Luke 10

Mien Bible (Thai Script) © Thailand Bible Society, 2007

1น้าย เต๋ย สี่ เจี๋ย ลิ์ว, ฆะฮ้า เฒี้ยว แอ๋ง กิ๊น ธ้วด เธี้ยด เหฒียบ เหญ่ย เต้า ไซ-ก๋อ พ้าย นิ่น บัว เหยียด ต๋อย เหยียด ต๋อย เญย มี่ง. เยซู อ๋อย มี่ง หาย นอม มู้ง หาย นอม ต๋อง, นิ่น ฯฒฯ พ้าย นิ่น บัว มี่ง ด่าง.

2นิ่น ก๊อง บั๋ว ไซ-ก๋อ บัว, “แกง-หฒวัง ธั้ม มป่า กง-เมี่ยน โหฒะ. เหว่ย น้าย อ๋อย หฒุ โท้ แกง-หฒวัง เญย เฒี้ยว พ้าย กง-เมี่ยน ธ้วด มี่ง เซียว นิ่น เญย แกง-หฒวัง.

3มี่ง ม่าะ! เยีย พ้าย เม่ย บัว ธ้วด มี่ง ฮนั้ง ปู๋ง ปะกี ยู่ง ตอน เปียะ เฮยี่ย จู๊ กวั้น กะญั์ว นอ.

4ไม้ ตู๋ง ต้อ ญ่าน บัวะ หย่า ไม้ ตู๋ง ต้อ บัวะ ตั๊บ กะน้าย. เฮ่ หย่า ไม้ ตู๋ง ต้อ. เจ๊า หฒั่ง ปวั้ง หฒุ เมี่ยน, เลี่ยม ไม้ ตู๋ง ก๊อง หวุ่ย ปวั้ง หว่า.

5“เปียะ หาย นอม เปย๊า, อ๋อย หฒุ ก๊อง น้าย เต๋ย หว่า ด่าง, ‘โท้ ปุน น้าย นอม เปย๊า แป้ง ออน.’

6สี ก๊อง เยียม หน่าย ม่าย เต้า อ๋อย ตุ๊ แป้ง ออน เญย เมี่ยน นอ, เม่ย บัว โท้ เญย แป้ง ออน นิ่น ฯฒฯ ตุ๊ หมี่ อ๊ะ. ไม้ ม่าย อ๋อย ตุ๊ แป้ง ออน เญย เมี่ยน นอ, แอ๋ง เซียว เม่ย บัว โท้ เญย แป้ง ออน หฑวน ต้าย.

7ตี่ง ฮิด หาย นอม เปย๊า, นิ่น บัว เบ่น หาย หญู่ง หญั่น ฮบ กุ๊น หญั่น กุ๊น ฮบ, เหว่ย หฒุ กง-เมี่ยน ผุย ตุ๊ ฒิบ นิ่น เญย กง-ฒิ่น. หย่า ไม้ ตู๋ง เยียม น้าย นอม เปย๊า ซุ้ย เจี๋ย วั้ว นอม เปย๊า.

8“เม่ย บัว เปียะ หาย นอม มู้ง ปวัด เมี่ยน ฒิบ เม่ย บัว นอ, เมี่ยน เบ่น หาย หญู่ง หญั่น ฮบ, กุ๊น หญั่น อ๊ะ.

9อ๋อย หฒุ หฒ่อ หลง วั้ว นอม มู้ง เญย แป่ง เมี่ยน หย่า บั๋ว นิ่น บัว, ‘ทิน-ฮู่ง โหฒว เฒี้ยว กุ๊น เมี่ยน เญย เฒี่ยง โห่ เถา เม่ย บัว ฟัด อ๊ะ.’

10สี ก๊อง เม่ย บัว เปียะ หาย นอม มู้ง, เมี่ยน หย่า ไม้ ฒิบ เม่ย บัว นอ, อ๋อย หฒุ มี่ง วั้ว ต้ม เจ๊า ก๊อง,

11‘เลี่ยม เม่ย บัว น้าย นอม มู้ง เญย เนีย-บูง นิด เยีย บัว เญย เหฒา เยีย บัว ฮล้าด กวั่ง เหฑ่ง ปุน ธีง เม่ย บัว ต่อง. มป่า เม่ย บัว อ๋อย หฒุ จั๋ง เจี๊ยน, ทิน-ฮู่ง โหฒว เฒี้ยว กุ๊น เมี่ยน เญย ฮนอย-เหญียะ เถา ฟัด อ๊ะ.’

