Luke 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1เยซู ก๊อง บั๋ว นิ่น เญย ไซ-ก๋อ, “ม่าย เต้า ปุ๊ด-ฒ่อย เมี่ยน, เมี่ยน แอ๋ง ต้าย โก๋ นิ่น ก๊อง, นิ่น เญย กุ๊น กง เมี่ยน หละไกว้ หฒาว นิ่น เญย ฒิ่น ญ่าน.

2นิ่น ฯฒฯ เห่ว นิ่น เญย กุ๊น กง เมี่ยน ต้าย หน่าย, ‘เยีย ไฮ์ เมี่ยน ก๊อง เม่ย น้าย เต๋ย สี่ ฮนั้ง หาย นอ? เฒาะ เหฑ่ง เม่ย กุ๊น กง เญย แฒะ-ตาน ต้าย ปุน เยีย หมั่ง ก๋า ม่าะ! เยียม น้าย มี่ง เม่ย ไม้ ตุ๊ โหฒว เยีย เญย กุ๊น กง เมี่ยน อ๊ะ.’

3“วั้ว เต้า กุ๊น กง เมี่ยน เยียม เฮญี้ยว ฮนั้ม, ‘เยีย อ๋อย หฒุ ฮนั้ง หาย นอ โหฒว? เยีย เญย เฒี้ยว ไม้ หล่ง เยีย โหฒว กง อ๊ะ. เยีย เว้ด เดา, โหย่ว ไม้ ม่าย ชะ. โท้ หญั่น, เยีย หย่า เตี๊ย ไม้ ตุ๊ ไญ้.

4อา, เยีย ฮิ้ว ตุ๊ หอบ หฒุ ฮนั้ง หาย นอ โหฒว. ฆะฮ้า น้าย หญู่ง กง เยีย ไม้ ตุ๊ โหฒว มป่า หธ่อ ไฮ่ ม่าย เต๋ย เมี่ยน ฒิบ เยีย เยียม นิ่น บัว เญย เปย๊า.’

5“นิ่น ฯฒฯ เห่ว เฉียม นิ่น เญย เฒี้ยว เญย แฒะ วั้ว เต๋ย โหฒะ เต้า, โหฒะ เต้า เญย ต้าย. นิ่น หน่าย ก๋า ตะเยี้ยด เต้า, ‘เม่ย เฉียม เยีย เญย เฒี้ยว เญย แฒะ บัวะ เหฒีย?’

6“วั้ว เต้า เตา, ‘เฉียม เหยียด แป๊ะ ท้ง กะลั้น โย่ว.’ “กุ๊น กง เมี่ยน บั๋ว นิ่น, ‘น้าย เม่ย เญย แฒะ-ตาน. ฆ่ง เฒว์ย เหฌี่ย เฟี้ย ฮม์ เหฒียบ ท้ง ฮนั้ง.’

7“นิ่น แอ๋ง หน่าย ตะเหญ่ย เต้า, ‘เม่ย นี? เฉียม บัวะ เหฒีย?’ “วั้ว เต้า เตา, ‘เหยียด แป๊ะ บัวะ ธุ.’ “กุ๊น กง เมี่ยน ก๊อง, ‘น้าย เม่ย เญย แฒะ-ตาน. เฟี้ย เป๊ด เหฒียบ บัวะ ฮนั้ง.’

8“วั้ว เต้า ปุ๊ด-ฒ่อย เมี่ยน ฯฒฯ เธง เฮญี้ยว ไม้ หฒีง วั้ว เต้า กุ๊น กง เมี่ยน โหฒว ตุ๊ ไกว ไห่. เหว่ย หฒุ เยียม น้าย ลู่ง เดี๊ย เญย เมี่ยน เหธา นิ่น บัว กั้น เญย วั้ว ต่อย เมี่ยน โหฒว เก้า ไกว เจี๋ย เยียม ฌัง ฒง วั้ว เจ๊า เมี่ยน.”

9เยซู แอ๋ง ก๊อง, “เยีย บั๋ว เม่ย บัว, อ๋อย หฒุ หล่ง ป้าม เกน ไม้ แป้ง ฟิม เญย ฒิ่น ญ่าน ฒิว ก๋อ-โย์ว. เถา ฒิ่น ญ่าน เหฑ่ง หมี่ อ๊ะ, เม่ย บัว ฯฒฯ ตุ๊ ทิน-ฮู่ง ฒิบ มี่ง เยียม เหยียด ลิ์ว เญย เปย๊า.

