Luke 6

Mien Bible (Thai Script) © Thailand Bible Society, 2007

1ม่าย นอม ตี้ง กง ฮนอย, เยซู เหธา นิ่น เญย ไซ-ก๋อ บัว เจี๋ย เมี่ยน เญย เบย้า เด่ย. นิ่น เญย ไซ-ก๋อ เนี้ยด เบย้า ต๊อ น้ม หญั่น.

2ม่าย เต๋ย ฟาลิสี เมี่ยน หน่าย ก๋า, “เอย บัว เญย เล์ย, ตี้ง กง ฮนอย ไม้ หอบ หฒุ ฮนั้ง น้าย นอ โหฒว, เม่ย บัว เหว่ย หาย ติ่ว โหฒว?”

3เยซู เตา นิ่น บัว, “เม่ย บัว ไม้ โตะ เจี๋ย น้าย เต๋ย เจ๊า ไฟ? ดาวิด ฮู่ง เหธา กัน นิ่น วั้ว เต๋ย เมี่ยน เฮญี้ยว เซีย เญย เฒี่ยง โห่, นิ่น บัว ฮนั้ง หาย นอ โหฒว?

4ดาวิด ฮู่ง เปียะ หฒั่ง ทิน-ฮู่ง เญย ด๊บ-ลิ่ว เฒาะ เก๋ง ทิน-ฮู่ง วั้ว เต๋ย ฌั้ว หญั่น. น้าย เต๋ย ฌั้ว ขูง ไซ เมี่ยน กั้น ม่าย เล์ย หญั่น ฮนั้ง. มป่า ดาวิด หญั่น หย่า ปุน กัน นิ่น วั้ว เต๋ย เมี่ยน เหธา เจี๊ยน หญั่น.”

5เยซู ฯฒฯ บั๋ว นิ่น บัว, “เยีย, ป้าม เมี่ยน เญย ตอน, โหฒว ตี้ง กง ฮนอย เญย เฒี้ยว.”

6แอ๋ง ม่าย นอม ตี้ง กง ฮนอย, เยซู เปียะ นอม หวุ่ย ต้อง หฌาว เมี่ยน. เยียม วั้ว ม่าย ล่าน เมี่ยน บย่าว เจี๊ยะ ปั์ว หว่าย หมี่ อ๊ะ.

7ม่าย เต๋ย หฌาว เล์ย เญย ฟิน-แซง เหธา ฟาลิสี เมี่ยน อ๋อย ล์อ เจ๊า โก๋ เยซู ฯฒฯ เธี่ยน หมั่ง เจี๊ยน, หมั่ง ก๋า, เยซู หล่ง ตี้ง กง ฮนอย หฒ่อ แป่ง ไฟ?

8มป่า นิ่น บัว ฮนั้ง หาย นอ ฮนั้ม, เยซู ฮิ้ว เญย. นิ่น บั๋ว ปั์ว หว่าย วั้ว ล่าน เมี่ยน, “ต้าย โซ้ว น้าย หฒวัง เมี่ยน เญย หฑะเฮมียน โอ่.” วั้ว ล่าน เมี่ยน ฯฒฯ เจี์ย ซิน โซ้ว เจี๊ยน วั้ว อ๊ะ.

9เยซู ก๊อง, “เยีย หน่าย ก๋า เม่ย บัว, เอย บัว เญย เล์ย, ตี้ง กง ฮนอย บัว ไฮ่ โหฒว หาย หญู่ง? ไฮ่ โหฒว หลง ไฟ โหฒว หว่าย? เหฌียว แหม่ง ไฟ ห่อย แหม่ง?”

10เยซู ฮวิน มี่ง หมั่ง นิ่น บัว เต้าๆ แอ๋ง ก๊อง บั๋ว ปั์ว หว่าย วั้ว ล่าน เมี่ยน, “ซูง เม่ย เญย ปั์ว ธ้วด ต้าย ม่าะ!” นิ่น ซูง ปั์ว ธ้วด ต้าย, ปั์ว ฯฒฯ หลง เหฑ่ง หมี่ อ๊ะ.

