Luke 1 — Mien Bible (Thai Script) © Thailand Bible Society, 2007

5เยียม ยูเดีย เญย ฮู่ง, เฮโล้ด, กุ๊น เญย เฒี่ยง โห่, ม่าย เต้า ไซ เมี่ยน, บั๋ว เห่ว เสคา ลิยา, เป๋น อาบียา ไซ เมี่ยน เญย กวั้น. นิ่น เญย เอ๊า, เอลีซาเบด, หย่า โหฒว อาโลน ไซ เมี่ยน เญย เฒ้ย-ฟุน.

6หฒิว ทิน-ฮู่ง หมั่ง, นิ่น บัว อี ฮมวั้ง เป๋น คู้ เมี่ยน, หมวัง เฒี้ยว หัด เญย เหยียด ฒู้ง หว่า เหธา เล์ย. ไม้ ม่าย ต๋อง เฆ่ม อ๊ะ.

7มป่า นิ่น บัว ไม้ ม่าย ฝุเจว๊ย เหว่ย หฒุ เอลีซาเบด ไม้ ไฮ่ ม่าย. นิ่น บัว อี ฮมวั้ง หย่า โก๋ ไห่ อ๊ะ.

8ม่าย ฮนอย เสคาลิยา เยียม หฒั่ง ทิน-ฮู่ง เญย เปย๊า โหฒว ไซ เมี่ยน เญย กง เอย นิ่น บัว เญย ล่วน ปาน ฮนอย โหฒว.

9ต้ง หน่าย ฮนอย, เอย ไซ เมี่ยน เญย เล์ย ตี่ง ต้าย, ด๊อด หฒุ เสคาลิยา อ๋อย หฒุ เปียะ เฒี้ยว เญย เปย๊า ปั๊ว ฮูง.

10นิ่น ปั๊ว ฮูง เญย เฒี่ยง โห่, หฒวัง เมี่ยน เยียม กะเหญี่ย เต๋า เก๋า.

11วั้ว หฒั่น ม่าย เต้า เฒี้ยว เญย ฟิน-เมี่ยน หิ่น ธ้วด ต้าย โซ้ว เจี๊ยน ปั๊ว ฮูง เตี้ย บย่าว แหมง.

12เสคาลิยา เยี้ยด ปวัด ฯฒฯ แฮะ นิ่น เฮญี้ยว ฮวาง เหฑ่ง, กั้ม เหฑีย ไห่.

13ฟิน-เมี่ยน บั๋ว นิ่น, “เสคาลิยา อ้า! เม่ย ไม้ ตู๋ง กั้ม เหฑีย โอ่. ต้ง เม่ย โท้ ทิน-ฮู่ง วั้ว เต๋ย หว่า, ทิน-ฮู่ง ไฮ์ หมี่ อ๊ะ. เม่ย เญย มเซียะ ตอน, เอลีซาเบด, อ๋อย ม่าย เต้า ตอน. อ๋อย หฒุ กัน นิ่น ธ้วด บั๋ว เห่ว โยฮัน.

14เม่ย ฯฒฯ เฌียน-โย่ว, ออน-เหลาะ ไห่. น้าย เต้า ฝุเจว๊ย ธ้วด เสย, เมี่ยน ธั้ม หย่า อะเฮน้ย ไห่.

15เอย เฒี้ยว หมั่ง, น้าย เต้า ฝุเจว๊ย หย่า โหฒว เต้า ม่าย เม่ง โห่ เญย เมี่ยน. นิ่น เหยียด เสย ไม้ ฮบ อะหงุ่น ติ๊ว ไฟ ไฮ่ ฆวิน เมี่ยน เญย กะน้าย. นิ่น ธ้วด เสย ต้าย ฯฒฯ ม่าย สีง ลี่ง ปวั๊ง เหฑ่ง นิ่น เญย เฮญี้ยว อ๊ะ.

16นิ่น อ๋อย ต้อ อิสะลาเอน เมี่ยน ธั้ม เญย แอ๋ง หฑวน ต้าย ล์อ เฒี้ยว, นิ่น บัว เญย ทิน-ฮู่ง.

17นิ่น อ๋อย มี่ง ด่าง เฒี้ยว, หย่า ม่าย หัด ม์า, ม่าย ชะ ฮนั้ง เอลียา นอ. นิ่น อ๋อย เถง โหฒว เตีย เญย เมี่ยน เหธา นิ่น บัว เญย ฝุเจว๊ย หอบ เฮญี้ยว ต้าย. ไม้ หมวัง หว่า เญย เมี่ยน, นิ่น หย่า ไฮ่ เถง ก๊อย เฮญี้ยว ต้าย กัน โต์-เล์ย. นิ่น หย่า อ๋อย เถง ทิน-ฮู่ง เญย เมี่ยน หลิ่ว เล์ย ฒิบ เฒี้ยว.”

18เสคาลิยา หน่าย ฟิน-เมี่ยน, “เม่ย ฮนั้ง หน่าย ก๊อง, เยีย ฝู่ง ไฮ่ ฮิ้ว ตุ๊ เฒียน? เยีย โก๋ ไห่ อ๊ะ. เยีย เญย มเซียะ ตอน หย่า โก๋ ไห่.”

19ฟิน-เมี่ยน เตา, “เยีย เซ กาเบเลียน, ต้ง โซ้ว เจี๊ยน ทิน-ฮู่ง เญย หฑะเฮมียน ฟู-สู นิ่น. ทิน-ฮู่ง พ้าย เยีย ต้าย โต่ว น้าย เต๋ย คู้ เฝียน บั๋ว เม่ย.

20เม่ย ไม้ เสียน เยีย เญย หว่า, มป่า เถา หอบ หฒุ ธ้วด วั้ว หฒั่น หฒะเก้ง อ๋อย เอย เจี๊ยน เยีย เญย หว่า ธ้วด ต้าย อ๊ะ เหลาะ. หลาย เม่ย ไม้ เสียน เยีย เญย หว่า, เม่ย อ๋อย หฒุ หฮงง มี่ง. ฒั้ว เถา น้าย เต๋ย สี่ ธ้วด ลิ์ว, หธีง ต้าย ไฮ่ ก๊อง หว่า.”

21หฒวัง เมี่ยน หธ่อ เยียม กะเหญี่ย แหมง ฒั้ว เจี๊ยน เสคาลิยา. นิ่น บัว ไม้ เม่ง แปะ นิ่น เหว่ย หาย ติ่ว เยียม หฒั่ง ทิน-ฮู่ง เญย เปย๊า กะญั์ว ด่ง หน่าย เล่า.

22โหฒว เกา, เสคาลิยา ธ้วด ต้าย ไม้ ไฮ่ เหธา นิ่น บัว ก๊อง หว่า. หฒวัง เมี่ยน ฯฒฯ ฮิ้ว ตุ๊ นิ่น เยียม หฒั่ง ทิน-ฮู่ง เญย เปย๊า กะญั์ว ปวัด หิ่น ย่าง เญย สี่. นิ่น ขูง หล่ง ปั์ว อู๊ ฮนั้ง. เหยียด โจ๋ว หว่า หย่า ไม้ ไฮ่ ก๊อง อ๊ะ.

23เสคาลิยา เยียม หฒั่ง ทิน-ฮู่ง เญย เปย๊า โหฒว เหฒียง นิ่น เญย ป่วน กง ฯฒฯ หฑวน หมี่ อ๊ะ.

24ฆะฮ้า เอลีซาเบด ม่าย เจี๊ยน ซิน. นิ่น ฯฒฯ เยียม ปยา หฮลา เหญียะ เปย๊า, ไม้ มี่ง หาย เดา.

25นิ่น ก๊อง, “อี้ หฒั่น เฒี้ยว อะเฮน้ย เยีย, เถง เยีย ไฮ่ ม่าย ฝุเจว๊ย, เยีย ฯฒฯ ไม้ หฒุ ไญ้ เมี่ยน อ๊ะ.”

