Ecclesiastes 11

Kamba (Mbivilia) 1956

← Chapter 10 Jump to: Chapter 12 →

1Ĩkya kĩmũtũ kyaku ĩũlũ wa manzĩ; nũndũ ũkakyona ĩtina wa mĩthenya mingĩ.

2Nenga andũ mũonza kĩlungu, ĩĩ, o na nyanya; nũndũ ndwĩsĩ ũthũku ũla ũkethĩwa ĩũlũ wa nthĩ.

3Ethĩwa mathweo nĩmausũĩtwe nĩ mbua, nĩmekwonosya manzĩ mamo ĩũlũ wa nthĩ; na ethĩwa mũtĩ nũũvalũka kwelekela ngalĩ ya ĩtheo, kana kwelekela ngalĩ ya ĩũlũ, vandũ, vala mũtĩ wĩvalũka, vu novo ũkethĩwa.

4Ũla ũsiasya kĩseve ndakavuĩa; na ũla ũsiasya mathweo ndakaketha.

5O ũndũ ũtesĩ nzĩa ya kĩseve, kana ũndũ mavĩndĩ meanaa ĩvunĩ ya ũla mũito; o ta ũu ndwĩsĩ wĩa wa Ngai ũla wĩkaa maũndũ onthe.

6Kĩoko vuĩa mbeũ syaku, na wĩoo ndũkasiĩĩe kw’oko kwaku; nũndũ ndwĩsĩ ila ikaĩla, ethĩwa nĩ ii kana iya, kana ethĩwa syelĩ ikeethĩwa nzeo ũndũ ũmwe.

7Nĩ w’o kyeni kĩ mũyo, na kũsisya syũa nĩkwendeeasya metho.

8Ĩĩ, ethĩwa mũndũ akekala thayũ myaka mingĩ, natane nthĩnĩ wayo yonthe; ĩndĩ nalilikane mĩthenya ya kĩvindu, nũndũ ĩkeethĩwa mingĩ. Kyonthe kĩla kyũkaa nĩ mana.

9Tana, we mwanake, wananĩ waku, na ngoo yaku ĩkũtan’ye mĩthenya ya wana waku, na kinya nzĩanĩ sya ngoo yaku, na kwonanĩ kwa metho maku; ĩndĩ manya we, Ngai akakũete ũsilĩlonĩ ũndũ wa maũndũ asu onthe.

10Kwondũ wa ũu veta woo ngoonĩ yaku, na ĩkya kũasa ũthũku kuma mwĩĩnĩ waku; nũndũ wana na ũika wa thayũ nĩ mana.

← Chapter 10 Jump to: Chapter 12 →