Luke 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1วั้ว หฒั่น ม่าย เต๋ย เยียม วั้ว เญย เมี่ยน ก๊อง บั๋ว เยซู ม่าย เต๋ย กาลิลี เมี่ยน ไต๋ แซง-คู้ เหฒี่ย ปุน ทิน-ฮู่ง วั้ว หฒั่น, หฒุ ปีล้าด ไต๋ นิ่น บัว. ฑย้าม ธ้วด ต้าย หฒอบ หฒุ วั้ว เต๋ย แซง-คู้ เญย ฑย้าม.

2เยซู เตา นิ่น บัว, “น้าย เต๋ย กาลิลี เมี่ยน ฮนั้ง น้าย นอ หฒุ ไต๋, เม่ย บัว หล่าย นิ่น บัว เญย ฒุ์ย เก้า โฮล กาลิลี เญย วั้ว เต๋ย หฒวัง เมี่ยน เญย ฒุ์ย ไฟ?

3ไม้ เฒ์ย เหลาะ. เยีย บั๋ว เม่ย บัว, สี ก๊อง เม่ย บัว ไม้ ก๊อย เฮญี้ยว กวั่ง ฒุ์ย, เม่ย บัว หย่า ฟี่ ฮนั้ง เญย อ๋อย หฒุ เหมียด.

4เหธา สีโลอัม ฟั่น ท้าบ บาง, ดั๊บ ไต่ วั้ว เต๋ย เหฒียบ เป๊ด ล่าน นี? เม่ย บัว หล่าย นิ่น บัว ต่อง เก้า โด เยลูซาเลม ฒี่ง เญย หฒวัง เมี่ยน ไฟ?

5ฒู้ง ไม้ เฒ์ย. เยีย บั๋ว เม่ย บัว, สี ก๊อง เม่ย บัว ไม้ ก๊อย เฮญี้ยว กวั่ง ฒุ์ย, เม่ย บัว หย่า ฮนั้ง นิ่น บัว นอ, อ๋อย หฒุ ไต่.”

6เยซู ก๊อง น้าย ติ้ว หว่า-เป๊ย ปุน นิ่น บัว หมวัง. “ม่าย ล่าน เมี่ยน ม่าย ฒู่ง ง่ง หญอ เดี๋ยง เยียม นิ่น เญย อะหงุ่น หฮวีง. นิ่น มี่ง เถา วั้ว ล์อ เปี๊ยว หย่า ล์อ ไม้ ตุ๊ เหยียด นอม.

7นิ่น ฯฒฯ บั๋ว เถง นิ่น โก๋ว หฮวีง เญย เมี่ยน, ‘หมั่ง ก๋า! ตุ๊ ปัว หฮญัง เยีย ต้าย ล์อ น้าย ฒู่ง ง่ง หญอ เดี๋ยง เญย เปี๊ยว หย่า ไม้ ตุ๊ เหยียด นอม. กุ๊น ก๋อย กวั่ง อ๊ะ. ขูง เยียม น้าย ท้อง เดา ฮนั้ง.’

8โก๋ว หฮวีง เญย เมี่ยน ก๊อง, ‘ต้ม ก๋อ อ้า! โท้ เม่ย แอ๋ง เลี่ยว หฮญัง. เยีย อ๋อย เว้ด เนีย ยวัง เจี๊ยน กอน, อัน เจี๊ยน ป๋วน.

9ตะเหญ่ย หฮญัง เฒี่ยง เปี๊ยว นอ, หลง อ๊ะ. ไม้ เฒี่ยง นอ, กุ๊น ก๋อย กวั่ง อ๊ะ.’”

10ม่าย นอม ตี้ง กง ฮนอย, เยซู เยียม นอม หวุ่ย ต้อง หฌาว เมี่ยน.

11เยียม วั้ว ม่าย เต้า มเซียะ ตอน ม่าย เมี้ยน เยียม นิ่น เญย ซิน ปุน นิ่น ปุ๊ด เหฒียบ เป๊ด หฮญัง แป่ง, มัวะ นิ่น เญย จ๊าย จุ๊ด มี่ง, โซ้ว ไม้ หฒะ.

12เยซู ปวัด ฯฒฯ เห่ว นิ่น ต้าย ฟัด เต๋ย บั๋ว นิ่น, “ญาม อ่า, เม่ย เญย แป่ง หลง ตั๋ง กอน อ๊ะ.”

