Luke 4

Mien Bible (Thai Script) © Thailand Bible Society, 2007

1เยซู มี่ง จอแดน ด้าย หฑวน, สีง ลี่ง เยียม ปวั๊ง นิ่น เญย เฮญี้ยว. สีง ลี่ง หย่า ต้อ นิ่น มี่ง เยียม เต่ย-ปูง-ฮวาง,

2เฝย เหฒียบ ฮนอย, หฒุ เมี้ยน เญย ฮู่ง เสย. น้าย เต๋ย ฮนอย กะญั์ว, เยซู ไม้ หญั่น หาย หญู่ง. น้าย เต๋ย ฮนอย-เหญียะ เจี๋ย ลิ์ว, นิ่น เฮญี้ยว เซีย อ๊ะ.

3เมี้ยน เญย ฮู่ง ฯฒฯ ก๊อง บั๋ว นิ่น, “สี ก๊อง เม่ย โหฒว ทิน-ฮู่ง เญย ตอน นอ, เห่ว น้าย นอม หละเปย๊ย เป๋น ฌั้ว ต้าย ม่าะ!”

4เยซู เตา, “กีง-โซว เฟี้ย เจี๊ยน ก๊อง, ‘เมี่ยน ไม้ เฒ์ย ขูง เขา หญั่น ฮบ ยู์ง แหม่ง ฮนั้ง.’”

5เมี้ยน เญย ฮู่ง แอ๋ง ต้อ นิ่น ฝาว นอม ต๋อง ฮลัง เญย, ฯฒฯ เฒาะ ป้าม เกน เญย หม่าน กั๊วะ หิ่น ธ้วด หฌับ ตั้ง ปุน นิ่น หมั่ง,

6หย่า ก๊อง, “น้าย เหยียด ฒู้ง เญย หลี่ง เหธา น้าย เต๋ย นอมๆ กั๊วะ เญย ฒิ่น ฒ่อย เยีย จิว ปุน เม่ย, เหว่ย หฒุ น้าย เต๋ย เหยียด ฒู้ง เซ จิว ปุน เยีย หมี่ อ๊ะ. เยีย อ๋อย ปุน หาย เต้า เซ เซว่ย เยีย ปุน อ๊ะ.

7สี ก๊อง เม่ย ป๋าย เยีย, น้าย เต๋ย เหยียด ฒู้ง ฯฒฯ เป๋น เม่ย เญย เหฑ่ง.”

8เยซู แอ๋ง เตา นิ่น, “กีง-โซว เฟี้ย เจี๊ยน ก๊อง, ‘อ๋อย หฒุ ป๋าย เฒี้ยว, เม่ย เญย ทิน-ฮู่ง, ขูง อ๋อย หฒุ หฒั่ง นิ่น ดุ เต้า ฮนั้ง.’”

9เมี้ยน เญย ฮู่ง แอ๋ง ต้อ เยซู มี่ง เยลูซาเลม ฒี่ง, หฒั่ง ทิน-ฮู่ง เญย เปย๊า วั้ว, ปุน นิ่น เยียม ฮลัง เจี๋ย วั้ว นอม ต๋อง, ก๊อง บั๋ว นิ่น, “สี ก๊อง เม่ย เป๋น ทิน-ฮู่ง เญย ตอน นอ, เยียม น้าย ปิว เหฌี่ย ก๋า.

10เหว่ย หฒุ กีง-โซว เฟี้ย เจี๊ยน ก๊อง, ‘ทิน-ฮู่ง อ๋อย พ้าย นิ่น เญย ฟิน-เมี่ยน เปว เจี๊ยน, โก๋ว เจี๊ยน เม่ย,’ หย่า ก๊อง,

11‘นิ่น บัว ฯฒฯ หล่ง ปั์ว โป้ว เจี๊ยน เม่ย, ไม้ ปุน เม่ย เญย เหฒา ฒง หฒุ หละเปย๊ย.’”