10“หาย เต้า เยียม ไฝ-ฟิ้ว สี่ โหฒว ตุ๊ หฒีง, เยียม โฮล เญย สี่ หย่า โหฒว ตุ๊ หฒีง. สี ก๊อง ไฝ-ฟิ้ว สี่ โหฒว ไม้ หฒีง, โฮล เญย สี่ หย่า โหฒว ไม้ หฒีง อ๊ะ.

11สี ก๊อง ป้าม เกน เญย ฒิ่น ญ่าน เม่ย บัว โก๋ว ไม้ หฒีง, หาย เต้า อ๋อย ปุน เม่ย บัว โก๋ว เฒียน ฒิ่น ฒ่อย?

12สี ก๊อง เม่ย บัว โก๋ว กั้น เต้า เญย กะน้าย ไม้ หฒีง, เม่ย บัว กั้น หอบ หฒุ ตุ๊ เญย กะน้าย, หาย เต้า อ๋อย ปุน เม่ย บัว?

13“ไม้ ม่าย หาย เต้า ไฮ่ โหฒว ตุ๊ อี เต้า เฒี้ยว เญย โปว. ฮนั้ง หน่าย นิ่น อ๋อย ฑอง น้าย เต้า, อ๋อย ฮนั้ม วั้ว เต้า. ไม้ เฒย แอ๊ะ, นิ่น อ๋อย ท่าย น้าย เต้า, อ๋อย หมั่ง เผีย วั้ว เต้า. เม่ย บัว ไม้ ไฮ่ ต้ง ตั้ง โหฒว ทิน-ฮู่ง เญย โปว หย่า โหฒว ญ่าน เญย โปว.”

14ฟาลิสี เมี่ยน ฮนั้ม ญ่าน, นิ่น บัว ไฮ์ เยซู ก๊อง น้าย เต๋ย หว่า นิ่น บัว ฯฒฯ คู่ จั๊ด ไห่ เยซู อ๊ะ.

15เยซู ฯฒฯ ก๊อง บั๋ว นิ่น บัว, “เม่ย บัว โหฒว เญย สี่ ปุน เมี่ยน หล่าย เม่ย บัว โหฒว ตุ๊ หอบ, มป่า ทิน-ฮู่ง ฮิ้ว ตุ๊ เม่ย บัว เญย เฮญี้ยว. เหว่ย หฒุ ป้าม เมี่ยน ฝุน จ๋าย เญย, เอย ทิน-ฮู่ง หมั่ง เซ ไม้ หฒี่ ฒิ่น.

16“โมเซ เญย เล์ย เหธา ทิน-ฮู่ง เญย โต่ว หว่า เมี่ยน เฟี้ย ต้าย เญย โซว เมี่ยน ฒุ่น เจี๊ยน ต้าย เถา โยฮัน. เยียม หน่าย ต้าย, ฒุ่น ทิน-ฮู่ง เญย กั๊วะ เญย คู้ เฝียน. เมี่ยน หย่า ธ้าง เจี๊ยน เปียะ ทิน-ฮู่ง เญย กั๊วะ.

17ลู่ง เหธา เดา เจี๋ย เหฑ่ง หธ่อ เก้า ฮู่ง เห่ เล์ย-หลัด ด๊อด เหยียด ติ๊ม เหยียด แหวะ หฑั่ง.

18“หาย เต้า เล่ย นิ่น เญย เอ๊า แอ๋ง มี่ง หล่ง เซียง-เอ๊า, นิ่น เซ เหฮยียน เอ๊า ฮนั้ง. หาย เต้า หล่ง เอ๊า-เล่ย โหฒว เอ๊า, วั้ว เต้า เซ ขูง เหฮยียน เอ๊า ฮนั้ง.

19“ม่าย เต้า ต้ม ปุ๊ด-ฒ่อย เมี่ยน ฒุ เธี่ยว ฒุ ตุ่น เญย ลุย-โหว ฮนั้ง. ฮนอยๆ หญั่น อ๊อ ฮบ ติ๊ว เฌียน-โย่ว ไห่.

20“แอ๋ง ม่าย เต้า ด๊อด หน่าน เมี่ยน, บั๋ว เห่ว ลาซาลัด, ปุ๊ด ฟาง ปุ๊ด หลาย ปวั๊ง เหฑ่ง เหยียด ซิน. เมี่ยน หฒั่นๆ ต้อ นิ่น มี่ง เถา วั้ว เต้า ปุ๊ด-ฒ่อย เมี่ยน เญย แก้ง ด่าง

21ฒั้ว หฮนาง-เฮม้ย-ด๊อด หญั่น. จู๊ หย่า ต้าย เบี่ย นิ่น เญย ฟาง.

