Luke 19

Mien Bible (Thai Script) © Thailand Bible Society, 2007

1เยซู เปียะ เยลีโค ฒี่ง, อ๋อย ยั่ง ฒี่ง เจี๋ย.

2เยียม วั้ว ม่าย เต้า เมี่ยน โหฒว เซียว โฑว-ฒิ่น เญย เปย๊ย เฒ้ย, บั๋ว เห่ว สักเคี้ยด. นิ่น หย่า ปุ๊ด-ฒ่อย เมี่ยน.

3นิ่น อ๋อย หมั่ง ก๋า เยซู ฮนั้ง หาย นอ, มป่า สักเคี้ยด ไอ๊ ไห่. เมี่ยน ธั้ม ท้อง เจี๊ยน นิ่น, นิ่น หมั่ง ไม้ ปวัด เยซู.

4นิ่น ฯฒฯ ธ้าง เจี๋ย ด่าง ฝาว ง่ง หญอ เดี๋ยง, เยียม วั้ว ฒั้ว เจี๊ยน หมั่ง เยซู, เหว่ย หฒุ เยซู อ๋อย ยั่ง น้าย ติ้ว เจ๊า เจี๋ย.

5เยซู เจี๋ย เถา เดี๋ยง-กอน ฯฒฯ เธา เฮมียน ก๊อง บั๋ว สักเคี้ยด, “สักเคี้ยด อ่า, ก๊าน เหฌี่ย ต้าย ม่าะ! อี้ ฮนอย เยีย อ๋อย หฒุ มี่ง ฮิด เม่ย เญย เปย๊า.”

6สักเคี้ยด ฮวางๆ ฒางๆ เญย เหฌี่ย ต้าย, อะเฮน้ย เญย ฒิบ เยซู.

7หฒวัง เมี่ยน ปวัด น้าย เต๋ย สี่ นิ่น บัว ฯฒฯ งบ ก๊อง, “หน่าย ล่าน เมี่ยน มี่ง โหฒว ฒุ์ย-เมี่ยน เญย แคะ อ๊ะโล่ะ!”

8สักเคี้ยด โซ้ว เจี์ย ต้าย ก๊อง บั๋ว เฒี้ยว, “เฒี้ยว อ้า! เยีย ม่าย เญย เหยียด ฒู้ง กะน้าย เยีย อ๋อย เฒาะ เหยียด ป่วน ปุน เมี่ยน จ่ม เมี่ยน. สี ก๊อง เยีย เผียน หาย เต้า เญย หาย หญู่ง, เหยียด โก๊ว เยีย อ๋อย ปุ้ย เปยย โก๊ว นิ่น บัว.”

9เยซู ก๊อง บั๋ว นิ่น, “อี้ ฮนอย เหฌียว เอน ต้าย เถา น้าย ป่วน เมี่ยน. น้าย ล่าน เมี่ยน หย่า โหฒว อับลาฮัม เญย เฒ้ย-ฟุน.

10เยีย, ป้าม เมี่ยน เญย ตอน, ต้าย ล์อ หย่า เหฌียว ตี๋ง ล่าย เญย เมี่ยน.”

11หฒวัง เมี่ยน หธ่อ หมวัง เจี๊ยน น้าย เต๋ย หว่า, เยซู แอ๋ง ก๊อง ติ้ว หว่า-เป๊ย. วั้ว หฒั่น นิ่น อ๊า ลั่ม เต๋ย เถา เยลูซาเลม ฒี่ง, เมี่ยน หล่าย ทิน-ฮู่ง โหฒว เฒี้ยว กุ๊น เมี่ยน เญย เฒี่ยง โห่ เถา อ๊ะ มเปย.

12เยซู ฯฒฯ ก๊อง, “ม่าย เต้า เจียน อ๋อย ธ้วด มี่ง โก เญย กั๊วะ ฒิบ หลี่ง โหฒว ฮู่ง. ฒิบ ลิ์ว นิ่น แอ๋ง หฑวน ต้าย.