12เยีย บั๋ว เม่ย บัว, เถา ทิน-ฮู่ง เซี้ยม ฒุ์ย วั้ว นอม ฮนอย, โสโดม ฒี่ง หฒุ ตี่ง ฒุ์ย ฒู้ง เก้า เฮง วั้ว นอม มู้ง.

13“โคลาซิน มู้ง อ้า! เม่ย อ๋อย หฒุ โค้ว อ๊ะ. เบดไซดา มู้ง อ้า! เม่ย หย่า อ๋อย หฒุ โค้ว อ๊ะ. เยียม เม่ย บัว บุด๋ง โหฒว เจี๋ย วั้ว เต๋ย บัวะ ฮ่อง เญย สี่, สี ก๊อง เยียม ไทละ เหธา ไซดอน มู้ง โหฒว ธ้วด ต้าย นอ, วั้ว เต๋ย อี นอม มู้ง เญย เมี่ยน ฒู้ง ปุ๋ย เจี๊ยน ล่าม่า เดีย-โธว, เฒว์ย เจี๊ยน ซ้าย-ดุย, ปุน ธีง นิ่น บัว ก๊อย เฮญี้ยว กวั่ง ฒุ์ย เล่า อ๊ะ.

14เถา ทิน-ฮู่ง เซี้ยม ฒุ์ย วั้ว ฮนอย, ไทละ เหธา ไซดอน มู้ง ฒู้ง หฒุ ตี่ง ฒุ์ย เก้า เฮง เม่ย บัว.

15คาเปนาอุม มู้ง อ้า! เม่ย กั้น อ๋อย ท่าย เม่ย กั้น ฝาว ลู่ง ไฟ? เม่ย ฒู้ง หฒุ ฒอย เหฌี่ย เยี่ยม เกน อ๊ะโล่ะ!”

16เยซู บั๋ว นิ่น เญย ไซ-ก๋อ บัว, “หาย เต้า หมวัง เม่ย บัว, นิ่น หย่า หมวัง เยีย. หาย เต้า เฆ่ม เม่ย บัว, หย่า เฆ่ม เยีย. หาย เต้า เฆ่ม เยีย หย่า เฆ่ม พ้าย เยีย ต้าย วั้ว เต้า.”

17วั้ว เต๋ย เธี้ยด เหฒียบ เหญ่ย เต้า ไซ-ก๋อ อะเฮน้ย เญย หฑวน ต้าย บั๋ว เยซู, “เฒี้ยว อ้า! เยีย บัว หล่ง เม่ย เญย บั๋ว หัด เมี้ยน, เมี้ยน หย่า หมวัง เยีย บัว.”

18เยซู บั๋ว นิ่น บัว, “เยีย ปวัด ซาตาน เยียม ทิน-ต้อง ด๊อด เหฌี่ย ฮนั้ง บะหลี่ง นอ.

19หมวัง ม่าะ! เยีย ปุน เม่ย บัว ม่าย หัด ม์า ธ้าย ตุ๊ นาง, ธ้าย ตุ๊ เหฒียบ เหญ่ย ด้าง, หย่า ฮี่ง เจี๋ย วั้ว เต้า วิน-วั้ง เญย เหยียด ฒู้ง ชะ, หย่า ไม้ ม่าย หาย หญู่ง ห่อย เม่ย บัว.

20มป่า ไม้ ตู๋ง อะเฮน้ย เมี้ยน หมวัง เม่ย บัว เญย หว่า. อ๋อย หฒุ อะเฮน้ย เม่ย บัว เญย บั๋ว ตุ๊ เฟี้ย เจี๊ยน เยียม ทิน-ต้อง.”

21วั้ว หฒั่น สีง ลี่ง ปุน เยซู เฌียน-โย่ว ไห่, นิ่น ฯฒฯ ก๊อง, “อา เตีย, ลู่ง เดา เญย เฒี้ยว อ้า! เยีย เธง เตีย เหว่ย หฒุ น้าย เต๋ย สี่ เตีย เกม เจี๊ยน ไม้ ปุน ม่าย ธง-เม่ง เญย เมี่ยน เหธา โหะ ฮลัง เญย เมี่ยน ฮิ้ว, มป่า เตีย ปุน ไม้ โหะ ฮลัง เญย เมี่ยน ฮิ้ว. อา เตีย อ้า! น้าย เซ โหฒว ตุ๊ หอบ เตีย กั้น เญย เฮญี้ยว.

