Ecclesiastes 4

Kamba (Mbivilia) 1956

← Chapter 3 Jump to: Chapter 5 →

1Na ĩndĩ nasyoka na noona mathĩna onthe ala mekawa ĩtheo wa syũa: na, sisya, methoi ma ala mathĩnaw’a, na matyaĩ na mũkiakisya; na ngalĩ ĩla ya athĩn’ya moo kwaĩ vinya; ĩndĩ matyaĩ na mũkiakisya.

2Kwondũ wa ũu nataĩa ala akw’ũ ala makwie tene kwĩ ala me thayũ kũvika yu;

3ĩĩ, na mbee wa asu nĩmũtaĩa ũla ũtanamba kwĩthĩwa, ũla ũtaona wĩa mũthũku ũla wĩkawa ĩtheo wa syũa.

4Nĩvo ĩndĩ noonie wĩa w’onthe na kĩla wĩa wĩ na ũtũĩka, kana kwondũ waw’o mũndũ nũnũkwĩw’ĩwa kĩwĩũ nĩ mũtũi wake. Ũu naw’o nĩ wa mana na ta kũsemban’ya na kĩseve.

5Ndia nĩkwatanasya syaa syayo, na kũya nyama sya mwĩĩ wayo mwene.

6Ũvĩ ũmwe wusĩe, vamwe na ũuu, wĩ kavaa kwĩ mbĩ ilĩ susĩe wĩa na kũsemban’ya na kĩseve.

7Nĩvo ĩndĩ nasyokie na noona no mana ĩtheo wa syũa.

8Kwĩ ũmwe ũla wĩ weka, na nde na ũngĩ wa kelĩ; ĩĩ, nde na mwana kana mwana‐a‐ĩthe; ĩndĩ kũti mũminũkĩlyo wa wĩa wake w’onthe, o na metho make matikolaa ũthwii. Ekũlya, Nĩtethasya wĩa kwondũ waũ, na kũima ngoo yakwa ũseo? O na ũu nĩ ũndũ wa mana, ĩĩ, nĩ thĩna mũnene.

9Elĩ me kavaa kwĩ ũmwe, nũndũ me na ĩtuvi ĩseo ũndũ wa wĩa woo.

10Nũndũ ethĩwa makavalũka, ũmwe akookĩlya mũtindan’ya wake; ĩndĩ woo nĩ wa ũla yĩla wĩ weka ũnũũvalũka, na nde na ũngĩ wa kũmũkĩlya.

11Na ĩngĩ, ethĩwa elĩ makomaa vamwe, nĩvo ĩndĩ me na muutĩa; ĩndĩ ũmwe atonya ata kwĩthĩwa na muutĩa?

12Na ethĩwa mũndũ akakĩlya vĩnya ũla wi weka, elĩ makamũsiĩĩa; ũlii mũvĩnde na ndii itatũ ndũtw’ĩkaa mĩtũkĩ.

13Kavaa kĩmwana kĩkya na kyũĩ kwĩ mũsumbĩ mũkũũ na mũtumanu, ũla ũtesĩ nzĩa ya kwosa ũtao ĩngĩ.

14Nũndũ nĩwaumie kolokolonĩ atw’ĩke mũsumbĩ; ĩĩ, o na ũsumbĩnĩ wake asyaiwe e ngya.

15Nĩnoonie onthe me thayũ ala makinyaa ĩtheo wa syũa, atĩ maĩ vamwe na kĩmwana, kĩla kya kelĩ, kĩla kyaũngamĩe vandũ vake.

16Kũtyaĩ mũmĩnũkĩlyo wa andũ onthe, o asu onthe ala waĩ ĩũlũ woo: ĩndĩ ala makooka ĩtina matikamũtanĩa. Vate ndĩĩ o na ũu naw’o nĩ mana na ta kũsemban’ya na kĩseve.

← Chapter 3 Jump to: Chapter 5 →