26เอลีซาเบด ม่าย เจี๊ยน ซิน ตุ๊ จุ๊ หฮลา เหญียะ, ทิน-ฮู่ง พ้าย กาเบเลียน วั้ว เต้า ฟิน-เมี่ยน มี่ง เถา กาลิลี แซ้ง, นาซาเล้ด มู้ง,

27โต่ว เฝียน บั๋ว เต้า เซียะ, บั๋ว เห่ว มาลียา. ม่าย เต้า ดาวิด ฮู่ง เญย เฒ้ย-ฟุน, บั๋ว เห่ว โยเซ้บ, ต้าย ก๊อง เฒี่ยง นิ่น หมี่ อ๊ะ.

28ฟิน-เมี่ยน มี่ง เถา มาลียา วั้ว บั๋ว นิ่น, “มาลียา อ่า, แป้ง ออน เญย ซ่าะ? เฒี้ยว เหธา เม่ย เยียม หย่า เหธย เอน ปุน เม่ย.”

29มาลียา ไฮ์ น้าย เต๋ย หว่า, เลี่ยม เฒ่ย เฮญี้ยว ฮวาง เหฑ่ง, ฮนั้ม ไม้ ฮิ้ว ฟิน-เมี่ยน เหว่ย หาย ติ่ว ฮนั้ง น้าย นอ ก๊อง มเปย.

30ฟิน-เมี่ยน แอ๋ง ก๊อง บั๋ว นิ่น, “มาลียา อ่า, เม่ย ไม้ ตู๋ง กั้ม เหฑีย โอ่. ทิน-ฮู่ง เหธย เอน ปุน เม่ย.

31เม่ย อ๋อย ม่าย นอม ซิน, ยู์ง ตุ๊ เต้า ตอน. เม่ย หย่า อ๋อย หฒุ เถง นิ่น ธ้วด บั๋ว เห่ว เยซู.

32นิ่น อ๋อย ตุ๊ โหฒว โฮล, หย่า ตุ๊ เห่ว เป๋น เยียม ฮลัง เจี๋ย วั้ว เต้า เญย ตอน. เฒี้ยว ทิน-ฮู่ง อ๋อย ปุน นิ่น หฑิบ นิ่น เญย อง-ถาย-แงะ, ดาวิด, เญย เหว่ย.

33นิ่น อ๋อย เหยียด ลิ์ว กุ๊น ยาโค้บ เญย เฒ้ย-ฟุน. นิ่น เญย ฮู่ง โห่ เหยียด ลิ์ว ไม้ ไฮ่ เจี๋ย.”

34มาลียา หน่าย ก๋า ฟิน-เมี่ยน, “เยีย เลี่ยม ไม้ เหธา หาย เต้า มจั่ง ตอน เปว๋ย เจี๋ย. ฮนั้ง หาย นอ ไฮ่ ม่าย ซิน?”

35ฟิน-เมี่ยน แอ๋ง เตา, “สีง ลี่ง อ๋อย เหฌี่ย ต้าย เยียม เม่ย. เยียม ฮลัง เจี๋ย เญย ทิน-ฮู่ง เญย ชะ อ๋อย เฑีย เจี๊ยน เม่ย. ฮนั้ง น้าย เม่ย ฯฒฯ ตุ๊ เต้า ไม้ ม่าย ฒุ์ย, ธีง-เหฑ่ง เญย ฝุเจว๊ย, เห่ว ทิน-ฮู่ง เญย ตอน.

36เม่ย ฮนั้ม หมั่ง ก๋า เม่ย เญย เธียน-เธะ, เอลีซาเบด. เมี่ยน ก๊อง นิ่น ไม้ ไฮ่ ม่าย กู้งว์า. อี้ หฒั่น นิ่น ด่ง หน่าย โก๋ มป่า นิ่น ฒู้ง ม่าย เจี๊ยน ซิน ตุ๊ จุ๊ หฮลา เหญียะ อ๊ะโล่ะ!

37ไม้ ม่าย หาย หญู่ง ทิน-ฮู่ง ไม้ ไฮ่ โหฒว.”

