Luke 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1เยซู เธา เฮมียน ปวัด ปุ๊ด-ฒ่อย เมี่ยน ตั๊บ ญ่าน หฒั่ง ทิน-ฮู่ง เญย เปย๊า วั้ว นอม เซียว ญ่าน เญย ฟาง.

2นิ่น หย่า ปวัด เต้า เอ๊า-กว๊า-จ่ม ต้าย ตั๊บ อี นอม ต้ง ฒิ่น ซิ.

3เยซู ก๊อง, “เยีย ก๊อง เฒียน บั๋ว เม่ย บัว, น้าย เต้า เอ๊า-กว๊า-จ่ม ฝ่ง ห่อ เญย ญ่าน เก้า ธั้ม เจี๋ย เต้าๆ เญย.

4เหว่ย หฒุ วั้ว เต๋ย เมี่ยน ญ่าน ธั้ม, นิ่น บัว ฝ่ง ห่อ เต๋ย ป๊า ฮนั้ง. มป่า น้าย เต้า เอ๊า-กว๊า ด่ง หน่าย จ่ม, เลี่ยม นิ่น เญย ยู์ง แหม่ง ญ่าน นิ่น ฝ่ง ห่อ เหฑ่ง หมี่ อ๊ะ.”

5ม่าย เต๋ย เมี่ยน เธง หฒั่ง ทิน-ฮู่ง เญย เปย๊า ฒอง ตุ๊ เหฑว่ย ไห่. หล่ง หละเปย๊ย-เหฑว่ย โหฒว ต้าย, หย่า หล่ง เมี่ยน ฝ่ง ห่อ เญย ฒี่ง เหญ่ย ฒอง เหฑว่ย. เยซู ก๊อง,

6“เม่ย บัว ปวัด น้าย เต๋ย กะน้าย, ม่าย นอม ฮนอย เหยียด ฒู้ง หฒุ แธะ เหฑ่ง. ไม้ ม่าย เหยียด คว้าย หละเปย๊ย ลับ เจี๊ยน อ๊ะ.”

7นิ่น บัว หน่าย เยซู, “ไซ-เตี๋ย อ้า! โท้ บั๋ว เยีย บัว โอ่. น้าย เต๋ย สี่ หาย หฒั่น อ๋อย ธ้วด? สี่ อ๋อย ธ้วด วั้ว หฒั่น ม่าย หาย หญู่ง จั๋ง-โห่ ปุน ธีง เฒี่ยง โห่ เถา?”

8เยซู ก๊อง, “อ๋อย หฒุ ไฝ ฟิม โอ่. ไม้ ตู๋ง หมวัง หาย เต้า ดั๊ว เม่ย บัว. ม่าย เมี่ยน ธั้ม อ๋อย หล่ง เยีย เญย บั๋ว ต้าย ก๊อง, ‘เยีย ต้ง กีตู่ อ๊ะ,’ หย่า ก๊อง, ‘เฒี่ยง โห่ เถา อ๊ะ.’ ไม้ ตู๋ง กัน นิ่น บัว.

9เม่ย บัว ไฮ์ เบ๊าะ ต้ม จ๋า เหธา เต่ย-ปูง หลุ่น เญย เฝียน, ไม้ ตู๋ง กั้ม เหฑีย. น้าย เต๋ย สี่ ด่ง หาย หย่า อ๋อย ธ้วด ด่าง. มป่า เซ้ด เมว์ย เญย ฮนอย-เหญียะ เลี่ยม เฒ่ย ไม้ แก้ง เถา.”

10เยซู แอ๋ง ก๊อง, “น้าย ฝีง เหธา วั้ว ฝีง อ๋อย เบ๊าะ จ๋า. น้าย นอม กั๊วะ เหธา วั้ว นอม กั๊วะ อ๋อย เบ๊าะ ต้ม จ๋า.

11แอ๋ง ม่าย เต๋ย ต๋อง เดา หย่า ต์ง ตุ๊ เสย ไห่. ม่าย เต๋ย ต๋อง ปวั้ง ต้ม หง่อ, ม่าย เต๋ย ปุ๊ด ต้ม ววน-แป่ง. หย่า ม่าย กั้ม เหฑีย ไห่ เญย สี่, เหธา ต้ม จั๋ง-โห่ เยียม วั้ว ลู่ง ธ้วด.

