Luke 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1ม่าย หฑุ่น ม่าย เซียว โฑว-ฒิ่น เญย เมี่ยน เหธา เม่ง เต้า หว่าย เญย เมี่ยน ต้าย ฟัด เยซู, อ๋อย หมวัง นิ่น หฌาว เล์ย.

2ฟาลิสี เมี่ยน เหธา หฌาว เล์ย เญย ฟิน-แซง ฯฒฯ งบ เยซู. นิ่น บัว ก๊อง, “น้าย ล่าน เมี่ยน อะเฮน้ย ฒิบ หน่าย เต๋ย เม่ง เต้า หว่าย เญย เมี่ยน, หธ่อ แอ๋ง เหธา นิ่น บัว หญั่น หฮนาง.”

3เยซู ฯฒฯ ก๊อง น้าย ติ้ว หว่า-เป๊ย ปุน นิ่น บัว หมวัง.

4“สี ก๊อง เม่ย บัว หาย เต้า ม่าย เหยียด แป๊ะ เต้า ปะกี ยู่ง, ม่าย เต้า ตี๋ง ล่าย มี่ง, นิ่น ฮนั้ง หาย นอ โหฒว? นิ่น ไม้ เฒ์ย กวั่ง เจี๊ยน วั้ว เต๋ย จั๊ว เหฒียบ จั๊ว เต้า เยียม วั้ว เมี้ย-เธี้ยง, มี่ง ล์อ เถา ปวัด ตี๋ง ล่าย วั้ว เต้า ไฟ?

5ล์อ ปวัด ต้าย นิ่น อะเฮน้ย ไห่, ฯฒฯ เฒาะ ยู่ง ต๊าบ เจี๊ยน บะเต้า หฑวน.

6“เถา เปย๊า นิ่น เห่ว นิ่น เญย ก๋อ-โย์ว เหธา ล์าง หฒั่ง เมี่ยน ต้าย, บั๋ว นิ่น บัว, ‘อ๋อย หฒุ ล่ม ฑ่อย เถง เยีย อะเฮน้ย. เหว่ย หฒุ เยีย เญย ปะกี ยู่ง, ตี๋ง ล่าย มี่ง วั้ว เต้า, เยีย ล์อ ปวัด ต้าย อ๊ะ.’

7“เยีย บั๋ว เม่ย บัว, ฟี่ ฮนั้ง เญย. ม่าย ล่าน เมี่ยน ก๊อย เฮญี้ยว กวั่ง ฒุ์ย นอ, เยียม ทิน-ต้อง วั้ว เต๋ย อะเฮน้ย ไห่, ฒู้ง เก้า อะเฮน้ย ม่าย จั๊ว เหฒียบ จั๊ว ล่าน คู้ เมี่ยน ไม้ เฉียม หฒุ ก๊อย เฮญี้ยว กวั่ง ฒุ์ย.

8“ไฟ สี ก๊อง ม่าย เต้า มเซียะ ตอน ม่าย เหฒียบ นอม ฒิ่น, ตี๋ง ล่าย เหยียด นอม, นิ่น ฮนั้ง หาย นอ โหฒว? นิ่น ไม้ เฒ์ย เตี๊ยม ตัง ต้าย หฒิว เจี๊ยน, พ้วด นิ่น เญย เปย๊า หลงๆ เญย ล์อ นอมๆ ต๋อง, ล์อ เถา ปวัด ไฟ?

9ล์อ ปวัด ต้าย, นิ่น ฯฒฯ เห่ว เมี่ยน มั์ว-ต่อย เหธา ล์าง หฒั่ง เมี่ยน ต้าย, ก๊อง บั๋ว นิ่น บัว, ‘ล่ม ฑ่อย เถง เยีย อะเฮน้ย โอ่. เหว่ย หฒุ เยีย เญย ฒิ่น, ตี๋ง ล่าย วั้ว นอม, เยีย ล์อ ปวัด ต้าย อ๊ะ.’

10“เยีย บั๋ว เม่ย บัว, สี ก๊อง ม่าย เต้า ฒุ์ย-เมี่ยน ก๊อย เฮญี้ยว กวั่ง ฒุ์ย, ทิน-ฮู่ง เญย ฟิน-เมี่ยน ฟี่ ฮนั้ง เญย อะเฮน้ย ไห่ อ๊ะ.”