11วั้ว เต๋ย เมี่ยน เฉีย เจี์ย! ไห่. นิ่น บัว ธ่าง ล่าง อ๋อย ฮนั้ง หาย นอ โหฒว ปุน เยซู.

12วั้ว เต๋ย เฒี่ยง โห่ เยซู ฝาว บง-ไอ๊ มี่ง เต๋า เก๋า, เยียม วั้ว เฒี่ยง ม์วน เหธา ทิน-ฮู่ง ก๊อง หว่า.

13ลู่ง ฌัง เญย เฒี่ยง โห่, นิ่น เห่ว นิ่น เญย ไซ-ก๋อ บัว ต้าย, ฯฒฯ กิ๊น ธ้วด เหฒียบ เหญ่ย เต้า, แอ๋ง เห่ว นิ่น บัว เป๋น กง-โฒ่.

14นิ่น กิ๊น ซีโมน, (แอ๋ง เถง นิ่น ธ้วด บั๋ว เห่ว ปีเต) เหธา ปีเต เญย โย์ว, อันดาลู, แอ๋ง ม่าย ยากอบ, โยฮัน, ฟีลิบ, บาโทโลมิว,

15มัดทาย, โทมัด, อันเฟอัด เญย ตอน, ยากอบ, ซีโมน (ต้ง เมี่ยน เห่ว, “ฮนั้ม กั๊วะ หฒั่ง” วั้ว เต้า).

16แอ๋ง ม่าย ยากอบ เญย ตอน, ยูดาด, เหธา หม่าย เยซู วั้ว เต้า ยูดาด อิสะคาลิโอด.

17เยซู เหธา นิ่น เญย กง-โฒ่ บัว เหฌี่ย เถา เดา-แป้ง โซ้ว เจี๊ยน วั้ว. เยียม วั้ว แอ๋ง ม่าย นิ่น เญย ไซ-ก๋อ ธั้ม เญย, หย่า ม่าย เมี่ยน ธั้ม เยียม ยูเดีย แซ้ง นอมๆ ต๋อง, เหธา เยลูซาเลม ฒี่ง, แอ๋ง เหธา เยียม ค้อย-เฮลน วั้ว เต๋ย อี นอม ฒี่ง, ไทละ เหธา ไซดอน,

18ต้าย หมวัง เยซู หย่า โท้ นิ่น หฒ่อ นิ่น บัว เญย แป่ง. หฒุ เมี้ยน มัวะ วั้ว เต๋ย หย่า ต้าย. เยซู หฒ่อ หลง เหฑ่ง.

19หฒวัง เมี่ยน เบ๋ง เจี๊ยน มี่ง อ๋อย ฮลัว เยซู, เหว่ย หฒุ นิ่น ม่าย หฒ่อ แป่ง เญย ชะ ธ้วด มี่ง เถง นิ่น บัว เหยียด ฒู้ง หฒ่อ แป่ง.

20เยซู หมั่ง เจี๊ยน นิ่น เญย ไซ-ก๋อ บัว ฯฒฯ ก๊อง, “เม่ย บัว เมี่ยน จ่ม เมี่ยน ม่าย เฌียน-โย่ว อ๊ะ, เหว่ย หฒุ ม่าย ทิน-ฮู่ง โหฒว เฒี้ยว กุ๊น เม่ย บัว.

21เม่ย บัว อี้ หฒั่น หง่อ เจี๊ยน เยียม เญย เมี่ยน ม่าย เฌียน-โย่ว อ๊ะ, เหว่ย หฒุ เม่ย บัว อ๋อย ตุ๊ หญั่น เป๊ว. เม่ย บัว อี้ หฒั่น เญี้ยม เจี๊ยน เญย เมี่ยน ม่าย เฌียน-โย่ว อ๊ะ, เหว่ย หฒุ เม่ย บัว อ๋อย ตุ๊ จั๊ด.

22เม่ย บัว เหว่ย เยีย, ป้าม เมี่ยน เญย ตอน, หฒุ เมี่ยน ฑอง, หฒุ เมี่ยน เฆ่ม, หฒุ เมี่ยน ฮว้วด, หย่า หฒุ เมี่ยน ต้าน เม่ย บัว เญย บั๋ว เซ เอ๊าะ ไห่ เญย บั๋ว, เม่ย บัว ม่าย เฌียน-โย่ว อ๊ะ.