12“น้าย เต๋ย สี่ ไม้ แก้ง ธ้วด เญย ฮนอย-เหญียะ, เมี่ยน อ๋อย เฒาะ เม่ย บัว หย่า โหฒว โตะ ห่อย. นิ่น บัว อ๋อย เฒาะ เม่ย บัว จิว ปุน หวุ่ย ต้อง หย่า ปุน เม่ย บัว หฒุ หววน เจี๊ยน โล่. เม่ย บัว เหว่ย เยีย เญย เม่ง แอ๋ง หฒุ ต้อ มี่ง เยียม ฮู่ง เตี๋ย เหธา หฒูง เญย หฑะเฮมียน.

13ฯฒฯ ม่าย ฉัง ก๊อง เหว่ย คู้ เฝียน โหฒว ฒอง-เหฒง.

14อ๋อย หฒุ จา-ด่าง ตี่ง เฮญี้ยว ไม้ ตู๋ง เฑ่า เถา วั้ว หฒั่น ฮนั้ง หาย นอ เตา.

15เหว่ย หฒุ เยีย อ๋อย ปุน เม่ย บัว ม่าย ฑุ่ย ม์า, ม่าย ธง-เม่ง, ปุน เม่ย บัว เญย วิน-วั้ง แฑง ไม้ ฮี่ง หย่า ไม้ ม่าย หว่า ก๊อง อ๊ะ.

16เม่ย บัว เญย เตี๋ย หม่า, มั์ว-ต่อย, เธียน-เธะ, ก๋อ-โย์ว หย่า อ๋อย หม่าย เม่ย บัว. ม่าย เต๋ย เม่ย บัว หย่า อ๋อย หฒุ นิ่น บัว ไต๋ ไต่.

17หลาย เยีย, หฒวัง เมี่ยน อ๋อย ฑอง เม่ย บัว.

18มป่า เม่ย บัว เญย บะเปยย เหยียด ติ้ว ฒู้ง ไม้ หฒุ เหมียด.

19เม่ย บัว เตี๊ย ตุ๊ เถา ต้าว นอ, ฯฒฯ เหฌียว ตุ๊ เม่ย บัว เญย แหม่ง อ๊ะ.

20“เม่ย บัว ปวัด แปง เว่ย เจี๊ยน เยลูซาเลม วั้ว หฒั่น, เม่ย บัว ฯฒฯ ฮิ้ว ตุ๊ ฒี่ง หฒุ ป่าย ฮวาง เญย เฒี่ยง โห่ เถา ฟัด อ๊ะ.

21วั้ว หฒั่น เยียม ยูเดีย แซ้ง วั้ว เต๋ย อ๋อย หฒุ เปย๋า ฝาว บง. เยียม ฒี่ง เญย เมี่ยน อ๋อย หฒุ เปย๋า ธ้วด. เยียม กะเหญี่ย หฒิ ฒี่ง วั้ว เต๋ย ไม้ ตู๋ง เปียะ ฒี่ง อ๊ะ.

22เหว่ย หฒุ น้าย เซ ตี่ง ฒุ์ย เญย ฮนอย-เหญียะ, อ๋อย ปุน หญู่งๆ ธ้วด ต้าย ต๋อย เหฑ่ง กีง-โซว เฟี้ย เจี๊ยน เญย หว่า.

23เยียม วั้ว เต๋ย ฮนอย-เหญียะ, ม่าย เจี๊ยน ซิน เหธา ม่าย กู้งว์า ฮบ หญอ เญย มเซียะ ตอน หฒะเก้ง โค้ว อ๊ะ. น้าย นอม เต่ย-ปูง อ๋อย หฒุ ต้ม เหฒะ หน่าน หย่า หฒุ ทิน-ฮู่ง โน์ว, ฯฒฯ ตี่ง น้าย เต๋ย เมี่ยน เญย ฒุ์ย.

24ม่าย เต๋ย หฒุ หฑุ ด๊าว ไต๋. ม่าย เต๋ย หฒุ ธ้าง มี่ง เถา หม่าน กั๊วะ. จั๋น อ๋อย ธ้าย เจี๊ยน เยลูซาเลม ฒี่ง เถา จั๋น เญย เฒี่ยง โห่ ปวั๊ง โสว โหม่ว.

25“วั้ว หฒั่น เหฮลย, หฮลา, บะฮนอย อ๋อย ธ้วด จั๋ง-โห่. ลู่ง เดี๊ย หม่าน ฝีง อ๋อย เฑ่า เถา โด๊ะ หย่า ฮนั้ม ไม้ เม่ง แปะ เหว่ย หฒุ ค้อย เจี๋ย ต้ม หล่าง หย่า ปะหละ บุย ตุ๊ เสย ไห่.