22“อา เตีย เฒาะ หญู่งๆ จิว ปุน เยีย. ธ้วด ลิ์ว เตีย, ไม้ ม่าย หาย เต้า ฮิ้ว ตุ๊ ตอน. ธ้วด ลิ์ว ตอน เหธา ตอน ปุน ฮิ้ว วั้ว เต๋ย, ไม้ ม่าย หาย เต้า ฮิ้ว ตุ๊ เตีย.”

23เยซู แอ๋ง ฮวิน หฑวน เหธา ไซ-ก๋อ บัว กั้น ก๊อง, “เม่ย บัว ตุ๊ ปวัด น้าย เต๋ย สี่, เม่ย บัว หฒะเก้ง เฌียน-โย่ว อ๊ะ.

24เยีย บั๋ว เม่ย บัว, ม่าย โต่ว หว่า เมี่ยน เหธา ฮู่ง เตี๋ย ธั้ม เญย อ๋อย ปวัด ต้ง เม่ย บัว ปวัด เญย, มป่า นิ่น บัว ไม้ ตุ๊ ปวัด. อ๋อย ไฮ์ ต้ง เม่ย บัว ไฮ์ เญย, มป่า นิ่น บัว ไม้ ตุ๊ ไฮ์.”

25ม่าย เต้า หฌาว เล์ย เญย ฟิน-แซง โซ้ว เจี์ย ต้าย อ๋อย เสย เยซู. นิ่น ฯฒฯ หน่าย, “ฟิน-แซง อ้า! เยีย อ๋อย หฒุ ฮนั้ง หาย นอ โหฒว หธีง ตุ๊ เหยียด ลิ์ว เญย แหม่ง?”

26เยซู ก๊อง, “ เล์ย-หลัด เฟี้ย เจี๊ยน ฮนั้ง หาย นอ ก๊อง? เม่ย โตะ ลิ์ว, เอ๋ย เล์ย ฮนั้ง หาย นอ?”

27วั้ว เต้า ฟิน-แซง เตา, “อ๋อย หฒุ หล่ง เหฑ่ง เฮญี้ยว, หล่ง เหฑ่ง หฒะเอ๋ย, หล่ง เหฑ่ง ชะ, หล่ง เหฑ่ง ธง-เม่ง ฮนั้ม เฒี้ยว, เม่ย เญย ทิน-ฮู่ง. หย่า อ๋อย หฒุ ฮนั้ม เมี่ยน ฮนั้ง ฮนั้ม กั้น นอ.”

28เยซู ก๊อง, “เม่ย เตา ตุ๊ หอบ เญย. อ๋อย หฒุ ฮนั้ง น้าย นอ โหฒว เม่ย ฯฒฯ ตุ๊ เฒี่ยง เจี๊ยน.”

29วั้ว เต้า ฟิน-แซง ฯฒฯ ไม้ ม่าย อี้ เฝย อ๊ะ. แอ๋ง ล์อ เจ๊า หน่าย เยซู, “วั้ว หญู่ง, เยีย หอบ หฒุ ฮนั้ม เญย เซ หาย เต้า?”

30เยซู เตา, “ม่าย เต้า เมี่ยน เยียม เยลูซาเลม ฒี่ง เหฌี่ย เยลีโค ฒี่ง. นิ่น มี่ง เกา, หฒุ จั๋น-หฒะ ธ้าง. เลี่ยม ลุย-โหว เธี้ย ฌัง เหฑ่ง, เฒาะ นิ่น เบ๊าะ ตุ๊ ไม้ นั่ง ไม้ ไต่ เญย, กวั่ง เจี๊ยน วั้ว, เฒียง หน่าย มี่ง หมี่ อ๊ะ.

31“ต๋อย หฒุ วั้ว นอม เฒี่ยง โห่, ม่าย เต้า ไซ เมี่ยน ยั่ง วั้ว ติ้ว เจ๊า เจี๋ย, ปวัด น้าย เต้า หฒุ มุน เญย เมี่ยน เยียม วั้ว เจ๊า-เฮลน. นิ่น ฯฒฯ หวี่ง เจี๋ย วั้ว ปูง เจ๊า-เฮลน มี่ง หมี่ อ๊ะ.

