Luke 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1ม่าย ฮนอย นอ, เยซู โซ้ว เจี๊ยน เกนเนซาเล้ด ค้อย-ตอน เฮลน. เมี่ยน ธั้ม เญย เบ๋ง เจี๊ยน มี่ง เยซู วั้ว, อ๋อย หมวัง นิ่น ก๊อง ทิน-ฮู่ง เญย หว่า.

2เยซู ปวัด อี โผว ฑั้ง ตี้ง เจี๊ยน วั้ว ค้อย-เฮลน, มป่า เฒาะ เบย์า เมี่ยน ธ้วด ฑั้ง มี่ง โหฑ นิ่น บัว เญย มู์ง หมี่ อ๊ะ.

3เยซู เปียะ โผว ฑั้ง. วั้ว โผว เซ ซีโมน เญย. เยซู โท้ นิ่น แฑง เจี๋ย มี่ง เต๋ย ฯฒฯ เฒว์ย เจี๊ยน วั้ว ฑั้ง หฌาว หฒวัง เมี่ยน.

4เยซู หฌาว ป่า หว่า, นิ่น บั๋ว ซีโมน, “แอ๋ง แฑง ฑั้ง เจี๋ย มี่ง เต๋ย วั้ว แหมง ววม โด เญย ต๋อง ป์อง มู์ง เหฌี่ย เฒาะ เบย์า ม่าะ!”

5ซีโมน เตา, “เฒี้ยว อ้า! เยีย บัว เฒี่ยง ม์วน ป์อง เกา โค้ว เหฑ่ง. เหยียด เต้า เบย์า หย่า ไม้ ตุ๊. มป่า เยีย เอย เจี๊ยน เม่ย เญย หว่า ป์อง มู์ง เหฌี่ย.”

6นิ่น บัว ฯฒฯ ป์อง มู์ง เหฌี่ย, ตุ๊ เบย์า ธั้ม! ไห่. มู์ง ค้า เต๋ย ฮู้ หมี่ อ๊ะ.

7ซีโมน บัว ฯฒฯ ย้าบ นิ่น บัว เญย เฒาะ เบย์า ต่อย ต้อ วั้ว โผว ฑั้ง ต้าย เถง. อี โผว ฑั้ง ม่าย เบย์า ปวั๊ง เหฑ่ง. ฑั้ง ค้า เต๋ย เฒ่ม อ๊ะ.

8ซีโมน ปีเต ปวัด ฮนั้ง น้าย นอ นิ่น ฯฒฯ เกว่ย เหฌี่ย เยซู เญย ธี่ง เบาะ กะเฮลน ก๊อง, “เฒี้ยว อ้า! โท้ เล่ย โก เต๋ย เยีย ม่าะ! เหว่ย หฒุ เยีย เซ ฒุ์ย-เมี่ยน.”

9นิ่น เหธา นิ่น เญย ต่อย บัวะ ฮ่อง ไห่, เฒาะ ตุ๊ เบย์า ด่ง หน่าย ธั้ม.

10เหธา ซีโมน จวั่ง กง วั้ว เต๋ย เฒาะ เบย์า ต่อย, เสเบดี เญย ตอน, ยากอบ เหธา โยฮัน, หย่า บัวะ ฮ่อง. เยซู แอ๋ง ก๊อง บั๋ว ซีโมน, “เม่ย ไม้ ตู๋ง กั้ม เหฑีย โอ่. ยั่ง น้าย เจี๋ย เม่ย อ๋อย ล์อ เมี่ยน.”

11นิ่น บัว ฯฒฯ ทอ ฑั้ง ธ้วด ววม-เฮลน, เหยียด ฒู้ง กะน้าย กวั่ง เหฑ่ง กัน เจี๊ยน เยซู มี่ง อ๊ะ.

12ม่าย หฑุ่น เยซู เยียม นอม มู้ง, ม่าย ล่าน เมี่ยน ปุ๊ด ก้ม ฮู้ แป่ง ปวั๊ง เหฑ่ง ซิน. นิ่น ปวัด เยซู ฯฒฯ บ๊าบ เหฌี่ย เดา โท้, “ต้ม ก๋อ อ่า, สี ก๊อง เม่ย อ๋อย นอ, เม่ย ไฮ่ หฒ่อ หลง เยีย เญย แป่ง.”

13เยซู ซูง ปั์ว มาน เจี๊ยน วั้ว ล่าน เมี่ยน หย่า ก๊อง, “เยีย อ๋อย หฒ่อ เญย. เม่ย หลง ต้าย ม่าะ!” วั้ว ล่าน เมี่ยน เญย แป่ง เลี่ยม เฒ่ย หลง หมี่ อ๊ะ.

14เยซู ก๊อง, “ธิน-หม่าน ไม้ ตู๋ง บั๋ว หาย เต้า โอ่. แปง หฒะ เญย มี่ง ไซ เมี่ยน วั้ว ปุน นิ่น ฒ่า หมั่ง. หมั่ง ลิ์ว, อ๋อย หฒุ หฒิว โมเซ พ้าย เญย หว่า ต้อ แซง-คู้ มี่ง เหฒี่ย ปุน ทิน-ฮู่ง เหว่ย สา เม่ย เญย หวุย, โหฒว ฒอง-เหฒง ปุน หฒวัง เมี่ยน ฮิ้ว ตุ๊ เม่ย เญย แป่ง หลง เหฑ่ง หมี่ อ๊ะ.”