26เมี่ยน กั้ม เหฑีย เกา, ฯฒฯ เม่ย มวั้ง เหฑ่ง. นิ่น บัว กั้ม เหฑีย ไห่ เยียม น้าย ลู่ง เดี๊ย อ๋อย ธ้วด ต้าย เญย สี่, เหว่ย หฒุ เยียม ลู่ง ม่าย ชะ เญย กะน้าย ฒู้ง หฒุ ดั่น ต์ง.

27เถา วั้ว หฒั่น นิ่น บัว ฯฒฯ ปวัด เยีย, ป้าม เมี่ยน เญย ตอน, ม่าย ชะ เหธา ต้ม ฌัง-หล่าง เยียม ต๊อ บ๋วน เหฌี่ย ต้าย.

28ปวัด น้าย เต๋ย สี่ เจี์ย กอน ธ้วด, อ๋อย หฒุ โซ้ว เจี์ย ต้าย เธา เฮมียน หมั่ง เจี๊ยน ลู่ง, เหว่ย หฒุ หฒัวะ เม่ย บัว เญย เฒี่ยง โห่ เถา ฟัด อ๊ะ.”

29เยซู แอ๋ง ก๊อง น้าย ติ้ว หว่า-เป๊ย ปุน นิ่น บัว หมวัง. นิ่น ก๊อง, “หมั่ง ก๋า ง่ง หญอ เดี๋ยง เหธา หญู่งๆ เดี๋ยง!

30ปวัด ธ้วด น่อม หลุน ฯฒฯ ฮิ้ว ตุ๊ อ๋อย เปียะ ห่า เกว๋ย อ๊ะ.

31น้าย ฟี่ ฮนั้ง เญย. เม่ย บัว ปวัด น้าย เต๋ย สี่ ธ้วด, เม่ย บัว ฯฒฯ ฮิ้ว ตุ๊ ทิน-ฮู่ง โหฒว เฒี้ยว กุ๊น เมี่ยน เญย ฮนอย-เหญียะ เถา ฟัด อ๊ะ.

32“เยีย ก๊อง เฒียน บั๋ว เม่ย บัว, น้าย ต่อย เมี่ยน เจี๋ย เสย ไม้ แก้ง เหฑ่ง, น้าย เต๋ย เหยียด ฒู้ง สี่ ฯฒฯ ธ้วด ต้าย อ๊ะ.

33ลู่ง เดา อ๋อย เจี๋ย เหฑ่ง มป่า เยีย เญย หว่า เหยียด ลิ์ว ไม้ เจี๋ย.

34“อ๋อย หฒุ กีง เฮญี้ยว บู้ง เจี๊ยน, ไม้ ตู๋ง หลาย ฮนั้ม อ๋อย หญั่น เป๊ว ฮบ ฆวิน หย่า หลาย เสย หฒั่ง เญย เจ๊า ขวน เฮญี้ยว. กั้ม เหฑีย วั้ว นอม ฮนอย เลี่ยม เฒ่ย เถา, ฮนั้ง แฒง ฮลาง ฮลบ เจี๊ยน เม่ย บัว นอ.

35เหว่ย หฒุ วั้ว นอม ฮนอย หฒะเก้ง อ๋อย เถา ลู่ง เดี๊ย นอมๆ ต๋อง เญย เมี่ยน.

36อ๋อย หฒุ หฒั่นๆ กีง เฮญี้ยว ฒั้ว เจี๊ยน, เต๋า เก๋า โท้ ทิน-ฮู่ง ปุน เม่ย บัว ม่าย ชะ ไฮ่ เตี๊ย ตุ๊ เหยียด ฒู้ง อ๋อย ธ้วด ต้าย เญย สี่, หย่า ตุ๊ โซ้ว เจี๊ยน เยีย, ป้าม เมี่ยน เญย ตอน, เญย หฑะเฮมียน.”

37เยซู ฮนอยๆ มี่ง หฒั่ง ทิน-ฮู่ง เญย เปย๊า หฌาว เมี่ยน. หฮมวัง เต๋ย นิ่น ฯฒฯ ธ้วด ฒี่ง มี่ง เฒี่ยง ม์วน เยียม กะลั้น บง.

38ดอมๆ เฑี้ยว เญย หฒวัง เมี่ยน มี่ง หฒั่ง ทิน-ฮู่ง เญย เปย๊า อ๋อย หมวัง เยซู.

← Chapter 20 Jump to: Chapter 22 →