23นิ่น บัว ฮนั้ง น้าย นอ โหฒว, เม่ย บัว อ๋อย หฒุ อะเฮน้ย, เฌียน-โย่ว เญย หธัง เหย, เหว่ย หฒุ เยียม ทิน-ต้อง ม่าย เม่ย บัว เญย ต้ม ฒี่ง เหญ่ย. โหฒว ห่อย เม่ย บัว วั้ว เต๋ย เมี่ยน เญย อง-ถาย หย่า ฟี่ ฮนั้ง เญย โหฒว ปุน โต่ว หว่า เมี่ยน.

24เม่ย บัว อี้ หฒั่น ปุ๊ด ฒ่อย เญย เมี่ยน อ๋อย หฒุ โค้ว อ๊ะ, เหว่ย หฒุ เม่ย บัว เญย เฌียน-โย่ว เม่ย บัว ตุ๊ ลิ์ว อ๊ะ.

25เม่ย บัว อี้ หฒั่น ตุ๊ หญั่น เป๊ว เญย เมี่ยน อ๋อย หฒุ โค้ว อ๊ะ, เหว่ย หฒุ เม่ย บัว อ๋อย หฒุ หง่อ. เม่ย บัว อี้ หฒั่น จั๊ด เญย เมี่ยน อ๋อย หฒุ โค้ว อ๊ะ, เหว่ย หฒุ เม่ย บัว อ๋อย หฒุ เฑ่า, เญี้ยม เจี๊ยน เยียม.

26เม่ย บัว ตุ๊ หฒวัง เมี่ยน เธง เม่ย บัว หลง เญย เฒี่ยง โห่, เม่ย บัว อ๋อย หฒุ โค้ว อ๊ะ. เธง เม่ย บัว วั้ว เต๋ย เมี่ยน เญย อง-ถาย ฟี่ ฮนั้ง เญย เธง จ๊า โต่ว หว่า เมี่ยน.

27“เยีย บั๋ว เม่ย บัว อี้ หฒั่น หมวัง เจี๊ยน เญย เมี่ยน, อ๋อย หฒุ ฮนั้ม เม่ย บัว เญย วิน-วั้ง, โหฒว หลง ปุน ฑอง เม่ย บัว วั้ว เต๋ย.

28เมี่ยน เหฒียว เม่ย บัว, อ๋อย หฒุ ปวัง หว่า ปุน นิ่น บัว. โหฒว โตะ เม่ย บัว วั้ว เต๋ย, อ๋อย หฒุ เถง นิ่น บัว เต๋า เก๋า.

29เมี่ยน เบ๊าะ เม่ย เญย น้าย ปูง เฮมียน, เลี่ยม วั้ว ปูง เฮมียน หย่า ฮวิน ปุน นิ่น. เมี่ยน เฒาะ เม่ย เญย ต้ม ลุย มี่ง, เลี่ยม กะญั์ว วั้ว เต๋ย เซว่ย นิ่น เฒาะ.

30หาย เต้า โท้ เม่ย เญย หาย หญู่ง, อ๋อย หฒุ ปุน นิ่น. หาย เต้า เฒาะ เม่ย เญย หาย หญู่ง กะน้าย มี่ง หย่า ไม้ ตู๋ง ล์อ หฑวน.

31เม่ย บัว อ๋อย เมี่ยน ฮนั้ง หาย นอ โหฒว ปุน เม่ย บัว, เม่ย บัว หย่า อ๋อย หฒุ ฮนั้ง วั้ว นอ โหฒว ปุน เมี่ยน.

32“สี ก๊อง เม่ย บัว ขูง ฮนั้ม ต้ง ฮนั้ม เม่ย บัว วั้ว เต๋ย เมี่ยน, น้าย ม่าย หาย หญู่ง ฝาว ตุ๊ เธง? เลี่ยม ฒุ์ย-เมี่ยน หย่า ฮนั้ม ต้ง ฮนั้ม นิ่น บัว วั้ว เต๋ย.