12เยซู เตา, “กีง-โซว ก๊อง, ‘ไม้ ตู๋ง เสย เฒี้ยว, เม่ย เญย ทิน-ฮู่ง.’”

13เมี้ยน เญย ฮู่ง หล่ง หญู่งๆ หฒะเอ๋ย เสย ลิ์ว, ฯฒฯ มี่ง หมี่ อ๊ะ, ฒั้ว เจี๊ยน ล์อ ฉัง ต้าย เสย.

14เยซู แอ๋ง หฑวน กาลิลี แซ้ง, ม่าย สีง ลี่ง เญย ชะ เหธา นิ่น เยียม. นิ่น เญย เจ๊า-โหล่ว ซีง ปวั๊ง วั้ว นอม เต่ย-ปูง.

15นิ่น เยียม นิ่น บัว เญย นอมๆ หวุ่ย ต้อง หฌาว เมี่ยน. หฒวัง เมี่ยน หย่า เธง นิ่น.

16เยซู แอ๋ง หฑวน นาซาเล้ด, ต้ง นิ่น เยียม วั้ว โฮล ต้าย วั้ว นอม มู้ง. เถา ตี้ง กง ฮนอย นิ่น ฮนั้ง เหยียด เกา นอ, มี่ง หวุ่ย ต้อง. นิ่น ฯฒฯ โซ้ว เจี์ย ต้าย โตะ กีง-โซว.

17ม่าย เต้า เฒาะ หฌุ่น วั้ว เต้า โต่ว หว่า เมี่ยน, อิสะยา, เญย โซว ธุ้น ปุน เยซู. นิ่น ฯฒฯ คอย ต้าย ล์อ ปวัด เฟี้ย เจี๊ยน น้าย เต๋ย หว่า,

18“เฒี้ยว เญย สีง ลี่ง เหธา เยีย เยียม, เหว่ย หฒุ นิ่น กิ๊น เยีย ต้าย ฒุ่น คู้ เฝียน บั๋ว เมี่ยน จ่ม เมี่ยน. นิ่น พ้าย เยีย ต้าย ฒุ่น บั๋ว หฒุ หววน เญย เมี่ยน นิ่น บัว อ๋อย ตุ๊ ปู๋ง ธ้วด, หย่า ฒุ่น บั๋ว มฒีง แม่ง เญย เมี่ยน, นิ่น บัว ไฮ่ หมั่ง ตุ๊ ปวัด, หย่า ปุน หฒุ เมี่ยน โหฒว โตะ ห่อย วั้ว เต๋ย ตุ๊ ปู๋ง ฆอย,

19แอ๋ง ฒุ่น ก๊อง เฒี้ยว เหธย เอน เญย หฮญัง เถา อ๊ะ.”

20เยซู โตะ ลิ์ว ฯฒฯ หฌุ่น เจี๊ยน โซว จิว ปุน โก๋ว หวุ่ย ต้อง เญย เมี่ยน เซียว ฯฒฯ เฒว์ย เหฌี่ย. เหยียด หฒวัง หวุ่ย ต้อง เญย เมี่ยน นี่ หนูง นุ เญย หมั่ง เจี๊ยน เยซู.

21นิ่น ฯฒฯ ก๊อง เม่ง บั๋ว นิ่น บัว, “เม่ย บัว ไฮ์ ลิ์ว น้าย โต่ว กีง-โซว เญย หว่า, อี้ ฮนอย ธ้วด ต้าย ต๋อย-ติ่ว เหฑ่ง.”

22หฒวัง เมี่ยน ไฮ์ หอบ เฮญี้ยว ไห่ นิ่น, หย่า บัวะ ฮ่อง นิ่น เญย หว่า ด่ง หน่าย คู่ หมวัง. นิ่น บัว หน่าย ก๋า, “น้าย โยเซ้บ เญย ตอน ไม้ เฒ์ย?”