13อ๋อย มี่ง วั้ว หฒั่น นิ่น เห่ว นิ่น เญย เหฒียบ เต้า โปว ต้าย, เหยียด เต้า ปุน ติ้ว ญ่าน. นิ่น ก๊อง, ‘ต้อ น้าย เต๋ย ญ่าน มี่ง โหฒว แซง-เอ๋ย เถา เยีย หฑวน.’

14“วั้ว เต้า เจียน เญย แปะ ฝีง ฑอง ไห่ นิ่น ฯฒฯ พ้าย เมี่ยน กัน ฆาง มี่ง ก๊อง, ‘เยีย บัว ไม้ อ๋อย หล่ง น้าย ล่าน เมี่ยน โหฒว เยีย บัว เญย ฮู่ง.’

15“มป่า วั้ว เต้า เจียน ตุ๊ หลี่ง โหฒว ฮู่ง แอ๋ง หฑวน ต้าย อ๊ะ. นิ่น ฯฒฯ เห่ว ต้ง นิ่น ปุน ญ่าน วั้ว เต๋ย โปว, ต้าย หมั่ง ก๋า นิ่น บัว หฒ่อน ตุ๊ บัวะ เหฒีย.

16“ตะเยี้ยด เต้า โปว ต้าย ก๊อง, ‘เฒี้ยว อ้า! เม่ย ปุน เยีย วั้ว ติ้ว ญ่าน เยีย หฒ่อน ตุ๊ เหฒียบ ติ้ว.’

17“เฒี้ยว เตา, ‘หลง อ๊ะ. เม่ย หฒะเก้ง เฮญี้ยว หฒีง เญย โปว. เต๋ย ป๊า ไฝ-ฟิ้ว สี่ เม่ย ฒู้ง โก๋ว ด่ง หน่าย หลง, เยีย ปุน เม่ย กุ๊น เหฒียบ นอม ฒี่ง.’

18“ตะเหญ่ย เต้า โปว ต้าย ก๊อง, ‘เฒี้ยว อ้า! เม่ย ปุน เยีย วั้ว ติ้ว ญ่าน เยีย แอ๋ง หฒ่อน ตุ๊ ปยา ติ้ว.’

19“เฒี้ยว บั๋ว นิ่น, ‘เยีย ปุน เม่ย กุ๊น ปยา นอม ฒี่ง.’

20“แอ๋ง ม่าย เต้า โปว ต้าย ก๊อง, ‘เฒี้ยว อ้า! น้าย! เม่ย ปุน เยีย วั้ว ติ้ว ญ่าน. เยีย หล่ง สิ จ๊าว เปว เจี๊ยน เซียว หลง เญย.

21เยีย กั้ม เหฑีย ไห่ เม่ย. เยีย ฮิ้ว ตุ๊ เม่ย ไม้ เซีย หาย เต้า. ไม้ เฒ์ย เม่ย กั้น เญย กะน้าย เม่ย หย่า เฒาะ. เม่ย กั้น ไม้ หฒุ ด๊อด ชะ หฒวัง มป่า เม่ย หย่า เซียว.’

22“เฒี้ยว ก๊อง บั๋ว นิ่น, ‘เม่ย หว่าย ไห่ เญย โปว อ้า! เยีย หล่ง เม่ย กั้น เญย หว่า ตี่ง เม่ย เญย ฒุ์ย. เม่ย ฮิ้ว ตุ๊ เยีย ไม้ เซีย หาย เต้า? เม่ย หย่า ฮิ้ว ตุ๊ ไม้ เฒ์ย เยีย เญย กะน้าย เยีย หย่า เฒาะ? ไม้ เฒ์ย เยีย ด๊อด ชะ หฒวัง เยีย หย่า เซียว?

23ฮนั้ง หน่าย เม่ย โหฒว หาย หญู่ง ไม้ ต้อ เยีย เญย ญ่าน มี่ง ตั๊บ ญ่าน ลั์ม? เยีย หฑวน ต้าย เยีย ตุ๊ ป๊วน-ฒิ่น หย่า ตุ๊ เต๋ย เหล่ย ฒิ่น เหธา เจี๊ยน นีอา.’

24“เฒี้ยว แอ๋ง บั๋ว โซ้ว กะเฮลน วั้ว เต๋ย เมี่ยน, ‘เฒาะ นิ่น วั้ว ติ้ว ญ่าน ปุน ม่าย เหฒียบ ติ้ว วั้ว เต้า ม่าะ!’

25“วั้ว เต๋ย ก๊อง, ‘เฒี้ยว อ้า! นิ่น ฒู้ง ม่าย เหฒียบ ติ้ว นีอา.’

26“วั้ว เต้า ฮู่ง เตา, ‘เยีย บั๋ว เม่ย บัว, หาย เต้า ม่าย เญย, อ๋อย จา ปุน นิ่น ม่าย เก้า ธั้ม. หาย เต้า ไม้ ม่าย, เลี่ยม นิ่น ม่าย เต๋ย ป๊า, ฒู้ง อ๋อย หฒุ เฒาะ มี่ง.

27มป่า ไม้ อ๋อย เยีย โหฒว ฮู่ง วั้ว เต๋ย วิน-วั้ง ต้อ ต้าย น้าย เยียม เยีย เญย หฑะเฮมียน ไต๋ กวั่ง.’”

28เยซู ก๊อง ลิ์ว น้าย เต๋ย หว่า นิ่น ฯฒฯ มี่ง ด่าง. ไซ-ก๋อ บัว กัน เจี๊ยน มี่ง เยลูซาเลม ฒี่ง.

29มี่ง เถา กะลั้น บง, เล่ย เบดฟายี เหธา เบทานี ล์าง ไม้ โก, นิ่น พ้าย อี เต้า ไซ-ก๋อ มี่ง ด่าง.

30นิ่น ก๊อง บั๋ว นิ่น บัว, “เม่ย บัว มี่ง เถา หฑะเฮมียน แหมง วั้ว นอม ล์าง. เปียะ ล์าง มี่ง ฯฒฯ ปวัด เต้า มาลี ตอน โด้ เจี๊ยน วั้ว, เมี่ยน ไม้ แก้ง เก้ เจี๋ย. ไจ๊ เคน เจี๊ยน ต้าย โอ่.

31สี ก๊อง ม่าย เมี่ยน หน่าย, ‘เม่ย บัว ไจ๊ มาลี ตอน โหฒว หาย หญู่ง?’ อ๋อย หฒุ บั๋ว นิ่น บัว, ‘เฒี้ยว เฉียม หฒุ หล่ง.’”

32นิ่น บัว ฯฒฯ มี่ง ด่าง, ปวัด หญู่งๆ ต๋อย เยซู ก๊อง เญย หว่า.

33นิ่น บัว ไจ๊ มาลี ตอน วั้ว หฒั่น, มาลี เญย เฒี้ยว หน่าย ก๋า, “เม่ย บัว ไจ๊ มาลี ตอน โหฒว หาย หญู่ง?”

34นิ่น บัว เตา, “เฒี้ยว เฉียม หฒุ หล่ง.”

35นิ่น บัว ฯฒฯ เคน มาลี ตอน มี่ง เยซู วั้ว, แอ๋ง เฒาะ กั้น เญย ต้ม ลุย ติ่ม เจี๊ยน, หย่า ป๊า เยซู ฝาว มี่ง เก้ เจี๊ยน มาลี เญย ติ ต์าน.

36เก้ เจี๊ยน มี่ง วั้ว หฒั่น, หฒวัง เมี่ยน เฒาะ นิ่น บัว เญย ต้ม ลุย ติ่ม เจี๊ยน วั้ว เจ๊า.

37เยซู เถา ฟัด เยลูซาเลม ฒี่ง, เหฌี่ย กะลั้น บง วั้ว หฒั่น, หฒวัง ไซ-ก๋อ ฯฒฯ ล่ม ฑ่อย เฌียน-โย่ว เญย หล่ง เฉีย โฮล เญย เธง ทิน-ฮู่ง เหว่ย นิ่น บัว ปวัด เจี๋ย เหยียด ฒู้ง บัวะ ฮ่อง ไห่ เญย สี่. นิ่น บัว ฯฒฯ เห่ว,

38“โท้ ทิน-ฮู่ง เหธย ฟุ เต๊ง เฒี้ยว เญย บั๋ว ต้าย น้าย เต้า ฮู่ง. ทิน-ต้อง ม่าย แป้ง ออน. เยียม ฮลัง เจี๋ย เญย ต๋อง ม่าย ฌัง-หล่าง.”

39เยียม วั้ว ม่าย เต๋ย ฟาลิสี เมี่ยน ก๊อง บั๋ว เยซู, “ฟิน-แซง อ้า! หัด เม่ย เญย ไซ-ก๋อ บัว เซ้ก ม่าะ!”

40เยซู เตา, “เยีย บั๋ว เม่ย บัว, สี ก๊อง นิ่น บัว ไม้ โค โล, หละเปย๊ย ฒู้ง อ๋อย หฒุ เห่ว เจี์ย ต้าย.”

41เยซู มี่ง อ๊า ลั่ม เถา เยลูซาเลม ฒี่ง. หมั่ง ปวัด ฒี่ง นิ่น ฯฒฯ เหว่ย วั้ว นอม ฒี่ง เญี้ยม.

42นิ่น หย่า ก๊อง, “เฝย ตุ๊ อี้ ฮนอย เม่ย ฮิ้ว ตุ๊ หาย หญู่ง ไฮ่ ปุน เม่ย ม่าย แป้ง ออน. มป่า อี้ หฒั่น น้าย เต๋ย สี่ เกม เจี๊ยน, เม่ย เญย มฒีง หมั่ง ไม้ ปวัด.

43เฒี่ยง โห่ อ๋อย เถา, เม่ย เญย วิน-วั้ง อ๋อย เว้ด เนีย-ดุย ฮวีง ก๋อม เม่ย. นิ่น บัว อ๋อย เหว่ย เจี๊ยน เปยย ปูง ขวน เจี๊ยน เม่ย.

44เลี่ยม เม่ย กั้น เหธา เยียม เม่ย เญย ฒี่ง หลาด กะญั์ว เญย เมี่ยน เหยียด ฒู้ง นิ่น บัว อ๋อย เหมียด เหฑ่ง, ไม้ เลี่ยว เหยียด คว้าย หละเปย๊ย ลับ เจี๊ยน, เหว่ย หฒุ เม่ย เฒียะ ไม้ ตุ๊ ทิน-ฮู่ง ต้าย เหฌียว เม่ย เญย เฒี่ยง โห่.”

45เยซู เปียะ หฒั่ง ทิน-ฮู่ง เญย เปย๊า มี่ง ฯฒฯ หฒุ่น ม์าย หม่าย เญย เมี่ยน ธ้วด มี่ง,

46หย่า บั๋ว นิ่น บัว, “กีง-โซว เฟี้ย เจี๊ยน ก๊อง, ‘เยีย เญย เปย๊า อ๋อย หฒุ โหฒว เต๋า เก๋า เญย เปย๊า,’ มป่า เม่ย บัว หล่ง โหฒว ‘จั๋น-หฒะ ปี๋ง เญย ค้วด.’”

47เยซู ฮนอยๆ เยียม วั้ว หฒั่ง ทิน-ฮู่ง เญย เปย๊า หฌาว เมี่ยน. ไซ เมี่ยน เปย๊ย เหธา หฌาว เล์ย เญย ฟิน-แซง เหธา กุ๊น แปะ ฝีง เญย เปย๊ย อ๋อย ไต๋ เยซู,

48มป่า นิ่น บัว ล์อ ไม้ ตุ๊ ฉัง เหว่ย หฒุ หฒวัง เมี่ยน อะเฮน้ย หมวัง เยซู หฌาว, หย่า ไม้ อ๋อย ปู๋ง ด๊อด เหยียด โจ๋ว นิ่น เญย หว่า.

← Chapter 18 Jump to: Chapter 20 →