33สี ก๊อง เม่ย บัว ขูง โหฒว หลง ปุน ต้ง โหฒว หลง ปุน เม่ย บัว วั้ว เต๋ย ฮนั้ง, ทิน-ฮู่ง ฮนั้ง หาย นอ ไฮ่ เหธย ฟุ ปุน เม่ย บัว? ฮนั้ง หน่าย เลี่ยม ฒุ์ย-เมี่ยน หย่า ไฮ่ โหฒว เญย.

34สี ก๊อง เม่ย บัว ขูง ก๊า กะน้าย ปุน ไฮ่ จ๊าว เม่ย บัว วั้ว เต๋ย ฮนั้ง, ทิน-ฮู่ง ฮนั้ง หาย นอ ไฮ่ เหธย ฟุ ปุน เม่ย บัว? เลี่ยม ฒุ์ย-เมี่ยน หย่า ก๊า กะน้าย ปุน ฒุ์ย-เมี่ยน, เหว่ย หฒุ นิ่น บัว ฮนั้ม ต้าย ไฮ่ ตุ๊ นิ่น บัว เญย กะน้าย หฑวน เหฑ่ง.

35ต๋าว หฑวน อ๋อย หฒุ ฮนั้ม เม่ย บัว เญย วิน-วั้ง, โหฒว หลง ปุน นิ่น บัว. ก๊า กะน้าย อ๋อย หฒุ ปุน นิ่น บัว หย่า ไม้ ตู๋ง ฮนั้ม แอ๋ง ตุ๊ หฑวน. ฮนั้ง น้าย, เม่ย บัว อ๋อย ตุ๊ ต้ม ฒี่ง เหญ่ย หย่า เป๋น เยียม ฮลัง เจี๋ย วั้ว เต้า เญย ตอน, เหว่ย หฒุ นิ่น โหฒว หลง ปุน ไม้ ม่าย เอน-ฒี่ง เญย เมี่ยน เหธา เมี่ยน หว่าย เมี่ยน.

36เม่ย บัว อ๋อย หฒุ ค้อ-เลี่ยน เมี่ยน ฮนั้ง เม่ย บัว เญย หฒั่ง เตี๋ย ค้อ-เลี่ยน เมี่ยน วั้ว นอ.

37“ไม้ ตู๋ง ต้าน เมี่ยน, ทิน-ฮู่ง ฯฒฯ ไม้ ต้าน เม่ย บัว. ไม้ ตู๋ง ตี่ง เมี่ยน เญย ฒุ์ย, ทิน-ฮู่ง ฯฒฯ ไม้ ตี่ง เม่ย บัว เญย ฒุ์ย. อ๋อย หฒุ กวั่ง เมี่ยน เญย ฒุ์ย, ทิน-ฮู่ง ฯฒฯ กวั่ง เม่ย บัว เญย ฒุ์ย.

38เม่ย บัว ปุน หาย หญู่ง เมี่ยน, ทิน-ฮู่ง หย่า อ๋อย วิ่น ปุน เม่ย บัว, ฒู้ง อ๋อย โต๋ ปุน เม่ย บัว เก้า ธั้ม, ฒัด ย่วน, ฆั้ม เหฒียด, ฮลาว หนีง เถา เยียม ไม้ เจี๊ยน. เม่ย บัว หล่ง หาย หญู่ง ฮลาว ปุน เมี่ยน, ทิน-ฮู่ง หย่า อ๋อย หล่ง วั้ว หญู่ง ฮลาว ปุน เม่ย บัว.”

39เยซู แอ๋ง ก๊อง หว่า-เป๊ย ปุน นิ่น บัว หมวัง. นิ่น ก๊อง, “มฒีง แม่ง เมี่ยน ไฮ่ เคน มฒีง แม่ง เมี่ยน ไฟ? ฮนั้ง หน่าย อี เต้า ฒู้ง ไฮ่ ด๊อด ค้วด ไม้ เฒ์ย?

40เหาะ แซง ไม้ ไฮ่ เก้า โฮล นิ่น เญย ฟิน-แซง. เหาะ แซง โหะ ลิ์ว หญู่งๆ ฯฒฯ เหธา ฟิน-แซง ฟี่ ฮนั้ง เญย.