23เยซู ก๊อง บั๋ว นิ่น บัว, “เยีย ฮิ้ว ตุ๊ เม่ย บัว ด่ง หาย อ๋อย ก๊อง น้าย ติ้ว หว่า-เป๊ย ปุน เยีย, ‘เดีย-ไซ อ้า! อ๋อย หฒุ หฒ่อ เม่ย กั้น ม่าะ!’ หย่า อ๋อย บั๋ว เยีย, ‘เยีย บัว ไฮ์ เม่ย เยียม คาเปนาอุม มู้ง โหฒว เญย สี่. อี้ หฒั่น เม่ย เยียม น้าย เม่ย เญย ป๊วน-มู้ง โหฒว ก๋า ม่าะ!’”

24เยซู แอ๋ง บั๋ว นิ่น บัว, “โต่ว หว่า เมี่ยน เยียม กั้น เญย ป๊วน-มู้ง ไม้ ม่าย หาย เต้า อะเฮน้ย ฒิบ.

25เยีย บั๋ว เม่ย บัว, เยียม เอลียา เญย ลู่ง เดี๊ย ลู่ง ฮ์าน ปัว หฮญัง-เปี๋ยน. ปวั้ง หฒุ ต้ม ฮวาง ต้ม หง่อ วั้ว หฒั่น, อิสะลาเอน เต่ย-ปูง ม่าย เอ๊า-กว๊า ธั้ม เญย.

26ทิน-ฮู่ง หย่า ไม้ พ้าย เอลียา มี่ง ล์อ เยียม อิสะลาเอน เต่ย-ปูง เญย หาย เต้า. ขูง พ้าย นิ่น มี่ง ล์อ เยียม ไซดอน เต่ย, สาเลฟัด มู้ง วั้ว เต้า ฮนั้ง.

27โต่ว หว่า เมี่ยน, เอลีซา, เญย ลู่ง เดี๊ย ม่าย ปุ๊ด ก้ม ฮู้ แป่ง เญย เมี่ยน ธั้ม เญย. มป่า ไม้ ม่าย หาย เต้า หน่อย ตุ๊ นิ่น กั้น เญย แป่ง หลง. ขูง ม่าย วั้ว เต้า ซีเลีย เมี่ยน, นาอามาน, ดุ เต้า ตุ๊ แป่ง หลง ฮนั้ง.”

28เยียม หวุ่ย ต้อง เญย หฒวัง เมี่ยน ไฮ์ เยซู ฮนั้ง น้าย นอ ก๊อง, นิ่น บัว เฉีย เจี์ย! ไห่,

29ฯฒฯ เจี์ย ซิน เหฑ่ง ต้าย, ทอ เยซู ธ้วด หฒิ มู้ง. วั้ว นอม มู้ง เยียม บง กู้ หงว่าย, นิ่น บัว ฯฒฯ ทอ เจี๊ยน มี่ง เถา ขัม-บาง ต้าว, อ๋อย ฟ้ง นิ่น ด๊อด.

30มป่า เยซู ยั่ง หฒวัง เมี่ยน บุด๋ง, มี่ง หมี่ อ๊ะ.

31เยซู เหฌี่ย เถา กาลิลี แซ้ง, คาเปนาอุม มู้ง. ตี้ง กง ฮนอย นิ่น เยียม วั้ว หฌาว เมี่ยน.

32หฒวัง เมี่ยน บัวะ ฮ่อง นิ่น หฌาว เญย หว่า, เหว่ย หฒุ นิ่น เญย หว่า ม่าย หัด ม์า.

33เยียม วั้ว หวุ่ย ต้อง ม่าย ล่าน เมี่ยน ม่าย เฮยี่ย ไกว๊ เมี้ยน เยียม นิ่น เญย ซิน. นิ่น เหน่าๆ เญย ก๊อง,

34“นาซาเล้ด มู้ง เญย เยซู อ้า! เม่ย ม่าย หาย หญู่ง เกวน หฒุ เยีย บัว? เม่ย ต้าย น้าย อ๋อย เหมียด เยีย บัว? เม่ย หาย เต้า เยีย ฮิ้ว เญย. เม่ย เซ ทิน-ฮู่ง เญย ธีง-เหฑ่ง เมี่ยน วั้ว เต้า.”

