Ecclesiastes 12

Kamba (Mbivilia) 1956

← Chapter 11 Jump to:

1O na lilikana Mũmbi waku mĩthenya ya wana waku mĩthenya mĩthũku ĩtanamba kũka, na myaka ĩthengeea, yĩla ũkasya, Ndi na ũtanu nthĩnĩ wayo;

2syũa, na kyeni na mwei, na ndata itanamba kũya kĩvindu, na mathweo kũsyoka ĩtina wa mbua;

3mũthenya ũla asũvĩi ma nyũmba makatetema, na andũ me vinya makekunamya, na ala mathiaa maieka nũndũ nĩ avũthũ, na ala mesyaĩlya mbũthinĩ makethĩwa na kĩvindu,

4na mĩomo ĩkavĩngwa nzĩanĩ nene; yĩla wasya wa kũthia wĩnyiva, na ũmwe akookĩlw’a nĩ wasya wa nyũnyi, na eĩtu onthe ma kwina makatheew’a vyũ;

5ĩĩ, makakĩa kĩla kĩ ĩũlũ, na motĩsyo makeethĩwa nzĩanĩ; na mũtĩ wa mũlosi ũkalaũka, na kĩtoolĩ kĩkeethĩwa mũio, na kĩla kĩkwendwa kĩkaa; nũndũ mũndũ nũendaa mũsyĩ wake wa tene na tene, na ala mametaa nĩmangangaa nzĩanĩ nene:

6ũlii wa vetha ũtanamba kũthaw’a, kana mbakũli ya thaavu kũawa, kana kĩtete kũaĩwa nthongonĩ, kana ndĩa kũtw’ĩkĩa kĩthimanĩ,

7na kĩtoo kĩisyoka nthĩ o ũndũ kyailyĩ, na veva kũsyoka kwa Ngai ũla wonenganie.

8No mana, mana vyũ, easya ũu Mũtavan’ya, onthe nĩ mana.

9Na ũndũ ũngĩ, nĩkwĩthĩwa Mũtavan’ya aĩ mũĩ, aendeea na kũmanyĩsya andũ ũmanyi; ĩĩ, nĩwasũanĩaa, na kũmantha, na kwaĩĩa nthimo nyingĩ.

10Mũtavan’ya nĩwatatie kwona ndeto syĩ mũyo, na ũvoo ũla ũandĩkĩtwe ũlũngalunĩ, o ndeto sya w’o.

11Ndeto sya ũla mũĩ iilyĩ ta mĩsenge; na ndeto sya anene ala mombanasya, ila syumaw’a nĩ mũĩthi ũmwe no ta mĩsumaa ĩathĩĩtwe.

12Na mbee wa ũu, mwana wakwa, taĩka; kũti mũminũkĩlyo wa kũseũvya mavuku maingĩ; na kwĩmanyĩsya mũno nĩ mĩnoo ya mwĩĩ.

13Ũũ nĩw’o mũminũkĩlyo wa ũvoo; w’onthe nĩwĩw’ĩkĩte: Kĩa Ngai, na kwata mĩao yake; nũndũ ũu nĩw’o ũndũ w’onthe waĩlĩte kwĩkawa nĩ mũndũ.

14Nũndũ Ngaĩ akaete kĩla wĩa ũsilĩlonĩ, vamwe na kĩla ũndũ ũvithĩtwe, ethĩwa nĩ ũseo kana ethĩwa nĩ ũthũku.

← Chapter 11 Jump to: