọ hụ n'ọ hụn ụzọ wụrụ ihiẹn wẹ gi a nọkin ẹnya brẹdi hụ, ọ wụrụ ihiẹn wẹ ye Osolobuẹ.

8Wẹ k'a gha e butọnị Osolobuẹ brẹdini Ụhụọhịn izu-ikẹn ọwụlẹ, n'ọ wụrụ ihiẹn ndị Izrẹlụ e ye ẹ; ẹrịra kẹ wẹ k'e mẹsọnmẹ ẹ.

9Ẹrọnụ lẹ ụmụ a nwọn ẹ; ebe rị nsọ kẹ wẹ k'a nọ e ri ẹ makẹni ihiẹn rịkẹnmẹkẹ nsọ hụn runi wẹ imẹ oyiye ndị w'e ye Osolobuẹ k'ọ wụ.”

10O nwọn okẹnnyẹ ohu nnẹ ẹ wụ onyẹ Izrẹlụ, nẹdi ẹ onyẹ Ijiptu; ụhụọhịn ohu, ebe ya lẹ ndị Izrẹlụ rị, ọgụn nọ suni ya lẹ okẹnnyẹ onyẹ Izrẹlụ ebẹhụ wẹ ile ziẹntọ.

11Hụn nnẹ ẹ wụ onyẹ Izrẹlụ nọ kpọlịa Ẹfan hụ rị nsọ, kpọ iyi. Wẹ nọ wẹhẹni Mozizi ya. (Ẹfan nnẹ ẹ wụ Shẹlomiti nwa Dibiri onyẹ ebọn Danị.)

12Ya wẹ nọ kwọndọngụ a, kẹni wẹ nụgụ ọnụ Osolobuẹ.

13Osolobuẹ nọ sị Mozizi;

14“Weri ni onyẹ hụ kpọlịa Ẹfan m gha ebẹhụ ụnụ ziẹntọ pụ. Ndị ile nụ k'o ku oku hụ wẹ kị ẹka kwasị a isi, ịhịan ile e gi ọmụma magbu ẹ.

15Sị ndị Izrẹlụ: Onyẹ kpọ Chuku ẹ iyi, o gi isi ẹ buru ẹ;

16onyẹ kuja oku ẹfan Osolobuẹ, wẹ k'e gburịrị a; ịhịan ile sikọ d'e gi ọmụma magbu ẹ, kẹ abịamabịa rọ kẹ nwa-di-alị rọ; o kuja oku Ẹfan hụ rị nsọ, wẹ k'e gburịrị a.

17“Onyẹ gbu ịhịan, wẹ k'e gburịrị a.

18Onyẹ gbu anụ ịhịan k'a kụrịrị ụgwọ a: wẹ k'e girịrị ihiẹn rị ndụn kụ ụgwọ ihiẹn rị ndụn wẹ gbu.

19Onyẹ rụ ibe ẹ ẹhụ, wẹ k'e mẹgwarịrịrị a ihiẹn o mẹ ẹ ibe ẹ:

20onyẹ kpagi ịhịan ọkpụkpụ, a kpagi w'a ọkpụkpụ; onyẹ tikpọ ịhịan ẹnya, e tikpọ w'a ẹnya; onyẹ tikwọn ịhịan eze, e tikwọn w'a eze; ẹhụ ịhịan rụ ibe ẹ kẹ wẹ k'a rụ a.

21Onyẹ gbu anụ ịhịan k'a kụ ụgwọ a, kanị onyẹ gbu ịhịan, wẹ k'e gburịrị ya lẹ enwẹn ẹ.

22Iwu ohu hụ rịnị kẹ abịamabịa kẹ nwa-di-alị. Mmẹ wụ Osolobuẹ, Chuku ụnụ.”

23Mozizi nọ gwa ndị Izrẹlụ, wẹ nọ weri onyẹ hụ kuja oku ẹfan Osolobuẹ, gha ebẹhụ wẹ ziẹntọ pụ, gi ọmụma magbu ẹ. Ndị Izrẹlụ mẹ kẹ Osolobuẹ dọn gwa Mozizi.

← Chapter 23 Jump to: Chapter 25 →