38มาลียา เตา, “เยีย โหฒว เฒี้ยว เญย โปว. มต้าย อ๋อย หฒุ ฮนั้ง เม่ย ก๊อง นอ อ๊ะ.” ก๊อง ลิ์ว น้าย เต๋ย หว่า, ฟิน-เมี่ยน มี่ง หมี่ อ๊ะ.

39ฆะฮ้า ไม้ เล่า มาลียา ฯฒฯ เบ่น กะน้าย ก๊าน เจี๊ยน ธ้วด เจ๊า มี่ง ยูเดีย แซ้ง, บง หฒั่ง เญย เหยียด นอม มู้ง.

40มี่ง เถา, นิ่น ฯฒฯ เปียะ เสคาลิยา เญย เปย๊า เหธา เอลีซาเบด ก๊อง หวุ่ย ปวั้ง หว่า.

41เอลีซาเบด เยี้ยด ไฮ์ มาลียา เญย เฉีย, กู้งว์า เยียม กะเซีย ต์ง ตุ๊ เสย ไห่. เอลีซาเบด หย่า ตุ๊ สีง ลี่ง ปวั๊ง เหฑ่ง เฮญี้ยว

42ฯฒฯ เห่ว เฉีย บุย เญย ก๊อง, “เยียม หฒวัง มเซียะ ตอน บุด๋ง, ทิน-ฮู่ง เหธย ฟุ ปุน เม่ย เก้า ธั้ม เจี๋ย. ทิน-ฮู่ง หย่า เหธย ฟุ ปุน เม่ย ม่าย เจี๊ยน น้าย เต้า กู้งว์า.

43เยีย เหว่ย หาย ติ่ว ตุ๊ ด่ง น้าย หลง? ตุ๊ เยีย เญย เฒี้ยว เญย มา ต้าย เหธา เยีย หฑย่าว นี?

44เยีย เยี้ยด ไฮ์ เม่ย เญย เฉีย, เยีย ม่าย เจี๊ยน น้าย นอม ซิน อะเฮน้ย ไห่, ฯฒฯ เลี่ยม เฒ่ย ต์ง ตุ๊ เสย ไห่.

45เม่ย เสียน เฒี้ยว ก๊อง ลิ์ว วั้ว เต๋ย หว่า หฒะเก้ง อ๋อย ธ้วด ต้าย เฒียน เญย, เม่ย ฯฒฯ ม่าย ออน-เหลาะ ไห่.”

46มาลียา ก๊อง, “เยีย เญย เฮญี้ยว เธง เฒี้ยว เว่ย โฮล,

47เยีย เญย เหฌียว เฒี้ยว, ทิน-ฮู่ง ปุน เยีย เญย ลี่ง ว่วน เฌียน-โย่ว.

48เยีย โหฒว นิ่น เญย โปว, ไม้ ม่าย หาย หญู่ง เม่ง โห่ มป่า นิ่น หธ่อ จั๋ง เถา เยีย. เยียม น้าย มี่ง ฆะฮ้า ฮี้ง, ต่อยๆ เมี่ยน ฒู้ง อ๋อย ก๊อง เยีย ตุ๊ ฟุ,

49เหว่ย หฒุ ม่าย ต้ม ชะ เญย ทิน-ฮู่ง เหธย บัวะ ฮ่อง ไห่ เญย สี่ ปุน เยีย. นิ่น เญย บั๋ว เซ ธีง-เหฑ่ง ไห่.

50นิ่น ค้อ-เลี่ยน ท่าย นิ่น เญย เมี่ยน, เหยียด ต่อย เจี๋ย เหยียด ต่อย.

51นิ่น ซูง นิ่น เญย ปั์ว โหฒว ธ้วด ต้ม สี่, ปุน เหมา เญย เมี่ยน เหธา นิ่น บัว เญย หญู่งๆ หฒะเอ๋ย ฟ้าด หฑาน เหฑ่ง มี่ง.

52โหฒว โฮล เญย เมี่ยน, นิ่น ทุด เหฌี่ย เหว่ย, โหฒว ไฝ วั้ว เต๋ย, นิ่น โป้ว ฝาว ฮลัง.