13เยซู ต้อ ปั์ว มาน เจี๊ยน นิ่น, นิ่น ฯฒฯ เลี่ยม เฒ่ย โซ้ว หฒะ ต้าย หย่า เธง ทิน-ฮู่ง.

14โก๋ว หวุ่ย ต้อง วั้ว เต้า เมี่ยน โก๋ ปวัด เยซู หล่ง ตี้ง กง ฮนอย หฒ่อ แป่ง, ไม้ หอบ นิ่น เญย เฮญี้ยว เหยียด เต๋ย. นิ่น ฯฒฯ บั๋ว หฒวัง เมี่ยน, “ม่าย จุ๊ ฮนอย โหฒว กง นีอา. เม่ย บัว หล่ง น้าย เต๋ย จุ๊ ฮนอย หฒ่อ แป่ง ม่าะ! ไม้ ตู๋ง หล่ง ตี้ง กง ฮนอย ต้าย หฒ่อ ซา.”

15เฒี้ยว เตา นิ่น, “เม่ย บัว เป้ย หฒะ เฮญี้ยว ฌ้วด เญย เมี่ยน อ้า! ตี้ง กง ฮนอย เม่ย บัว หาย เต้า หย่า ปู๋ง ง่ง ปู๋ง ล่อ ธ้วด ล่าน, เคน มี่ง ฮบ ววม ไม้ เฒ์ย?

16น้าย เต้า อับลาฮัม เญย เฒ้ย-ฟุน หฒุ ซาตาน โด้ เจี๊ยน ตุ๊ เหฒียบ เป๊ด หฮญัง. หล่ง ตี้ง กง ฮนอย ไจ๊ ดุ๊ด, ปู๋ง นิ่น ธ้วด ไม้ หอบ ไฟ?”

17เยซู ฮนั้ง น้าย นอ เตา, เหธา นิ่น โหฒว วิน-วั้ง วั้ว เต๋ย ฯฒฯ ไฮ์ ไญ้ ไห่. มป่า หฒวัง เมี่ยน อะเฮน้ย ไห่ เยซู โหฒว เญย เหยียด ฒู้ง บัวะ ฮ่อง ไห่ เญย สี่.

18เยซู หน่าย ก๋า, “ทิน-ฮู่ง โหฒว เฒี้ยว กุ๊น เมี่ยน ฮนั้ง หาย นอ? เยีย อ๋อย หฒุ ต้อ หาย หญู่ง ต้าย เป๊ย?

19อ๋อย หฒุ เป๊ย นอม ไล-จ๋าย ญิม. ม่าย ล่าน เมี่ยน ต้อ มี่ง หฒวัง นิ่น เญย หฮวีง. ญิม ธ้วด, โฮล ต้าย เป๋น เหยียด ฒู่ง เดี๋ยง, เหนาะ หย่า โหฒว เล์า เยียม นิ่น เญย ฆว่า.”

20เยซู แอ๋ง หน่าย ก๋า, “อ๋อย หฒุ หล่ง หาย หญู่ง เป๊ย ทิน-ฮู่ง โหฒว เฒี้ยว กุ๊น เมี่ยน?

21เซ ฮนั้ง ปี๊ง นอ. ม่าย เต้า มเซียะ ตอน เฒาะ เต๋ย ปี๊ง โช้ว ปัว ท้ง บ๊วน. น้าย เต๋ย บ๊วน ฯฒฯ ปุ๊ด เหฑ่ง หมี่ อ๊ะ.”

22เยซู มี่ง เยลูซาเลม ฒี่ง. มี่ง วั้ว หฒั่น นิ่น เฒว่ย มู้ง เฒว่ย ล์าง หฌาว เมี่ยน.

23ม่าย ล่าน เมี่ยน หน่าย ก๋า, “ฟิน-แซง อ้า! ตุ๊ เหฌียว เญย เมี่ยน โหฒะ เญย ไฟ?” เยซู บั๋ว นิ่น บัว,

24“อ๋อย หฒุ เบ๋ง เจี๊ยน เปียะ เหบ เญย แก้ง. เยีย บั๋ว เม่ย บัว, ม่าย เมี่ยน ธั้ม เญย อ๋อย เปียะ หย่า เปียะ ไม้ ตุ๊.

25เปย๊า-เฒี้ยว เจี์ย ซิน มี่ง กวน เจี๊ยน แก้ง, เม่ย บัว อ๋อย หฒุ เยียม กะเหญี่ย เห่ว, ‘ต้ม ก๋อ อ้า! โท้ คอย แก้ง ปุน เยีย บัว เปียะ ม่าะ!’ “มป่า นิ่น อ๋อย เตา, ‘เยีย ไม้ ฮิ้ว ตุ๊ เม่ย บัว เยียม หาย ต้าย.’