22“โหฒว เกา, น้าย เต้า ด๊อด หน่าน เมี่ยน ไต่ หมี่ อ๊ะ. ฟิน-เมี่ยน ต้อ นิ่น มี่ง เหธา นิ่น เญย อง-ถาย-แงะ, อับลาฮัม, เยียม. “ปุ๊ด-ฒ่อย เมี่ยน หย่า ไต่ หมี่ อ๊ะ, ปย๊บ เจี๊ยน.

23นิ่น มี่ง เยียม เยี่ยม เกน หฒุ เตี๊ย มุน เตี๊ย โค้ว. นิ่น ฯฒฯ เธา เฮมียน ปวัด อับลาฮัม เยียม โก เญย, หย่า ปวัด ลาซาลัด เหธา อับลาฮัม เยียม วั้ว.

24นิ่น ฯฒฯ เห่ว อับลาฮัม, ‘อง อ้า! โท้ ค้อ-เลี่ยน เยีย, บั๋ว ลาซาลัด ต้าย หล่ง ปั์ว-โด๊ะ โธะ ววม ต้าย เดี๊ยบ เยีย เญย เบียด ล่าง เต๋ย, เหว่ย หฒุ เยียม น้าย โต์ว ปั๊ว เจี๊ยน เยีย มุน ไห่, โค้ว ไห่.’

25“อับลาฮัม เตา นิ่น, ‘ฟุน อ่า, เม่ย อ๋อย หฒุ จั๋ง เถา เม่ย เยียม เสย หฒั่ง วั้ว หฒั่น เม่ย หญู่งๆ หย่า ตุ๊ หลง ไห่. ลาซาลัด หย่า ขูง ตุ๊ หว่าย เญย ฮนั้ง. อี้ หฒั่น ลาซาลัด ตุ๊ หลง, เฌียน-โย่ว ไห่ อ๊ะ. ต๋าว หฑวน เม่ย อี้ หฒั่น หฒุ เสี่ยว โค้ว.

26หธ่อ แอ๋ง ม่าย หญู่ง. ม่าย ติ้ว ต้ม หฒวน หม่าน หฒูง โด แฆะ เจี๊ยน. หาย เต้า เยียม น้าย ปูง อ๋อย เจี๋ย เม่ย บัว วั้ว ปูง, เจี๋ย ไม้ ตุ๊. หาย เต้า เยียม วั้ว ปูง อ๋อย เจี๋ย เยีย บัว น้าย ปูง หย่า เจี๋ย ไม้ ตุ๊.’

27“ปุ๊ด-ฒ่อย เมี่ยน แอ๋ง ก๊อง, ‘อง อ่า, วั้ว หญู่ง โท้ เม่ย พ้าย ลาซาลัด มี่ง เถา เยีย เญย เตีย เญย เปย๊า.

28เยีย หธ่อ ม่าย ปยา มั์ว-ตอน เยียม วั้ว. โท้ ปุน ลาซาลัด มี่ง ขวิน นิ่น บัว ไม้ ตู๋ง ต้าย น้าย เสี่ยว โค้ว เญย ต๋อง.’

29“อับลาฮัม เตา, ‘นิ่น บัว ฒู้ง ม่าย โมเซ เหธา ทิน-ฮู่ง เญย โต่ว หว่า เมี่ยน เญย โซว นีอา. เม่ย เญย มั์ว-ต่อย อ๋อย หฒุ หมวัง นิ่น บัว เญย หว่า.’

30“ปุ๊ด-ฒ่อย เมี่ยน แอ๋ง เตา อับลาฮัม, ‘อง อ่า, บัวะ น้าย ไม้ เก๋า. สี ก๊อง ม่าย ล่าน เมี่ยน ไต่ มี่ง แอ๋ง นั่ง ต้าย มี่ง เถา เยีย เญย มั์ว-ต่อย วั้ว, มั์ว-ต่อย ฒู้ง อ๋อย ก๊อย เฮญี้ยว กวั่ง ฒุ์ย.’

31“อับลาฮัม ก๊อง, ‘สี ก๊อง นิ่น บัว ไม้ หมวัง โมเซ เหธา ทิน-ฮู่ง เญย โต่ว หว่า เมี่ยน เญย หว่า นอ, ไม้ กุ๊น ม่าย ล่าน เมี่ยน ไต่ มี่ง แอ๋ง นั่ง ต้าย, นิ่น บัว หย่า ไม้ หมวัง เหลาะ.’”

← Chapter 15 Jump to: Chapter 17 →