11เยซู แอ๋ง ก๊อง, “ม่าย ล่าน เมี่ยน ม่าย อี เต้า ตอน.

12ตอน-ไฝ ก๊อง บั๋ว นิ่น เญย เตีย, ‘อา เตีย อ้า! เตีย พ้าย ปุน เยีย เญย ป่วน จา-ตี้ง โท้ อี้ หฒั่น ปุน เยีย โอ่.’ นิ่น เญย เตีย ฯฒฯ เฒาะ นิ่น เญย จา-ตี้ง กะน้าย ต้าย ปุน ฆอย นิ่น บัว อี มั์ว หมี่ อ๊ะ.

13“ฆะฮ้า อี เหฒีย ฮนอย ฮนั้ง, ตอน-ไฝ ฯฒฯ เฒาะ นิ่น เญย ป่วน หม่าย เป๋น ญ่าน ต้าย กั๊บ ฒุ้น ต้อ เจี๊ยน ธ้วด เต่ย-ปูง โกๆ เญย มี่ง. เถา นอม เต่ย-ปูง, นิ่น เยียม วั้ว หละไกว้ หฒาว เหฑ่ง นิ่น เญย ญ่าน.

14หฒาว เหฑ่ง ญ่าน วั้ว หฒั่น หย่า ต๋อย เจี๊ยน นิ่น เยียม วั้ว นอม เต่ย-ปูง ปวั้ง หฒุ ต้ม ฮวาง ต้ม หง่อ. นิ่น เญย ญ่าน หย่า ตั๋ง เหฑ่ง หมี่ อ๊ะ.

15นิ่น ฯฒฯ กัน เต้า วั้ว นอม เต่ย-ปูง เญย เมี่ยน โหฒว กง. วั้ว เต้า เมี่ยน พ้าย นิ่น มี่ง เด่ย โก๋ว ตู์ง.

16“โก๋ว เกา ตู์ง, ปวัด ตู์ง หญั่น ตบ คุ, นิ่น หฒะเก้ง อ๋อย หญั่น ไห่ อ๊ะ. มป่า ไม้ ม่าย หาย เต้า ปุน หาย หญู่ง นิ่น หญั่น.

17“โหฒว เกา, นิ่น ฮนั้ม-หฑวน. ‘จั๋ง หฒุ เยีย เญย เตีย เญย โปว บัว. ลู่ง ต๋น นิ่น บัว หญั่น ลิ์ว ฮบ ลิ์ว, ฒู้ง หธ่อ ม่าย เหฒ่ง เญย. เยีย เยียม น้าย อ๋อย หฒุ หง่อ ไต่.

18เยีย อ๋อย หฑวน มี่ง บั๋ว เยีย เญย เตีย, “อา เตีย อ้า! เยีย หฒิ ฒุ์ย ทิน-ฮู่ง หย่า หฒิ ฒุ์ย เตีย.

19ยั่ง น้าย เจี๋ย เยีย ไม้ ผุย เตีย เหญี่ยม เยีย โหฒว ตอน อ๊ะ. เยีย โท้ เม่ย ฝุน เยีย เซ ฮนั้ง เหยียด เต้า เม่ย เญย โปว นอ โอ่.”’

20นิ่น ฯฒฯ เจี์ย ซิน ธ้วด เจ๊า หฑวน นิ่น เญย เตีย วั้ว. “หฑวน เกา, หธ่อ เล่ย โก เต๋ย เญย, นิ่น เญย เตีย ปวัด, เฒียะ ตุ๊ นิ่น เญย ตอน อ๊ะ. หฒะเก้ง ค้อ-เลี่ยน ไห่ ฯฒฯ ถิว มี่ง เถา, ชัม เจี๊ยน นิ่น เญย ตอน ฒม.

21“นิ่น เญย ตอน ก๊อง, ‘อา เตีย อ้า! เยีย หฒิ ฒุ์ย ทิน-ฮู่ง หย่า หฒิ ฒุ์ย เตีย. อี้ หฒั่น เยีย ฒู้ง ไม้ ผุย เตีย เหญี่ยม เยีย โหฒว ตอน อ๊ะ.’

