Hosea 13

Icelandic 2007 (Biblían (2007))

← Chapter 12 Jump to: Chapter 14 →

1Þegar Efraím tók til máls skelfdust menn, hann var virtur í Ísrael en varð sekur vegna Baals og dó.

2Og nú syndga þeir áfram og steypa sér líkneski úr silfri sínu, skurðgoð af eigin hugviti sem öll eru verk handverksmanna. Þeir segja: „Menn færa fórnir og kyssa kálfa.“

3Þess vegna munu þeir líkjast morgunþoku og dögg sem hverfur fljótt eða hismi sem feykt er af þreskivelli og reyk sem hverfur út um ljóra.

4En ég, Drottinn, er Guð þinn síðan í Egyptalandi og þú skalt engan Guð játa annan en mig og enginn er frelsari nema ég.

5Ég annaðist þig í eyðimörkinni, í skraufþurru landi.

6Þegar þeir höfðu haglendi urðu þeir saddir, urðu saddir og fylltust hroka og því gleymdu þeir mér.

7Ég mun reynast þeim sem ljón, ligg í leyni við veginn eins og pardus,

8ræðst á þá eins og birna svipt húnum sínum og ríf þá á hol, ég gleypi þá eins og ljón, villidýr munu slíta þá í sundur.

9Eyðing kemur yfir þig, Ísrael, en hjálp þín er í mér.

10Hvar er nú konungur þinn sem gæti bjargað þér og öllum borgum þínum, hvar stjórnendur þínir? Þú baðst um þá og sagðir: „Fáðu mér konung og höfðingja.“

11Ég gaf þér konung í reiði minni og tók hann aftur í heift minni.

12Sekt Efraíms er innsigluð, synd hans geymd.

13Þrautir líkar fæðingarhríðum koma yfir hann. Hann er heimskur sonur. Þegar stundin er komin kemur hann ekki í burðarliðinn.

14Á ég að leysa þá úr greipum heljar, frelsa þá frá dauða? Hvar eru sóttir þínar, dauði, hvar broddur þinn, hel? Augu mín þekkja enga miskunn.

15Þó að Efraím blómgist innan um sefgresi kemur austanvindurinn, stormur frá Drottni. Hann hefur sig upp frá eyðimörkinni, vatnsból þorna og uppsprettur þrjóta. Hann rænir fjárhirsluna öllum dýrgripum sínum.

← Chapter 12 Jump to: Chapter 14 →

Recommended Reading

Commentary Hosea Commentaries → Devotional Hosea Devotional Guide → Get This Bible 2007 Study Bible →