53หง่อ เญย เมี่ยน นิ่น เหธย หลง เญย กะน้าย ปุน หญั่น เป๊ว, ปุน เมี่ยน ม่าย เมี่ยน ขูง-ปั์ว แปะ เหฒา เญย มี่ง.

54นิ่น เอย นิ่น เหธา บัว เญย อง-ถาย แล์ง ลิ์ว เญย หว่า เถง นิ่น เญย โปว, อิสะลาเอน. นิ่น ค้อ-เลี่ยน อับลาฮัม, หย่า เหยียด ลิ์ว ค้อ-เลี่ยน อับลาฮัม เญย เฒ้ย-ฟุน.”

56มาลียา เหธา เอลีซาเบด เยียม อ๊า ลั่ม ตุ๊ ปัว หฮลา เหญียะ เญย ต๋อง, มาลียา ฯฒฯ หฑวน หมี่ อ๊ะ.

57เอลีซาเบด ม่าย ซิน เญย เฒี่ยง โห่ เก๋า, นิ่น ฯฒฯ ยู์ง ตุ๊ เต้า ตอน.

58นิ่น เญย ล์าง หฒั่ง เมี่ยน เหธา เธียน-เธะ ไฮ์ เฒี้ยว ฮนั้ง น้าย นอ ค้อ-เลี่ยน นิ่น, เหยียด ฒู้ง ฯฒฯ ล่ม ฑ่อย เถง นิ่น อะเฮน้ย.

59กู้งว์า ธ้วด เสย ต้าย ตุ๊ เหฮยียด ฮนอย, อ๋อย เจี๋ย ก๊าด เญย เล์ย วั้ว หฒั่น, เมี่ยน อ๋อย เถง กู้งว์า ธ้วด บั๋ว เห่ว นิด นิ่น เญย เตีย, เสคาลิยา.

60มป่า นิ่น เญย มา ก๊อง, “ไม้ เฒ์ย เหลาะ. นิ่น เญย บั๋ว อ๋อย หฒุ เห่ว โยฮัน.”

61วั้ว เต๋ย เมี่ยน ก๊อง บั๋ว นิ่น, “เม่ย เญย เธียน-เธะ เญย บั๋ว ไม้ ม่าย หาย เต้า ฮนั้ง หน่าย นอ เห่ว นีอา.”

62ก๊อง ลิ์ว นิ่น บัว ฯฒฯ หล่ง ปั์ว อู๊ หน่าย ก๋า กู้งว์า เญย เตีย อ๋อย เถง นิ่น เญย ตอน ธ้วด บั๋ว เห่ว หาย หญู่ง.

63เสคาลิยา โท้ คว้าย เฟี้ย หฑั่ง เป๊น ต้าย เฟี้ย เจี๊ยน ก๊อง, “นิ่น เญย บั๋ว เห่ว โยฮัน.” หฒวัง เมี่ยน ฯฒฯ ฮนั้ม ไม้ เม่ง แปะ.

64เสคาลิยา เลี่ยม เฒ่ย แอ๋ง ไฮ่ ก๊อง ธ้วด หว่า ต้าย ฯฒฯ เธง ทิน-ฮู่ง.

65ล์าง หฒั่ง เมี่ยน หฒะเก้ง กั้ม เหฑีย ไห่. น้าย เต๋ย สี่ เญย เฝียน ฆะฮ้า ซีง ปวั๊ง ยูเดีย แซ้ง, บง หฒั่ง เญย ต๋อง.

66ไฮ์ ลิ์ว เญย เมี่ยน เฒาะ น้าย เต๋ย สี่ อัน เจี๊ยน เฮญี้ยว ฮนั้ม, “อา, น้าย เต้า ฝุเจว๊ย โฮล ต้าย เป๋น หาย หญู่ง เมี่ยน นี?” เหว่ย หฒุ เม่งๆ แปะๆ เญย ปวัด เจี๊ยน เฒี้ยว เหธา นิ่น เยียม.