15มป่า เยซู เญย เม่ง เต้า จา ซีง จั๊ง เจี๊ยน มี่ง. ม่าย เมี่ยน ธั้ม! เญย ต้าย หมวัง นิ่น, หย่า อ๋อย นิ่น หฒ่อ นิ่น บัว เญย แป่ง,

16มป่า เยซู อ้าโหล่ มี่ง เล่ง เญย ต๋อง เต๋า เก๋า.

17ม่าย ฮนอย เยซู หฌาว เจี๊ยน เมี่ยน, ม่าย เต๋ย ฟาลิสี เมี่ยน เหธา เต๋ย หฌาว เล์ย เญย ฟิน-แซง หย่า เฒว์ย เจี๊ยน วั้ว. นิ่น บัว เยียม กาลิลี เต่ย เญย นอมๆ ล์าง, หย่า เยียม ยูเดีย เต่ย, หย่า เยียม เยลูซาเลม ฒี่ง ต้าย. เฒี้ยว เญย ชะ เหธา เยซู เยียม, ปุน นิ่น ไฮ่ หฒ่อ ตุ๊ แป่ง หลง.

18ม่าย เต๋ย เมี่ยน หล่ง จิ่ว แกง เต้า ปุ๊ด แป่ง-ไบ เมี่ยน, อ๋อย ต้อ เปียะ เปย๊า มี่ง อัน เยซู เญย หฑะเฮมียน.

19มป่า เมี่ยน ธั้ม ไห่, เปียะ ไม้ เถา เยซู วั้ว. นิ่น บัว ฯฒฯ ฝาว เปย๊า-ง่อ, แธะ ทง งว์า, เฒาะ แป่ง เมี่ยน เปว๋ย เจี๊ยน จิ่ว ปู๋ง เหฌี่ย หฒวัง เมี่ยน บุด๋ง, เยซู เญย หฑะเฮมียน.

20เยซู ปวัด นิ่น บัว เสียน ด่ง หน่าย หลง, นิ่น ฯฒฯ ก๊อง, “โย์ว อ้า! เม่ย เญย ฒุ์ย ตุ๊ กวั่ง ลิ์ว อ๊ะ.”

21หฌาว เล์ย เญย ฟิน-แซง เหธา ฟาลิสี เมี่ยน เยียม เฮญี้ยว ฮนั้ม, “น้าย หาย เต้า เมี่ยน แล่? ฝู่ง ฮนั้ง หน่าย ก๊อง หว่า คี ทิน-ฮู่ง? ขูง ทิน-ฮู่ง กั้น ไฮ่ กวั่ง ตุ๊ เมี่ยน เญย ฒุ์ย ฮนั้ง นีอา.”

22วั้ว เต๋ย เมี่ยน ฮนั้ง หาย นอ ฮนั้ม, เยซู ฮิ้ว เญย. นิ่น ฯฒฯ หน่าย ก๋า, “เม่ย บัว เญย เฮญี้ยว เหว่ย หาย ติ่ว ฮนั้ง น้าย นอ ฮนั้ม?

23ก๊อง, ‘เม่ย เญย ฒุ์ย ตุ๊ กวั่ง ลิ์ว อ๊ะ,’ ไฟ ก๊อง, ‘เจี์ย ซิน ต้าย ยั่ง เจ๊า อ๊ะ,’ น้าย เต๋ย อี โจ๋ว หว่า, หาย โจ๋ว เก้า เห่ ตุ๊ ก๊อง?

24มป่า เยีย อ๋อย ปุน เม่ย บัว ฮิ้ว ตุ๊ เยีย, ป้าม เมี่ยน เญย ตอน, เยียม น้าย ลู่ง เดี๊ย ม่าย หัด ม์า กวั่ง เมี่ยน เญย ฒุ์ย.” เยซู บั๋ว วั้ว เต้า ปุ๊ด แป่ง-ไบ เญย เมี่ยน, “เยีย บั๋ว เม่ย, เจี์ย ซิน ต้าย ต้อ เจี๊ยน เม่ย เญย จิ่ว หฑวน อ๊ะ.”

25วั้ว ล่าน เมี่ยน ฯฒฯ เยียม หฒวัง เมี่ยน เญย หฑะเฮมียน เลี่ยม เฒ่ย เจี์ย ซิน, ต้อ เจี๊ยน นิ่น เปว๋ย วั้ว นอม จิ่ว, เธง เจี๊ยน ทิน-ฮู่ง หฑวน.

26หฒวัง เมี่ยน บัวะ ฮ่อง ไห่ ฯฒฯ เธง ทิน-ฮู่ง. นิ่น บัว กั้ม เหฑีย เญย, หย่า ก๊อง, “อี้ ฮนอย บัว หฒะเก้ง ปวัด บัวะ ฮ่อง ไห่ เญย สี่ อ๊ะ.”

