Hosea 10

Icelandic 2007 (Biblían (2007))

← Chapter 9 Jump to: Chapter 11 →

1Ísrael er blómlegur vínviður sem ber ávöxt. Þegar ávöxtum hans fjölgaði fjölgaði hann ölturum sínum. Þegar velmegun jókst í landinu gerði hann merkisteina sína fegurri.

2Hjarta þeirra er svikult, nú eru þeir sekir. Hann mun sjálfur brjóta ölturu þeirra, eyða merkisteinum þeirra.

3Nú munu þeir segja: „Vér höfum engan konung því að vér óttumst ekki Drottin. Hvað getur konungurinn gert fyrir oss?

4Talað fánýt orð, svarið meinsæri, gert sáttmála.“ Og rétturinn blómstrar eins og eitruð jurt í plógfari á akri.

5Íbúar Samaríu óttast um kálfinn í Betaven. Þjóð hans syrgir hann, prestar hans gráta dýrð hans því að hann verður gerður útlægur frá þeim.

6Hann verður fluttur til Assýríu sem gjöf til stórkonungs. Efraím uppsker smán, Ísrael verður sér til skammar vegna ráða sinna.

7Samaría verður eydd, konungur hennar verður sem afskorinn kvistur í vatni.

8Fórnarhæðir illskunnar, synd Ísraels, verða eyddar, þyrnar og þistlar munu vaxa yfir ölturu þeirra. Menn munu segja við fjöllin: „Hyljið oss,“ og við hæðirnar: „Hrynjið yfir oss.“

9Allt frá dögum Gíbeu hefur þú syndgað, Ísrael, þar hafa þeir staðið í sömu sporum. Mun stríð ekki ná til þeirra í Gíbeu vegna illskuverkanna?

10Ég er kominn til að aga þá. Þjóðir munu safnast saman gegn þeim þegar þeir sæta aga fyrir báðar syndir sínar.

11Efraím var tamin kvíga, viljug að þreskja. Þegar ég gekk hjá og sá sterklegan háls hennar spennti ég Efraím fyrir til að plægja, Jakob á að herfa.

12Sáið réttlæti og uppskerið kærleika, brjótið land til ræktunar. Nú er tími til að leita svara hjá Drottni þar til hann kemur og lætur réttlæti rigna yfir yður.

13En þér hafið gróðursett ranglæti, uppskorið glæpi, þér hafið etið ávöxt lyginnar. Þú treystir þínum eigin leiðum og fjölda hermanna þinna.

14Þess vegna rís hergnýr gegn þjóð þinni og allar virkisborgir þínar verða eyddar eins og Salman eyddi Betarbel á degi orrustunnar þegar móðir var kramin ásamt börnum sínum.

15Þannig mun ég fara með yður, Ísraelsmenn, vegna mikillar vonsku yðar. Í dögun þagnar konungur Ísraels.

← Chapter 9 Jump to: Chapter 11 →