35เยซู หัด วั้ว เต้า เมี้ยน, “ไม้ ตู๋ง โค โล. ธ้วด น้าย เต้า เมี่ยน เญย ซิน ต้าย ม่าะ!” เมี้ยน ฯฒฯ มัวะ วั้ว เต้า เมี่ยน คีง เหฆวก เหฌี่ย หฒวัง เมี่ยน เญย หฑะเฮมียน, เฒียง หน่าย ธ้วด หมี่ อ๊ะ, หย่า ไม้ โหฒว หาย หญู่ง ห่อย วั้ว ล่าน เมี่ยน.

36หฒวัง เมี่ยน บัวะ ฮ่อง ไห่. ล่าน บั๋ว ล่าน, “หน่าย หาย หญู่ง หว่า นี? นิ่น ม่าย หลี่ง ม่าย หัด ม์า หัด เฮยี่ย ไกว๊ เมี้ยน ธ้วด, เมี้ยน ฯฒฯ ธ้วด หมี่ อ๊ะ.”

37เยซู โหฒว เญย เจ๊า-โหล่ว ฯฒฯ ซีง ปวั๊ง วั้ว นอม เต่ย-ปูง.

38เยซู ธ้วด หวุ่ย ต้อง แอ๋ง มี่ง ซีโมน เญย เปย๊า. ซีโมน เญย มา-เตี๊ย ปุ๊ด แป่ง, ซิน ฮลุ จอม เญย. นิ่น บัว ฯฒฯ โท้ เยซู เถง.

39เยซู ฯฒฯ มี่ง โซ้ว เจี๊ยน นิ่น เญย กะเฮลน หัด ซิน จอม แป่ง ถุย. แป่ง ฯฒฯ ถุย หมี่ อ๊ะ. ปีเต เญย มา-เตี๊ย เลี่ยม เฒ่ย เจี์ย ซิน ต้าย ฟู-สู เยซู บัว.

40บะฮนอย ม้วด เญย เฒี่ยง โห่, หาย เต้า ม่าย ก๋อ-โย์ว ปุ๊ด หาย หญู่ง แป่ง ฯฒฯ ต้อ ต้าย ล์อ เยซู. เยซู มาน เจี๊ยน เต้าๆ, หฒ่อ เหยียด ฒู้ง เญย แป่ง หลง เหฑ่ง.

41เมี้ยน เยียม เมี่ยน ธั้ม เญย ซิน ธ้วด นี่ หนูง เหน่า เญย เห่ว เจี๊ยน ก๊อง, “เม่ย เซ ทิน-ฮู่ง เญย ตอน.” มป่า เยซู หัด เมี้ยน, ไม้ ปุน นิ่น บัว ก๊อง หว่า, เหว่ย หฒุ นิ่น บัว ฮิ้ว ตุ๊ นิ่น เซ กีตู่.

42ลู่ง ฌัง เยซู ธ้วด หฒิ มู้ง มี่ง เล่ง เญย ต๋อง. หฒวัง เมี่ยน ธ้วด มี่ง ล์อ. ล์อ ปวัด, นิ่น บัว อ๋อย เลี่ยว นิ่น เยียม วั้ว, ไม้ ปุน นิ่น เล่ย ฆอย นิ่น บัว.

43เยซู บั๋ว นิ่น บัว, “ทิน-ฮู่ง พ้าย เยีย, เยีย ฯฒฯ อ๋อย หฒุ มี่ง วั้ว เต๋ย กั้น นอม มู้ง ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน. ทิน-ฮู่ง พ้าย เยีย ต้าย เซ เหว่ย ฮนั้ง น้าย นอ โหฒว.”

44เยซู ฯฒฯ มี่ง ก๋อม ยูเดีย เต่ย เญย หวุ่ย ต้อง ฒุ่น โต์.

← Chapter 3 Jump to: Chapter 5 →