27ฆะฮ้า เยซู แอ๋ง ธ้วด เจ๊า มี่ง เกา, ปวัด เต้า เถง โลมา ฮู่ง จา เซียว โฑว-ฒิ่น เญย เมี่ยน, บั๋ว เห่ว เลวี, เฒว์ย เจี๊ยน เซียว โฑว เญย หฒ่าม. เยซู บั๋ว นิ่น, “ต้าย กัน เยีย โอ่.”

28เลวี ฯฒฯ เจี์ย ซิน, กวั่ง เหฑ่ง นิ่น เญย เหยียด ฒู้ง กะน้าย, กัน เจี๊ยน เยซู มี่ง หมี่ อ๊ะ.

29เลวี ฯฒฯ เยียม นิ่น เญย เปย๊า เบ่น ต๋น หฮนาง โฮล เญย โห่ว เยซู. หญั่น วั้ว ต๋น หฮนาง เญย แคะ เมี่ยน ม่าย เถง โลมา ฮู่ง จา เซียว โฑว เญย เมี่ยน แอ๋ง เหธา เมี่ยน ธั้ม เญย.

30ม่าย เต๋ย ฟาลิสี เมี่ยน เหธา นิ่น บัว เญย หฌาว เล์ย เญย ฟิน-แซง งบ ปุน เยซู เญย ไซ-ก๋อ บัว หมวัง. นิ่น บัว ก๊อง, “เม่ย บัว เหว่ย หาย ติ่ว เหธา เซียว โฑว เญย เมี่ยน เหธา เม่ง เต้า หว่าย เญย เมี่ยน จวั่ง เตี้ย หญั่น, จวั่ง เตี้ย ฮบ?”

31เยซู เตา, “หวั่ง เสียง เญย เมี่ยน ไม้ เฉียม หฒุ เดีย-ไซ. ขูง ปุ๊ด-แป่ง เมี่ยน ฮนั้ง, เฉียม หฒุ เดีย-ไซ.

32เยีย ไม้ เฒ์ย ต้าย เห่ว คู้ เมี่ยน. เยีย ต้าย เห่ว เม่ง เต้า หว่าย เญย เมี่ยน, อ๋อย นิ่น บัว ก๊อย เฮญี้ยว กวั่ง ฒุ์ย.”

33ม่าย เต๋ย เมี่ยน ก๊อง บั๋ว เยซู, “โยฮัน เญย ไซ-ก๋อ บัว หฒั่นๆ เฒย ไม้ หญั่น หาย หญู่ง หย่า เต๋า เก๋า. ฟาลิสี เมี่ยน เญย ไซ-ก๋อ หย่า ฟี่ ฮนั้ง เญย, มป่า เม่ย เญย ไซ-ก๋อ ขูง หญั่น ขูง ฮบ ฮนั้ง.”

34เยซู เตา, “เซียง-ล่าง หธ่อ เยียม เจี๊ยน ธีง-จา-ยิ่น เญย เฒี่ยง โห่, ไฮ่ เห่ว เซียง-ล่าง เญย แคะ เมี่ยน เฒย เจี๊ยน ไม้ ปุน หญั่น, ไม้ ปุน ฮบ ไฟ?

35มป่า ฮนอย-เหญียะ อ๋อย เถา, เซียง-ล่าง หฒุ ต้อ มี่ง หมี่ อ๊ะ. เถา วั้ว หฒั่น แคะ เมี่ยน หธีง ต้าย เฒย ไม้ หญั่น หาย หญู่ง.”

36นิ่น แอ๋ง ก๊อง น้าย ติ้ว หว่า-เป๊ย, “ไม้ ม่าย หาย เต้า เป๊ด เซียง-ลุย ต้าย เบี๊ย โล์-ลุย. ฮนั้ง หน่าย นอ ขูง เป๊ด หว่าย เซียง-ลุย ฮนั้ง. เซียง-เดีย หย่า ไม้ ผุย โล์-เดีย.

37หย่า ไม้ ม่าย หาย เต้า โต๋ เซียง-อะหงุ่น ติ๊ว ตั๊บ โล์-ด๊บ-บัวะ. ฮนั้ง น้าย นอ โหฒว, เซียง-ติ๊ว ไฮ่ หฒูง ด๊บ-บัวะ บ๋าย. อะหงุ่น ติ๊ว ฯฒฯ ธ้วด เหฑ่ง. ด๊บ-บัวะ หย่า ฮู้ หมี่ อ๊ะ.

38เซียง-อะหงุ่น ติ๊ว อ๋อย หฒุ ตั๊บ เซียง-ด๊บ-บัวะ ฮนั้ง.

39หาย เต้า ฮบ ลิ์ว โล์-อะหงุ่น ติ๊ว ไม้ อ๋อย ฮบ เซียง-อะหงุ่น ติ๊ว. นิ่น ก๊อง, ‘โล์-ติ๊ว เก้า คู้.’”

← Chapter 4 Jump to: Chapter 6 →