Ecclesiastes 6

Kamba (Mbivilia) 1956

← Chapter 5 Jump to: Chapter 7 →

1Ve ũthũku ũla nonete ĩtheo wa syũa, na nĩ mũito ĩũlũ wa andũ:

2mũndũ ũla Ngai ũmũnengae ũthwii, na syĩndũ mbingĩ, na ndaĩa, na kwondũ wa ũu vati kĩndũ kĩoleku kya kyonthe kĩla ũnũkwenda ũndũ wa thayũ wake, ĩndĩ Ngai ndamũnengaa ũtonyĩ wa kwiĩsaa, ĩndĩ mũeni nĩwiĩsaa; ũu nĩ mana, na nĩ ũwau mũthũku.

3Ethĩwa mũndũ akasyaa syana ĩana, na kwĩkala thayũ myaka mingĩ, ũkethĩa mĩthenya ya myaka yake nĩ mingĩ, ĩndĩ thayũ wake ndusĩe ũseo, o na nde na athiki; nĩasya, kĩvuno kĩvune nĩ kavaa kwĩ we;

4nũndũ nĩkyũkaa kya mana, na nĩkĩendaa kĩvindunĩ, na syĩtwa yakyo nĩyĩvw’ĩkĩtwe nĩ kĩvindu;

5o na ĩngĩ kityaona syũa kana ũyĩmanya; kyu kĩ na ũthũmũo kũte ũla ũngĩ:

6ĩĩ, o na kethĩwa akekala thayũ myaka ngili kũndũ, kwĩlĩ, na ndatanĩaa ũseo o na wĩva, onthe matiendaa vandũ vamwe?

7Wĩa w’onthe wa mũndũ nĩ kwondũ wa kanyw’a wake, ĩndĩ nzaa yake ndĩvũnaw’a.

8Nũndũ ũla mũĩ akĩlĩtye ndia na kyaũ? Kana ũla ngya e na kyaũ, ũla wĩsĩ ũndũ waĩle kũendaa mbee wa ala me thayũ?

9Kwona kwa metho kwĩ kavaa kwĩ kwanganga na wendi; o na ũu nĩ mana na ta kũsemban’ya na kĩseve.

10O kĩla kyaĩ kw’o, kyanengiwe syĩtwa tene mũno; na nĩkũmanyĩkĩte atĩ nĩ mũndũ; o na ndatonya kũkĩlan’ya vinya na ũla wĩ ũtonyi kwĩ we.

11Nĩkwĩthĩwa kwĩ syĩndũ nyingĩ ila singĩvasya maũndũ ma mana, mũndũ ũunĩkĩte na kyaũ?

12Nũndũ nũũ ũla wĩsĩ ũla ũseo kwa mũndũ thayũnĩ wake, mĩthenya yonthe ya thayũ wake wa mana ũla wanangaa ta muunyĩ? Nũndũ nũũ ũla ũtonya kũtavya mũndũ ũndũ ũkethĩwa ĩtina wake ĩtheo wa syũa?

← Chapter 5 Jump to: Chapter 7 →