41“เม่ย เหว่ย หาย ติ่ว ปวัด เม่ย เญย ก๋อ-โย์ว เญย มฒีง ม่าย หละฟับ, หย่า ไม้ ฮนั้ม เถา เม่ย กั้น เญย มฒีง ม่าย หฆัน เดี๋ยง?

42กั้น เญย มฒีง ม่าย หฆัน เดี๋ยง เม่ย หย่า ไม้ ปวัด, ฝู่ง ไฮ่ บั๋ว ก๋อ-โย์ว, ‘ก๋อ อ่า, เยีย เถง ก๋อ ปัน ธ้วด มฒีง เญย หละฟับ โอ่.’ เป้ย หฒะ เฮญี้ยว ฌ้วด เญย เมี่ยน อ้า! อ๋อย หฒุ เฒาะ ธ้วด กั้น เญย มฒีง วั้ว หฆัน เดี๋ยง ด่าง, เม่ย ฯฒฯ ไฮ่ หมั่ง ตุ๊ เฒียน เถง ก๋อ-โย์ว ปัน ธ้วด มฒีง เญย หละฟับ.

43“เดี๋ยง หลง ไม้ เฒี่ยง ไม้ เป๋น เญย เปี๊ยว. ไม้ เป๋น เญย เดี๋ยง หย่า ไม้ เฒี่ยง หลง เญย เปี๊ยว.

44ปวัด เปี๊ยว ฯฒฯ ฮิ้ว ตุ๊ เปี๊ยว-เดี๋ยง เซ หาย หญู่ง เดี๋ยง. เมี่ยน ไม้ มี่ง เดี๋ยง-ฌิ้ม แก๊ะ ง่ง หญอ เปี๊ยว, หย่า ไม้ มี่ง ฌิ้ม-เบยาะ แก๊ะ อะหงุ่น เปี๊ยว.

45คู้ เมี่ยน เญย เฮญี้ยว เซียว หลง เญย กะน้าย, เฒาะ ธ้วด ต้าย เญย เซ หลง เญย. เมี่ยน หว่าย เมี่ยน เญย เฮญี้ยว เซียว หว่าย เญย กะน้าย, เฒาะ ธ้วด ต้าย เซ หว่าย เญย. เฮญี้ยว ฒ่าง ปวั๊ง หาย หญู่ง, ฑุ่ย ฯฒฯ ก๊อง ธ้วด วั้ว หญู่ง.

46“เม่ย บัว เหว่ย หาย ติ่ว เห่ว เยีย, ‘เฒี้ยว อ้า! เฒี้ยว!’ หย่า ไม้ เอย เจี๊ยน เยีย บั๋ว เญย หว่า โหฒว?

47หาย เต้า ต้าย ล์อ เยีย, ไฮ์ เยีย เญย หว่า หย่า เอย เจี๊ยน โหฒว, เยีย อ๋อย ปุน เม่ย บัว ฮิ้ว ตุ๊ วั้ว เต้า ฮนั้ง หาย นอ.

48นิ่น เซ ฮนั้ง ล่าน เมี่ยน ก๊ม เปย๊า, เว้ด ตุ๊ โด, ปั่ง หละเปย๊ย-แป้ง กู้ หงว่าย เหธย เจี์ย. ววม เหยียม, ววม กว๊าด, เปย๊า หย่า ไม้ บาง, เหว่ย หฒุ เหธย ตุ๊ ว้วน.

49มป่า หาย เต้า ไฮ์ เยีย เญย หว่า หย่า ไม้ หมวัง, ไม้ เอย เจี๊ยน โหฒว นอ, เซ ฮนั้ง ล่าน เมี่ยน ก๊ม เปย๊า เยียม เดา หย่า ไม้ ม่าย กอน-โด๊ะ. ววม เหยียม, ววม กว๊าด, เปย๊า ฯฒฯ ล์ม! ล์ม เญย บาง หว่าย เหฑ่ง หมี่ อ๊ะ.”

← Chapter 5 Jump to: Chapter 7 →