67โยฮัน เญย เตีย, เสคาลิยา, ตุ๊ สีง ลี่ง ปวั๊ง เหฑ่ง เฮญี้ยว ฯฒฯ โต่ว หว่า ก๊อง,

68“บัว อ๋อย หฒุ เธง เฒี้ยว, อิสะลาเอน เมี่ยน เญย ทิน-ฮู่ง, เหว่ย หฒุ นิ่น ต้าย หฒัวะ นิ่น เญย เมี่ยน หฑวน.

69นิ่น เยียม นิ่น เญย โปว, ดาวิด, เญย เฒ้ย-ฟุน, เหว่ย บัว เหลียบ เต้า ม่าย ชะ เญย เหฌียว เฒี้ยว,

70ฮนั้ง โล์-ฮนอย ทิน-ฮู่ง หล่ง นิ่น เญย ธีง-เหฑ่ง โต่ว หว่า เมี่ยน ก๊อง เญย หว่า.

71ทิน-ฮู่ง อ๋อย เหฌียว บัว เล่ย ดุ๊ด บัว เญย วิน-วั้ง, เหธา ฑอง บัว วั้ว เต๋ย เมี่ยน เญย ปั์ว-เดี๊ย.

72นิ่น ก๊อง นิ่น อ๋อย ค้อ-เลี่ยน บัว เญย อง-ถาย, หย่า หฒั่นๆ จั๋ง เจี๊ยน นิ่น แล์ง ลิ์ว วั้ว เต๋ย ธีง-เหฑ่ง เญย แหง่ง หว่า.

73ทิน-ฮู่ง แล์ง แหง่ง หว่า ปุน บัว เญย อง-ถาย-แงะ, อับลาฮัม.

74นิ่น ก๊อง นิ่น อ๋อย ปุน เยียม บัว เญย วิน-วั้ง เญย ปั์ว-เดี๊ย เปย๋า ธ้วด ต้าย ปัวะ หฒั่ง นิ่น, ไม้ หฒุ กั้ม เหฑีย หาย หญู่ง,

75หย่า ปุน บัว เหยียด เสย เยียม นิ่น เญย หฑะเฮมียน ธีง-เหฑ่ง, โหฒว ตุ๊ หอบ นิ่น เญย เฮญี้ยว.

76เยีย เญย ตอน อ่า, เม่ย เญย บั๋ว อ๋อย หฒุ เห่ว เยียม ฮลัง เจี๋ย วั้ว เต้า เญย โต่ว หว่า เมี่ยน, เหว่ย หฒุ เม่ย อ๋อย หฒุ มี่ง ด่าง หลิ่ว เล์ย เฒี้ยว เญย เจ๊า.

77อ๋อย หฒุ ปุน นิ่น เญย แปะ ฝีง ฮิ้ว ตุ๊ นิ่น บัว ตุ๊ เหฌียว เซ เหว่ย หฒุ ตุ๊ นิ่น บัว เญย ฒุ์ย กวั่ง ลิ์ว.

78ทิน-ฮู่ง ค้อ-เลี่ยน เมี่ยน, ฯฒฯ อ๋อย ปุน เหฌียว เอน เหฌี่ย ต้าย, ฮนั้ง ลู่ง ดอม เฑี้ยว เญย ฌัง

79หฒิว เจี๊ยน เยียม หฮมวัง เญย เหธา เยียม หฒุ ไต่ เญย ต้ง ลิ่น กะญั์ว วั้ว เต๋ย. นิ่น หย่า อ๋อย เยี์ยน บัว ยั่ง แป้ง ออน เญย เจ๊า.”

80น้าย เต้า ฝุเจว๊ย กุ๊น โฮล, นิ่น เญย เฮญี้ยว กุ๊น เฮ้น. นิ่น เยียม เต่ย-ปูง-ฮวาง ฒั้ว เถา เฒี่ยง โห่ นิ่น ธ้วด ต้าย ปุน อิสะลาเอน เมี่ยน ฮิ้ว ตุ๊ นิ่น.