22“มป่า นิ่น เญย เตีย เห่ว นิ่น เญย โปว บัว, ‘ฆ่ง มี่ง เฒาะ เหฑว่ย เจี๋ย วั้ว เต๋ย ลุย-ด๊าว ต้าย เถง นิ่น ฒุ เจี๊ยน. แอ๋ง เฒาะ ปั์ว-โด๊ะ-แฑง ต้าย เถง นิ่น ตั้ง เจี๊ยน. เฮ่ หย่า เฒาะ ต้าย เถง นิ่น ตาบ เจี๊ยน.

23อ๋อย หฒุ แอ๋ง มี่ง เฒาะ จุ่น เจี๋ย วั้ว เต้า ง่ง ตอน ไต๋ ต้าย, เบ่น ต้าย หญั่น โห่ว นิ่น.

24เหว่ย หฒุ เยีย น้าย เต้า ตอน ไต่ มี่ง แอ๋ง นั่ง ต้าย. ตี๋ง ล่าย มี่ง แอ๋ง ล์อ ปวัด ต้าย.’ หฒวัง เมี่ยน ฯฒฯ เจี์ย กอน โห่ว นิ่น อ๊ะ.

25“วั้ว หฒั่น ตอน-โฮล เยียม วั้ว เด่ย. หฑวน เถา เปย๊า-เฮลน ไฮ์ ปย๊ม หฑัด, เบ๊าะ ล่อ, เบ๊าะ โฑ์, หธัง เหย เญย เฉีย บุย.

26นิ่น ฯฒฯ เห่ว เต้า โปว ต้าย หน่าย, ‘วั้ว เปย๊า นิ่น บัว โหฒว หาย หญู่ง?’

27โปว ก๊อง, ‘เม่ย เญย โย์ว หฑวน ต้าย อ๊ะ. เม่ย เญย เตีย เห่ว เฒาะ จุ่น เจี๋ย วั้ว เต้า ง่ง ตอน ไต๋ ต้าย หญั่น โห่ว เม่ย เญย โย์ว, เหว่ย หฒุ เม่ย เญย เตีย ตุ๊ นิ่น เญย ตอน หฑวน ต้าย หลง เญย.’

28“ตอน-โฮล เฉีย เจี์ย ไห่ ฯฒฯ ไม้ คั้ง เปียะ เปย๊า อ๊ะ. นิ่น เญย เตีย ฯฒฯ ธ้วด ต้าย ขวิน นิ่น เปียะ.

29ตอน-โฮล ก๊อง, ‘หมั่ง ก๋า! เยีย ฮนั้ง โน่ว เก๊า นอ เถง เม่ย โหฒว กง เถา อี้ หฒั่น อ๊ะ. ไม้ ม่าย เหยียด หฑุ่น เยีย ไม้ หมวัง เม่ย เญย หว่า นีอา. เม่ย ปุน เจี๋ย หาย หญู่ง เยีย? เลี่ยม เหยียด เต้า ยู่ง ตอน ฒู้ง ไม้ ปุน เจี๋ย เยีย เหว่ย เหธา เยีย เญย ก๋อ-โย์ว หญั่น โหฒว จอม เหยียด หฑุ่น นีอา.

30เม่ย หน่าย เต้า ตอน แอ๊ะ, หละไกว้ ม์าย เซียะ เหฮยียน, เฒาะ เม่ย เญย จา-ตี้ง กะน้าย หฒาว ฌัง เหฑ่ง หฑวน ต้าย. เม่ย หธ่อ เซ แอ๋ง เฒาะ จุ่น เจี๋ย วั้ว เต้า ง่ง ตอน ไต๋ ต้าย โห่ว นิ่น!’

31“นิ่น เญย เตีย เตา, ‘ตอน อ่า, เม่ย หาย หฒั่น หย่า เหธา เยีย เยียม. เยีย เญย เหยียด ฒู้ง กะน้าย เซ เม่ย เญย.

32มป่า เยีย บัว อ๋อย หฒุ โหฒว จอม เฌียน-โย่ว เญย โห่ว, เหว่ย หฒุ เม่ย เญย น้าย เต้า โย์ว ไต่ มี่ง แอ๋ง นั่ง ต้าย, ตี๋ง ล่าย มี่ง แอ๋ง หฑวน ต้าย อ๊ะ.’”

← Chapter 14 Jump to: Chapter 16 →