32“แอ๋ง ม่าย เต้า เลวี เมี่ยน หย่า ฟี่ ฮนั้ง เญย เถา วั้ว ปวัด ฯฒฯ มี่ง หมั่ง. หมั่ง ลิ์ว, แอ๋ง หวี่ง เจี๋ย วั้ว ปูง เจ๊า-เฮลน, เฒียง หน่าย มี่ง หมี่ อ๊ะ.

33“มป่า ม่าย เต้า สะมาเลีย จั๋น เจี๋ย เถา วั้ว, ปวัด หน่าย เต้า หฒุ จั๋น-หฒะ เบ๊าะ มุน เญย เมี่ยน ฯฒฯ ค้อ-เลี่ยน ไห่,

34มี่ง เถา วั้ว หมั่ง. หมั่ง ลิ์ว, นิ่น ฯฒฯ เฒาะ โย่ว เหธา อะหงุ่น ติ๊ว เฮยี้ยด เจี๊ยน หฒุ มุน เญย ต๋อง, หย่า เฒาะ เดีย เปว เจี๊ยน, แอ๋ง ฮล้อบ นิ่น ฝาว น้าย เต้า สะมาเลีย จั๋น เญย ล่อ, เคน มี่ง เถา นอม แคะ เปย๊า, หธ่อ เยียม วั้ว โก๋ว นิ่น.

35“ตะเหญ่ย ดอม สะมาเลีย จั๋น เฒาะ ตุ๊ อี นอม แท้บ ต้าย ปุน เปย๊า-เฒี้ยว หย่า ก๊อง บั๋ว นิ่น, ‘เถง เยีย โก๋ว หลง นิ่น โอ่. ฒั้ว เยีย แอ๋ง ต้าย เถา น้าย หมั่ง ก๋า, เม่ย หล่ง หฒุ บัวะ เหฒีย เยีย มต้าย จ๊าว เม่ย.’”

36เซ้ด เมว์ย เยซู ก๊อง, “เม่ย บัว ฮนั้ม ก๋า, น้าย เต๋ย ปัว เต้า, ต้ง หาย เต้า ฮนั้ม จั๋น-หฒะ ธ้าง วั้ว เต้า เมี่ยน?”

37หฌาว เล์ย เญย ฟิน-แซง ก๊อง, “ต้ง ค้อ-เลี่ยน นิ่น วั้ว เต้า.” เยซู ก๊อง, “วั้ว หญู่ง, กุ๊น มี่ง ฮนั้ง หน่าย นอ โหฒว โอ่.”

38เยซู เหธา นิ่น เญย ไซ-ก๋อ บัว ยั่ง เจ๊า มี่ง วั้ว หฒั่น, นิ่น เถา นอม ล์าง. วั้ว นอม ล์าง ม่าย เต้า มเซียะ ตอน, บั๋ว เห่ว มาทา, อะเฮน้ย ฒิบ เยซู ฮิด นิ่น เญย เปย๊า.

39มาทา ม่าย เต้า เฑี์ย, บั๋ว เห่ว, มาลียา, เฒว์ย เจี๊ยน เฒี้ยว เญย เหฒา-เฮลน หมวัง นิ่น หฌาว เล์ย.

40มาทา เบ่น แคะ, กง ธั้ม, หละเญ้า ไห่, นิ่น ฯฒฯ ต้าย ก๊อง, “เฒี้ยว อ้า! เม่ย ฮนั้ม ตุ๊ เจี๋ย เอ๋ย เญย? เยีย เญย เฑี์ย กวั่ง ปุน เยีย กั้น โหฒว กง ฮนั้ง. โท้ บั๋ว นิ่น ต้าย เถง เต๋ย เยีย ม่าะ!”

41เฒี้ยว เตา, “มาทา อ้า! มาทา! เม่ย ม่าย ธั้ม-หญู่ง ห่อย เม่ย เฮญี้ยว เฑ่า เฮญี้ยว ฮวาง นีอา.

42มป่า หอบ หฒุ โหฒว เญย ม่าย ดุ หญู่ง ฮนั้ง. เก้า หลง วั้ว หญู่ง มาลียา กิ๊น ลิ์ว อ๊ะ, หย่า ไม้ ม่าย หาย เต้า เฒาะ ตุ๊ นิ่น เญย ธ้วด.”

← Chapter 9 Jump to: Chapter 11 →