26“เม่ย บัว ฯฒฯ เตา, ‘เยีย บัว เหธา เม่ย จวั่ง หญั่น, จวั่ง ฮบ เจี๋ย. เม่ย หย่า เยียม เยีย บัว เญย จาย-ห่อง หฌาว เจี๋ย เญย.’

27“มป่า นิ่น แอ๋ง ก๊อง, ‘เยีย บั๋ว เม่ย บัว, เยีย ไม้ ฮิ้ว ตุ๊ เม่ย บัว หย่า ไม้ ฮิ้ว ตุ๊ เม่ย บัว เยียม หาย ต้าย. เมี่ยน หว่าย เมี่ยน อ้า! เปย๋า ฆอย ม่าะ!’

28“วั้ว หฒั่น เม่ย บัว ตุ๊ ปวัด อับลาฮัม, อีสัก, ยาโค้บ เหธา เหยียด ฒู้ง โต่ว หว่า เมี่ยน เยียม ทิน-ฮู่ง เญย กั๊วะ, มป่า เม่ย บัว กั้น หฒุ หฒุ่น กวั่ง เยียม กะเหญี่ย ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.

29เมี่ยน อ๋อย เยียม ตง น่าม ไฟ ป๊ะ ปูง ต้าย เยียม ทิน-ฮู่ง เญย กั๊วะ จวั่ง เตี้ย หญั่น หฮนาง.

30วั้ว หฒั่น เยียม ฆะฮ้า ม่าย เต๋ย ตุ๊ เยียม วั้ว ด่าง, เยียม วั้ว ด่าง ม่าย เต๋ย ฒู้ง อ๋อย หฒุ เยียม ฆะฮ้า.”

31วั้ว หฒั่น ม่าย เต๋ย ฟาลิสี เมี่ยน ต้าย บั๋ว เยซู, “เม่ย อ๋อย หฒุ ซิ้ม ฆอย มี่ง กั้น นอม ต๋อง อ๊ะ. เฮโล้ด ฮู่ง อ๋อย ไต๋ เม่ย.”

32เยซู เตา, “มี่ง บั๋ว วั้ว เต้า เฮยี่ย จู๊, อี้ ฮนอย เหธา ฌัง ฮนอย เยีย หฒุ่น เมี้ยน ธ้วด หย่า หฒ่อ แป่ง. ฮนาง ฮนอย โหฒว เหฒียง เยีย เญย กง อ๊ะ.

33มป่า ฮนั้ง หาย เยีย อี้ ฮนอย, ฌัง ฮนอย, ฮนาง ฮนอย อ๋อย หฒุ กัน เจี๊ยน เจ๊า มี่ง อ๊ะ, เหว่ย หฒุ หาย เต้า โต่ว หว่า เมี่ยน ไม้ หอบ หฒุ เยียม เยลูซาเลม ฒี่ง กะเหญี่ย แหมง เญย ต๋อง หฒุ ไต๋.

34“เยลูซาเลม ฒี่ง อ้า! เยลูซาเลม ฒี่ง! เม่ย ไต๋ โต่ว หว่า เมี่ยน หย่า เฒาะ หละเปย๊ย ฒง ไต่ ทิน-ฮู่ง พ้าย มี่ง เม่ย หน่าย เญย เมี่ยน. บัวะ เหฒีย หฑุ่น เยีย อ๋อย ฮล้อ ฒุ้น เม่ย เญย เมี่ยน ฮนั้ง ไจ-เญ์ย ปั่ว ตอน เยียม ด๊าด-เดี๊ย นอ. มป่า เม่ย ไม้ คั้ง ปุน เยีย โหฒว.

35หมั่ง ม่าะ! เม่ย เญย เปย๊า ฒู้ง หฒุ กวั่ง เป๋น เปย๊า-ฮวาง. เยีย บั๋ว เม่ย บัว, เยียม น้าย มี่ง เม่ย บัว ไม้ ตุ๊ ปวัด เยีย. ฒั้ว เม่ย บัว ก๊อง, ‘โท้ ทิน-ฮู่ง เหธย ฟุ เต๊ง เฒี้ยว เญย บั๋ว ต้าย วั้ว เต้า’ หธีง ตุ๊ ปวัด เยีย.”

← Chapter 12 Jump to: Chapter 14 →